البقاء لله يا ريس

تدوينة كتبتها  الدكتورة مروة  ومسحتها لأنها شكت إن فيها شماتة.بس أنا عدلت حاجة بسيطة وهنزلها لأن مفيهاش شماتة.ولازم نفصل بين تعاطفنا مع أم الطفل زيها زي أم أي طفل بينتقل لرحمة ربنا ودعائنا ليها سراً بالصبر..وكذلك اليقين الطبيعي عند أي حد عارف دينه إن الطفل البرئ في الجنة

وبين جوقة النفاق _ تقرباً من الجد فقط لا غيرأو شكر لنعمته علي رئيسهم مش رئيسي  _ اللي شغلها الإعلام وحالة الحداد الغير طبيعية وقطع الإرسال والجنازة اللي الطفل نفسه لو رجع للدنيا هيرفضها لأنه رايح لربنا مش رايح للبشر..ونتج عن ما سبق حالة تعاطف غير إرادية حس بيها البعض من الغلابة ..أو إرادية نافق بيها البعض نفسهم قبل أي حد تاني

أنا بس مندهش..هو فعلاً بقي صاحب العزبة ؟ واستطعم الناس الخضوع للفرعون حتي في أدق التفاصيل ؟ من 3 سنين كان مستهتر بيتفرج علي ماتش السنغال مع جدة الحفيد ومبانش عليهم غير السعادة برغم إنه ولي أمر سيحاسب عن رعية ماتوا بسبب إهمال إدارته وعضو من أعضاء حاشيته..مفكرش إكراماً ليهم حتي يشوف الماتش في بيتهم ..ليه بقي كل التعازي العلنية والسرية..فيس بوك وماسنجر ورسايل علي القنوات..هل لأن الزن علي الودان إمبارح كان أمر من السحر ؟ ولا لأن إنفلونزا النفاق استشرت بشكل لا إرادي ؟ ولا الجد فعلاً قدر يبقي فرعون بيحكم فراعنة ؟ اسئلة ملهاش رد لا عندنا ولا عند الجد

أسيبكم مع كلام مروة اللي وجعلي قلبي فعلاً..وربنا يرحم الجميع..أحياء وأموات

البقاء لله يا ريس .. انا أم ابني مات وهو بيحاول يهج من البلد ويروح اليونان .. غرق هو واصحابه فيه منهم الي رجع ومنهم الي اكله السمك اصله مبيعرفش يعوم .. ومعرفوش أهله يلفوه بعلم مصر الحرير أصله ناكر للجميل ورمى بنفسه في التهلكة
البقاء لله يا ريس .. انا أم ابني الوحيد مات وهو واقف يستنى الترام .. وقعت على دماغه المحطة - رغم انها كانت جديدة - ومات في الحال كان شايل في جيبه وقتها جواب ترشيحه لكلية الطب غلطته انه استنى التروماي
البقاء لله يا ريس .. انا أم ابني مات متكهرب وهو بيعوم في حمام سباحه غلطتي اني لبسته مايوه وملحقتش اسفره بره ولا حتى يوصل المستشفى الميري .. لان صاعقة الكهربا كانت اسرع .. قدر ربنا وعطيته استردها
البقاء لله يا ريس .. انا أم ابني مات وهو بيدافع عن شباب البلد دي ضد تاجر مخدرات .. وكان يدوب عريس جديد ومطلعش حتى بزفة جنازة عسكرية بعد موته
البقاء لله يا ريس .. انا أم طفلي مات وهو بيتفرج على فرح من البلكونه برصاصة.. طايشة شقاوة عيال يا ريس
البقاء لله يا ريس .. أنا ابني كان عندكم في القسم خدوه من الشارع سليم رجعلي جثة .. واحتسبته عند الله شهيد .. مش هو كده شهيد يا ريس؟؟  يا رب يكون شهيد يا ريس
البقاء لله يا ريس .. أنا ابني دكتور الجامعة مات وهو خارج من صلاة الفجر..عشان يسرقوا منه الموبايل  .. غلطان حد قاله يخرج في ساعة متأخره وكمان يشيل موبايل غلطان يا ريس


البقاء لله يا ريس ..  أنا أم طفل بيموت كل يوم في المستشفى من سرطان وامراض الدم وعيوب خلقية و .... لاني معيش تمن امبول الدواء .. و مستنيه نفقة الدولة  .. قبل ما يموت زي الحيوانات النافقة على سرير مستشفى حكومي
البقاء لله يا ريس .. انا اب ابني مات مولع في قطر الصعيد ومكنش حيلتنا غيره .. فات وسابلنا كوم لحم مراته وعياله وانا عاجز ومريض .. ياما قلتله بلاش تركب درجة تالتة واطلع على السطح أو خليك في السبنسة يا ريس
البقاء لله يا ريس .. انا ابني ومراته ماتوا في عمارة لوران في اسكندرية .. كانوا لسه عرسان مكملوش شهر العسل .. كان نفسي اشوفلي اي حفيد ..  حفيد بس يا ريس

البقاء لله يا ريس .. انا والد اسلام فاكره يا ريس ؟ ؟ اسلام اللى المدرس ضربه في قلبه موته رغم ان قلبه كان سليم وبكامل صحته .. كان من اشطر واهدى طلاب المدرسة .. ضربة قلبه حرقت قلبي عليه يا ريس
البقاء لله يا ريس .. انا اب من الدويقة او كنت من الدويقة رجعت من شغلي لاقيت اطنان حجارة فوق اولادي ومراتي .. حاولت اغسّلهم معرفتش .. اصلهم طلعوا اشلاء بعد يومين وتلاته واسبوع ..  كان نفسي صورهم تنزل في التليفزيون او حتى يتكتب اسمهم في جرنان اصفر يا ريس
البقاء لله يا ريس .. انا جد زيك مات ابني ومراته وعياله في عبارة السلام من البرد والغرق .. حد قالهم مياخدوش عوامات معاهم  .. بس علي الأقل مماتوش لوحدهم وكان معاهم اكتر من الف واحد .. وتخيل يا ريس إن التليفزيون مقطعش الارسال ولو لساعة واحدة بالعكس ده سابلنا الماتش نتفرج عليه ونفرح بالفوز عشان ننسي  .. والاجمل ان صاحب العبارة طلع براءة من قتلهم .. اصلهم ماتوا موتة ربنا .. بس تعرف وحشوني اصل اعز الولد ولد الولد و كان نفسي اشيل جثمانهم حتى يا ريس

البقاء لله يا ريس ..أنا أي أب لأطفال وشباب بيروح دمهم هدر علي الأسفلت كل يوم ..وبيهرب القاتل وبيفلت المسئولين والجرح مش بيندمل يا ريس

البقاء لله يا ريس ..إحنا أسر شباب زي الورد انتقلوا لرحمة ربنا من 8 سنين لما طيارتهم وقعت أدام نيويورك لأسباب غامضة ومنفعناش بحاجة الصندوق الإسود ..هم لقوه صحيح يا ريس ؟! ادعيلهم يا ريس
البقاء لله يا ريس .. احنا أغلب شعب مصر كله الي مات واندفن من اكتر من 25 سنه من الفقر والجوع والمرض والتخلف والتعصب والقوانين وبلاش اكمل .. متزعلش يا ريس وعمر حفيدك التاني ربنا يبارك لوالدته فيه ويطولها في عمره.. بإذن الله طبعاً يا ريس
افتكر إن الموت مبينساش حد .. أول الشهر احتفلت بعيد ميلادك .. اعتقد دي اخر مرة هتحتفل بيه لانه مينفعش تحتتفل بذكرى ميلاد وموت في نفس الشهر .. ربنا يصبر أم الفقيد ويصبرنا كمان يا ريس .. أنا أسف لأني  حاولت افتكر قد ما اقدر الناس الي ماتوا بس الذاكره مستحملتش من كترهم


 البقاء لله دائماً وأبداً يا ريس..ويفني العبد ويبقي الله

تعرف كده يا ريس ؟! يا رب تعرف يا ريس

البقاء لله يا ريس

صدق الله العظيم

قُلْ إِن كَانَ آبَاؤُكُمْ وَأَبْنَآؤُكُمْ وَإِخْوَانُكُمْ وَأَزْوَاجُكُمْ وَعَشِيرَتُكُمْ وَأَمْوَالٌ اقْتَرَفْتُمُوهَا وَتِجَارَةٌ تَخْشَوْنَ كَسَادَهَا وَمَسَاكِنُ تَرْضَوْنَهَا أَحَبَّ إِلَيْكُم مِّنَ اللّهِ وَرَسُولِهِ وَجِهَادٍ فِي سَبِيلِهِ فَتَرَبَّصُواْ حَتَّى يَأْتِيَ اللّهُ بِأَمْرِهِ

عن حلم أسطبل عنتر سأتحدث

مفتتح

اهو ده اللي صاااار وادي اللي كااان

مااالكش حق تلوم عليا ما لكش حق

تلوم عليا ازاااااي يا سيدنا

وخير بلدنا ماهوش في ايدنا

قول لي عن اشياء تفيدنا

وبعدها ابقى لوم عليااااا

عن صوت لأطفال في عمر الزهور يشدو بأروع طقطوقة سمعتها أو هسمعها في حياتي

عن تطابق معناها التام مع أحلامهم ومع ادائهم المسرحي القصير المعبر الموجز

عن حلم اسطبل عنتر سأتحدث

عن محمود حنفي بطل العرض الصغير

عن خجله وهو بيفهم مني معني الاوتوجراف وبيكتبلي إسمه ويقول مش قلتلك خط مش حلو

عن إلهام وتعبيرها المرتبك الخجول عن حلمها في التمثيل وعمل كل البرامج

عن تعبير بسيط من أطفال أكثر بساطة

عن عرض مسرحي صغير كان أبرز مثال علي دور الفن في التعبير عن الواقع وخدمة الرسالة اللي بيقدمها

فن بيرضوا بيه ربنا وميقدرش أعتي المتشددين إنه يفكر يحرمه

فن مش بيتصرف علي أبطاله جزء في المليار من اللي بيتصرف علي أبطال أي فيلم في سينماتنا

فن نقل الواقع اللي أجبر _ وبصراحة يحسد عليها _ مخرج حين ميسرة إنه يعتذر في نهاية الفيلم عن عدم قدرته علي نقل الفيلم للواقع بشكل كامل

ليس لأن الفيلم مبالغ فيه بل لأن الواقع أكثر قسوة

فعلاً ازاي كان هينقل روايح أكوام الزبالة المهولة في منطقة جبلية مساحتها متساويش مساحة نادي مثلاً

عن طفلة سنها خمس سنوات اسمها ياسمين اللي قبل ما أسمع أخر حرف منه كانت أضافت مندهشة : بس إسمي الأصلي عدالات..وأنا بحب اسم عدالات معرفش ليه هم بيحبوا ياسمين

عن نظرة عينيها وهي بتلف طيارتها الورقية البسيطة وبتقوللي ازاي أعرف أطير طيارتي وعجزي لأني في حين إن الطيارة أطول منها..فأنا اللي أطول منها والطيارة في الواقع مجربتش أطيرها قبل كده

عن طفل 3 سنين كان نفسه في آيس كريم زي الأطفال الباقيين ومقدرش يندفع معاهم

عن ورشة بسيطة للغزل وصناعة السجاد بدأت تعلم أطفال متسربين من التعليم مهنة شريفة وفقاً للحكمة القائلة إذا أردت إن تساعد إنساناً فلا تعطه سمكة بل علمه كيف يصيد

عن طفل فخور بإنه بينتمي لمدرسة الفصل الواحد اللي شجعت نسبة محدودة _ متوقع زيادتها _ علي التعليم بدلاً من التسرب والتشرد

وبيقولها زي ما بيقول البعض بإنه متخرج من هارفارد أو بيدرس في الجامعة الأمريكية براس مرفوعة



عن أبطال العرض المسرحي وهما بيسألوني ببراءة..كنا حلوين يا أستاذ ؟

عن وصولهم بفرحتهم للسما وابتساماتهم العريضة والسبب بس كان إشادتي المتواضعة بيهم

عن أطفال كتير زيهم تشجيعهم ممكن والأمل فيهم كبير بس محتاجين المكان يتوسع والمتطوعين يزيدوا

عن المخرج المتطوع اللي قال إنه حفظهم هيعملوا إيه بالترتيب غير كده هم مش احتاجوا تدريب لأنه ده واقعهم ومحدش هيدربهم أحسن من الواقع


عن صوت العود المصاحب للعرض وهو لسه بيرن في أذني بشجنه المناسب للواقع


عن مربع من السيراميك فضل الأطفال جواه طول العرض كرمز لسجن الواقع


عن طفلة بريئة من الأبطال وهي بتقول أنا حلمي..يبقي عندي حمام سباحة كبير..وأدَخَل الناس من غير فلوس


عن طفل حلمه بس الإستحمام..بمياه طبيعية مش بجركن مياه بتكلفه جنيه ويكتشف متأخر أوي إختلاطها بصرف صحي


عن عشرات الأطفال والمراهقين في أسطبل عنتر شفتهم بعيني بيستنفذوا طاقتهم في ملعب ترابي معمول بجهود أصحاب الحلم مش بجهود المسئولين عن بلدنا والمتشدقين بإنجازاتهم ( واجباتهم المنقوصة ) والمتبجحين بتصديرهم الغاز للصهاينة ولا حتي من هواة لعبة تحرير المرأة


عن سور قلعة الكبش ومنظره كتحفة أثرية سمحلها إهمال المسئولين وادائهم ل 1% من واجبهم بإنها تبقي مجرد مقلب زبالة كبير أوي أوي..وغرزة للشباب الفقير الضايع اللي بينسي الواقع بأحقر الوسائل المتاحة وهو الإدمان


عن تلاجة آيس كريم هدية متجددة لحلم اسطبل عنتر وفرحة الأطفال ولهفتهم وإندفاعهم وإشباع الحرمان اللي حسيته في عينهم ولو بثلاجة آيس كريم من شركة كبيرة خلتني اتفائل بإن مش كل الشركات الكبيرة في مصر مجرد حيتان جشعة بتكبر علي أجساد الآخرين لأن هدية رمزية زي دي بتساهم ولو بتخفيف المعاناة


عن متطوعين بعتبرهم أبطال وعن كل أسرة جمعية صحبة الخير وبالأخص المساهمين في حلم اسطبل عنتر لأن مجرد طلوعنا ونزولنا في يوم واحد للمكان حسينا فيه بدوار يمكن دام اليوم كله..فما بالنا بناس كل يوم بتروح وتيجي ويمكن في اليوم الواحد أكتر من مرة ..مقدرش أقول غير ربنا يحميهم ويكتر من أمثالهم




عن 850 ألف إنسان وإنسانة ..فقرهم أنا لو بعانيه..كان ممكن أتاجر في المخدرات فعلاً..ممكن أشتغل قاطع طريق..ممكن قواد..ممكن حرامي..ممكن أنتحر حسب درجة إيماني وتحملي ( وبحمد ربنا علي نعمه المحسوس منها وغير المحسوس ) للمعاناة


لكن هما بس نفسهم في وظيفة ..نفسهم يحسوا بأمان بنقطة شرطة..نفسهم حلم اسطبل عنتر ينجح ويكبر.ويتعلموا علي إيد أصحاب الحلم مش علي إيد كدابين الحكومة ..هيتعلموا ازاي يصطادوا


مش هيمدوا إيدهم لمسئول مش بيعتبرهم بشر ولا حتي يستحقوا إهتمام معاليه


ولا حتي هيمدوا إيدهم لفاعل خير..رغم إحتياج أغلبهم الواضح ولو لعشرة جنيه يسد بيها جوعه لمدة يوم ويمكن أكتر كمان ومحدش يسأل ازاي يسد جوعه بعشرة جنيه لعدة وجبات


عن حلم اسطبل عنتر نفسي أحكي وأحكي لأني بتمني قريب أبقي ترس فعال فيه مش مجرد متكلم من بعيد بيكتب


عن أرض محتاجة كشافات عشان تبقي ملعب كورة بيخدم مئات من شباب وأطفال المنطقة كل يوم ولحد أخر الليل ..والنتيجة إن المنطقة هيبقي فيها حركة..وعن ركن من أركان سور قلعة الكبش هيبقي مضاء ومساحة الغرزة هتقل ..لأن كمان الشباب والأطفال المستهدفين من الحلم..مش هيتجهوا للغرزة زي اللي سبقوهم ولا هيدمنوا زيهم ويضيعوا

ولسخرية القدر تكلفة الإضاءة والملعب وملعب طايرة _ مع الفائدة المهولة ليهم _ مش تساوي عشر عربية من عربيات حراسة أي مسئول مبجل معظم ويمكن أقل

تكلفة ورشة تعليم صناعة السجاد ومهن أخري مش تساوي اللي بيقبضه تافه حسني ولا عمرو بيه دياب ولا فيفي عبده في حفلتين ترف

عن أرض عملوها مركز للشباب بجهود ذاتية وبمساعدة أهل الخير..ولما حبوا يخصصوها كمركز شباب.محدش هيمتلكه.محدش هينتفع بيه إلا شباب بينتمي لمصر اللي خايفين علي سمعتها ناس قاعدين تحت التكييف ومش شايفين الواقع ..تجربة عملية قام بيها أصحاب الحلم ..مشيوا في الإجراءات القانونية عشان تخصيص قطعة أرض في مكان محدش بيستفاد بيه من قرون ومش متوقع الإستفادة بيه قريباً..يروحوا لهيئة الآثار يقولولهم مفيش مشكلة لو الأرض اتخصصت مركز شباب..يطلبوا التخصيص من المحافظة يقولولهم لأ دي أرض آثار


عن حلم اسطبل عنتر اللي بيمثل جزء بسيط من حلم اتولد جوايا من فترة بعيدة وكنت نسيته

حلم إنقاذ ما يمكن إنقاذه.إنقاذ المستقبل..إنقاذ طاقات مهدرة لشباب بعد كده هيتحرش.وهيدمن.وهينضم لقافلة أطفال الشوارع ويمكن ينضموا للقاعدة كمان مين عارف !! وكالعادة هيكتب عنهم الجالسين تحت التكييف.هيكتبوا بحرارة.وهيتحركوا تحركات هاتفية وتلفزيونية.وفي النهاية النتيجة هتبقي محدودة.مسلسل بيمجد البطلة ويرضي غرورها وبينساه المشاهدين بعد شهرين ..وبعض مساعدات من أهل الخير لا تكفي للأسف وبس !! للأسف

تفتكروا الحلم اللي أنا شفته وخايف ييجي في يوم أشوفه بيتدفن بإيد البيروقراطية والروتين هيدفنوه فعلاً

بس لأ..ازاي أخاف..لما أشوف الأطفال والناس اللي انقطاع المياه بالنسبة لهم حياة كاملة وعايشين عادي وتكيفوا مع أوضاعهم..وأنا نص ساعة بس المياه تنقطع كانت تكفي لخروجي عن شعوري في اتصالي بالموظفين

أنا عندي أمل في بكره.وهفضل أحاول وراه..هفضل أحاول لحد ما أشوف إلهام ممثلة بتنقل قضية أهلها ومكانها ومحمود فتحي ممثل مسرح بيوقع الأوتوجرافات بخطه بعد التعديل..عدالات أو ياسمين زي ما بيسموها بتعرف تطير الطيارة وبتحقق أحلامها البسيطة كل ما بيتقدم بيها العمر

عن حلم اسطبل عنتر اللي تأكدت إنه مش مجرد حلم علي ورق
ده عمل لنزع فتيل ألغام متحركة في مجتمع فيه ألغام تكفي عشرات المجتمعات
مش مجرد حلم يتسجل علي جدران عادية
ده حلم بنقش فرعونى لا يمحى مع الزمن

محتاج الحلم يوصل لناس تقدر تساعد ضد الروتين وضد الحاجة..ممكن أي اقتراحات تتسابلي في تعليقات أو في ميل وشكراً مقدماً

لينك لموقع الحلم اللي عمله المتطوعين

ولينك لتحميل عرض للحلم بيشتغل بمشغل الفلاش

العالم المخمور

دُعي أحد الدكاترة لإلقاء محاضرة في مركز للمدمنين عن أضرار الخمر

فأحضر معه حوضان زجاجيان : الأول فيه ماء ، والثاني فيه خمر

ووضع دودة في الماء فسبحت ، ثم وضعها في الخمر فتحللت وذابت

حينها نظر إلى المدمنين سائلاً: هل وصلت الرسالة ؟؟ فكان الجواب

نعم اللي في بطنه دود يشرب خمر عشان يطيب !!000

________________________

بتفكرني النكتة دي بالناس اليومين دول

يبقوا شايفين وحاسين بإنهم ماشيين في طريق غلط

بس بدل ما يدوروا علي طريق تاني أو يحاولوا يفكروا ولو لحظة

لأ بكل بساطة بيفضلوا منتشيين بنشوة الغلط سواء كانت

سلطة ..فلوس..شهوة..ويبرروه بمبررات من عينة

الطموح والسعادة والراحة ومحدش واخد منها حاجة

ربنا يهدي الجميع ...وأي حد بطنه توجعه يشرب ويدعيلي

السر

ظلا متزوجين ستين سنة كانا خلالها يتصارحان حول كل شيء ، ويسعدان بقضاء كل الوقت في الكلام أو خدمة أحدهما الآخر، ولم تكن بينهما أسرار، ولكن الزوجة العجوز كانت تحتفظ بصندوق فوق أحد الأرفف، وحذرت زوجها مرارا من فتحه او سؤالها عن محتواه، ولأن الزوج كان يحترم رغبات زوجته فإنه لم يأبه بأمر الصندوق، الى ان كان يوم أنهك فيه المرض الزوجة وقال الطبيب ان أيامها باتت معدودة، وبدأ الزوج الحزين يتأهب لمرحلة الترمل، ويضع حاجيات زوجته في حقائب ليحتفظ بها كذكريات.ثم وقعت عينه على الصندوق فحمله وتوجه به الى السرير حيث ترقد زوجته المريضة، التي ما ان رأت الصندوق حتى ابتسمت في حنو وقالت له: لا بأس .. بإمكانك فتح الصندوق .. فتح الرجل الصندوق ووجد بداخله دميتين من القماش وإبر النسج المعروفة بالكروشيه، وتحت كل ذلك مبلغ 25 ألف دولار، فسألها عن تلك الأشياءفقالت العجوز هامسة : عندما تزوجتك أبلغتني جدتي ان سر الزواج الناجح يكمن في تفادي الجدل والناقر ونقير.. ونصحتني بأنه كلما غضبت منك، أكتم غضبي وأقوم بصنع دمية من القماش مستخدمة الإبر.. هنا كاد الرجل ان يشرق بدموعه : دميتان فقط؟ يعني لم تغضب مني طوال ستين سنة سوى مرتين؟ ورغم حزنه على كون زوجته في فراش الموت فقد أحس بالسعادة لأنه فهم انه لم يغضبها سوى مرتين ... ثم سألها: حسنا، عرفنا سر الدميتين ولكن ماذا عن الخمسة والعشرين ألف دولار؟ أجابته زوجته: هذا هو المبلغ الذي جمعته من بيع بقية الدمى

تعليقي :

ده ميل وصلني مش فاكر من أد ايه و أكيد مش عارف مصدر القصة الأصلي ..لكن فكرتني بحاجات ناقصاني وناقصة غيري ..فكرتني اننا لما نبطل نتنرفز عمال علي بطال و معتقدين ان الكون كله المفروض يتفهم رغباتنا و تفكيرنا و قواعدنا و كل اللي بنفضله و نحبه مع ان العكس هو اللي لازم يحصل ..ده رأيي .. لازم نبص حوالينا و نشوف اللي ادامنا ده شخصيته شكلها ايه و نحترمها و لو مش خدنا نفس الأحترام يبقي اسمنا عملنا اللي علينا و اللي نفسنا نلاقيله مثيل و لما الواحد ينام وهو مش مزعل حد أو مضايقه وفي نفس الوقت واخد علي خاطره من حاجات لو فكر فيها كويس و خرج نرفزته منها بشكل مش سلبي ..زي الدمي .. هيلاقيها مش مستاهلة حتي تكشيرة أحسن ما ينام و هو مبسوط و 100% بس مزعله بالميت كده ييجي نص دستة بني ادمين و الله أعلم قيمته عاملة ازاي عند اللي زعلهم .

لما نبص للنبات و البيئة و الحيوان و نشوف معاملتنا ليهم شكلها ايه مش المفروض نتوقع بعد كده ان الدنيا تبقي ماشية زي الخاتم في صباعنا لأن خالق البشر هو خالق الكائنات كلها و زي ما لينا نعم من ربنا و بنتمتع بيها زي ما للكائنات دي برضه حق المعاملة الكويسة اثناء الأستمتاع بيها ..و ده معناه أن رضا ربنا هو المطلوب مش أكتر ..فما بالنا لو اضفنا لرضا ربنا رضا حد بنحبه و مش شايفين حوالينا أحسن منه ؟!

اظن الموضوع ساعتها يستاهل شوية تضحية ..صبر أو كلاهما ..و مش هنكون أقل من اللي صبرت العمر كله لحد محوشت 25 ألف دولار من بيع نتيجة تحكمها في زعلها و المبلغ ده ميجيش بالساهل لأنها ببساطة بتبيع حاجة متجيبش مكسب 2 دولار بالكتير أوي يعني زعلت مالايقل عن 12 ألف مرة يعني لو في كل مرة اتقمصت 10 دقايق يبقي العمر كله هيضيع في زعل و كآبة .

يا رب استوعب اللي كتبته و اللي فهمته من الكلام ده ..ويا رب كل الناس اللي حواليا يفهموا قصدي ايه.

و يا رب نفهم حاجات من أهم المطلوب استيعابه في حياتنا كلها ..رضا ربنا ..حب الناس خصوصا اللي بيهتموا ..البساطة و الذوق .

و يمكن لو ربنا أداني عمر اكتب رأيي فيهم يمكن لما أكتبه الاقيني فاهم و يمكن حد يقرا و يلاحظ أني غلط فيفهمني ..ليه لأ .طالما عندي وقت أتخانق أكيد عندي وقت أفهم و وقت أعمل فيه دمية من القش