تفتكروا ليه حصل كده ؟!

غش رغم أنشغالي النفسي و المادي ..بس لما رشا قالتلي علي موضوع أول يوم العيد و اللي حصل فيه ..مش عارف أوصف اللي انا كنت فيه او اللي أنا فعلا عايشه وحاسه دلوقتي
واحد زيي أصلا مش بيروح الجامعة لأنه مش فاضي ومخنوق بس الموضوع ده مش ممكن اتجاهله ..
ولو حبيتوا تاخدوا فكرة عن اللي حصل فشوفوا اللينك ده
http://www.khayalworld.com/viewtopic.php?p=20473#20473

بصراحة مش عارف ابدأ ازاي ..

بس ممكن برضه تشوفوا مدونة الأخت شمس http://shamseddeen.blogspot.com/ وتعقيبها علي الموضوع خصوصا أنها حاطة لينكات لناس تابعت الموضوع

هحاول بقي أرتب أفكاري ..

1_الحكومة بتتكلم عن السياحة المزدهرة ...شفت منها في شرم لما رحت أشتغل هناك دعارة مزدهرة أكتر من أي شئ تاني وأسف في اللفظ بس دول تجاوزا حدود الفعل الفاضح ..وده بينطبق علي الأجانب و المصريين ولاد البطة البيضا ..او ولاد الحرامية ..او أصحاب الدماء الزرقاء الباردة .. والحكومة بتتكلم عن فرص العمل و الأسكان و البنية التحتية و الأسعار الممتازة و النمو الأقتصادي العالي جداٌ وانجازات الريس

مش قصدي بالحكومة حد معين ..قصدي كل كلاب الريس اللي بتتحط في أي مكان و أي وقت عشان تقول سمعا وطاعة يا مولاي

2_الصحف اللي بيملكها الشعب محبتش تعكر عليه وتفور دمه وتعرفه بالموضوع ده ..اضعف الأيمان الأسر تمنع بناتها من أنها تروح وسط البلد عشان يحافظوا علي اخر ذرة كرامة في حياتهم ..لكن انا رأيي أن الصحف المسماة بالقومية واللي 90% من صفحاتها متنفعش أكتر من ورق نمسح بيه أي حاجة .. معملتش كده عشان الموضوع ميطلعش بره أو ميأذيش حركة الدعارة المسماة مجازاً بالسياحة ...او يمكن عشان ميزعجوش السادة السفرا الأمريكي و الأسرائيلي و البريطاني و يخلوهم يتفسحوا براحتهم ..الله اعلم بس اثبتت صحفنا الكومية أنها فعلا مملوكة للشعب ومعمولة عشان تكدب عليه أو عشان تعيشه في جهل مش أكتر

3_الناس دي بتعمل كده ليه ...هتكلم بصفتي شاب وهتخيل نفسي رايح أعمل حاجة زي كده ..اكيد مش هكون في وعيي ..طب مغيبات الوعي ايه ..يا اما مكيفات .من البرشام مرورا بالحشيش لحد الأكستازي واللي مش عارفة حكومتنا الرشيدة النظيفة القوية الأنيقة النزيهة الشفافة أنها تمنع دخولها مصر بل بالعكس دول بيدخلوا تجار المخدرات لمجلس الشعب بالتزوير أو بيدخلوا شركائهم عشان يحموهم و يتفرغوا ..الشرطة .لخدمة الشعب بسحله في المظاهرات وبهدلته عشان مش معاه بطاقة

يا اما مشاكل وضغوط نفسية معنديش بيها دراية علمية كبيرة لكن أعتقد أن بصفتي مجرب ممكن أوصف ..

لما الواحد يكون مولود بعقل والعقل ده تلت تكوينه الأدمي و المحرك الرئيسي ليه ..والعقل ده علي مر السنين الدراسية بيندفن بالحيا وبيعملوله عمليات تفريغ فمش بيقدر يفكر بعد ما يوصل لسن المراهقة الا في الكورة ..اللي منعونا نلعبها و لغوا كل المساحات الخضرا اللي في المدن الكبيرة والمدارس باستثناء أندية أولاد الذوات ..

أو في الدين عن طريق الجوامع و كده وده للأسف موضوع مش متنظم صح و مخوفين الناس منه و اللي بيصلي بأنتظام مصيره المعتقل عاجلاً أم أجلاً

أو في الجنس ..بالمصطلحات العامية ..حريم ومزز ..إلخ ..وده بقي متوفر وبشدة وبيشجعوا عليه كمان بمسلسلاتهم اللي البنت بتلبس فيها المشهيات بره البيت و تيجي في البيت تلبسلي لبس شبه محترم لو لبسته بره عداد ذنوبها هيخس التلتين ..مسلسلاتهم اللي فيها الحبيبة ممكن يتقابلوا في أي حتة و يقولوا أي حاجة ويتجوزوا ببساطة تحرق دم كام مليون شاب و شابة مش لاقيين عش عصافير يلمهم

وكمان المواقع الأباحية ..الأستخدام الأوسع للكمبيوتر وهدية الغرب و الصهاينة لمجتمعاتنا المثالية عشان يكملوا الصورة الوردية ..مواقع سهلة جدا و انا من شغلي بقول ان اي طفل ممكن يحفظها و يشتغل عليها زي الحصان

فلما الشباب يشوفوا كده ويشوفوهم في شرم ومارينا و أي حتة هاي كلاس كل واحد ابن دادي ومامي حاطط ايده في وسط واحدة بنت دادي ومامي ..متعبوش في دنيتهم عشر اللي بيتعبه شاب خد دكتوراه ومش لاقي شغلانة توفرله عيشة كريمة من ابسط معطياتها أنه يتجوز زي ما الناس بتتجوز ..ومع كده بيكونوا مبسوطين خالص وواخدين راحتهم

يعني الخلاصة ...ناس منعوهم انهم يعرفوا دينهم ..ووفرولهم مغيبات العقل ..وخلوا الأسر المصرية همها الأول لقمة العيش ليس الا فبالتالي مفيش وقت للتربية ومفيش طاقة يستحملوا بيها واحد مكافح عايز ياخد بنتهم اللي بتكون غالباً مشبعة بفكر القصور والعربيات والشقق اللي علي النيل ومش عايزة تتعب في حاجة ..ناس ادامها كله بيعمل و شقق الدعارة معروفة غالبا في الأحياء الراقية وغير الراقية ..وناس شايفة الكباريه المسمي مجازاً بالكازينو بتاخد تراخيصها هوا في حين أن اللي عايز يعمل محل بلاي ستيشن محتاجله الشئ الفلاني عشان يرخص وده مش متوفرله ..

عايزين شباب مسطولة ومخنوقة ومكبوتة تعمل ايه ...و ايه !!

في غياب عنصري الأمن و الأمان اللي بيتشدق بيهم ريسنا الجميل السكرة في كل خطبه

يعني لا تربية ولا تعليم ولا شغل بيحترم البني ادم وبيديله حق تعبه ..انا مثلا ممكن معملش اكتر من 300 جنيه مع أني بشتغل 14 ساعة يوميا اللي بره في أوربا بيشتغلوهم في يومين ..ولا تكافل اجتماعي ومحدش طايق حد واللي ممعاهوش ميلزموش .. ولا كمان في ردع وعقاب للي يعمل كده ..هو في ردع للحرامية الكبار لما هيكون في ردع لدول ؟!

يبقي اللي حصل ده منطقي علي الأقل من منظور واحد عقله فاضي ملحوش مغيب ومليان كلاكيع نفسية زرعها جواه مجتمعه من أول الرئيس الحكيم لحد أصغر مدرس ألعاب في مدرسة ابتدائي

4_ اما بقي ...ازاي الشباب دي تعمل كده ..فأنا هتكلم ليهم ..رغم تيقني ان الناس دي مش هتفتح الجهاز عشان تشوف مدونة بني ادم زيه زيهم ..ممكن يشوفوا مدونة اباحية ولا حاجة بس الحق مش عليهم ..لكن هعمل اللي عليا

لما ميكونش عندك ارادة تحارب بيها كل ده عايز ربنا يساعدك ويوفقك ازاي ؟ لما تستسلم وتقتل ضميرك لأنك مرتاح كده عايز مصيرك يبقي ايه غير جهنم وبأس المصير ؟ لما دمك يفور لو حد عاكس اختك لكن أنت تستحل لنفسك اللي انت عايزه مع أخت غيرك و تستخدم نفس قوانين الغابة اللي بيستخدمها بوش في العالم ومبارك في مصر ..الكيل بمكيالين و القوة هي اللغة الأولي والأخيرة ؟

ليه منحاولش نطلع الجزء النضيف اللي جوانا ..ربنا مخلقش حد وحش ..الدنيا بتخلينا وحشين بس برضه فيها حاجات _علي قلتها _ ممكن تخلينا حلوين و ناس محترمة نفسها وغيرها ..ليه مش ندور علي الحاجات دي ؟!

5_ نوعية البنات دي أصلا بتبقي ايه ؟ ..يعني البنت اللي بتستثير الشاب وتكون ماشية في الشارع مبسوطة وهو ماسك نفسه لأي سببٍ كان لحد ما فاض بيه ...يا اما بنت أهلها عايزين يتباهوا بجمالها فيلبسوها وهي زي الهابلة اللي مسكوها طبلة ممكن متكونش عارفة أصلا الشاب بيبص علي جسمها ليه وتبقي مبسوطة وخلاص ..أو بنت بتحب تبقي دلوعة ومميزة فبتظهر جمالها وتعوض بيه عقد النقص اللي جواها ...أو بنت بتقلد الغرب في لبسهم بس لكن مش تقلدهم في أي حاجة تانية عدلة رغم أن الغرب يوم ما قلدنا قلدنا في علمنا مش في لبسنا ومش في أحدث انظمة تربية الجواري ..أو بنت بتقلد صاحباتها وبتقول ما هم يا ماما لابسين كده ..أو بنت أهلها رافعين الأريال وأخلاقهم زي الزفت فغالبا ما بتعلن تمردها عليهم بأنها توصل لأقصي درجات الأنحلال و إذا كان رب البيت بالدف ضاربٌ ..أو بنت لا بيها ولا عليها و بتجيب اللبس لأنه جميل وبتعمل المستحيل عشان تقنع أهلها اللي بيكونوا مش متفرغين نفسيا وبيجيبوا أخرهم معاها فبيتعاملوا بقسوة وحدة زيادة بتخليها تعند أو بتسيب زيادة بتخليها تنفتح أكتر ..أو بنت معلش في اللفظ واطية واطية واطية ودي بقي البيئة بتشكلها من عوامل كتير ممكن نتكلم فيها في موضوع تاني بس برضه الحق مش عليها وأصلا مهما كانت مستفزة في لبسها أو تصرفاتها انا شايف أنه خسارة الواحد ياخد فيها ذنب لأنها بتكون وصلت لمرحلة أرخص من أنها يتبصلها أصلاً بس بتمثل دور بيغطي علي كده ..أو _وده اللي حرق دمي أكتر وأكتر _ بنت لابسة محترمة جدا وعارفة مسئولية أنها شرفها أغلي من شرف الراجل و أنها هتبقي أم و هيبقالها قيمة كبيرة ربنا خلقها عشانها فبتحافظ علي نفسها وتصرفاتها بالعقل مش بتشدد ومش عارف ازاي ابص لواحدة منقبة أصلاً ..تعمل ايه عشان تبعد عينك عنها ؟ تنتحر ولا تحبس نفسها ؟ _ أو بقي بنت بتحاول بتكون محترمة وكويسة بس غصب عنها من غير ما تحس بتلفت الأنتباه سواء بضحكة أو بلبس أو بحركة أو بكلمة ..

عايز بقي أي واحد من اللي كانوا في وسط البلد دول يجيبلي نموذج لواحدة من اللي اعتدوا عليهم يكون خارج النطاق ده .عايزه يقنعني أن نص البنات دول بجد مش فاهمين أنهم مستفزين لشهواته و أنهم مهما كان لسه فيهم برائة وحياء بس الظروف اللي حواليهم هيا اللي حطتهم في خانة غلط ..عايزه يقولي ليه لما بنت لابسة كويس وعايشة حياتها باحترامها افكر مجرد تفكير أني ابصلها مش ألمسها ..عايزه يقنعني ازاي اروح لواحدة تقريباً مصيرها جهنم وأروح أخد منها متعة سريعة عشان اشاركها نفس الطريق ؟

انا بجد بدأت أخرج عن التركيز بس عايز أحكي حاجة قبل ما أخلص

ايام الأستفتاء علي تعديل الدستور عشان يعرفوا يورثوا العزبة لجيمي ..كنت في قهوة ..كافيتريا ..ولقيت واحد بيقول مين عايز ياخد عشرين جنيه في شغل 5 ساعات ..فكنت انا الوحيد اللي رحتله بس صاحبي قعدني وقاللي ده حزب وطني وعايز الناس تروح تصوت باين ..فأنا مقبلتش الموضوع علي نفسي بس رحت للراجل وقلتله انت طلباتك فيه ايه ..قاللي انت مش نافع وعايزين واحد فيه صحة وشكله يخوف و انت شكلك غلبان فرحت جبتله واحد أعرفه كان محتاج فلوس ضروري و روحت البيت ونسيت المسألة .

يومها كان الثلاثاء 24 مايو ..تاني يوم بليل مقابل الواد لقيته أول مشافني مشي بعيد ..جريت وراه _رغم اننا مش اصحاب أوي _ وسألته فيه ايه فوقف في ركن مضلم كده وعيط وقاللي انت السبب .وبعد ما هدي طلع أنه كان واحد من اللي اتحرشوا بالبنات في عبد الخالق ثروت ..بيقولي وزعوا عليهم سجاير بانجو وحشيش بس علي حد قوله كانت مختلفة عن أي سيجارة شربها ..وأول معملوا دماغهم ..مجرد ما واحد سخنهم ..مراحش معاهم ..جريوا زي الكلاب علي البنات وفي دماغهم ان دول ....عاهرات مش أكتر جايين يمتعوا جنابهم ..المهم الولد لما رجع وفاق فضل يفكر و قال باللفظ ..انا مستفيد ايه من اللمسة ولا المسكة دي وايه الخبرة اللي حصلت ؟ و هعمل ايه لو أختي كده ..هو فلسطيني و ساب مصر خلاص بعد نوبة تدين اقتنع انها بلد بنت ستين في سبعين ودلوقتي هو في السعودية علي ما أعتقد ..وفضل يربط الأمور ببعضها لحد ما وصل أنه بقي اسوأ من الصهاينة لأنه طول ال 15 سنة اللي عاشهم في نابلس مشافش الا حالة تحرش واحدة ببنت فلسطينية و الجندي كان مخمور ...

يعني هو غلب الخنازير لما عمل كده و اللي معندهمش أي مانع غير أنهم مهمتهم عسكرية مش حيوانية ...مهمتهم يقتلوا الجسد مش الروح

في النهاية انا عايز أقول ...لكل أب وأم انهم يربوا ولادهم كويس لأن الأبن اللي هيفسد اصلاحه صعب ومتوقف علي رحمة ربنا ودي منقدرش نتحكم في وقتها ..تيجي وقت ما ربنا يريد وممكن الأهل ميستحملوش ويسلموا أمر الأبن أو البنت لربنا

عايز أقول برضه أنهم لازم ياخدوا بالهم من عملية تفريغ العقول اللي بتحصل بشكل منهجي لولادهم من أول الحضانة و مروراً بالتلفزيون و السينما

عايز أقول لكل حد حاسس أنه قريب من ربنا يدعي كتير

يدعي أن ربنا يهدي المسلمين ..

ربنا يستر علينا

سكاكين

سكاكـين بـاردة بتقـطع من جوايا ..

هو أنا بموت و لا ايه الحكاية؟! ..

ولا بيموت أجمل احساس في رواية ..

احساسي بيها حتي وهيا مش معايا ..

ااه يا خوفي لتكون هي دي النهاية ..

نهاية أجمل احسـاس عاش جوايـا ..

21 days passed

امبارح بقوا واحد وعشرين يوم

كل يوم أطول من اللي بعده

وأصعب من القلق والجهل بأحوالها أني مفتقدها أوي ..هتجنن

نفسي أنام زي أهل الكهف كده وأصحي لما تيجي ..بس لو جات وعرفت هتزعل مني أوي

والنهارده صديقة مشتركة لينا كانت هتكمل عليا بس ربنا ما أرادش أني أموت دلوقتي ..

معتقدة أني لما مقلتلهاش ميعاد سفر راوان كنت متعمد أني أتجاهلها ومتعمد أني أفوت عليها فرصة تحميس راوان

نسمة مش مقتنعة ليه أني مشفتكيش وقتها اونلاين وأن راوان مكانتش عيزاني اعمل كده بنفسي لأني بقلق الناس وبوترهم ؟

مش مقتنعة أني مكنتش مركز ومقدرش أرفع سماعة التليفون وأقولها ومقدرتش اكتب ميل ومفكرتش في كده ..مكانش نسيان

انا بحبك زي أختي ومحدش بينسي أهله ولا أقرب اصدقائه ..بس في لحظات الواحد مبيقدرش يفكر فيها غير في حد واحد بس

وأنا فكرت فيها هيا

انا أسف ..و لو أنتي شايفة أنك مجرد حد بعمل معاه شات فأنتي غلط ..

من الأيام الأصعب في حياتي ..انتظار حد بحبه أوي كده وجهلي باخباره كمان

يا ربت تتفهم

ويارب ترجع بالسلامة ويا رب صبرني وقدرني أني اعيش لحد مترجع بالسلامة

افتقادي ليها بيحرق في أعصابي ...ببطء مؤلم ..زي النار في الحديد كده ..

كل سنة وأنتي أطيب يا راوان _ولو أن مفيش أطيب من كده بس أنا متوقع أني هلاقي عندك كل حاجة _ويا رب تكوني بتعملي حاجة تبسطك ..وتيجي تحكيلي

هو اللي راح مبيرجعش ؟!

مفيش سبب محدد أكتب عنك النهارده يا محمد ..بس الواحد ميضمنش يعيش لحد أمتي
في يوم زي ده من سنة و شهرين شفتك لأول مرة
ضحكتك بصوت عالي و ذوقك في التعامل خلوني أجي السايبر أكتر من مرة كزبون رغم أنه _حتي و انا شغال فيه دلوقتي _ سايبر نص لبة علي رأيك .
عوضتني في الفترة دي عن حاجات كتير مكنتش لاقيها ..صراحتك كصديق و كأخ..خبرتك _رغم صغر سنك بالنسبة لي _ في حاجات أنا مكنتش بعتبرها مهمة ..و تطوعك بخدمتي في حاجات كنت بتكسف فيها أوي ..وكمان الصورة الوردية اللي رسمتها عني للناس والكلام اللي مكنتش أتخيل أن حد يقوله عني لولاك أنت و طبعاً بمشيئة ربنا .
كنت جاي منقول لحي جديد ..خبرتي عنه قبل كده أنه مش مكان أعيش فيه ومكنتش بحب أمشي فيه أصلاً
وفعلاً لحد دلوقتي أغلب الناس هنا زي منتا كنت بتقول بالضبط ...غجر بس اتعودت و ادينا مستحملين ..
أنت من أهم أسباب أني اشتغلت في السايبر اللي أنا بكتب منه دلوقتي ده _بعد ما كنت خالي شغل ومش طايق الدراسة_ ومن أهم اسباب أني بستحمل أي حاجة فيه عشان كلامك معايا وتشجيعك ليا ولحد دلوقتي كلامك هو الدافع الرئيسي لأستمراري هنا .
تعرف ..أخويا اللي هو عايش معايا في البيت مكانش بيلجألي زي ما كنت بتيجي أنت ومكانش صريح معايا بنفس صراحتك معايا

وحشاني كل حاجة كنا بنعملها ..واحشني سباقات العربيات اللي كنت بتكسبني فيها بكل بساطة ..ماتشات الكورة اللي أكون كاسبك فيها 9 ولا 10 و تقول للناس أن أنت الفرقة الكسبانة ..حتي تصرفاتك اللي كنت بنتقدها وحشاني أوي ..

تعرف ؟..الكلام ده كان نفسي أقوله ليك قبل ما تروح أسكندرية ..اقولك أنا متشكر علي كل اللي عملته معايا و أقولك انك كنت أخ و صديق ملوش زي مهما عملت وغلطت في حقي ..كنت عايز أعتذرلك عن كام حاجة كده ..

مش هنسي تعليقك لما شفتني وأنا بشوف صورة راوان ..بتقولي أنت ناوي تتجوز ملاك..ساعتها أنا ضحكت و شلتها ومكنتش متخيل أنك فعلاً صح و أنها أقرب للملائكية ..بقالها 16 يوم معرفش عنها حاجة يا محمد ..لو تعرف أنت تعرفلي عنها حاجة و تيجيلي في المنام زي ما جيت قبل كده ..

لحد دلوقتي مش متخيل أزاي سبتك تروح اسكندرية من غير ما أقولك لأ ...عارف أنك مجنون وهتنزل البحر ..وعارف أنك مبتعرفش تعوم..بس وجود صاحبك معاك خلاني أأجل المناقشة يومها لأني كنت تعبان ...ومكملتش المناقشة تاني ..قضاء ربنا ولا أعتراض عليه..نفسي تكون شايف الكلام ده ..نفسي تعرف أني مقصر في حقك و مش بدعيلك كتير ..بس والله أول ما هقدر هعمل حاجة تعوض جزء بسيط من جمايلك عليا ..بإذن الله .

الناس اللي كانت بتعيط يومها و اليومين اللي بعدها كانوا بيمثلوا أو كان انفعال مؤقت..بس والله وربنا شاهد .. انا رغم أني كنت بهديهم وماسك نفسي قدامهم بس لحد دلوقتي فاكرك و بدعيلك بالرحمة و المغفرة ..نفسي أشوفك تاني في حلم أطمن أنك عرفت الكلام اللي أنا قلته بعد فوات الأوان ..اطمن عليك و أنت عند ربنا ..

كنت فاكرك أكتر واحد بيكره مصر عشان انتقادك اللي زاد عن انتقادي ليها ..بس يوم ماتش مصر وليبيا في كاس الأمم ..لما ميدو جاب الجون ..صوتك العالي أوي و عروقك اللي كانت هتنفجر و أنت الوحيد اللي فضلت فرحان اكتر من دقيقة ..كنت براقبك و انا مبسوط ..تأكدت ان العيوب اللي بتبان منك دي مجرد قناع مزيف فرضه عليك المجتمع

عموماً انت انسان طيب وجميل أوي يا محمد و قناعك المزيف مخدعنيش و بإذن الله ربنا هيسامحك عليه ..بإذن الله اشوفك تاني في الجنة

ومعتقدش أن في صاحب هيعوضني عنك ..ومعتقدش أن في حاجة تخليني أعرف أرد علي البنت اللي بتحبك وسؤالها ليا يومها ..ليه سبتوا يروح اسكندرية ..كان هيسمع كلامك يا ضياء ...لحد دلوقتي السؤال لسه في عينيها ..مش مستوعبة مسألة القضاء و القدر ..بس مين قال أني كان يصح أسيبك و أمشي زعلان ومنكملش كلامنا

ربنا يغفرلك يا محمد و يجمعك بكل اللي بتحبهم و يحبوك في الجنة ..حتي محمد عبد الوهاب اللي كنت فخور بتشابه اسمكم مع بعض طلع عند ربنا ..كان نفسك تسلم عليه وتاخده بالحضن عشان رافع راسك وسطينا

سلمت عليه يا محمد ؟!

7 days passed

امبارح مر أسبوع علي غيابها في مدينة الضباب و البرد
مفيش أخبار ..الأسبوع ده كأنه قطر ماشي علي تلافيف مخي وملوش نهاية ..من يومها و جبل الوحدة اللي كان جوايا بقي سلاسل جبال
امتي يا رب هيروح الأحساس ده ..انا حاسس أن دي تخليص لذنوبي
اتمني كده

الشباك ..!!

صفحة نت ..كلمة بسيطة أوي ..بس كانت عندي حاجة كبيرة جدا

شباك ببص منه علي روح أنسانة غالية عندي أوي

جزء مني ..

لمدة شهرين أو أكتر كنت ببص من الشباك و أعيش أجمل لحظات حياتي و أنا بتفرج علي روحها اللي عاملة زي البحر ..كنت بكون مبسوط أوي أوي لما بتكون مبسوطة و أبقي مبسوط أني ببص من الشباك ده و في نفس الوقت اتألم لما أحس انها زعلانة أو متضايقة

البحر ده كان بيأسرني حتي في أعتي لحظات ثورته و أشدها جنوناً ..حتي لما موجه يعلي فوق في السما مكنتش بمل ..

حتي الأيام اللي غبت فيها أو كنت بتوقع كده سواء لمرض أو لظروف شغل كنت بخلي صديق ليا يعملي برينت كنت بطل من الشباك ده حتي و أنا مش في السايبر ..

لكن لظروف طارئة و خارجة عن ارادتها الشباك ده اتقفل ..ورغم أن ده أمر مؤقت بإذن الله بس مش عارف أتصوره لحد دلوقتي

لما الواحد يعيش في مكان ويحبه لدرجة وهمية و يحب كل اضافة ليه ..وفجأة المكان يفضل علي حاله و ميتغيرش ..

احساس غريب بالتوهان ...الواحد بعد متعود أنه يركب سفن كلماتها بعينه و يتخيل الموقف و الكلمات ويتابع موج البحر وفجأة البحر يتجمد ومقدرش أشوف منه غير اللي فات !!

الصفحة دي و أحساسي بيها عرفتني قيمة أن كل واحد لازم يفتح نافذة تطل علي روحه و يبص منها الناس اللي ملهمش غرض و يقهموها الناس اللي بيتمني أنهم يفهموه

عرفتني قيمة أن حاجة زي كده مش لازم تتقفل حتي لو الواحد فينا بيحارب في العراق ..

وعشان اللي يقرا ميقولش دي تخاريف صيام انا هدلكم علي عنوان الشباك ده..يمكن تفهموني ..

احساس بالتوهان من غير الشباك ..مش قادر أتخيل هحس بإيه من غير صاحبته .

مش عارف أعمل ايه لحد ما ترجع تفتحه غير أني ادعيلها ترجع و تكون في أحسن حال

ولحد ما أعرف أعمل ايه تاني يصبرني أسيبلكم عنوان الصفحة

يمكن تعجبكم

يمكن حد يفهم

http://root-less.blogspot.com/

اشمعني صحيح ؟!

امبارح و أنا بتسحر صدفة كده قعدت في أوضة أخواتي اللي فيها التفلزيون ..شفت جزء من مسلسل الفخراني اللي اسمه سيرة الهلالي باين .
بغض النظر عن رأيي في المسلسل ، السيناريست أيا كان أسمه حط جملة علي لسان يحي الفخراني كانت تحفة و شغلت دماغي لدرجة أني بدل ما أحط السكينة في الليمونة حطيتها في صباعي ..
ليه لما حد بيكره أو بيتخنق أو مش بيطيق حد مش بنطلب مبررات و ممكن نستوعب الحوار ده علي أساس أنه مش نازلي من زور و أنه هو كده ملهاش تفسير !! أما لو حبيت أو اهتميت بحد و خصوصاً لو كان من الجنس الأخر أو كان مهم و ممكن بجرعة نفاق نستغله في أي مصلحة
يعني لما أهتم بيك لازم أكون عايز منك حاجة ؟ ولازم مليون مبرر ؟! ولو مش مقتنع يبقي أنا مصلحة ؟! و العلاقات العاطفية مثلاً يكون الواحد أو الواحدة بيحب حد مستغل و بشع مع الناس كلها بي لمجرد الضعف أدامه بنقبل منه أش شئ و من غير تفسير لكن مع اللي حوالينا طالما مفيش أرتباط عاطفي بنقعد نرمي الأتهامات و نقول ليه مهتم ...أكيد عايز كذا و كيت ..مع أننا لو اديناله الفرصة احتمال نبقي غلط و مش عيب لو فكرنا في احتمال استغلالنا لكن العيب ان الأحتمال ده يسيطر علينا لدرجة أننا نرفض أهتمام ملوش غرض من انسان حظه السئ أنه بيفكر بفطرته مش زي ما المجتمع عايز
موضوع غريب أوي و بكره أحس بيه لأني بحس بالغباء الأنساني كله متجسد فيه ..اهتمام من حد مش عايز حاجة بيترفض و العكس لما واحد أكون مشدودله عاطفيا يبقي اهتمامه كله مصلحة بس أنا مش دريان .. هو السبب نقص انساني ؟ ولا غباء سببه سرطان يوسف والي ؟!
عايز أفهم عشان أرتاح لأن المشكلة دي مرت بيا ..مليون مبرر مطلوب عشان أثبت حبي لحد و أهتمامي بيه ؟! و ممكن مبرر تافه يقنع أي حد بالكراهية و كل المشاعر الغلط ؟! هو الكراهية بقت الأصل ؟!
و في النهاية بختمها بجملة غناها منير في رائعته ...حدوتة مصرية
لايهمني أسمك..لايهمني عنوانك ..لايهمني لونك ولابلادك..مكانك!! ..يهمني الأنسان ..ولو ملوش عنوان
و المدونة دي مطروح عليها موضوع خطير ..سياسي و تاريخي في نفس الوقت
متعلق بأغتيال السادات اللي رغم رأيي فيه بس شايف أن الأسلوب ده أكبر غلط
معاكم البوست
مدونة شاب أسكندراني
http://katkooot.blogspot.com/

الكتابة

كتير أوي لما بحاول أكتب حاجة كانت في بالي الاقي نفسي مش عارف أكتب أو الكلام راح مني و مبيرجعش الا لما أقوم من أدام الورقة أو من أدام الجهاز

المعضلة دي خلتني أفكر ..هو الكتابة دي ايه ؟!..غاية ولا وسيلة ؟! هدف ولا طريق ؟!

طب لو غاية ..بستفاد فعلا من وصولي ليها ؟! فايدة مؤقتة ولا فايدة بتعلم علي جدران روحي ؟! طب غاية بحس بإيه لما بوصلها ..الأنتصار ولا بالراحة كأني عملت واجب مع نفسي ولا بالاطمئنان كأني خلصت نفسي من مشكلة ؟! مش عارف

طب لو وسيلة ..بتوصلني لأيه ؟ غرض الواحد لما بيكتب بيكون ايه ؟! يخرج كبت ..بأنواعه سواء بقي أحلام أو آلام .. ولا يعمل حاجة ؟!

بصيت لنفسي ..لقيتني ساعات بتكلم مع حد ملاقيش ليه صدي ..مش بشوف رد فعل أصلاً ومش بحس بأني اتكلمت ..من الأخر كلامي بيروح مبيرجعش زي لما بتحصلي حالة التوهان قبل كتابة أي شئ ..عكس لما بكتب ..بيكون فيه أمل ان الكلام يفضل و استفاد منه أو غيري يستفاد منه

مرة كنت في امتحان ثانوية عامة..كان اقتصاد و احصاء..وما كنتش مذاكر و اصلا الأحصاء دي حاجة مملة و المدرس مكانش بيعرف

المهم كنت حفظت 8 قوانين و أول ما دخلت كتبتهم في ورقة الأجابة من ورا..تيجي الأسئلة ..ايه ده دول هما اللي بتتكلم عنهم القوانين ..اشطة هبدع ..و نسيت اني كنت عايز أعيد السنة لدرجة اني كنت بتعمد مجاوبش أحياناً ..احط القانون جنب المسألة و احاول أطبق مفيش ..قمت جايب أخر ورقة الأجابة ..و كنت لسه قاري قصة فلاش كان فيها نثر كاتبه الأستاذ الصفتي بينتقد فيه بعض بلاوي وطننا الحبيب..قمت خدت نفس الوزن و استعرت نص النثر بتاعه و قمت كاتب حاجة مباشرة أكتر ووصلت كمان للعيلة المالكة و الحمد لله الموضوع موصلش للوزير ومش اتكرم عليا الريس بالعفو ..المهم الكلام ده كتبته في صفحة ونص من غير مسيب ولا سطر وكنت في قمة تركيزي لدرجة أني قعدت أقراه بعدها معجب و مصدوم من ما أقترفته ايدي

المهم خرجت و امتحنت في الاقتصاد و عملت فيه ابداع بجد ..فتي أشد من فتي طنطاوي و واصل .. ومع كده خدت 21 من 25 مش عارف علي ايه !!

و بعد الأمتحان اتفسحت و رحت وجيت و روحت بيتنا بعد نص الليل ...تاني يوم بقي نويت أذاكر تاريخ لأن أهلي صعبوا عليا ..صرفوا ييجي الفين جنيه في السنة دي ومكانش يصح معملش بجنيه فيهم

المهم و أنا بذاكر نمت ..صحيت لقيتني بكتب كل اللي كتبته في امتحان الأحصا بالحرف ..مفيش كلمة وقعت مني

يعني الكلام ده لو كنت رغيت فيه اسبوع مكنتش هفتكره بعد ما أخلص رغي لكن مجرد ما كتبته ..ثبت في دماغي ييجي شهرين ولولا المشاكل و الغم اللي مريت بيه كان زماني لحد دلوقتي فاكر

فيمكن تكون الكتابة وسيلة لحبس الأفكار في قفص معتقدش انها هتلاقي أحسن منه عشان تطيرله بجناحاتها..يمكن تكون مجرد فضفضة و تفريغ انفعالات ..يمكن تعبر عن اللي اللسان معرفش يعبر عنه..يمكن اللي قدامي يفهمها احسن..يمكن الكتابة بتوصلني لحد مش قادر أوصله بطريق تاني ، حد بعيد عني جسديا ..

مش عارف برضه

و مش هعرف لحد ما ربنا يأذنلي بكده ..

و علي فكره استدعوني في الأمتحان اللي بعده و قالولي شكلك غلبان و مش عايزين أهلك يتبهدلوا معاك و الكلام اللي عملته ده ميتكررش و أمتحانك اتلغي و نجحت بسبب الأقتصاد .. يلا عشان متقولوش أن الحكومة ظالمة .

روان تتحدث

kont dayman 3awezni ab3atlak mail taweel
yemken da wa2t el mail dah bel-raghm men enni mosh 3andi 7aga mo7addada 2a2olha
w ma-tefhamsh mosha7anatna b sora ghalat

- di kanet daleel sadaqa qawiyya - mosh mesadda2ni? lol
diyaa, e7na fedelna asdiqa2 lel nehaya w koll wa7ed menna shayel lel tani 7obb f 2alboh

- ayyan kan noo3 el 7obb dah
laken daleel enn za3alna kan za3al asdiqa2 mosh 3ashan 7'elafat kebira malhash 7all
law kont ma3aya delwa2ti, kont hateddini mandeel amsa7 domo3i walla ba7'eel kal 3ada? lol
3aref ya diyaa?! el 7ayah di gamila awi w f nafs el wa2t mo7zena awi - garrabt abl keda te7ess el
7ozn wel far7a f wa2t wa7ed? yeb2a 2albak far7an w 3neik balelha el dam3? lol mosh 2adra awsiflak asdi, laken el sh3oor dah gameel ... bas 7azeen
3awzaak teb2a aqwa men keda, diyaa
efra7 - efra7 men 2albak
el 7ayah testahel far7a kebira men gowwana
bas e7na mosh me2addareen
magarrabnash no7don el 7ayah 2abl keda w neshrabha l a7'er no2ta
lol ana mosh merakkeza w mosh 3arfa ba2ool aih
lessa mosh mesadda2 ennak ghali awi 3andi?
lol ma3adsh wa2t ennak matsadda2neesh ya diyaa - sadda2 ba2a w amrak lellah
btw, estamerr fel ketaba
Rabbena ywaffa2ak f 7ayatak
sa3ba kelmet goodbye. mosh keda?!
Goodbye my friend.
كالعادة كنت هكتب بوست أفضفض فيه مع الكيبورد شوية ..وصلني الميل ده و حذفت منه كلام يخصني أنا بس ..ومش عارف هيا لو شافته هتتضايق ولا هتفرح بس حبيت احط كلامها لأن مفيش حاجة توصف احساسي ناحيتها غير أني أوري الناس أد ايه هيا انسانة قلبها يتلف في حرير و دماغها قبل قلبها كمان
جوود باي دي مؤقتة و بإذن الله هرد علي الميل ده كلمة كلمة بعدين
لكن عايز أقول أني مصدق والله و عارف ان الميلز بتتقفل بعد شهر لو متفتحتش فيه فقولت أكتبها هنا عشان كلامي يفضل ميروحش
انا عارف أنك عارفة اني مش بكدبك ولو حصل فبهزار
بإذن الله هستمر في الكتابة و يمكن أكتب بوست كمان النهاردة
و بتمني متحرمش من الميلز بتوعها خلال الشهرين دول ..أو ربنا يصبرني
يا رب...