الفترة دي وبعد الأنيميا الاجتماعية اللي اتحطيت فيها

ولأني مش متعود علي كده أو لأني اتصدمت لأني صبرت علي الناس الغلط

ولأن رصيد الاحتمال النفسي لأي حد وأي حاجة خلص ..فمكنتش ناوي أكتب خالص ولو بعد شهر

بس صديقة عزيزة في عالم التدوين عرفت إنها مسافرة ومش عارفة هترجع امتي

وكمان مش عارف هيكون عندها مقدرة هناك تدخل علي البلوج ولا لأ

فقلت أرد علي التاج اللي بعتتهولي عشان تعرف أد إيه هيا بني أدمة طيبة وجميلة

وأكيد كل حد بيحس وبيفهم هيفتكرها لحد ما ترجع بإذن الله

عشانك بس يا ميس حاسا هرد علي التاج وأتمني تكوني بخير

_________________________

*

*

اسم مدونتك؟

هو الأسم مكتوب بخط صغير ولا إيه ..اللي عمل التاج ده مكانش نايم كويس

أو يمكن واكل فول ..ده الأسم فوق واضح في صفحة الانترنت اكسبلورار

مش هقوله بقي رخامة

لماذا اخترته..وماهي نيتك من وراء اختياره؟

أيوه هي دي الأسئلة اللي يترد عليها

بص يا سيدي امسك ماج النيسكافيه وربع علي الكنبة

ايوه هي دي اللي علي يمين باب البلوج وأنت داخل

بص يا سيدي أو يا ستي أيا كان جنس اللي حط السؤال أو اللي بيقراه

الاسم مش أنا اللي اخترته

روان اللي اختارته ..فضولك بينقح وهتقول روان مين

؟!

رغم إن الناس اللي بتيجي هنا عددها ميزيدش عن عشرة وأعتقد إن كله عارف بس هقول من تاني

روان أجمل إنسانة عرفتها وهعرفها

بس خلاص

وقبل ما ربنا يرحمها من غباء وأنانية العالم الرائع اللي عايشينه ده

كانت عملتلي البلوج ده ..كان عندي أكاونت بس هيا شجعتني علي إني أعمله

والنية أو المعني من ورا الأسم ده ..إن في كل واحد فينا الخير والشر والكلام القديم ده

وبما إن نعمة ربنا هيا العقل فأهم حاجة الواحد بيتمناها لنفسه

ده بافتراض إنه بيفهم ..إن يكون عنده عقل جميل ..وروان شافت إني ممكن أوصل للمرحلة دي

أو يمكن شافت فيا كده فعلاً وده شرف لا أدعيه بس أدعي الرغبة في الوصول ليه

وعمري ما هغيره ..لو لقيتني فشلت أقفل البلوج أفضل

هل فكرت في إغلاق مدونتك؟..والسبب؟

اه فكرت ..لما لقيتني عاجز إني أقول كل اللي أنا عايزه من خلالها

ولما لقيتني بقعد علي الكمبيوتر بال 3 ساعات ضيف تقيل علي أي من أصحابي

اللي عندهم سايبرات طبعاً..التشرد موصلش للبيوت الحمد لله

المهم ..3 ساعات بعمل فيهم كتابة مكانتش بتاخد مني نص ساعة والباقي سرحان

+ إني بفكر الفترة دي برضه أقفله لأن أقرب الناس ليا في الواقع

راحوا ..كأنهم ماتوا بالضبط

وبالتالي البلوج فضفضة من واحد مع نفسه لناس غالباً متعرفوش كويس ..فاحتمال يملوا منه قريب

وبالتالي مش هلاقي حتى الرأي اللي بدور عليه من اللي بيعلق ..+ طبعاً إن مش بقعد وقت ما بحب دايماً

وللأسف معنديش المثابرة والقوة اللي تخليني أتبني فكرة وألف بيها علي مدونات ناس معرفهاش كويس

يعني بعمل دعاية لحاجة يا تخيب يا تصيب ..وفي الأخر كله بيكسل ..فالموضوع ببصله ساعات بلاقيه مش مجدي

بس هيا بديل كويس لحالة الخرس اللي مفروضة عليا في حياتي

صورتك في المدونة..رمزيتها ؟

صورتي

هيا بالنسبة لي لحظة بتمناها ..إن بعد ما أرضي ربنا وأعمل اللي عليا في الدنيا

تبقي مكافأتي إني أقابل روان وتكون راضية عني

بس خلاص

احلى جمله قيلت لك فى وصف مدونتك؟

جملة اتقالت في تعليق ..بتقول إن الموسيقي والصورة والفراشتين

بيعيشوا الواحد في جو وهمي ..والجملة مش بليغة ولا حاجة بس أثبتتلي حاجة

إن ذوقها ورقتها هتفضل موجودة وليها اشعاعها طالما البلوج موجود وطالما في حد لسه بيحس

التعليقات بالنسبه لك ..اهميتها؟

رأي ..استفزاز إني اتكلم ..بيدفعني بعض التعليقات للتفكير

وساعات من التعليق بعرف ناس جميلة أوي وبفكر كتير أقول

ليه ميكونوش الأصدقاء في الواقع

احلى بوست كتبته ...ضع اللينك ..ثم اذكر لماذا؟

مبحبش أدي رأي إيجابي في حاجة أنا عملتها ..أنتقد ماشي لكن الاعجاب بسيبه لغيري

بس عموماً أقدر أقول إنه أكتر بوست عبرت فيه عن احساسي ناحية روان

أو ناحية أي موقف عموماً ..لأن إن الواحد معبرش صح عن رأيه أو احساسه يبقي

البلوج معمول ليه

؟!

أفضل مدونة قرأتها؟

الذاكرة المؤقتة مرتبكة دلوقتي ..ومقدرش أدعي إني أقدر أقارن بين مدونة وأخري

لكن هقول قاعدة عامة ..أفضل مدونة قريتها هيا اللي حسيت فيها بالصدق

وبالجمال ..سواء التصميم أو الكلام أو الفكرة أو حتي التعليقات ..لأن احياناً بكون في مدونة

ويجبرني الكلام علي إني متكلمش ..بحس بس ..لو لسه في إحساس أصلاً

أفضل بوست قرأته؟ وضع لينكه

للأسف مش هقدر أحط اللينك لأن أخوها قفل البلوج

وبالتالي مش هقوله ..لكن في بوستات كتيرة جميلة ..هبقي أعمل بيها ليستة في يوم

أجيب بس الجهاز وأقعد براحتي

حد قل ادبه فى التعليق..ايه رد فعلك؟

هتجاهله وأمسح تعليقه ..ولو صمم هرد عليه بخير الكلام ما قل ودل ..زاد فيها هرجع التحكم في التعليقات

وأتجاهل اللي خلفوه..لأنه ببساطة مترباش ..ومدعيش إني هربي اللي أهله والدنيا بحاله معرفتش تربيه

ربنا يهدي الجميع ومنوصلش للمرحلة دي

أسوأ مدونة؟ا

مدونة واحد فخور بمرضه ..بشذوذه الجنسي ..والمشكلة إن في ناس أعرفها وبتبان في مدوناتها ناس بتفهم

بس علي حد علمي قريبين أوي ليه ..طيب طالما إنتي قريبة منه..ليه متحاوليش تغيريه ..ولا مبسوطة بإنك بتقلدي الغرب

أنا حرة وبعمل الي أنا عايزاه وبعرف واحد شاذ جنسياً من غير ما أحسسه إنه وحش ..وعلي فكرة مش الشذوذ بس ..

تقدروا تقولوا ده اسقاط علي اللي بيكون صديق لواحد غلط وبيكدب علي نفسه لكنه بيتفرج عليه ومش بيعمل أي حاجة إيجابية وبيكون عبارة عن صديق مزيف

معاه معاه عليه عليه

أسوأ بوست..أسوأ مدون؟

اللي بيكدب ...واللي بيكون كله بجاحة وإثارة جنسية أو أي نوع من الإثارة

بغرض جذب التعليقات والاحساس بالأهمية وإنه بيناقش قضية كبيرة بقي

تدي التاج ده لمين؟

لأي حد يحب ياخده

_______________________

كلمة أخيرة ...

ميس حاسا عايز بس أقول إن تعليقياتك ومدونتك لما بقراهم بحس فعلاً

إنك اسم علي مسمي ..مش قصدي ياسمينا ..لأ قصدي الأسم اللي أنا سميتك بيه

أكتر واحدة شفتها بتستخدم كلمة بحس ومشتقاتها وبجد إنتي بني أدمة طيبة ورقيقة

وربنا يصبرك علي غربتك وتيجي بالسلامة أو علي الأقل تتكيفي مع الوضع

ويكون عندك نت عشان منتحرمش منك كتير

ربنا يكون في عونك وتروحي وتيجي بالسلامة

وشكراً أوي لكلامك وأنا عارف إنك مشغولة ولو كنتي مشغولة مكنتيش اكتفيفي بتعليقاتك

all the ppl who knew u

will miss u

مش محتاج عنوان

كتابتي النهاردة وبعد مرور شهرين إلا يوم علي فقداني روان وعدوا كأنهم يومين ويمكن أقلالنهارده مفيش هدف عندي غير الفضفضة وبسربنا يكون في عون اللي هيكمل للآخر .

****

تكملة للبوست اللي فات

بمجرد أن اكتشف عدم وجود مبلغ من النقود كان بحوزته قبل دخول المسجد عاد وسأل خادم المسجد والذي طمأنه بوجه مضئ أنه بمجرد أن يجدها مع رفيقه في المسجد سوف يحفظها له وأن باستطاعته المرور في الفجر لأخذها ولكنه لم يصلي بنفس المسجد يومين متتاليين في لحظة من لحظات انتصار نفسه الأمارة بالسوء عليه وعندما تغلب علي كسله وذهب لأداء الصلاة في المسجد..وبعد أن انتهي منها فوجئ بخادم المسجد مضئ الوجه يستوقفه ويظهر له المبلغ المفقود كما كان في جيبه يوم ضياعه وبابتسامة أحس فيها بطيبة العالم كلها قال خادم المسجد ..فلوسك حلال ..بعد المعتاد في مثل هذه المواقف خرج من المسجد وهو يفكر ..هل ما حدث الآن مجرد جزاء إحساسه بالصغير ونصيحته لخادم المسجد ؟ أم مجرد تأكيد لأنه وضع قدميه علي الطريق الصحيح _رغم تيبسهما علي أول الطريق ؟ أم إن ما حدث تأكيد لأن ما يكسبه من مال علي بساطته لا حرام فيه ولابد أن يواصل السعي لكي يصل لأهدافه التي لم يفهمها ولن يهتم بها أحد ؟!

دارت هذه الخواطر بباله ولم يدري أيها الصحيح وتمني أن يثبته رب العالمين علي إيمانه

تمني أن تتحرك قدماه علي الطريق بدلاً من إضاعة الوقت في إنتظار مساعدة من مجهول

وانصرف ولم يدور في باله إلا الدعاء ...

****

عن الفتاء الدستوري سأتحدث ..

في صورة عرضتها الجزيرة واتبعتتلي من أخت عزيزة بتثبتلي بيها اللي بيدور فعلاً

وبصراحة الموضوع مش محتاج إثبات

طبعا الصورة تتحدث عن نفسها ودي حاجة بسيطة من رئيس قرية فما بالكم بقي

بنائب مجلس أيا كان كلهم واحد الصراحة ولا وزير ولا حتي رئيس مجلس إدارة

وأنا دمي اتحرق إمبارح في لفتي علي بعض المدونات

أكتر ما هو محروق من همومي اللي محدش هيشاركني فيها أصلاً

لكن حبيت أقول حاجة بسيطة ..أنا مرحتش ومعملتش بطاقة انتخابية

رغم احترامي لشجاعة اللي راحوا قالوا لأ رغم علمهم بعدم جوداها

بس علي الأقل نفسهم مفتوحة يعبروا عن رأيهم ولو إن الحكومة استغلتهم

في إثبات مدي الإقبال الكبييييييير علي ديمقراطية الحكيم اللي مجابتهوش ولادة

محمد ولد حسني ولد مبارك

المهم بقي اللي عايز أقوله كمان ...ومش مهم إذا كان يهم حد ولا لأ أهو هعمل اللي عليا وأقول رأيي

يمكن ييجي بفايدة

الناس متحكم فيهم حكام بالسوء ده ليه ؟

عشان الناس محتاجة تنضف من جوه وقبل كده مش هيقدروا يغيروا ولو رئيس مجلس محلي من مكانه

الناس بكل بساطة بقي همها الفلوس ولا شئ سوي الفلوس

بعض المظاهر الكدابة

الجنس ولو جاعوا يبقي الأكل اللي بتحس منه إنها أخر وجبة ليهم

لبس وشوبنج عموماً

تقليد للغرب في الحرية بجانبها السلبي

تشبث بكل ما هو تافه في الدين والجدل في اللاشئ

كل ما حد يقولنا شايفين العصفورة نرفع عينينا وندور عليها

كل ما يثيروا أي قضية ننشغل بيها ونفرغ كل طاقتنا العصبية فيها وبعدين منوصلش لشئ

يبقي ازاي هنقدر علي حاكم زي ده تبت وتنح وحواليه عصابة الأربعين ألف حرامي

وكمان متحكمين في الناس بيخلوهم يخبطوا في بعض

ما هو الأمن المركزي دول مننا وغلابة بس ممسوح دماغهم ومخوفينهم

نغلب خوفنا وعيوبنا أمتي

يا اما نستني مع الزمن والتربية واحدة واحدة ويمكن الجيل الجاي أو اللي بعده يكون فيهم الفايدة

يا إما نستني جيفارا يكون فيه منه نسخة مصرية أو عربية أو مسلمة

وأعتقد إن حتي جيفارا لو ظهر في مصر هيموت بسرطان أو بكبد وبائي أو بأهمال في مستشفي

او في عبارة أو في طيارة أو في مسرح والقائمة تطول

مش عايز أقول مفيش أمل ..عايز أقول منبدأ باللي نقدر عليهم

بس خلاص كفاية

****

صلاح عبد الصبور قال

يا موتانا ذكراكم قوت القلب في أيام عز فيها الأقوات

لا تنسونا حتي نلقاكم

وأنا عايز أعترض عليه..لأن مش هما اللي بإيدهم ينسوا أو لأ

لأن مفيش دنيا شغلاهم ولا شهوات مستغرقاهم

عكس بنو البشر اللي ربنا أنعم عليهم بالحياة عشان يموتوا عقولهم ويمشوا ورا اللاشئ

لحد ما حياتنا هتبقي لاشئ كبيرة

وأنا كمان بقيت بحاول أوقف عقلي

بس كل ما في ناس بتسيبني في وسط الرحلة

بيفضل شغال..

وفي كلمتين عايز أهديهم لروان ..

يا من تسكنين العالم الآخر جمعت لك من حديقة الحياة زهرتين

زهرة عشق وزهرة وفاء ..وأنتظر دوماً يا مليكتي يوم اللقاء

****

عني وعن الصداقة سأتحدث وبدون التزام بأي قواعد لغوية

أغلب اللي عرفتهم كانوا بيضيعوا وقتهم بعيد عن أعز أصدقائهم

وأحياناً كنت بكون واحد من أعز الأصدقاء

وتمر الأيام وتاخدهم الدنيا

ومكونش عرفتهم أد إيه هما غاليين وأد إيه أنا مستعد أثبت كده فعلاً

بس بيفوت الوقت ومبنلحقش

بيضيعوا كلهم ..وفي وقت وجودنا مع بعض بتوصل لدرجة إن مفيش كلام يتقال

وتوصل لدرجة اصطياد الأخطاء والحساسية علي حاجات ممكن نتقبلها من ناس ميسووش عندنا حاجة

وفي الأخر السكة بتنتهي ومنكونش لحقنا نعبر عن جزء بسيط من مشاعرنا لبعض

ومنكونش لحقنا نكمل الطريق اللي بدأناه مع بعض

ومنلحقش نسيب أثر في حياة الناس دي

هو مش البديهي إن الواحد فينا يحتاج صديقه عشان وقت الضيق ..

وقت ميكونش صديقه فيه ده محتاج إلا لإيد تتمدله وتكمل معاه لحد ما يرجع يقف علي رجليه ؟!

هو الصداقة أو أي علاقة انسانية مجرد بيس أوف كيك ..قطعة كعك يعني ؟!

حاجة سهلة كده المفروض يبقي الطرفين فيها مسليين أوي ومحدش فيهم يمر بحالة انعدام وزن

يكون الاتنين مادياً زي بعض وكل حاجة زي بعض ؟!

طيب يبقي كده نكتفي بأخواتنا اللي في البيوت منروحش لحد غريب

لأن اللي في البيت نفس الوضع المادي ومكشوفين لينا لدرجة إن من السهل استيعاب أغلب تصرفاتهم

بس بيضيق الصدر جوه البيت وبيهرب أغلبنا لبره وده غالباً لأختلاف الشخصية لأن كل أسرة مش متماسكة بتطلع فيها الشخصيات كل واحد مع نفسه

ولما نهرب لبره ونكون اصحاب في الوقت العادي ولو التعامل فسح وخروج ونكت ونميمة

هنبقي قريبين أوي ويا سلام لو في مصلحة مادية ..حتي لو مش ماديين بس اهي تقوية أواصر الصداقة

لكن ساعة الجد بيختفي الجميع

هنفضل أنانيين لحد أمتي ؟!

متوقعين إن الهدف من خلقتنا هو اننا نستمتع بالعيشة من غير أي أعباء ليه ؟!

أنا رغيت كتير وحاسس إني بضيع وقت اللي ربنا هيبتليه بقراية البوست ده

بس لما أحس إني أقرب الناس ليا أول ما بيلاقوا بديل ينسوني

ميهتموش بالاتصال ولا إنهم حتي يطمنوني عليهم

طيب بعد ما كافحت عشان أخرج وأقرب لربنا واعتمدت علي ربنا وفي نفس الوقت

مقدرتش أكمل لوحدي واحتجت للتشجيع واحتجت أفضل مهتم بأقرب الناس ليا

بس الاهتمام اترفض والفراق بيحط أخر لمساته الرمادية علي أخر أمل كان ليا

بس النهارده حاسس إني كسبت أخت وصديقة عزيزة

وبرضه أتمني صاحبي اللي شايل كل جمايله في عينيا الأتنين يرجع صاحبي

وبس خلاص ..مش هكمل عشان كفاية كده علي ناس متعرفنيش

بس بدعي ربنا إن كل أتنين كويسين وقريبين من بعض ميجيلهمش داء الكسل

ميستسهلوش يبعدوا طالما حاسين بعبء

ما هو كما تدين تدان

****

في صورة شفتها عند المدون الجميل شرم أقدر أعتبرها كوميديا سوداء

عارفين إن مصر فيها عيوب كتير وغباء مستشري

لكن مش لدرجة إني أتوقع إن الأعمي هيقرا الإعلان

ولا المفروض إن زمايل الطلبة المكفوفين يدوروا عليهم يبلغوهم ؟

روح التعاون دي بتموت يوم بعد يوم وأكيد نص الناس المستهدفة من الصورة دي مش هيعرفوا أصلاً

يبقي اتحطت ليه ؟

سد خانة ؟!

وعموماً المتنبي كان 100% صح

ياما فيكي يا مصر من مضحكات ولكنه ضحكٌ كالبكاء

بس كفاية كده عشان الناس كرهتني

(5)صراحة مع الاعتذار للباشمهندزة شيماء

ده تاج يا جماعة يعني حاجة كده بيعزمنا عليها أصحابنا ونبقي مجبرين نرد لو عندنا دم..فأنا هرد عشان بحاول أثبت إن عندي دم..وكمان عشان روان بقالها فترة بتقولي إمتي هتكتب حاجة من جواك ..وبصراحة من تلات تيام وأنا فاضي ومع كده مقدرتش أكتب..بس التدبيسة دي أجبرتني علي كده..ومتشكر أوي لميوية وكل تدبيسة وأحنا طيبين

الموضوع عبارة عن سؤال..5 حاجات محدش يعرفهم عنك إيه هما ؟!

هبدأ باستطرادة..إن فعلاً في كتير أوي ممكن أحطه ضمن البند ده ( ومع إني مش بحب الغموض بس قليل لما حد يهتم بإنه يعرف كل حاجة عني أصلاً ) بس هحاول أكون صريح ..وهيكونوا أهم 5 حاجات من وجهة نظري .

1- الناس كلها اللي حاولت تفهمني أو فهمتني إلي حد ما معتقدة إني طيب ..أو شخصية بتميل للمثالية في تفكيرها وأحلامها وحتي عيوبي بيبقي مبررها مثالي شوية ..لكن أنا فعلاً جوايا شر غريب مش عارف أنا كاتمه إزاي..وفعلاً نفسي أطلعه برايا خالص عشان بخاف منه..بخاف لدرجة إني أول ما ابدأ أفكر التفكير ده وأنا في البيت بعمل أخر حاجة حد يتوقعها ..بروح الأوضة بتاعة الحاجة الوالدة وأهزر معاها شوية بأي كلام من اللي بيخليها تضحك علي هبلي وبعدين أنسي..ولو بره بقي بسرح وببص لأي حاجة بعيدة ..حتي اسم الميل بتاعي اللي اقترحته الأنسانة الوحيدة اللي اطلعت علي جزء من الشر ده.. معناه عقل جهنمي أو خبيث ..معناه حاجة ذكية لدرجة الشر يعني..أنا فعلاً من يومها وهي الله يرحمها بتصلحلي تفكيري وسلبيتي دي..ويمكن روان في صمت وهدوء ادتني رسالة مختلفة يوم ما أختارت عنوان المدونة عكس الأسم بتاع الميل..بس بجد يا جماعة الخير وأنتم عددكم مش هيزيد عن ال 20 في أغلب الأحوال ..انا بخاف مني أوي لدرجة مرعبة .

2- رغم إني من ابطأ الناس كتابة في المدونة بس كتبت وأنا في المراهقة ( 13 ل 16 ) حوالي 20 قصة محدش شافهم..لأنهم ببساطة ضاعوا في نقل العفش..وبعدين كتبت واحدة قصيرة بعد حد معين في حياتي فارقها وراح عن ربنا..وكانت كئيبة شوية..وكانت طويلة أوي بس اختصرتها وبعتها لعدد قليل أوي من اللي أعرفهم علي النت وخفت حتي أبعتها لروان لتاخد الكئابة اللي كانت فيا وابدأ ألوم نفسي بعد كده علي غبائي ..

بجد يا جماعة أنا مش بقول إني موهوب..بس يعني كنتي بكتب كتير أوي كنت الزفير بتاعي عبارة عن كتابة رغم محدودية اللي قريته بس كتبت قصص طويلة كمان ..دلوقتي إيدي بتوجعني من امتحان نص ساعة ..والكيبورد بس اللي باخد راحتي عليها بس لحد دلوقتي مفيش موود كتابة مناسب..أدعولي أتهنا وأستقر وأطمن علي روان وبعدين ابدأ اخنقكم مني لحد ما المدونة تبقي خاوية علي عروشها ..قصص وشعر وكلام في السياسة كمان ..

3-معيطتش ودموعي بانت بجد إلا لوحدي ومشافنيش إلا إنسانة واحدة للأسف مش عايشة دلوقتي وإن كنت وصلي احساس إنها راحت لمكان ارتاحت فيه عكس الدنيا اللي كانت بتيجي في لحظات السعادة وتضرب كرسي في الكلوب..اعتبرت أنا وهي اللحظات دي زي ابتلاء من ربنا لقوة إيمانها وصدق توبتها ليه..وكانت كمان معتقدة إن ده تكفير عن ذنوب كتير ليها..بس يوم ما عرفت إنها في المستشفي وعملت حادثة ..ورحتلها وعلي قول الممرضة كانت في الرمق الأخير..رحت اتأسفلها والله ..لقيتني بعيط زي أي بنت بتعيط بعد امتحان محلتش فيه حاجة..بس عياطي ده ميغفرش إني كنت جبان في يوم من الأيام مع واحدة مخافتش من حد إلا ربنا في معاملتها معايا..واتمني إنها تكون فعلاً سامحتني ومبسوطة بيا وأنا بحاول أنسي...لذلك أي حد يشوفني بعيط أدامه يعرف إن ده يوم تاريخي في حياتي..بكره أحس بالضعف أدام حد مش هيقدر ولا هيفهم ومسيره ينسي تاني يوم ..ويمكن يزود ضعفي من غير ما يحس..

4-كنت وأنا مخنوق من السياسة أقول ( كنت 7 سنين وكبرت معايا محدش يتريق أنا هاري نفسي تريقة أصلاً ) ..قنبلة نووية وأمسح بيها اسرائيل أس البلاوي وقنبلة تانية علي الكويت باعتبارهم نموذج الخيانة في نظري ولحد دلوقتي مش بطيق حكامهم ..رغم غلط صدام بس دول كانوا في الأول بيستفزوه بالريموت كونترول الأمريكاني ..من الآخر دول نموذج للخليج والخونة العرب والخونة عموماً ..لكن دلوقتي رغم احتقاري للقيادة السياسية في البلدين ..واحتقاري لحاجات كتير في البلدين وبلدان كتير ...بس فعلا لو جاتلي القنبلتين دول هضربهم في شوية حاجات كده لو تجسدوا في صورة مادية ( الضعف - الفقر - الجهل - الكدب عمهم كلهم طبعاً وأبو الشر أصلاً - الجشع - وكل ما يندرج تحت بند الخطايا ) طبعاً محدش يضحك عليا بصفتي بحلم بخلاص الإنسانية والكلام الكبير ده اللي ماليين بيه دواوين الشعر وكتب النخبة المثقفة ..أنا بس ببينلكم إزاي كنت بفكر و تفكيري أتغير من غير أي سبب محدد..العالم ده عالم مش متربي ..العيب مش في اسرائيل بس ..

5-محدش فيكم يعرف إني ما نمتش بقالي يومين من القلق ..قلقان أوي وهحتفظ بسبب القلق لنفسي..حاسس إن في حياة كاملة ناقصة...مش عارف ليه متضايق من نفسي وليه حاسس إني مسئول عن الغيبة اللي مسببالي القلق ده..ويمكن ده يبرر إني بكتب وأنا في الطراوة خالص وأكيد أخطائي النحوية واللغوية في أعلي معدلاتها ..فأديكم عرفتم وبجد أنا بحب الصراحة بس بخاف لأكون صريح مع حد غلط وبيني وبينكم المدونة برضه

مش في بير ..أي حد ممكن يدخل بالصدفة .

__________

و متشكر أوي ليكي يا ميوية لأنك خلتيني أعور نفسي بصراحتي دي وقايم مبتئس زي ما بيقول صاحبي عليا دلوقتي بس في نفسي الوقت حاسس إني بقيت بتنفس بشكل أحسن ..فضفضت

شكراً تاني يا ميوية و للأسف أنا مش فايق ولا ليا في الHTML ومش دماغ أفتح سايت أجيب الكود أو اسأل ..هو سهل علي فكرة أصلا..بس مش هعرف أحط اسمك ووراه اللينك

ينفع اللينك بس مؤقتاً ..

http://dandana87.blogspot.com/

والتاج ده بدبس فيه أي حد يعلق علي البوست ده ..وأي حد علق علي اللي قبله وهيعلق علي اللي بعده ..براحتكم بقي.. اللي مي هيجاوب يبقي مش بيهمه ضياء بتاتاً ولا بيحب ياخده علي أد عقله وشكل اللي هيزوغ مش هيعلق أصلاً ..لما نشوف بقي :((

الكتابة

كتير أوي لما بحاول أكتب حاجة كانت في بالي الاقي نفسي مش عارف أكتب أو الكلام راح مني و مبيرجعش الا لما أقوم من أدام الورقة أو من أدام الجهاز

المعضلة دي خلتني أفكر ..هو الكتابة دي ايه ؟!..غاية ولا وسيلة ؟! هدف ولا طريق ؟!

طب لو غاية ..بستفاد فعلا من وصولي ليها ؟! فايدة مؤقتة ولا فايدة بتعلم علي جدران روحي ؟! طب غاية بحس بإيه لما بوصلها ..الأنتصار ولا بالراحة كأني عملت واجب مع نفسي ولا بالاطمئنان كأني خلصت نفسي من مشكلة ؟! مش عارف

طب لو وسيلة ..بتوصلني لأيه ؟ غرض الواحد لما بيكتب بيكون ايه ؟! يخرج كبت ..بأنواعه سواء بقي أحلام أو آلام .. ولا يعمل حاجة ؟!

بصيت لنفسي ..لقيتني ساعات بتكلم مع حد ملاقيش ليه صدي ..مش بشوف رد فعل أصلاً ومش بحس بأني اتكلمت ..من الأخر كلامي بيروح مبيرجعش زي لما بتحصلي حالة التوهان قبل كتابة أي شئ ..عكس لما بكتب ..بيكون فيه أمل ان الكلام يفضل و استفاد منه أو غيري يستفاد منه

مرة كنت في امتحان ثانوية عامة..كان اقتصاد و احصاء..وما كنتش مذاكر و اصلا الأحصاء دي حاجة مملة و المدرس مكانش بيعرف

المهم كنت حفظت 8 قوانين و أول ما دخلت كتبتهم في ورقة الأجابة من ورا..تيجي الأسئلة ..ايه ده دول هما اللي بتتكلم عنهم القوانين ..اشطة هبدع ..و نسيت اني كنت عايز أعيد السنة لدرجة اني كنت بتعمد مجاوبش أحياناً ..احط القانون جنب المسألة و احاول أطبق مفيش ..قمت جايب أخر ورقة الأجابة ..و كنت لسه قاري قصة فلاش كان فيها نثر كاتبه الأستاذ الصفتي بينتقد فيه بعض بلاوي وطننا الحبيب..قمت خدت نفس الوزن و استعرت نص النثر بتاعه و قمت كاتب حاجة مباشرة أكتر ووصلت كمان للعيلة المالكة و الحمد لله الموضوع موصلش للوزير ومش اتكرم عليا الريس بالعفو ..المهم الكلام ده كتبته في صفحة ونص من غير مسيب ولا سطر وكنت في قمة تركيزي لدرجة أني قعدت أقراه بعدها معجب و مصدوم من ما أقترفته ايدي

المهم خرجت و امتحنت في الاقتصاد و عملت فيه ابداع بجد ..فتي أشد من فتي طنطاوي و واصل .. ومع كده خدت 21 من 25 مش عارف علي ايه !!

و بعد الأمتحان اتفسحت و رحت وجيت و روحت بيتنا بعد نص الليل ...تاني يوم بقي نويت أذاكر تاريخ لأن أهلي صعبوا عليا ..صرفوا ييجي الفين جنيه في السنة دي ومكانش يصح معملش بجنيه فيهم

المهم و أنا بذاكر نمت ..صحيت لقيتني بكتب كل اللي كتبته في امتحان الأحصا بالحرف ..مفيش كلمة وقعت مني

يعني الكلام ده لو كنت رغيت فيه اسبوع مكنتش هفتكره بعد ما أخلص رغي لكن مجرد ما كتبته ..ثبت في دماغي ييجي شهرين ولولا المشاكل و الغم اللي مريت بيه كان زماني لحد دلوقتي فاكر

فيمكن تكون الكتابة وسيلة لحبس الأفكار في قفص معتقدش انها هتلاقي أحسن منه عشان تطيرله بجناحاتها..يمكن تكون مجرد فضفضة و تفريغ انفعالات ..يمكن تعبر عن اللي اللسان معرفش يعبر عنه..يمكن اللي قدامي يفهمها احسن..يمكن الكتابة بتوصلني لحد مش قادر أوصله بطريق تاني ، حد بعيد عني جسديا ..

مش عارف برضه

و مش هعرف لحد ما ربنا يأذنلي بكده ..

و علي فكره استدعوني في الأمتحان اللي بعده و قالولي شكلك غلبان و مش عايزين أهلك يتبهدلوا معاك و الكلام اللي عملته ده ميتكررش و أمتحانك اتلغي و نجحت بسبب الأقتصاد .. يلا عشان متقولوش أن الحكومة ظالمة .

حوار من غير محاور

طبعا أم احمد ..الوحيدة تقريبا اللي شافت البلوج و بتعبرني بأنتظام مع اني كسلان و مش بكتب.. هي اللي تعرف مين المحاور وبناءاً علي طلبها اللي مقدرش أرفضه هجاوب و رجلي فوق الكرسي اللي أنا قاعد عليه

س1 : هل انت عقلانى اكثر ام عاطفى؟

ج1 : والله يا خويا أو يختي _ حسب شخصية المحاور _ بحاول علي قد ما أقدر أكون عقلاني بس أعتقد اني لو هعرف أتحكم في الجزئية دي من شخصيتي هكون عقلاني دائما لحد ما تيجي فرصة أكون عاطفي ..لكن كلمة في سرك مفيش احلي من الوهم .

س2 :صف شخصيتك فى خمس كلمات ؟

ج2 : مينفعش 5 جمل ؟!!

س3 : اذا كان لكل انسان شبيه من الحيوانات,أى حيوان يشبهك؟

ج3 : والله بفضل أكون شبه النورس و مشوه حيوان عشان خاطري .

س4 :ما هو لونك المفضل؟

ج4 : قوس قزح .

س5 : هل أنت أجتماعى اكثر ام منعزل؟

ج5 : بحاول أكون اجتماعي عشان وحدتي أو أنعزالي هيقتلوني من التفكير و أنا أقصد المعني الحرفي ..ده أنا من الحياة العادية كل يوم بيتقاللي وشك أصفر فما بالك بالأنعزال ؟ و زي ما حضرتك شايف أنا رغاي و ده نتيجة أن من عاشر قوما ً...

س6 :ماذا يشكل أصدقائك بالنسبه لك؟

ج6 : اهتمامي الأول و الأخير ..و رغم ملائكية الرد و المثالية اللي فيه بس نحسبها من المنظور الرأسمالي ..لو اهتميت بنفسي هموت من الغم و النكد لكن اهتمامي بغيري هيموتني شهيد ...هههه

س7 :هل أنت مرتبط بعائلتك؟

ج7 : والله بحبهم و تحديدا الحاجة بس مش مرتبط بيهم معيشيا و كفاية 5 دقايق معاهم و الباقي بقعد أقرا أو انام بس طبعا مش كل يوم 5 دقايق و احيانا بيحتجزوني ساعة أو اتنين ساعة المشاكل ..

س8 : هل أنت عصبى أكثر أم هادئ؟

ج8 : والله علي السطح هادي جدا ..لكن عصبي أصلا معدا مع الناس اللي بحبها و ممكن استحمل منهم قنبلة نووية و أنا مبتسم أبتسامة عريـــــــــــــضة ولو أنها مش حلوة بس بتأدي الغرض .

س9 : هل تفضل فصل الشتاء أم الصيف ؟

ج9 :بالنسبة للمعطيات الحالية بفضل الشتاء و بديله نسبة 99.999 % _مقصدش امس نزيهة ولا انتخاباتها طبعا _ من الأصوات بس ده ميمنعش ان للصيف متعته و كفاية أني أتمشي فيه بليل من بعد نص الليل كده لحد ما رجلي تقول يا بس .

س10 :متى أخر مره بكيت فيها؟ولماذا؟

ج10 : كان من كام يوم كده و متقدرش تقول عليه بكاء حار يعني و الكثير من الدموع بس هيا عيني اتملت دموع و كنت في الشغل فاستحملت و عدت علي خير ..و الموقف كان اعتذار من أجمل ما يمكن من انسانة متتوصفش و انا لو استاهل نصه يبقي أنا ملاك ..بجد كان موقف خلاني هموت من السعادة ، الأحراج ، الغرور ...هههه

خلصت .

و يغلق المحضر في ساعته و تاريخه

توقيع وكيل نيابة المدونة .

لا يوجد ضحايا و علي المتبرع أن يتقدم من تلقاء نفسه _نفسها