عن الحقيقة والموت

الحقيقة.كلمة بها الكثير من الغموض.ونظل نهرب منها وفي النهاية يتبين لنا إننا ما وصلنا إلا إليها

الموت.كلمة تعني التشاؤم ولكن

يظل المرء منا يتهرب منه..ويظل يتشبث بكل ما يعتقد أنه سبب في سعادته قبل أن يدركه الموت

ولكن في الواقع..إنما يعجل بموت مبررات وجوده علي ظهر الدنيا متنازلاً عنها واحداً تلو الآخر متعجلاً

متبعين مبدأ عش حياتك

هكذا في رأيي يتقاطع طريقين..طريق الوصول للحقيقة..بطريق الوصول للنهاية

الموت المؤقت..موت إلي حين

الحقيقة.نتهرب منها عندما تؤلمنا ونلجأ لها فقط لمواراة قلة حيلتنا

الموت.نتهرب منه عندما نظننا أقوياء ونستجدي من أجله إذا تبين لنا

أننا لا نملك ما يكفي من إرادة لأستكمال مشوار لا ندرك طوله ولا نعلم أخباره

ولكن..وكما قرأت هذه الحكمة

الحقيقة كالموت..كلاهما يخرسان من يراهما

لا أدري من قائلها

الحقيقة.تؤلم أكثر عندما ندركها في عزيز لدينا

الموت.يؤلم أكثر عندما يدرك عزيز لدينا

****

ورغم التقاطعات

ولكن يبقي الهدف مختلف

فالحقيقة. قد نسعي لإدراكها وقد لا ندركها

الموت.لا نسعي لإدراكه ولكن نسعي للهروب منه أو إليه

الحقيقة قد تتغير بتغير المعطيات

الموت واحد مهما تعددت المعطيات

الحقيقة.تتعدد أوجهها والأختيار متاح

الموت.تتعدد أسبابه بدون اختيارات

وفي النهاية..اعتذر لمدعي التفاؤل ولكن كل ما كتبته

لا يحمل أدني قدر من التشاؤم..القليل من التأمل لا يضر

ولعل ما دفعني لكتابة ما كتبته

التطير الغريب من كلمة ذكرها أو عدم ذكرها لا يغير من الأمر شيئاً

وتجاهل أنها مجرد استراحة ما قبل الحساب

كبرت وخرفت يابو جمال

في الأول وقبل ما أدخل في الموضوع

بعتذر لكل حد علق ومش رديت وكل حد قصرت

في متابعة مدونته بس بييجي لحظات الواحد بيحس

إن حتي بيته مش قادر يدخله أو يقول فيه كلمة

والمدونة زي ما بيقول البعض..بيت تاني أو أول أحياناً

فمعلش سماح..والبوست ده رجوع مؤقت مني للتدوين

رجوع عاجز وجبان..بس مش قادر أمنعه

******

بدون مقدمات..قريت خبر موثوق من مصدره

إن أبو جمال..تكرم مشكوراً وبعت برقية

بيهني فيها شيمون بيريز وعلي حد علمي الشخص ده سفاح محترم

لو في نقابة سفاحين فأكيد هيكون في مجلس إدارتها

بيهنيه بإيه يا حلوين ؟

بيقول إنه بيتشرف إنه بينقل لسيادتكم

عائدة علي السفاح الغني عن التعريف

تهنئتي بمناسبة عيد الأستقلال

خلص الكلام الجميل

وتسلم إيدك يا أبو جمال

كويس إنك مش ورطت معاك

عدد سبعين مليون مواطن

بطرح عصابة المنتفعين حوالين حضرتك طبعاً

لأنهم ميفرقش معاهم يهنوا إبليس نفسه بعيد ميلاده

يهمهم الكرسي..والثروة وبس

المهم..كويس إوي إنه مقالش تهنئة جمهورية مصر العربية

أو شعبها..أو جيشها اللي المقابر الجماعية ليه في سينا لسه مش بردت

أو حتي حرس الحدود اللي كل ما جندي صهيوني

يحب يصطاد عصفورة يقوم يصطاد واحد منهم

من الملل ويموت شهيد

والمحروسة اسرائيل تعتذر

وبصدر رحب الأعتذار بيتقبل

أنا مصدقتش عيني

افتكرتها تشنيعة زي تشنيعة الجرايد القومية علي إمام مسجد

مش فاكر اسمه.بس اللي فاكره إنهم قاللوا إنه أفتي بإباحة قتل

الجنود المصريين

والراجل كدب الفتوي وشفت كده في قناة الجزيرة

وبعدين ده إمام مسجد..يعني لو صدرت منه فدي مش فتوي

لأنه مش مؤهل ليها..مسجد زي مليون مسجد في مصر

مش موقف رسمي

المهم تاني..اتأكدت من الخبر

واستغربت..إذا كان أهل الكدب

وأهل الخداع

الكيان الصهيوني المسمي بإسرائيل

مقالوش عليه عيد استقلال

بس ازاي..لازم أبقي صهيوني أكتر من الصهاينة

أمال..أنا داخل علي قانون إرهاب ..وأزمة غلاء

ومظاهرات هتطلع وبلد هتولع وكمان

هنزل ضنايا من علي حجري وأقعده مكاني

لما هخرب في البلد أكتر وأضرب في اللي يعترض

أسكت عين العالم بره بإيه

؟؟؟

!!!

برافو ...ببرقية تثبت إن السادات مماتش

وتلميذه الأسوأ منه مليون مرة عايز يورثها لأبنه بأي شكل

ولو بتوسل رضا الصهاينة عننا

بقي الصهاينة مش بيسموه عيد استقلال

استقلال ازاي وهما كلهم شعب لقيط أصلاً

هجين زبالة العالم اتجمع وبضعفنا عرفوا يفرضوا أمر واقع

وطبعاً بعلمهم وبقوتهم العسكرية

مش قوتهم بالضبط..قوة الغرب عموماً

بعد كل ده..نيجي إحنا وعن طريق

المنتخب

مش منتخب حسن شحاتة

لأ

ولا منتخب الناشئين

لأ

ده المنتخب بالتزوير

وبالعافية

سيادة الرئيس

المبجل المعظم

محمد حسني مبارك

وبما إننا خلاص بقينا زيتنا في دقيقنا

فمش أستبعد بعد ستين سنة كمان

يكون حفيد جمال متجوز اسرائيلية

وبيبعت تهنئة لحماه نيابة عن جموع الشعب المصري

ووقتها مش هيكون في دم لدرجة إنه هيضم الغير منتفعين

بفرض إن التعداد وقتها هيوصل تسعين مليون

فبسلامته هيعبر عنهم كلهم

والعيب مش عليه ..ولا علي جده اللي تشرف بالتهنئة

لأ ..العيب علي سبعين مليون

أناني..شهواني..جبان..كداب

تايه..جاهل..غبي..منافق

تور في ساقية..خروف في مرعي

وضيفوا ضمير المؤنت..مقصدش أهين حد

ولا أجرح في حد..بس مفيش وصف لينا بره الأوصاف دي

لو كل واحد تنازل عن نرجسيته وإحساسه بمميزاته وبس

هيلاقي أبسط وصف ليه إنه بيكدب علي نفسه وعلي اللي حواليه

أو جبان خايف يتكلم رغم إنه فاهم وعارف

أو جاهل .أو منافق..أوتايه..مش بدعي إني عالم

وأقدر أحصر كل أنواع البشر في كلمات محددة

بس ده أقرب وصف عام لحال سبعين مليون مصري

المتدين فيهم أغلبهم تدين سطحي ومزيف

والباقيين منعزلين ومنطويين كأن الدين عبادة وبس

ونفس القصة بالنسبة للعلم..مدعيين العلم كتير

لكن العالم بجد..ناس قليلة ومنبوذة

مع إن العلماء ورثة الأنبياء

فبعد كده..اللوم فعلاً مش عليه

ده مجرد رمز لينا إحنا اللي اخترناه

اخترناه بالسكوت ..اختيار سلبي

وبما إن المدونة مش متراقبة..ومش مشهورة

فاللي هيقرا فضفضتي ونرفزتي مش هيتعدوا علي صوابع الإيدين

بس أتمني يجيلي فرصة أحاول أقول فوقوا لينا كلنا

وأولهم أنا نفسي..ولحد ما تيجي الفرصة ليا أو لغيري

ربنا يستر وعقابه لينا ميكونش اسوأ من كده

وتتوقف تخاريف عصابة الأربعين حرامي عند كده

التهنئة بعيد الأستقلال..يمكن بكره يبعتوا كتيبة

من الجيش المصري..لمساعدة الأشقاء الصهاينة

لمقاومة الأحتلال الفلسطيني..ويقاوموا الخطر الأعظم

حزب الله..أخر رجالة حقيقيين من المحيط للخليج

كتر خير الفلسطينيين إنهم مش بيفجروا نفسهم في سفارات مصر

أو وزارة خارجيتها أو قصر عروبتها أو مجالس تزوريها

لأن الناس دي مهما غلطت..فدول تحت احتلال

لكن إحنا غلطنا مفيش مبرر ليه غير الهوان

بس كفاية

وفي الآخر أسيبكم مع رائعة الفن الشعبي

يا عم الدنيا مخ

كم أكره النسيان

بداية الكلام كده اللي حابب أقوله في البوست ده سؤال

ليه حاسس إن من السهل تخسر بني ادم

في حين إن صعب جداً تحافظ عليه

يعني العيب فيك ولا فيه ولا فينا ولا المسألة نسبية

مجرد تساؤل

وصديق أخر يذهب ولا يعود

وعلي رأي الجملة اللي سمعتها في فيلم

من السهل إنك تبدأ حرب لكن من الصعب إنك تبدأ حب

its Easy to Start A war but its Hard to Start a Love

**********

قريت جملة وردت علي لسان أحد أبطال رواية لسوزان عليوان

حتي الرواية مش فاكر اسمها بس الناقد كان معجب بيها أوي

كانت بتقول

وفي الوردة التي تنبت من قلب التراب عطر موتانا

وربما قد أصابت بها كبد الحقيقة وربما بهذا العطر

تكتمل تلك البوصلة الكامنة في أرواحنا والموجهة لنا

و التي سرعان ما تصاب بالعطب بمجرد الفراق

**********

بقي زمن الخد وهات

لأن خلاص عم عشم مات

علي رأي القائل

********

برتراند راسل قال كلمة فكرت فيها ملقيتش فيها غلطة

ومش حابب أنساها برضه زي كل اللي كتبته

إن عقلاً متشككاً علي الدوام لهو عقل فارغ علي الدوام

بذمتكم الراجل ده بيفهم ولا لأ ؟ عن نفسي أرفعله القبعة

********

في دستور 12 / 9 كتب جمال حمزة

واللي أعتقد إنه مش محترف

شعر بعنوان طفل ليس كذلك

وأيا كان نوعه كشعر بس اللي كاتبه بيحس

لأنه كتب الآتي

فالفقر لعين والقهر لعين

والكل لهذا أو ذاك سجين

بس أحب أضيف إن الترف والجهل أيضاً

لازم يتحطوا في القائمة دي

**********

وفي النهاية

نقطة طرحها صديق في معرض كلام

إني مصلح اجتماعي

وهو شرف مقدرش أدعيه إلا لما أحس إني راضي عن نفسي

وبحاول أصحح الفهم الغلط ده تاني

لأني يهمني كل حد يوصل لغرضي من الكتابة في المدونة

وبالتالي هيفهم كل حاجة من منظور مختلف

كل حد تشمل اللي بيتابعني لأنه بيفهمني أو بيهتم

مش المتابعة لمجرد المجاملة

الأسباب متعددة والغرض واحد

أولاً بحيلكم لكلام الأخ العزيز محمد الغزالي

نكتب لأننا كل يوم نشعر أن جدار الظلام يزحف علينا من

كل ناحية يحاول أن يعمي بصيرتنا كما نجح مع آخرين
نعم .. إبليس قد أعمى أذهان غير المؤمنين ولذلك نكتب

لكي نثقب في جدار الظلام هذا ثقبا يمر النور منه للأجيال
نور …يروي ظمأ الباحثين عن الحق وعن الطريق القويم وعن الحياة الأفضل

نور يجدد قلوبنا بحق لتصير قلوبنا الأنانية والمتعصبة

والشريرة… قلوب ترحم وتغفر وتحب الجميع
نور أنار أذهاننا بحق فصرنا لا نـُخدع ولا نـُغيب ولا نـُضلل

بتقوى خارجية … أو بكلام جميل تحت اسم الله

.....

الكتابة من قديم الأزل ملهاش جدوي أكبر من حفظ ما قد ننساه

وسننساه لأننا بنملك ذاكرة مراوغة

تتذكر ما لا يجب تذكره وتنسي ما لا يجب تناسيه

وأنا عن نفسي في مدونة مش مشهورة

أي إن المتابعين عددهم قليل والحمد لله

فمفيش قاعدة مستهدفة أصلاً لٌلإصلاح

وكل اللي بعمله إني بحاول أفكر نفسي

وكل حد بيهتم بالعالم الافتراضي البسيط ده

بكل ما قد يستحق التذكر

والغرض التاني..إني مديون للإنسانة اللي عملت المدونة دي ليا

إن جهدها ميروحش هدر وهفضل أدور جوايا

وهلاقي حاجة علي الأقل تستحق إن أفضل أكتب

لحد ما ألاقيها وأحقق من وراها اللي كانت شيفاه فيا

لأن العالم البسيط ده متعملش مجاملة

وبالتالي أنا مش بكتب فيه مجاملة أوارضاء لغرور

أو مجرد واحد عنده ازدواج في الشخصية

لأ أنا مقدرش أبداً أدعي الوظيفة دي

لأني صغير وضئيل أوي عليها

بفكر وأناقش وأعترض وأكتب

لكن أصلح ..أنا أولي بالجهد ده

خصوصاً إنه لن ينال أي تقدير

وشكراً تعبتكم معايا ..ورمضان كريم عليكم يا رب

وصوم مقبول وأعمال صالحة دايماً وادعولي معاكم بقي

لأني من أول الشهر معملتش حاجة أصلاً

رمضان كريم عليكم

يا رب يكون الشهر ده بداية خير لينا كلنا

ونحس كلنا بنعم خالقنا ونستغل الشهر ده أحسن استغلال

مش مجرد شحن بطون وفرجة علي أعلام سفوت الشريف

كل سنة وأنتم طيبين ودايماً صيام مقبول وعمل صالح وإفطار لذيذ