كم أكره النسيان

بداية الكلام كده اللي حابب أقوله في البوست ده سؤال

ليه حاسس إن من السهل تخسر بني ادم

في حين إن صعب جداً تحافظ عليه

يعني العيب فيك ولا فيه ولا فينا ولا المسألة نسبية

مجرد تساؤل

وصديق أخر يذهب ولا يعود

وعلي رأي الجملة اللي سمعتها في فيلم

من السهل إنك تبدأ حرب لكن من الصعب إنك تبدأ حب

its Easy to Start A war but its Hard to Start a Love

**********

قريت جملة وردت علي لسان أحد أبطال رواية لسوزان عليوان

حتي الرواية مش فاكر اسمها بس الناقد كان معجب بيها أوي

كانت بتقول

وفي الوردة التي تنبت من قلب التراب عطر موتانا

وربما قد أصابت بها كبد الحقيقة وربما بهذا العطر

تكتمل تلك البوصلة الكامنة في أرواحنا والموجهة لنا

و التي سرعان ما تصاب بالعطب بمجرد الفراق

**********

بقي زمن الخد وهات

لأن خلاص عم عشم مات

علي رأي القائل

********

برتراند راسل قال كلمة فكرت فيها ملقيتش فيها غلطة

ومش حابب أنساها برضه زي كل اللي كتبته

إن عقلاً متشككاً علي الدوام لهو عقل فارغ علي الدوام

بذمتكم الراجل ده بيفهم ولا لأ ؟ عن نفسي أرفعله القبعة

********

في دستور 12 / 9 كتب جمال حمزة

واللي أعتقد إنه مش محترف

شعر بعنوان طفل ليس كذلك

وأيا كان نوعه كشعر بس اللي كاتبه بيحس

لأنه كتب الآتي

فالفقر لعين والقهر لعين

والكل لهذا أو ذاك سجين

بس أحب أضيف إن الترف والجهل أيضاً

لازم يتحطوا في القائمة دي

**********

وفي النهاية

نقطة طرحها صديق في معرض كلام

إني مصلح اجتماعي

وهو شرف مقدرش أدعيه إلا لما أحس إني راضي عن نفسي

وبحاول أصحح الفهم الغلط ده تاني

لأني يهمني كل حد يوصل لغرضي من الكتابة في المدونة

وبالتالي هيفهم كل حاجة من منظور مختلف

كل حد تشمل اللي بيتابعني لأنه بيفهمني أو بيهتم

مش المتابعة لمجرد المجاملة

الأسباب متعددة والغرض واحد

أولاً بحيلكم لكلام الأخ العزيز محمد الغزالي

نكتب لأننا كل يوم نشعر أن جدار الظلام يزحف علينا من

كل ناحية يحاول أن يعمي بصيرتنا كما نجح مع آخرين
نعم .. إبليس قد أعمى أذهان غير المؤمنين ولذلك نكتب

لكي نثقب في جدار الظلام هذا ثقبا يمر النور منه للأجيال
نور …يروي ظمأ الباحثين عن الحق وعن الطريق القويم وعن الحياة الأفضل

نور يجدد قلوبنا بحق لتصير قلوبنا الأنانية والمتعصبة

والشريرة… قلوب ترحم وتغفر وتحب الجميع
نور أنار أذهاننا بحق فصرنا لا نـُخدع ولا نـُغيب ولا نـُضلل

بتقوى خارجية … أو بكلام جميل تحت اسم الله

.....

الكتابة من قديم الأزل ملهاش جدوي أكبر من حفظ ما قد ننساه

وسننساه لأننا بنملك ذاكرة مراوغة

تتذكر ما لا يجب تذكره وتنسي ما لا يجب تناسيه

وأنا عن نفسي في مدونة مش مشهورة

أي إن المتابعين عددهم قليل والحمد لله

فمفيش قاعدة مستهدفة أصلاً لٌلإصلاح

وكل اللي بعمله إني بحاول أفكر نفسي

وكل حد بيهتم بالعالم الافتراضي البسيط ده

بكل ما قد يستحق التذكر

والغرض التاني..إني مديون للإنسانة اللي عملت المدونة دي ليا

إن جهدها ميروحش هدر وهفضل أدور جوايا

وهلاقي حاجة علي الأقل تستحق إن أفضل أكتب

لحد ما ألاقيها وأحقق من وراها اللي كانت شيفاه فيا

لأن العالم البسيط ده متعملش مجاملة

وبالتالي أنا مش بكتب فيه مجاملة أوارضاء لغرور

أو مجرد واحد عنده ازدواج في الشخصية

لأ أنا مقدرش أبداً أدعي الوظيفة دي

لأني صغير وضئيل أوي عليها

بفكر وأناقش وأعترض وأكتب

لكن أصلح ..أنا أولي بالجهد ده

خصوصاً إنه لن ينال أي تقدير

وشكراً تعبتكم معايا ..ورمضان كريم عليكم يا رب

وصوم مقبول وأعمال صالحة دايماً وادعولي معاكم بقي

لأني من أول الشهر معملتش حاجة أصلاً

حروف

كتير أوي أكتب الحروف وأرجع أبصلها تاني ..الحرف مجرد تكوين بسيط

لكن إرادة ربنا جعلته أساس للتواصل والفهم والتعلم والحياة عموماً

عشان كده بستغرب لما أقرا كلام بيعلم جوايا وألاقيني نسيته

وأستغرب لما الناس تقراه ومتحسش بيه أو تنساه زيي

وعايز الحروف تبعتلي مندوب عنها يعلمني ازاي منساش

والسبب ببساطة مجردة

إني دائماً ما أنسي ما لا يجب نسيانه وأتذكر ما لا يجب تذكره

عموماً وحشتني المدونة وكل حد علق فيها مش للمجاملة ..لأ لأنه فهم المكتوب وفهم الكاتب

علي فكرة ..كلمة كاتب دي كتيرة عليا ..خليها مدون أحسن

في كام حاجة كده معلقة في دماغي قلت أكتبها قبل ما أنساها

يا تري مين هيستحمل ؟! هنشوف

**********

واجبي نحو الإسلام ..العلم بالإسلام والعمل بالإسلام والعمل للإسلام ..يوسف القرضاوي

**********

اوعي يا ابني تدور ع الدفا في فلوس وهدوم

ومتنساش تحوش شوية أصحاب

وافرح أوي لما يدقلك باب

وتلاقي حد بيحضنك لوحه الله

ياه ياما ياه

فاكرة لما كنتي بتعملي البصارة

وتدي منها لأبلة سارة

يرجع ف الطبق رز بلبن

ويروح الطبق لأم حسن

ويرجع صنية بسيسة

تبعتي منها لخالتي بيسة

يرجعلك الطبق مليان حب

معقول في كده قلب

عارفة يامه النهاردة خفت بجد

حفت مني وحفت من أي حاجة وأي حد

وبخاف غصب عني أتخبط في حد

ومن أول هنا يامه لازم ابدأ من جديد

واسأل ليه الفرح يامه شكله لسه بعيد

ده أجزاء من كلام كتبه علي سلامة ...الدستور 15/8 ..مع قليل من التصرف

***********

عايز أكبر بس شرطي إني احتفظ بطفولتي

عايز أكبر وقت ما هو لازم وواجب

وأصغر لجل ما ألعب وألاعب

بكبر مش بشيخ يعني بتعلم يا شيخ

دي أجزاء من تعتعة دكتور الرخاوي في الدستور 15/8 برضه

***********

قالوا قديماً الوحدة خيرٌ من صديق السوء

وأحب أقول حديثاً وأيضاً خيرٌ من صديق مشغول

***********

Let me Tell You Something about me

i'm just a mortal creature

i'm not staying on that planet forever

i just have my turn & i'll leave it forever

Let me remind You that

although of your beauty or wealth

& although of your wisdom or strength

although of all what you already have

and what will have

you still mortal

you will leave one day

your role is not to stay

Let me Tell something more

those who left our world

those who will come to our world

those who still on the edge

all of them were created in that world

but they dont belong to it

because they are mortals

so i wish for myself to put my foot

on that way that i know its right

& which i believe in it

before i'd leave on the way of nothing

طعم الحصرم * في الفم

بعدت الفترة اللي فاتت عن الصلاة رغم إن أول الأسبوع حصل حاجة كويسة في حياتي حمدت عليها ربنا لفظاً مش أكتر ..والنهارده الحمد لله رجعت أحسن شوية ..وحبيت أكتب حاجة قبل ما تتنسي زي اللي قبلها ..لأني بقالي 80 يوم بنسي ..

من فترة طويلة بفكر مكتبش أصلاً ...لأني محتار بين حاجات كتير عايز أقولها وبين حاجات مأثرة علي نفسيتي بتأثر

وبتخرجني عن الموضوع اللي بكتبه بس ما باليد حيلة ..

وأنا بتمشي في الشارع ..كان في واحد بيتكلم في المحمول
فبيحكي بصوت عالي أوي في تأجيل جلسة وشغل المحاميين ده
وعشان يوصل وجهة نظره فقال النكتة دي
واحد مراته طردته ..ومكانش ليه حد في الدنيا غيرها
فمش عارف يروح فين وفضل واقف علي باب الشقة
ينادي عليها متردش ..يخبط متردش ..لحد ما اتعصب أوي
فبقي كل شوية كل لما يخبط ومتردش عليه يخبط برجله صفيحة القمامة تخبط في الحيطة وتخبط فيه ..0

وهكذا فضل يكرر الموضوع ده
لغاية أما أتعور جامد أوي ..0

فقام مصرخ وقالها افتحي يا ولية
الصفيحة هتموتني ..!!00
فمنطق النكتة القديمة دي لما أفتكرته وصلني لخواطر معينة وهكتب البوست النهاردة
عشان منساش بس الموقف اللي استفدت منه أوي

*

*

*

________

**

*

لما تخرج من بيت إنت بنيته ..0

من حاجة تعبت فيها عشان تكملها للآخر

وقتها عشان ترجع ..والباب مقفول ..هتفضل تنادي ..

بس لا حياة فيمن تنادي ..هتخبط علي باب جنبه ..

هيخرجلك صاحبه بشياكة

فيقولك إنه مشغول ويقفل من تاني

وده حقه فمتقدرش تتكلم ..أكيد من حقه يحدد أولوياته

فساعتها من الحيرة تنسي أهم حاجة

اللجوء لربنا والإيمان بيه بكل جوارحك

ساعتها هتنسي وترجع للباب اللي لما اتقفل في وشك وصلك للحالة دي وتقعد تخبط ..ولما ميردش صاحبه ..0

أو يرد ببرودوبكلمتين يبينوا إنه مش مهتم بيك أصلاً وعايز يخلص منك من غير ما يتعب ضميره

وقتها هتخبط في صفيحة ذكرياتك اللي علي الباب ؟!0

أو صندوق عبارة عن خلايا مخك اللي مش بتبطل تفكير

وبحث عن مبررات لكل حاجة بتحصل..وغرق في موجات من الحيرة لوحدك تماماً مش عارف تكمل للآخر ولا تستني المجهول

حيرة بين استسلام لواقع تافه وأناني

واقع أنت متأكد من إنك مش لازم تسيبه يستغرقك..

ساعتها هتحس بطعم مر في روحك بيحاول يغطي علي الأمل

اللي تعبت عشان تزرعه جواك

وتفضل تخبط في صندوق الحيرة والذكريات..صندوق الاحتمالات

وكل ما تخبط فيه غصب عنك..0

غصب عنك لأنك لسه مش القوة

اللي تمنع بيه جنوحك للتصرف ده

يخبط ويرجع يخبط فيك تاني بقوة متزايدة ..0

ويزيد عمق الجروح ومصمم إنك لما هتعمل كده هتقدر تفتح آخر باب اتقفل في وشك

لكن في الواقع الموضوع مش متوقف علي تصرفك إنت ..0

المفروض تسلم أمرك لله

وتستني تقلبات أمزجة أصحاب الأبواب

الأبواب المقفولة ..وتروح بكل جوارحك للمكان الوحيد

اللي بابه مش هيقفل في وشك

يا تري تقدر ؟!000

ولا هتسيب طعم الحصرم يكون الطعم الوحيد في فمك ؟!00

هتفضل واقف مستسلم للصفيحة أو الصندوق اللي كل ما تخبطه يرجعلك ..يخبط فيك ؟!00

تسيبه يعمق جروحك ..تسيبه وإنت معتقد إن وحدتك

هتكون الحل لفتح أي باب إنت عايزه يفتح تاني ؟!00

في النهاية ..في اختيارين ..0

تفضل أدام الباب تجرح وتهين في روحك

أو تروح للباب الوحيد اللي مش هيتقفل في وشك وتصبر

وفي الحالتين هيفضل طعم الحصرم في فمك

_______

*

*

0* الحصرم ..كلمة عربية بترمز لأول العنب أو التمر ...يعني أول الحصاد بتاعه مبيكون لسه مش ناضج

وغالباً ما تستخدم الكلم للرمز لطعم مر

* عنوان البوست قريته في مقالة في الدستور عن رواية اسمها ( حصرم الجنة ) لأديب فلسطيني اسمه عاطف أبو سيف ..والرواية بتعبر تعبير جميل وبذكريات بسيطة عن سيطرة المرارة علي المغتربين عن بلادهم ..بداية من خبرة جدته والأجيال التالية ليها من مجتمع فلسطيني منسي في زمن جمال مبارك وهيفاء وهبي وكوندي ..مجتمع اللاجئين

المقال اللي بيحكي عن الرواية دي بالصدفة كان في جنبه مقال تاني لأحمد الخميسي

قال فيه إن الأدب ( وأنا بضيف عليها أي تعبير جميل عموماً سواء كان غناء أو سينيما أو كتابة أو شعر )

بيعيبه في المجمل إن الشخصية بطلة العمل الأدبي أو أيا كان مش بتكبر بحيث إن همها يبقي بحجم الوطن

أو المجتمع بل بالعكس

بيجرها ليصبح المجتمع أو الوطن بحجم مشكلة الفرد ..وده اللي حسيته وأنا بكتب في المدونة 00

مش عارف أخرج من شرنقة بعيب علي الناس استسلامهم ليها مع إن ربنا لو لاحظنا أغلب أحكامه وتعليماته

بتحثنا علي إننا نكون في حالة الكل

مش الفرد ..نحس بحاجات مشتركة ويكون لينا أهداف مشتركة

عموماً نرجع لمقال الأخ / أحمد الخميسي اللي قال

حاجة جميلة أوي في الآخر عجبتني أوي

مقتبسها من مسرحية بس نسيت اسمها

قد تكون قبسة النور في الغروب الشامل الذي نعيشه

هي كيفية وصفنا لهذا الغروب ..وبضيف عليه ..نظرتنا لهذا الغروب

نهاية جسر

نظرت خلفها بتوتر

نظرت لتؤكد مخاوفها

لتؤكد وصولها إلي مرحلة اللاعودة

لقد قطعت شوطاً أطول مما تتخيل

لم تكن تتخيل في البدء أن كرامتها ستتحمل أن تصل لهذا المدي

أحست بإرهاق نفسي لم تشعر به منذ أمد طويل

لم تتخيل مدي القلق الذي تشعر به الآن

تنظر للخلف مرة أخري وتتوقف لثانية

نظرات زائغة تتأمل بها ما قطعته من شوط طويل

لم تعد تحتمل التحلي بالصبر

نظرات زائغة تتأمل كرامتها الذبيحة

فبعد رفضه الأخير وللمرة الثالثة

وإهانته لها بدون أن يشعر

وهي متأكدة أنه لا يعتبرها صديقة

وأنه قد وجد البديل لها ..وهرع إليه بدون تفكير

ومع ذلك وبعدها ولمرات نادرةأحست بوجود مشاعره التي صرح بها كثيراً والتي صدقتها لعدم وجود أي غرض منها

ولكن الآن يخجل من التصريح برفضه لها

وأن اهتمامه المتقطع مجرد شفقة

ملت من استطراداتها

و ملت من ترديدها

فات الكتير وما باقي إلا القليل

أحست بتراخي خطواتها وبأنها لن تكمل ما قد بدأته

ولكن نظرتها الأخيرة أدركت أن ذلك الجسر لن يحتمل حتي تعود لأوله

وأنه سينهار قريباً جداً

وأنها ستنهار معه

وستلملم أشلاء روحها من محيط الواقع المرير

وتذكرت ذلك الإحساس الذي تخشاه لدرجة الرعب

الوحدة وسط الناس

الغربة في دارها الذي لم تعرف غيره

كم عانت لتقنع نفسها أن الحياة هبة لا يستحقها من عاش لنفسه فقط

وهي تحب الحياة ولاتحب أن تعيش لنفسها ولكن

انقطعت أغلب حبال التواصل مع أقرب الناس إليها

سواء بتقصير منها أو غفلة لم تتنبه منها إلا بعد فوات الآوان

سواء بإرادة الخالق التي لا راد لها

سواء بتقصير من الآخرين

ومع ذلك بذلت أقصي جهدها في بناء أخر الجسور

جسرهما معاً جسر الصداقة

جسر كانت تتمناه أبدياً

واجهت الكثير لأجل أن تبني ذلك الجسر

لأجل أن تمر عليه في لحظات الحاجة

لكي تستمتع بالوصول لطرفه الثاني

لكي تشاركه لحظات سعادته

لكي تكون بجانبه عند الحاجة

وعند اللا حاجة

وعند هذه النقطة أحست بألم مختلف

أحست بعدم الثقة من جانبه وخوفه من أن يظهر أمامها عارياً

يظهر علي حقيقته وبدون أقنعة

خوفه من أن يظهر ضعفه وحاجته

يظهر عيوبه ومساوئه

ذلك الخوف الغبي

ورفضه ليدها الممدودة دائماً وأبداً

يدها التي طالما امتدت مهما كان طول الجسر ومهما كانت مرهقة نفسياً

نادراً ما فكرت في سحبها

لم تستوعب بعد فكرة تخيله غارقاً في محيط الواقع

في تلك الغابة التي ترتدي قناع الجنة

في الزيف والتضليل والكذب

لم تستوعب لماذا لا يثق بها علي الأقل كجزء منه

هل يخشي أن تستغل مساعدتها له في إيلامه ؟!00

هل يخشي هروبها منه ؟!00

وهي من أعطته وعداً ببقائها بجانبه طوال الحياة

وكررت وعدها عبر أسلاك الهاتف وهي من هي وقتها

كررت وعدها وهي تظن أنه بحاجة إليه

وساعدتها دموعه في تأكيد هذا الظن

رغم أنها هي من أحتاجت له وإلي يده الممدودة

إنها تتذكر امتدادها في مواقف عديدة لا تتعدي أصابع اليدين

ولكنها تترك في نفسها إحساساً جميلاً

إحساس تمنت أن يشاركها إياه

الإحساس بوجود الصديق

طالما أخبرته أنه ينقصه تعريفاً كاملاً

تعريفاً للصداقة لكي يحصل علي صديق كامل

طالما أخبرته أن الصداقة هي علاقة توحد وأن الفروق تكاد تتلاشي

طالما أرادت إخباره بالمزيد عن الصداقة

ولكنه دائماً ما كان يغطس في محيط الواقع

وينشغل عنها ويعود متظاهراً بأنه لم يتألم

وبأنه قد استفاد من هذه الرحلة القصيرة

وقد صدقته أحياناً وصدقت أنه ما عاد إليها إلا إشفاقاً منه عليها

ومع ذلك تستسلم وتواصل الحفاظ علي جسرها الأخير

تكاد تمسك بأعمدته لكي لا ينهار

تطأ كرامتها لأجل تحقيق ذلك الهدف

تخجل من إعلانه بأنها مستعدة لفعل أي شئ لأجله

تدرك أنه لن يفهم رغم أنه كرر أنه يحب صداقتها

ولكنها لا تري سوي صداقة منقوصة

صداقة من النوع العابر ..أو هكذا أراد هو

تواصل المحاولات معه وتظل يدها ممدودة

ولا يتنازل ويتلقف يدها المرتعشة ولا يكلف نفسه مجرد التجربة

يتبع معها أسلوباً لا تفهمه فهو يقترب حينما يريد

ويبتعد حينما يريد ..كأن وجودها مجرد فانتازيا أخري

لقد أرهقها اعتماده علي مشيئته وحده

رغم أنه مؤمن بالله وفي مرة من المرات

كان هو من يذكرها بوجوب تذكر ذلك

ومع ذلك يواصل الاعتماد علي ما يريده

ولا يتوقف ليفكر في ما تريده هي

واصلت تقليل المسافات بينهما

وتلين من وجهة نظرها لكي يظل الجسر ممكناً

تعلم أن ما ينقصه إنما هي اشياء افتقدها عند تكوين شخصيته

ولكن هل يظن أنها مكتملة ؟!0

إنها لا يزال أمامها الكثير لكي تقول أنها شبه كاملة

والكمال لله وحده طالما كررها

لماذا يصمم أن يمر بنفس المراحل التي مرت بها ويصمم علي تجربة ما توصلت هي لنتائجه ؟!0

تشعر بعدم تصديقه لها ويؤلمها هذا

تشعر بعدم ثقته في حسن نواياها وجدوي وجودها في حياته أصلاً

ومع ذلك تكذب احساسها

تراه يتسرع في الحصول علي بديل لها

وتكذب احساسها مرة أخري

وتتجاوز آلامها وكل ما يمكن أن ينفره منها

وتتجمل وتمد يدها إليه للمرة الأخيرة

وتنتظر أن يقبل وجودها ويجرب إحساسها بجمال الصداقة ونقائها

مرت خواطرها وتجاوزت شباك الحيرة التي تحاصر قلبها وعقلها

ونظرت نظرة أخيرة علي امتداد الأفق

وكأنها تودع نفسها التي تركتها عند مدها لجسرها الأخير

هي تدرك أنه يستحق تضحيتها ...علي الأقل تضحي لأجله بدلاً من أن تضحي لأجل المجهول

وتستعد لقفزتها الأخيرة قبل انهيار الجسر

وتنبهت أن الانهيار من طرفه هو وليس طرفها هي

ومع ذلك تواصل اندفاعها

وتراه وهو يعطيها ظهره وتتمني أن تناديه ندائها الأخير

فقد تفشل في تجاوز ذلك الشرخ الذي يتسع كل لحظة

وتسقط ....

وعندها لن يسمعها مرة أخري

وإذا تصادف وتلاقيا في الأسفل فغالباً ما لن يتعارفا..

إنها تشعر بتغيره وتشعر بأنها لن تعود كما هي الآن

وتنظر لأسفل وترتجف وتنظر لنهاية الجسر وعبر الشرخ

وتري ظهراً طالما تمنت أن تربت عليه

طالما تمنت أن يكون سندها في الحياة التي تحبها ..

ولكنها تراه الآن ينظر للمجهول

ويـختار النهاية الضبابية ويتجه للمحيط

ومع ذلك قررت قرارها الأخير

وتوكلت علي الله

وتمنت أن يشعر بها حتي لو لم تنجح

فقط لو يشعر ويقدر ويستجيب ؟!

واستعاذت بالله من كلمة لو وأغمضت عينيها

_________________

*

*

*

صوفي مبروك الخطوبة وأتمني قريب أدخل الاقي كلمة رومانسية ومنسية علي يمين البلوج بقت

رومانسية وبس

ماشي ؟

ومستنيين الفرح بقي وعقبال أما تجوزي العيال

وكان نفسي أباركلك من زمان

بس أنتي عارفة الدنيا معايا شكلها إيه

ألف ألف مبروك والمليار مبروك بقي يوم الفرح

مش محتاج عنوان

كتابتي النهاردة وبعد مرور شهرين إلا يوم علي فقداني روان وعدوا كأنهم يومين ويمكن أقلالنهارده مفيش هدف عندي غير الفضفضة وبسربنا يكون في عون اللي هيكمل للآخر .

****

تكملة للبوست اللي فات

بمجرد أن اكتشف عدم وجود مبلغ من النقود كان بحوزته قبل دخول المسجد عاد وسأل خادم المسجد والذي طمأنه بوجه مضئ أنه بمجرد أن يجدها مع رفيقه في المسجد سوف يحفظها له وأن باستطاعته المرور في الفجر لأخذها ولكنه لم يصلي بنفس المسجد يومين متتاليين في لحظة من لحظات انتصار نفسه الأمارة بالسوء عليه وعندما تغلب علي كسله وذهب لأداء الصلاة في المسجد..وبعد أن انتهي منها فوجئ بخادم المسجد مضئ الوجه يستوقفه ويظهر له المبلغ المفقود كما كان في جيبه يوم ضياعه وبابتسامة أحس فيها بطيبة العالم كلها قال خادم المسجد ..فلوسك حلال ..بعد المعتاد في مثل هذه المواقف خرج من المسجد وهو يفكر ..هل ما حدث الآن مجرد جزاء إحساسه بالصغير ونصيحته لخادم المسجد ؟ أم مجرد تأكيد لأنه وضع قدميه علي الطريق الصحيح _رغم تيبسهما علي أول الطريق ؟ أم إن ما حدث تأكيد لأن ما يكسبه من مال علي بساطته لا حرام فيه ولابد أن يواصل السعي لكي يصل لأهدافه التي لم يفهمها ولن يهتم بها أحد ؟!

دارت هذه الخواطر بباله ولم يدري أيها الصحيح وتمني أن يثبته رب العالمين علي إيمانه

تمني أن تتحرك قدماه علي الطريق بدلاً من إضاعة الوقت في إنتظار مساعدة من مجهول

وانصرف ولم يدور في باله إلا الدعاء ...

****

عن الفتاء الدستوري سأتحدث ..

في صورة عرضتها الجزيرة واتبعتتلي من أخت عزيزة بتثبتلي بيها اللي بيدور فعلاً

وبصراحة الموضوع مش محتاج إثبات

طبعا الصورة تتحدث عن نفسها ودي حاجة بسيطة من رئيس قرية فما بالكم بقي

بنائب مجلس أيا كان كلهم واحد الصراحة ولا وزير ولا حتي رئيس مجلس إدارة

وأنا دمي اتحرق إمبارح في لفتي علي بعض المدونات

أكتر ما هو محروق من همومي اللي محدش هيشاركني فيها أصلاً

لكن حبيت أقول حاجة بسيطة ..أنا مرحتش ومعملتش بطاقة انتخابية

رغم احترامي لشجاعة اللي راحوا قالوا لأ رغم علمهم بعدم جوداها

بس علي الأقل نفسهم مفتوحة يعبروا عن رأيهم ولو إن الحكومة استغلتهم

في إثبات مدي الإقبال الكبييييييير علي ديمقراطية الحكيم اللي مجابتهوش ولادة

محمد ولد حسني ولد مبارك

المهم بقي اللي عايز أقوله كمان ...ومش مهم إذا كان يهم حد ولا لأ أهو هعمل اللي عليا وأقول رأيي

يمكن ييجي بفايدة

الناس متحكم فيهم حكام بالسوء ده ليه ؟

عشان الناس محتاجة تنضف من جوه وقبل كده مش هيقدروا يغيروا ولو رئيس مجلس محلي من مكانه

الناس بكل بساطة بقي همها الفلوس ولا شئ سوي الفلوس

بعض المظاهر الكدابة

الجنس ولو جاعوا يبقي الأكل اللي بتحس منه إنها أخر وجبة ليهم

لبس وشوبنج عموماً

تقليد للغرب في الحرية بجانبها السلبي

تشبث بكل ما هو تافه في الدين والجدل في اللاشئ

كل ما حد يقولنا شايفين العصفورة نرفع عينينا وندور عليها

كل ما يثيروا أي قضية ننشغل بيها ونفرغ كل طاقتنا العصبية فيها وبعدين منوصلش لشئ

يبقي ازاي هنقدر علي حاكم زي ده تبت وتنح وحواليه عصابة الأربعين ألف حرامي

وكمان متحكمين في الناس بيخلوهم يخبطوا في بعض

ما هو الأمن المركزي دول مننا وغلابة بس ممسوح دماغهم ومخوفينهم

نغلب خوفنا وعيوبنا أمتي

يا اما نستني مع الزمن والتربية واحدة واحدة ويمكن الجيل الجاي أو اللي بعده يكون فيهم الفايدة

يا إما نستني جيفارا يكون فيه منه نسخة مصرية أو عربية أو مسلمة

وأعتقد إن حتي جيفارا لو ظهر في مصر هيموت بسرطان أو بكبد وبائي أو بأهمال في مستشفي

او في عبارة أو في طيارة أو في مسرح والقائمة تطول

مش عايز أقول مفيش أمل ..عايز أقول منبدأ باللي نقدر عليهم

بس خلاص كفاية

****

صلاح عبد الصبور قال

يا موتانا ذكراكم قوت القلب في أيام عز فيها الأقوات

لا تنسونا حتي نلقاكم

وأنا عايز أعترض عليه..لأن مش هما اللي بإيدهم ينسوا أو لأ

لأن مفيش دنيا شغلاهم ولا شهوات مستغرقاهم

عكس بنو البشر اللي ربنا أنعم عليهم بالحياة عشان يموتوا عقولهم ويمشوا ورا اللاشئ

لحد ما حياتنا هتبقي لاشئ كبيرة

وأنا كمان بقيت بحاول أوقف عقلي

بس كل ما في ناس بتسيبني في وسط الرحلة

بيفضل شغال..

وفي كلمتين عايز أهديهم لروان ..

يا من تسكنين العالم الآخر جمعت لك من حديقة الحياة زهرتين

زهرة عشق وزهرة وفاء ..وأنتظر دوماً يا مليكتي يوم اللقاء

****

عني وعن الصداقة سأتحدث وبدون التزام بأي قواعد لغوية

أغلب اللي عرفتهم كانوا بيضيعوا وقتهم بعيد عن أعز أصدقائهم

وأحياناً كنت بكون واحد من أعز الأصدقاء

وتمر الأيام وتاخدهم الدنيا

ومكونش عرفتهم أد إيه هما غاليين وأد إيه أنا مستعد أثبت كده فعلاً

بس بيفوت الوقت ومبنلحقش

بيضيعوا كلهم ..وفي وقت وجودنا مع بعض بتوصل لدرجة إن مفيش كلام يتقال

وتوصل لدرجة اصطياد الأخطاء والحساسية علي حاجات ممكن نتقبلها من ناس ميسووش عندنا حاجة

وفي الأخر السكة بتنتهي ومنكونش لحقنا نعبر عن جزء بسيط من مشاعرنا لبعض

ومنكونش لحقنا نكمل الطريق اللي بدأناه مع بعض

ومنلحقش نسيب أثر في حياة الناس دي

هو مش البديهي إن الواحد فينا يحتاج صديقه عشان وقت الضيق ..

وقت ميكونش صديقه فيه ده محتاج إلا لإيد تتمدله وتكمل معاه لحد ما يرجع يقف علي رجليه ؟!

هو الصداقة أو أي علاقة انسانية مجرد بيس أوف كيك ..قطعة كعك يعني ؟!

حاجة سهلة كده المفروض يبقي الطرفين فيها مسليين أوي ومحدش فيهم يمر بحالة انعدام وزن

يكون الاتنين مادياً زي بعض وكل حاجة زي بعض ؟!

طيب يبقي كده نكتفي بأخواتنا اللي في البيوت منروحش لحد غريب

لأن اللي في البيت نفس الوضع المادي ومكشوفين لينا لدرجة إن من السهل استيعاب أغلب تصرفاتهم

بس بيضيق الصدر جوه البيت وبيهرب أغلبنا لبره وده غالباً لأختلاف الشخصية لأن كل أسرة مش متماسكة بتطلع فيها الشخصيات كل واحد مع نفسه

ولما نهرب لبره ونكون اصحاب في الوقت العادي ولو التعامل فسح وخروج ونكت ونميمة

هنبقي قريبين أوي ويا سلام لو في مصلحة مادية ..حتي لو مش ماديين بس اهي تقوية أواصر الصداقة

لكن ساعة الجد بيختفي الجميع

هنفضل أنانيين لحد أمتي ؟!

متوقعين إن الهدف من خلقتنا هو اننا نستمتع بالعيشة من غير أي أعباء ليه ؟!

أنا رغيت كتير وحاسس إني بضيع وقت اللي ربنا هيبتليه بقراية البوست ده

بس لما أحس إني أقرب الناس ليا أول ما بيلاقوا بديل ينسوني

ميهتموش بالاتصال ولا إنهم حتي يطمنوني عليهم

طيب بعد ما كافحت عشان أخرج وأقرب لربنا واعتمدت علي ربنا وفي نفس الوقت

مقدرتش أكمل لوحدي واحتجت للتشجيع واحتجت أفضل مهتم بأقرب الناس ليا

بس الاهتمام اترفض والفراق بيحط أخر لمساته الرمادية علي أخر أمل كان ليا

بس النهارده حاسس إني كسبت أخت وصديقة عزيزة

وبرضه أتمني صاحبي اللي شايل كل جمايله في عينيا الأتنين يرجع صاحبي

وبس خلاص ..مش هكمل عشان كفاية كده علي ناس متعرفنيش

بس بدعي ربنا إن كل أتنين كويسين وقريبين من بعض ميجيلهمش داء الكسل

ميستسهلوش يبعدوا طالما حاسين بعبء

ما هو كما تدين تدان

****

في صورة شفتها عند المدون الجميل شرم أقدر أعتبرها كوميديا سوداء

عارفين إن مصر فيها عيوب كتير وغباء مستشري

لكن مش لدرجة إني أتوقع إن الأعمي هيقرا الإعلان

ولا المفروض إن زمايل الطلبة المكفوفين يدوروا عليهم يبلغوهم ؟

روح التعاون دي بتموت يوم بعد يوم وأكيد نص الناس المستهدفة من الصورة دي مش هيعرفوا أصلاً

يبقي اتحطت ليه ؟

سد خانة ؟!

وعموماً المتنبي كان 100% صح

ياما فيكي يا مصر من مضحكات ولكنه ضحكٌ كالبكاء

بس كفاية كده عشان الناس كرهتني

مش عارف

هكتب لمجرد الكتابة وبدون هدف
في دماغي كوبليه يخصني
علي لسان منير ومش فاكر مين تاني
ليه يا دنيا الواحد بيقرب من ناس بايعاه
ليه يا دنيا الواحد متغرب عن ناس شارياه
رغم أني مليش في الشرايط ولا السيديهات بس علي المستوي الشخصي بقالي أسبوعين من ساعة ما سمعتها و أنا بسمعها كل يوم في وداني مش من الراديو
ومعنديش أجابة غير ان الناس مبقوش ناس و الظروف بتمنعنا عن البني ادمين اللي بجد ومش بتتقاطع حياتي معاهم ألا في الوقت بدل الضايع
المهم ...كنت عايز أقول حاجة بخصوص استعراض الأزهر ..يعني لما بيتقتل كام واحد علي الحدود برصاص اسرائيلي مصنوع في تل أبيب بناخد بوسة من أولمرت و بنعمل مسامحين ..لكن لما شوية عيال يعملوا مسرحية ظاهرها القوة وباطنها التهييس ..يبقي الأخوان دول أوسخ من الصهاينة ..انا شخصيا مش بحبهم ولا هحبهم الا لما أجربهم في الحكم و أشوف هما بيتكلموا جد ولا بيسرحوا بالناس ..لكن بني أدمين عاديين يتمسكوا بداعي أنهم عملوا تمارين كاراتيه و كان عندهم كام سكينة مطبخ في بيتهم
طب أنا عندي ستة وهجيب من أصحابي كام سنجة وتعالوا خدوني من بيتنا أنا كمان
ولا لازم البس أسود و أقف في الجامعة و أقول صامدون وأشوح برجلي شوية ؟
يلا مش مشكلة ..المتنبي ده باشا والله ..مصر فيها مضحكات لكنه ضحك كالبكاء
أعدام صدام بيه ..رأيي فيه محتاج بوست ووقت وتفكير..لكن دموع الأسد فكرتني بجملة قالتها أم أخر حاكم مسلم في الأندلس
قالتوا ...أبكي كالناس ملكاً لم تستطع الحفاظ عليه كالرجال .. المهم مش الملك ...راح مع اللي راح ...حتي الكرامة ذهبت ولم تعد
يلا مش مشكلة برضه ...العيد بقي
أتحدي أي حد يقوللي أن العيد بيتطبق صح ..
العيد بقي عيد لحمة ( للكل معدا الممنوعين منها لأي سبب أو المكتئبين ) و حشيش ( للشياب العاطل والشباب اللي دماغه زي جزمتي ) و كل أنواع الزينة و اللبس اللي بيتلزق علي الجسم ( للبنات التافهين فقط ودول كتير )
يعني محدش عارف يعني ايه تضحية
واللي عارف ( زيي ) مش عارف يعمل ايه أو مش بيعمل أكتر من الكلام و غالباً مع نفسي
مش عايز أحلف ..بس طالما أحنا كل عيد بنمشي فيه بالمستوي ده ..مش هنورد علي جنة ..يعني حتى بعض المتدينين ..كل همهم زي ما ايبي قالت في البوست بتاعها ..هو الزكاة قبل ولا بعد الصلاة
للدرجة الدين بقي شكليات ؟
للدرجة دي بقينا مجرد ناس بتفكر في الشهوة والمزاج والفلوس ؟
وحتي الحكام اللي شبعوا سلطة مش بيفكروا غير في كيفية البقاء عليها طالما في صدرهم قلب ينبض _ عنه ما نبض يا شيخ ده أنت أبرد من الديب فريزر _ طيب وايه العمل ؟
مش عارف ..هدعي ربنا يهدي الجميع ...وهستني أخبار راوان ربنا يشفيها ..وأول فرصة هسيبهالهم يشبعوا بيها و أعمل كل اللي أقدر عليه عشان أرضي ربنا في مكان تاني مكان ميحرقش دمي بالشكليات و الحرية اللي بيستغلوها غلط و الدين اللي بياخدوا منه حتة ويسيبوا ميتين حتة
كفاية
سلام وأعذروني بس أنا كنت متنرفز و عشان خاطر روان قالتلي أكتب كتبت ..ولأن شيماء قالتلي برضه مش هتكتب ولا ايه
طالما في حد يهمه أني اكتب هكتب ..أما الشياكة في الأسلوب وترتيب الأفكار
فده مش وقته للأسف
وعلي رأي نجيب بتاع الحشيش _ نجيب باشا محفوظ العبقري _ إن آفة حارتنا هي النسيان
هنقري وننسي ونسمع وننسي ونشوف وننسي وسلام عليكم .

يا ريتنا كنا عصافير

البوست ده كان حصل فيه مشكلة وباظ

اديني رجعته تاني ..وأعذروني لغيبتي الفترة اللي فاتت بس أحياناً الواحد مش بيكون عنده بديل

___________________________________

لماذا تهاجر الطيور على شكل 7

ألم تسال نفسك عندما يأتي فصل الخريف وترى جماعات الطيور تتجه نحو الجنوب ‏وهي تطير على شكل الرقم 7 , يا ترى لماذا تتخذ الطيور هذا الشكل بالذات أثناء الطيران ؟؟؟؟؟

لقد توصل العلم إلى أن كل طير عندما يضرب بجناحيه يعطي رفعة إلى أعلى للطائر الذي يليه ‏مباشرة , وعلى ذلك فإن الطيران على شكل الرقم 7يمكن سرب الطيور من أن يقطع مسافة ‏إضافية تقدر على الأقل ب71% زيادة على المسافة التي يمكن أن يقطعها فيما لو طار كل طائر بمفرده........

‏إذاً تعلم من الطير أن مجموعة الأفراد الذين يعملون في فريق واحد يتخذون الوجهة نفسها ‏يصلون إلى أهدافهم بصورة أسرع وأسهل فيتعاونون ويدعم بعضهم بعضاً ....... ‏وعندما يخرج أحد الطيور عن مسار الرقم7فإنه يواجه فجأة بسحب الجاذبية وشدة مقاومة ‏الهواء, لذلك فلإنه سرعان ما يرجع إلى السرب ليستفيد من القوة والحماية التي تمنحها إياه ‏المجموعة ...

‏وهكذا فإن الإنسان ضعيف بنفسه قوي بإخوانه وإذا ابتعد عن الجماعة فقد لايستطيع مقاومة ‏التيار ...... ‏وعندما يحس قائد السرب بالتعب لأنه يتحمل العبء الأكبر من المقاومة فإنه ينسحب إلى الخلف ‏ويترك القيادة لطائر آخر , وهكذا تتم القيادة بالتناوب ...

‏إذاً يعلمنا الطير أنه مما يجدر الإهتمام به التعاون في عملية القيادة والتناوب عليها من قبل ‏الأكفاء خاصة عندما يكون العمل صعباً ....‏أما أفراد الطيور الذين في المؤخرة فإنهم يواصلون الصياح أثناء الطيران لتشجيع الأفراد الذين ‏في المقدمة على المحافظة على سرعة الطيران ........

‏إذاً تعلم أن العبارات التشجيعية تساعد دائماً في تنشيط الذين يعملون في الخطوط الأمامية ‏وتحثهم على التقدم دائماً بالرغم من الضغوط المستمرة ........ ‏وأخيراً فعندما يمرض أحد أفراد البط أو تصيبه رصاصة صياد فيتخلف عن السرب , يقوم ‏اثنان من الطيور بالانسحاب من السرب واللحاق به لحمايته ويبقيان معه حتى يتمكن من اللحاق ب ‏المجموعة أو يموت فيلتحقان بسرب آخر .

مش جيه الوقت اللي نبص فيه فوق للعصافير والطيور ونتعلم منها ... ؟!

ليه الناس مش عايزة تقتنع أن سعادتها في قربها من بعض ؟!

مش هختم كلامي إلا بأمنية

يا ريتنا كنا عصافير

أول يوم رمضان ..

دخلنا في رمضان أجمل شهور السنة .. وعمال أفكر أكتب ايه ولا ايه

قررت أكتب كل اللي يمر بدماغي وقتي كده و يمكن ده يساعدني أبقي احسن

بفكر النهاردة أروح الجامعة ولا أفضل في الشغل طول الشهر ؟ علي الأقل استفزاز الشغل متعود عليه و مش هتفاجئ بيه و أتنرفز و أعمل حاجة تضيع صيامي ..و كمان الحمد لله الأناث هنا نسبتهم معدومة و لبسهم ميلفتش الأنتباه بنسبة كبيرة فبضمن أني هغلب الشيطان لو وجه عيني غصب عني خصوصا أني لما بروح الجامعة بتكون حجته جاهزة ..انهن في كل مكان ورغم نزعة التدين المزيفة _بتمناها متكونش كده و متكونش زي اللي بتقلع حجابها عشان الشغل ولا في الأفراح _ اللي بتنتاب بعضهن بس برضه بيبقي في نوع من أنوال الحصار ..

محتار أواجه أي حاجة مثيرة لأعصابي أو لشهواتي _بس ده ميعنيش والله أني مريض ولا حاجة ده نوع من أنواع اجتناب شبهات الغلط _ و اعود نفسي علي المقاومة الذاتية و أخلي شغال ولا أريح نفسي و أمشي جنب الحيط حتي في مواجهتي مع شيطاني _مش كفاية السياسة مشونا فيها جنب الحيط و المجتمع و كمان التعليم ؟!

بس رجعت أفكر هو المشكلة في دي بس ولا المشكلة في حاجات أكبر ؟ مش عارف الصراحة و تفكيري وسع مني أوي في الموضوع ده فكفاية كتابة فيه لحد كده و بتمني أستقر فيها علي حل قريب .

بفكر كمان ليه كل اللي قابلتهم من أمبارح للنهارده مش مديين للشهر حقه فعلي سبيل المثال واحد فيهم كان بيهزر امبارح بعد نص الليل مع بنت في جنينة مضلمة و عديت جنبهم ولا كأني أعرفهم لأني عارف أنه معندوش دم ..و واحد النهارده الساعة 7 الصبح بيقوللي هموت من العطش وواحد تاني بيقوللي أنا نازل أقابل بعد الفطار ده غير زبون بيقوللي الساعة 10 الواحد أحلي حاجة يعملها في رمضان يروح ينام ..حتي انا مش قادر أقعد ساكت و عمل أشوف اي حاجة اعملها في المحل لدرجة أني مسحت الشاشات 3 مرات و دي مكانتش بتحصل في أسبوع كامل و لولا وجع ضهري كنت مسحته كمان ..و ناوي بعد ما أخلص قراية قرآن بإذن الله أشغل نفسي بلعبة ولا جريدة ..ليه حاسس أن الناس أغبيا و مش عارفين يحسبوها صح ؟ و الموضوع ماشي مظهر و فهم غلط ..لدرجة أني لوهلة احترمت واحد شفته حاطط الشيشة في بقه و جنبه مراته و العيال و مش مكسوف حتي من التحجيبة اللي هيا لابساها ولا من بصات الناس ليه بس رجعت أقول ان البجاحة دي هيا السبب في انتشار النفاق الديني و بالتالي لو حد عنده المقدرة علي أنه يفهمني الصح أو يصلح غلطي مش هيعرف لأنه أصلا شايفني من بره هالله هالله ..

للأسف علاقاتي القريبة و أجمل اوقاتي كلها بقضيها في النت بما أني شغال في سايبر ..رغم أني بفضل الشاتينج علي الحقيقة لبعده عن المصلحة غالبا و عن السطحية و الشكليات و لأنه علاقة روحية أكتر ... فاللي بيحصل بقي أني لما ألاقي اللي بكلمه أو بكلمها كويس بديله أهتمامي كله و تفكيري كله بيبقي منصب علي الفهم الكامل ليه فبتفهم غلط ..اللي بيقوللي أنت بتحاول تعمل نفسك عبقري أو تعمل نفسك محلل نفسي لمجرد أني بقول حاجة اتهيأتلي فيه !! و اللي يقولي أنت بتتكلم كلام أكبر منك لمجرد أني قلت جملة قريتها في جرنان و انا مؤمن بيها !! و الكثير من هذا القبيل اللي ممكن افضل أكتب فيه لحد ما ايدي تقف .. بفكر لو بعدت نهائياً عن النت و حاولت أشغل نفسي في رمضان بالقرآن _ رغم صعوبة أو استحالة كده في شغلي مع ازعاج الأطفال و طلبات الزباين _ يمكن اعرف استغني عن اهتمامي بالناس اللي بيأذيني يوم بعد يوم _ رغم حسن نيتي ..مع وجود أخطاء ناتجة عن عدم التركيز أو الموود المش مضبوط أو الطبع اللي مبيتغيرش بسهولة _ و اللي بأذي بيه الناس كما يبدو أو علي الأقل بضيع وقتي ووقتهم ..يمكن لما أشغل نسي في حاجة تانية استفاد

عايز أخد اجازة الشهر ده و أقعد في البيت زي ربات البيوت _ no insult _ رغم الصداع الخماسي في البيت بالأضافة لصوت بابا العالي لما بييجي من الشغل و دوشة العيال الكتير أوي اللي بيلعبوا من بعد المدرسة لقبل الفطار ...بس الولد اللي معايا في الشغل عنده كورس و صعب يمسك ال 14 ساعة اللي أنا ماسكهم لأنه وراه مذاكرة .. فكالعادة كل ما بتمني حاجة مش

في كارت وصلني من صديق بيهنيني فيه برمضان و بجد أنا مبسوط أوي بس مستغرب من ناس لما بشوفها بتقول أحلي كلام و بتعمل تصرفات تحسسني أن انا فرخة بكشك عندهم لكن أول ما بنغيب عن عين بعض أو يبطلوا يشوفوني أونلاين مشوفش منهم ميل حتي بيقولي هاي أوي ازيك أو سلام عليكم ..يا رب الناس تبطل نسيان أو أنا ابطل تفكير في الموضوع ده ..

المهم انا تعبت من الكتابة و الضهر بيأذن ..فممكن أكمل كتابة في بوست تاني

عايز بس أدعي للأنسانة اللي بحبها ..يا رب يكون اللي هيا حاساه غلط و كفاية عليا اللي فات مش عايز احس بالوحدة النهائية تاني ..+ اني مش متخيل أنها تسيبي حاجة أنتي بتحبيها لأن اللي زيها المفروض ياخدوا كل اللي نفسهم فيه لأنهم نوعية من البشر أقرب للملائكية ..

رمضان كريم و فعلا حاسس أني مرتاح أكتر بعد البوست ده و كل ما هفكر في الشهر و بركته أكيد مش هكتئب ولا هتضايق ..علي رأي واحد مش فاكر اسمه ..رمضان ضد الاكتئاب