مش عارف

هكتب لمجرد الكتابة وبدون هدف
في دماغي كوبليه يخصني
علي لسان منير ومش فاكر مين تاني
ليه يا دنيا الواحد بيقرب من ناس بايعاه
ليه يا دنيا الواحد متغرب عن ناس شارياه
رغم أني مليش في الشرايط ولا السيديهات بس علي المستوي الشخصي بقالي أسبوعين من ساعة ما سمعتها و أنا بسمعها كل يوم في وداني مش من الراديو
ومعنديش أجابة غير ان الناس مبقوش ناس و الظروف بتمنعنا عن البني ادمين اللي بجد ومش بتتقاطع حياتي معاهم ألا في الوقت بدل الضايع
المهم ...كنت عايز أقول حاجة بخصوص استعراض الأزهر ..يعني لما بيتقتل كام واحد علي الحدود برصاص اسرائيلي مصنوع في تل أبيب بناخد بوسة من أولمرت و بنعمل مسامحين ..لكن لما شوية عيال يعملوا مسرحية ظاهرها القوة وباطنها التهييس ..يبقي الأخوان دول أوسخ من الصهاينة ..انا شخصيا مش بحبهم ولا هحبهم الا لما أجربهم في الحكم و أشوف هما بيتكلموا جد ولا بيسرحوا بالناس ..لكن بني أدمين عاديين يتمسكوا بداعي أنهم عملوا تمارين كاراتيه و كان عندهم كام سكينة مطبخ في بيتهم
طب أنا عندي ستة وهجيب من أصحابي كام سنجة وتعالوا خدوني من بيتنا أنا كمان
ولا لازم البس أسود و أقف في الجامعة و أقول صامدون وأشوح برجلي شوية ؟
يلا مش مشكلة ..المتنبي ده باشا والله ..مصر فيها مضحكات لكنه ضحك كالبكاء
أعدام صدام بيه ..رأيي فيه محتاج بوست ووقت وتفكير..لكن دموع الأسد فكرتني بجملة قالتها أم أخر حاكم مسلم في الأندلس
قالتوا ...أبكي كالناس ملكاً لم تستطع الحفاظ عليه كالرجال .. المهم مش الملك ...راح مع اللي راح ...حتي الكرامة ذهبت ولم تعد
يلا مش مشكلة برضه ...العيد بقي
أتحدي أي حد يقوللي أن العيد بيتطبق صح ..
العيد بقي عيد لحمة ( للكل معدا الممنوعين منها لأي سبب أو المكتئبين ) و حشيش ( للشياب العاطل والشباب اللي دماغه زي جزمتي ) و كل أنواع الزينة و اللبس اللي بيتلزق علي الجسم ( للبنات التافهين فقط ودول كتير )
يعني محدش عارف يعني ايه تضحية
واللي عارف ( زيي ) مش عارف يعمل ايه أو مش بيعمل أكتر من الكلام و غالباً مع نفسي
مش عايز أحلف ..بس طالما أحنا كل عيد بنمشي فيه بالمستوي ده ..مش هنورد علي جنة ..يعني حتى بعض المتدينين ..كل همهم زي ما ايبي قالت في البوست بتاعها ..هو الزكاة قبل ولا بعد الصلاة
للدرجة الدين بقي شكليات ؟
للدرجة دي بقينا مجرد ناس بتفكر في الشهوة والمزاج والفلوس ؟
وحتي الحكام اللي شبعوا سلطة مش بيفكروا غير في كيفية البقاء عليها طالما في صدرهم قلب ينبض _ عنه ما نبض يا شيخ ده أنت أبرد من الديب فريزر _ طيب وايه العمل ؟
مش عارف ..هدعي ربنا يهدي الجميع ...وهستني أخبار راوان ربنا يشفيها ..وأول فرصة هسيبهالهم يشبعوا بيها و أعمل كل اللي أقدر عليه عشان أرضي ربنا في مكان تاني مكان ميحرقش دمي بالشكليات و الحرية اللي بيستغلوها غلط و الدين اللي بياخدوا منه حتة ويسيبوا ميتين حتة
كفاية
سلام وأعذروني بس أنا كنت متنرفز و عشان خاطر روان قالتلي أكتب كتبت ..ولأن شيماء قالتلي برضه مش هتكتب ولا ايه
طالما في حد يهمه أني اكتب هكتب ..أما الشياكة في الأسلوب وترتيب الأفكار
فده مش وقته للأسف
وعلي رأي نجيب بتاع الحشيش _ نجيب باشا محفوظ العبقري _ إن آفة حارتنا هي النسيان
هنقري وننسي ونسمع وننسي ونشوف وننسي وسلام عليكم .

تفتكروا ليه حصل كده ؟!

غش رغم أنشغالي النفسي و المادي ..بس لما رشا قالتلي علي موضوع أول يوم العيد و اللي حصل فيه ..مش عارف أوصف اللي انا كنت فيه او اللي أنا فعلا عايشه وحاسه دلوقتي
واحد زيي أصلا مش بيروح الجامعة لأنه مش فاضي ومخنوق بس الموضوع ده مش ممكن اتجاهله ..
ولو حبيتوا تاخدوا فكرة عن اللي حصل فشوفوا اللينك ده
http://www.khayalworld.com/viewtopic.php?p=20473#20473

بصراحة مش عارف ابدأ ازاي ..

بس ممكن برضه تشوفوا مدونة الأخت شمس http://shamseddeen.blogspot.com/ وتعقيبها علي الموضوع خصوصا أنها حاطة لينكات لناس تابعت الموضوع

هحاول بقي أرتب أفكاري ..

1_الحكومة بتتكلم عن السياحة المزدهرة ...شفت منها في شرم لما رحت أشتغل هناك دعارة مزدهرة أكتر من أي شئ تاني وأسف في اللفظ بس دول تجاوزا حدود الفعل الفاضح ..وده بينطبق علي الأجانب و المصريين ولاد البطة البيضا ..او ولاد الحرامية ..او أصحاب الدماء الزرقاء الباردة .. والحكومة بتتكلم عن فرص العمل و الأسكان و البنية التحتية و الأسعار الممتازة و النمو الأقتصادي العالي جداٌ وانجازات الريس

مش قصدي بالحكومة حد معين ..قصدي كل كلاب الريس اللي بتتحط في أي مكان و أي وقت عشان تقول سمعا وطاعة يا مولاي

2_الصحف اللي بيملكها الشعب محبتش تعكر عليه وتفور دمه وتعرفه بالموضوع ده ..اضعف الأيمان الأسر تمنع بناتها من أنها تروح وسط البلد عشان يحافظوا علي اخر ذرة كرامة في حياتهم ..لكن انا رأيي أن الصحف المسماة بالقومية واللي 90% من صفحاتها متنفعش أكتر من ورق نمسح بيه أي حاجة .. معملتش كده عشان الموضوع ميطلعش بره أو ميأذيش حركة الدعارة المسماة مجازاً بالسياحة ...او يمكن عشان ميزعجوش السادة السفرا الأمريكي و الأسرائيلي و البريطاني و يخلوهم يتفسحوا براحتهم ..الله اعلم بس اثبتت صحفنا الكومية أنها فعلا مملوكة للشعب ومعمولة عشان تكدب عليه أو عشان تعيشه في جهل مش أكتر

3_الناس دي بتعمل كده ليه ...هتكلم بصفتي شاب وهتخيل نفسي رايح أعمل حاجة زي كده ..اكيد مش هكون في وعيي ..طب مغيبات الوعي ايه ..يا اما مكيفات .من البرشام مرورا بالحشيش لحد الأكستازي واللي مش عارفة حكومتنا الرشيدة النظيفة القوية الأنيقة النزيهة الشفافة أنها تمنع دخولها مصر بل بالعكس دول بيدخلوا تجار المخدرات لمجلس الشعب بالتزوير أو بيدخلوا شركائهم عشان يحموهم و يتفرغوا ..الشرطة .لخدمة الشعب بسحله في المظاهرات وبهدلته عشان مش معاه بطاقة

يا اما مشاكل وضغوط نفسية معنديش بيها دراية علمية كبيرة لكن أعتقد أن بصفتي مجرب ممكن أوصف ..

لما الواحد يكون مولود بعقل والعقل ده تلت تكوينه الأدمي و المحرك الرئيسي ليه ..والعقل ده علي مر السنين الدراسية بيندفن بالحيا وبيعملوله عمليات تفريغ فمش بيقدر يفكر بعد ما يوصل لسن المراهقة الا في الكورة ..اللي منعونا نلعبها و لغوا كل المساحات الخضرا اللي في المدن الكبيرة والمدارس باستثناء أندية أولاد الذوات ..

أو في الدين عن طريق الجوامع و كده وده للأسف موضوع مش متنظم صح و مخوفين الناس منه و اللي بيصلي بأنتظام مصيره المعتقل عاجلاً أم أجلاً

أو في الجنس ..بالمصطلحات العامية ..حريم ومزز ..إلخ ..وده بقي متوفر وبشدة وبيشجعوا عليه كمان بمسلسلاتهم اللي البنت بتلبس فيها المشهيات بره البيت و تيجي في البيت تلبسلي لبس شبه محترم لو لبسته بره عداد ذنوبها هيخس التلتين ..مسلسلاتهم اللي فيها الحبيبة ممكن يتقابلوا في أي حتة و يقولوا أي حاجة ويتجوزوا ببساطة تحرق دم كام مليون شاب و شابة مش لاقيين عش عصافير يلمهم

وكمان المواقع الأباحية ..الأستخدام الأوسع للكمبيوتر وهدية الغرب و الصهاينة لمجتمعاتنا المثالية عشان يكملوا الصورة الوردية ..مواقع سهلة جدا و انا من شغلي بقول ان اي طفل ممكن يحفظها و يشتغل عليها زي الحصان

فلما الشباب يشوفوا كده ويشوفوهم في شرم ومارينا و أي حتة هاي كلاس كل واحد ابن دادي ومامي حاطط ايده في وسط واحدة بنت دادي ومامي ..متعبوش في دنيتهم عشر اللي بيتعبه شاب خد دكتوراه ومش لاقي شغلانة توفرله عيشة كريمة من ابسط معطياتها أنه يتجوز زي ما الناس بتتجوز ..ومع كده بيكونوا مبسوطين خالص وواخدين راحتهم

يعني الخلاصة ...ناس منعوهم انهم يعرفوا دينهم ..ووفرولهم مغيبات العقل ..وخلوا الأسر المصرية همها الأول لقمة العيش ليس الا فبالتالي مفيش وقت للتربية ومفيش طاقة يستحملوا بيها واحد مكافح عايز ياخد بنتهم اللي بتكون غالباً مشبعة بفكر القصور والعربيات والشقق اللي علي النيل ومش عايزة تتعب في حاجة ..ناس ادامها كله بيعمل و شقق الدعارة معروفة غالبا في الأحياء الراقية وغير الراقية ..وناس شايفة الكباريه المسمي مجازاً بالكازينو بتاخد تراخيصها هوا في حين أن اللي عايز يعمل محل بلاي ستيشن محتاجله الشئ الفلاني عشان يرخص وده مش متوفرله ..

عايزين شباب مسطولة ومخنوقة ومكبوتة تعمل ايه ...و ايه !!

في غياب عنصري الأمن و الأمان اللي بيتشدق بيهم ريسنا الجميل السكرة في كل خطبه

يعني لا تربية ولا تعليم ولا شغل بيحترم البني ادم وبيديله حق تعبه ..انا مثلا ممكن معملش اكتر من 300 جنيه مع أني بشتغل 14 ساعة يوميا اللي بره في أوربا بيشتغلوهم في يومين ..ولا تكافل اجتماعي ومحدش طايق حد واللي ممعاهوش ميلزموش .. ولا كمان في ردع وعقاب للي يعمل كده ..هو في ردع للحرامية الكبار لما هيكون في ردع لدول ؟!

يبقي اللي حصل ده منطقي علي الأقل من منظور واحد عقله فاضي ملحوش مغيب ومليان كلاكيع نفسية زرعها جواه مجتمعه من أول الرئيس الحكيم لحد أصغر مدرس ألعاب في مدرسة ابتدائي

4_ اما بقي ...ازاي الشباب دي تعمل كده ..فأنا هتكلم ليهم ..رغم تيقني ان الناس دي مش هتفتح الجهاز عشان تشوف مدونة بني ادم زيه زيهم ..ممكن يشوفوا مدونة اباحية ولا حاجة بس الحق مش عليهم ..لكن هعمل اللي عليا

لما ميكونش عندك ارادة تحارب بيها كل ده عايز ربنا يساعدك ويوفقك ازاي ؟ لما تستسلم وتقتل ضميرك لأنك مرتاح كده عايز مصيرك يبقي ايه غير جهنم وبأس المصير ؟ لما دمك يفور لو حد عاكس اختك لكن أنت تستحل لنفسك اللي انت عايزه مع أخت غيرك و تستخدم نفس قوانين الغابة اللي بيستخدمها بوش في العالم ومبارك في مصر ..الكيل بمكيالين و القوة هي اللغة الأولي والأخيرة ؟

ليه منحاولش نطلع الجزء النضيف اللي جوانا ..ربنا مخلقش حد وحش ..الدنيا بتخلينا وحشين بس برضه فيها حاجات _علي قلتها _ ممكن تخلينا حلوين و ناس محترمة نفسها وغيرها ..ليه مش ندور علي الحاجات دي ؟!

5_ نوعية البنات دي أصلا بتبقي ايه ؟ ..يعني البنت اللي بتستثير الشاب وتكون ماشية في الشارع مبسوطة وهو ماسك نفسه لأي سببٍ كان لحد ما فاض بيه ...يا اما بنت أهلها عايزين يتباهوا بجمالها فيلبسوها وهي زي الهابلة اللي مسكوها طبلة ممكن متكونش عارفة أصلا الشاب بيبص علي جسمها ليه وتبقي مبسوطة وخلاص ..أو بنت بتحب تبقي دلوعة ومميزة فبتظهر جمالها وتعوض بيه عقد النقص اللي جواها ...أو بنت بتقلد الغرب في لبسهم بس لكن مش تقلدهم في أي حاجة تانية عدلة رغم أن الغرب يوم ما قلدنا قلدنا في علمنا مش في لبسنا ومش في أحدث انظمة تربية الجواري ..أو بنت بتقلد صاحباتها وبتقول ما هم يا ماما لابسين كده ..أو بنت أهلها رافعين الأريال وأخلاقهم زي الزفت فغالبا ما بتعلن تمردها عليهم بأنها توصل لأقصي درجات الأنحلال و إذا كان رب البيت بالدف ضاربٌ ..أو بنت لا بيها ولا عليها و بتجيب اللبس لأنه جميل وبتعمل المستحيل عشان تقنع أهلها اللي بيكونوا مش متفرغين نفسيا وبيجيبوا أخرهم معاها فبيتعاملوا بقسوة وحدة زيادة بتخليها تعند أو بتسيب زيادة بتخليها تنفتح أكتر ..أو بنت معلش في اللفظ واطية واطية واطية ودي بقي البيئة بتشكلها من عوامل كتير ممكن نتكلم فيها في موضوع تاني بس برضه الحق مش عليها وأصلا مهما كانت مستفزة في لبسها أو تصرفاتها انا شايف أنه خسارة الواحد ياخد فيها ذنب لأنها بتكون وصلت لمرحلة أرخص من أنها يتبصلها أصلاً بس بتمثل دور بيغطي علي كده ..أو _وده اللي حرق دمي أكتر وأكتر _ بنت لابسة محترمة جدا وعارفة مسئولية أنها شرفها أغلي من شرف الراجل و أنها هتبقي أم و هيبقالها قيمة كبيرة ربنا خلقها عشانها فبتحافظ علي نفسها وتصرفاتها بالعقل مش بتشدد ومش عارف ازاي ابص لواحدة منقبة أصلاً ..تعمل ايه عشان تبعد عينك عنها ؟ تنتحر ولا تحبس نفسها ؟ _ أو بقي بنت بتحاول بتكون محترمة وكويسة بس غصب عنها من غير ما تحس بتلفت الأنتباه سواء بضحكة أو بلبس أو بحركة أو بكلمة ..

عايز بقي أي واحد من اللي كانوا في وسط البلد دول يجيبلي نموذج لواحدة من اللي اعتدوا عليهم يكون خارج النطاق ده .عايزه يقنعني أن نص البنات دول بجد مش فاهمين أنهم مستفزين لشهواته و أنهم مهما كان لسه فيهم برائة وحياء بس الظروف اللي حواليهم هيا اللي حطتهم في خانة غلط ..عايزه يقولي ليه لما بنت لابسة كويس وعايشة حياتها باحترامها افكر مجرد تفكير أني ابصلها مش ألمسها ..عايزه يقنعني ازاي اروح لواحدة تقريباً مصيرها جهنم وأروح أخد منها متعة سريعة عشان اشاركها نفس الطريق ؟

انا بجد بدأت أخرج عن التركيز بس عايز أحكي حاجة قبل ما أخلص

ايام الأستفتاء علي تعديل الدستور عشان يعرفوا يورثوا العزبة لجيمي ..كنت في قهوة ..كافيتريا ..ولقيت واحد بيقول مين عايز ياخد عشرين جنيه في شغل 5 ساعات ..فكنت انا الوحيد اللي رحتله بس صاحبي قعدني وقاللي ده حزب وطني وعايز الناس تروح تصوت باين ..فأنا مقبلتش الموضوع علي نفسي بس رحت للراجل وقلتله انت طلباتك فيه ايه ..قاللي انت مش نافع وعايزين واحد فيه صحة وشكله يخوف و انت شكلك غلبان فرحت جبتله واحد أعرفه كان محتاج فلوس ضروري و روحت البيت ونسيت المسألة .

يومها كان الثلاثاء 24 مايو ..تاني يوم بليل مقابل الواد لقيته أول مشافني مشي بعيد ..جريت وراه _رغم اننا مش اصحاب أوي _ وسألته فيه ايه فوقف في ركن مضلم كده وعيط وقاللي انت السبب .وبعد ما هدي طلع أنه كان واحد من اللي اتحرشوا بالبنات في عبد الخالق ثروت ..بيقولي وزعوا عليهم سجاير بانجو وحشيش بس علي حد قوله كانت مختلفة عن أي سيجارة شربها ..وأول معملوا دماغهم ..مجرد ما واحد سخنهم ..مراحش معاهم ..جريوا زي الكلاب علي البنات وفي دماغهم ان دول ....عاهرات مش أكتر جايين يمتعوا جنابهم ..المهم الولد لما رجع وفاق فضل يفكر و قال باللفظ ..انا مستفيد ايه من اللمسة ولا المسكة دي وايه الخبرة اللي حصلت ؟ و هعمل ايه لو أختي كده ..هو فلسطيني و ساب مصر خلاص بعد نوبة تدين اقتنع انها بلد بنت ستين في سبعين ودلوقتي هو في السعودية علي ما أعتقد ..وفضل يربط الأمور ببعضها لحد ما وصل أنه بقي اسوأ من الصهاينة لأنه طول ال 15 سنة اللي عاشهم في نابلس مشافش الا حالة تحرش واحدة ببنت فلسطينية و الجندي كان مخمور ...

يعني هو غلب الخنازير لما عمل كده و اللي معندهمش أي مانع غير أنهم مهمتهم عسكرية مش حيوانية ...مهمتهم يقتلوا الجسد مش الروح

في النهاية انا عايز أقول ...لكل أب وأم انهم يربوا ولادهم كويس لأن الأبن اللي هيفسد اصلاحه صعب ومتوقف علي رحمة ربنا ودي منقدرش نتحكم في وقتها ..تيجي وقت ما ربنا يريد وممكن الأهل ميستحملوش ويسلموا أمر الأبن أو البنت لربنا

عايز أقول برضه أنهم لازم ياخدوا بالهم من عملية تفريغ العقول اللي بتحصل بشكل منهجي لولادهم من أول الحضانة و مروراً بالتلفزيون و السينما

عايز أقول لكل حد حاسس أنه قريب من ربنا يدعي كتير

يدعي أن ربنا يهدي المسلمين ..

ربنا يستر علينا

هو اللي راح مبيرجعش ؟!

مفيش سبب محدد أكتب عنك النهارده يا محمد ..بس الواحد ميضمنش يعيش لحد أمتي
في يوم زي ده من سنة و شهرين شفتك لأول مرة
ضحكتك بصوت عالي و ذوقك في التعامل خلوني أجي السايبر أكتر من مرة كزبون رغم أنه _حتي و انا شغال فيه دلوقتي _ سايبر نص لبة علي رأيك .
عوضتني في الفترة دي عن حاجات كتير مكنتش لاقيها ..صراحتك كصديق و كأخ..خبرتك _رغم صغر سنك بالنسبة لي _ في حاجات أنا مكنتش بعتبرها مهمة ..و تطوعك بخدمتي في حاجات كنت بتكسف فيها أوي ..وكمان الصورة الوردية اللي رسمتها عني للناس والكلام اللي مكنتش أتخيل أن حد يقوله عني لولاك أنت و طبعاً بمشيئة ربنا .
كنت جاي منقول لحي جديد ..خبرتي عنه قبل كده أنه مش مكان أعيش فيه ومكنتش بحب أمشي فيه أصلاً
وفعلاً لحد دلوقتي أغلب الناس هنا زي منتا كنت بتقول بالضبط ...غجر بس اتعودت و ادينا مستحملين ..
أنت من أهم أسباب أني اشتغلت في السايبر اللي أنا بكتب منه دلوقتي ده _بعد ما كنت خالي شغل ومش طايق الدراسة_ ومن أهم اسباب أني بستحمل أي حاجة فيه عشان كلامك معايا وتشجيعك ليا ولحد دلوقتي كلامك هو الدافع الرئيسي لأستمراري هنا .
تعرف ..أخويا اللي هو عايش معايا في البيت مكانش بيلجألي زي ما كنت بتيجي أنت ومكانش صريح معايا بنفس صراحتك معايا

وحشاني كل حاجة كنا بنعملها ..واحشني سباقات العربيات اللي كنت بتكسبني فيها بكل بساطة ..ماتشات الكورة اللي أكون كاسبك فيها 9 ولا 10 و تقول للناس أن أنت الفرقة الكسبانة ..حتي تصرفاتك اللي كنت بنتقدها وحشاني أوي ..

تعرف ؟..الكلام ده كان نفسي أقوله ليك قبل ما تروح أسكندرية ..اقولك أنا متشكر علي كل اللي عملته معايا و أقولك انك كنت أخ و صديق ملوش زي مهما عملت وغلطت في حقي ..كنت عايز أعتذرلك عن كام حاجة كده ..

مش هنسي تعليقك لما شفتني وأنا بشوف صورة راوان ..بتقولي أنت ناوي تتجوز ملاك..ساعتها أنا ضحكت و شلتها ومكنتش متخيل أنك فعلاً صح و أنها أقرب للملائكية ..بقالها 16 يوم معرفش عنها حاجة يا محمد ..لو تعرف أنت تعرفلي عنها حاجة و تيجيلي في المنام زي ما جيت قبل كده ..

لحد دلوقتي مش متخيل أزاي سبتك تروح اسكندرية من غير ما أقولك لأ ...عارف أنك مجنون وهتنزل البحر ..وعارف أنك مبتعرفش تعوم..بس وجود صاحبك معاك خلاني أأجل المناقشة يومها لأني كنت تعبان ...ومكملتش المناقشة تاني ..قضاء ربنا ولا أعتراض عليه..نفسي تكون شايف الكلام ده ..نفسي تعرف أني مقصر في حقك و مش بدعيلك كتير ..بس والله أول ما هقدر هعمل حاجة تعوض جزء بسيط من جمايلك عليا ..بإذن الله .

الناس اللي كانت بتعيط يومها و اليومين اللي بعدها كانوا بيمثلوا أو كان انفعال مؤقت..بس والله وربنا شاهد .. انا رغم أني كنت بهديهم وماسك نفسي قدامهم بس لحد دلوقتي فاكرك و بدعيلك بالرحمة و المغفرة ..نفسي أشوفك تاني في حلم أطمن أنك عرفت الكلام اللي أنا قلته بعد فوات الأوان ..اطمن عليك و أنت عند ربنا ..

كنت فاكرك أكتر واحد بيكره مصر عشان انتقادك اللي زاد عن انتقادي ليها ..بس يوم ماتش مصر وليبيا في كاس الأمم ..لما ميدو جاب الجون ..صوتك العالي أوي و عروقك اللي كانت هتنفجر و أنت الوحيد اللي فضلت فرحان اكتر من دقيقة ..كنت براقبك و انا مبسوط ..تأكدت ان العيوب اللي بتبان منك دي مجرد قناع مزيف فرضه عليك المجتمع

عموماً انت انسان طيب وجميل أوي يا محمد و قناعك المزيف مخدعنيش و بإذن الله ربنا هيسامحك عليه ..بإذن الله اشوفك تاني في الجنة

ومعتقدش أن في صاحب هيعوضني عنك ..ومعتقدش أن في حاجة تخليني أعرف أرد علي البنت اللي بتحبك وسؤالها ليا يومها ..ليه سبتوا يروح اسكندرية ..كان هيسمع كلامك يا ضياء ...لحد دلوقتي السؤال لسه في عينيها ..مش مستوعبة مسألة القضاء و القدر ..بس مين قال أني كان يصح أسيبك و أمشي زعلان ومنكملش كلامنا

ربنا يغفرلك يا محمد و يجمعك بكل اللي بتحبهم و يحبوك في الجنة ..حتي محمد عبد الوهاب اللي كنت فخور بتشابه اسمكم مع بعض طلع عند ربنا ..كان نفسك تسلم عليه وتاخده بالحضن عشان رافع راسك وسطينا

سلمت عليه يا محمد ؟!

اشمعني صحيح ؟!

امبارح و أنا بتسحر صدفة كده قعدت في أوضة أخواتي اللي فيها التفلزيون ..شفت جزء من مسلسل الفخراني اللي اسمه سيرة الهلالي باين .
بغض النظر عن رأيي في المسلسل ، السيناريست أيا كان أسمه حط جملة علي لسان يحي الفخراني كانت تحفة و شغلت دماغي لدرجة أني بدل ما أحط السكينة في الليمونة حطيتها في صباعي ..
ليه لما حد بيكره أو بيتخنق أو مش بيطيق حد مش بنطلب مبررات و ممكن نستوعب الحوار ده علي أساس أنه مش نازلي من زور و أنه هو كده ملهاش تفسير !! أما لو حبيت أو اهتميت بحد و خصوصاً لو كان من الجنس الأخر أو كان مهم و ممكن بجرعة نفاق نستغله في أي مصلحة
يعني لما أهتم بيك لازم أكون عايز منك حاجة ؟ ولازم مليون مبرر ؟! ولو مش مقتنع يبقي أنا مصلحة ؟! و العلاقات العاطفية مثلاً يكون الواحد أو الواحدة بيحب حد مستغل و بشع مع الناس كلها بي لمجرد الضعف أدامه بنقبل منه أش شئ و من غير تفسير لكن مع اللي حوالينا طالما مفيش أرتباط عاطفي بنقعد نرمي الأتهامات و نقول ليه مهتم ...أكيد عايز كذا و كيت ..مع أننا لو اديناله الفرصة احتمال نبقي غلط و مش عيب لو فكرنا في احتمال استغلالنا لكن العيب ان الأحتمال ده يسيطر علينا لدرجة أننا نرفض أهتمام ملوش غرض من انسان حظه السئ أنه بيفكر بفطرته مش زي ما المجتمع عايز
موضوع غريب أوي و بكره أحس بيه لأني بحس بالغباء الأنساني كله متجسد فيه ..اهتمام من حد مش عايز حاجة بيترفض و العكس لما واحد أكون مشدودله عاطفيا يبقي اهتمامه كله مصلحة بس أنا مش دريان .. هو السبب نقص انساني ؟ ولا غباء سببه سرطان يوسف والي ؟!
عايز أفهم عشان أرتاح لأن المشكلة دي مرت بيا ..مليون مبرر مطلوب عشان أثبت حبي لحد و أهتمامي بيه ؟! و ممكن مبرر تافه يقنع أي حد بالكراهية و كل المشاعر الغلط ؟! هو الكراهية بقت الأصل ؟!
و في النهاية بختمها بجملة غناها منير في رائعته ...حدوتة مصرية
لايهمني أسمك..لايهمني عنوانك ..لايهمني لونك ولابلادك..مكانك!! ..يهمني الأنسان ..ولو ملوش عنوان
و المدونة دي مطروح عليها موضوع خطير ..سياسي و تاريخي في نفس الوقت
متعلق بأغتيال السادات اللي رغم رأيي فيه بس شايف أن الأسلوب ده أكبر غلط
معاكم البوست
مدونة شاب أسكندراني
http://katkooot.blogspot.com/

حكيم قالها ..ازاي أعملها ؟!

شاب ذهب إلى أحد حكماء الصين ليتعلم منه.. وسأله
"هل تستطيع أن تذكر لي ما هو سر النجاح؟"فرد عليه الحكيم الصيني بهدوء و قال له "سر النجاح هو الدوافع"

فسأله الشاب " و من أين تأتي هذه الدوافع؟"

فرد عليه الحكيم الصيني " من رغباتك المشتعلة"

وباستغراب سأله الشاب "و كيف يكون عندنا رغبات مشتعلة؟"

وهنا استأذن الحكيم الصيني لعدة دقائق وعاد ومعه وعاء كبير مليء بالماء وسأل الشاب هل أنت متأكد أنك تريد معرفة مصدر الرغبات المشتعلة؟

فأجابه بلهفة: طبعاً فطلب منه الحكيم أن يقترب من وعاء الماء و ينظر فيه، و نظر الشاب إلى الماء عن قرب و فجأة ضغط الحكيم بكلتا يديه على رأس الشاب ووضعها داخل وعاء المياه !!

و مرت عدة ثوان و لم يتحرك الشاب، ثم بدأ ببطء يخرج رأسه من الماء، و لما بدأ يشعر بالاختناق بدأ يقاوم بشدة حتى نجح في تخليص نفسه و أخرج رأسه من الماء ثم نظر إلى الحكيم الصينيوسأله بغضب "ما هذا الذي فعلته؟"

فردّ و هو ما زال محتفظا بهدوئه و ابتسامته سائلا
"ما الذي تعلمته من هذه التجربة؟" قال الشاب: لم أتعلم شيئا

فنظر اليه الحكيم قائلا لا يا بني لقد تعلمت الكثير، ففي خلال الثواني الأولى أردت أن تخلص نفسك من الماء و لكن دوافعك لم تكن كافية لعمل ذلك، و بعد ذلك كنت دائما راغبا في تخليص نفسك فبدأت في التحرك و المقاومة ولكن ببطء حيث أن دوافعك لم تكن قد وصلت بعد لأعلى درجاتها.. وأخيـراً وعندما شارفت على الغرق أصبح عندك الرغبة المشتعلة لتخليص نفسك، و عندئذ فقط أنت نجحت لأنه لم تكن هناك أي قوة في استطاعتها أن توقفك
ثم أضاف الحكيم الذي لم تفارقه ابتسامته الهادئة :عندما يكون لديك الرغبة المشتعلة للنجاح فلن يستطيع أحد إيقافك

___________________

_ تعليقي ...مش لاقي الرغبة المشتعلة دي ..ماتت مع اللي ماتت و هيا بتحبني ولا ماتت مع التعليم المصري العقيم ولا مع الأقتصاد اللي في الواقع مفهوش اي اقتصاد الا لو كان ليه تعريف جديد _ الحفاظ علي ثروات العصابة الحاكمة و الأنتهازيين و الحرامية _ ولا يمكن سذاجة الأهل و عدم وعيهم بالتربية و التنشئة الصح ...ولا يمكن ماتت يوم ما بعدت عن ربنا و لحد دلوقتي ما رجعتش زي الأول ..

عموما انا بقيت قنوع ..عايز أنجح في أني أعرف أقرب من ربنا و في أني أقدر أدعي للي بحبهم و راحوا أو اللي بحبهم و بعدوا أو اللي بحبهم و مجودين ..ان ربنا يجمعني بيهم في الجنة يمكن تكون فرصنا هناك أفضل

يا رب اهديني

هل .. و ليه؟

اسئلة كتيرة بتدور في بال أي واحد فينا .. و في اللحظة دي خطر في بالي اسئلة كتير و قلت يمكن لما أخرجها من بالي و يبقي ليها شكل مادي الاقيلها اجابة أو اتيقن من عدم جدوي اي سؤال منها

هل احنا نستاهل تكريم ربنا لينا كبشر .. في الوقت الآني؟ .. هل البني أدم فينا بيتحول لمعدوم الضمير مع الوقت و المتغيرات ولا بيتولد كده؟ هل اللي بيكنز فلوسه ده هيستفيد ب 50% منها؟ هل القناعة فعلا كنز لايفني .. وهل الناس القنوعة دي قنوعة فعلا ولا مجبرة علي كده؟ هل الأهل مسئولين عن تربية أولادهم 100% ولا المجتمع مسئول معاهم في التنشئة و التربية؟ هل المفترض في الزوجين الخبرة بالتربية قبل الأنجاب ولا يجيبوا الأطفال و يجربوا فيهم و بعدين يشتكوا؟ هل الصح اننا نعترض علي الحرامي الكبير و نتجاهل ذنوبنا الصغيرة اللي بتتجمع من غير منحس و تبقي أبشع من أبشع كوابيسنا؟ ولا الصح أننا نقول ما هو اللي فوق دول غلطاتهم بدأت من الغلط الصغير و نبدأ نرمي كل نشال بحجر و نتجاهل الحيتان؟ .. هل الكتابة غرض ولا وسيلة؟ .. ليه البني ادم مش بيتعلم من اخطائه؟ ليه بنبص بعيد في حين ان الراحة جوانا احنا؟ ليه لما تخلص لحد يبقي حساس معاك؟ ليه لما تحتاج متلاقيش ولما تلاقي متحتاجش ؟ هل ده قضاء و قدر ولا تراكم اخطاء؟ ليه بنمسك المشكلة التافهة نتمعن فيها و المشكلة الكبيرة نستخسر التفكير فيها؟ ليه بنفكر صح في مشاكل غيرنا و مشاكلنا مهما كانت بسيطة بنحس ادامها بالعجز ؟ ليه بنهرب من أحزاننا للوحدة و نهرب من الوحدة للأحزان؟ ليه خير الكلام ما قل و دل؟ ليه منكونش اكتر صراحة خصوصا في الأسر و بين الأصدقاء و الأحبة؟ ليه التفاهة بتتقدر و ممكن يعملولها تماثيل و يخصوصلها ساعات هوا أكتر ؟ ليه الأناقة هي العري مش الحشمة؟ ليه الأعتقاد ان المخدرات هي الحل أوالانشغال في لا شئ هوالحل؟ ليه اللي بيكدب مش يبطل كدب؟ ليه اللي بيحاول يكون كويس بيتفهم غلط؟ ليه الأنانية و نرضي لغيرنا الغلط و منرضاهوش لنفسنا؟ هل فعلا الأسئلة بتنور طريقنا؟ ليه الأمور بالنسبة لأغلب الناس نسبية لما بيستفادوا من كده بغض النظر عن الأخلاق و الضمير و مطلقة برضه لما بيستفادوا؟ ليه انا منتقد أوي كده؟

سؤالي الأخير .. ليه الواحد فينا بيكدب علي نفسه و يصدق شيطانه ؟
يكفي هذا القدر عشان مش من أول بوست هكره الناس فيا .. دايما اللي بيتكلم بيبعد عنه الناس .. للأسف
يا رب اهديني و نور طريق كل مؤمن .. كل قلب أبيض
كتير من ال هل هل هل .. انا بدأت أغني هل هلالك يا رمضان
رمضان كريم عليا و عليكم يا مسلمين