Thursday, May 21

البقاء لله يا ريس

تدوينة كتبتها  الدكتورة مروة  ومسحتها لأنها شكت إن فيها شماتة.بس أنا عدلت حاجة بسيطة وهنزلها لأن مفيهاش شماتة.ولازم نفصل بين تعاطفنا مع أم الطفل زيها زي أم أي طفل بينتقل لرحمة ربنا ودعائنا ليها سراً بالصبر..وكذلك اليقين الطبيعي عند أي حد عارف دينه إن الطفل البرئ في الجنة

وبين جوقة النفاق _ تقرباً من الجد فقط لا غيرأو شكر لنعمته علي رئيسهم مش رئيسي  _ اللي شغلها الإعلام وحالة الحداد الغير طبيعية وقطع الإرسال والجنازة اللي الطفل نفسه لو رجع للدنيا هيرفضها لأنه رايح لربنا مش رايح للبشر..ونتج عن ما سبق حالة تعاطف غير إرادية حس بيها البعض من الغلابة ..أو إرادية نافق بيها البعض نفسهم قبل أي حد تاني

أنا بس مندهش..هو فعلاً بقي صاحب العزبة ؟ واستطعم الناس الخضوع للفرعون حتي في أدق التفاصيل ؟ من 3 سنين كان مستهتر بيتفرج علي ماتش السنغال مع جدة الحفيد ومبانش عليهم غير السعادة برغم إنه ولي أمر سيحاسب عن رعية ماتوا بسبب إهمال إدارته وعضو من أعضاء حاشيته..مفكرش إكراماً ليهم حتي يشوف الماتش في بيتهم ..ليه بقي كل التعازي العلنية والسرية..فيس بوك وماسنجر ورسايل علي القنوات..هل لأن الزن علي الودان إمبارح كان أمر من السحر ؟ ولا لأن إنفلونزا النفاق استشرت بشكل لا إرادي ؟ ولا الجد فعلاً قدر يبقي فرعون بيحكم فراعنة ؟ اسئلة ملهاش رد لا عندنا ولا عند الجد

أسيبكم مع كلام مروة اللي وجعلي قلبي فعلاً..وربنا يرحم الجميع..أحياء وأموات

البقاء لله يا ريس .. انا أم ابني مات وهو بيحاول يهج من البلد ويروح اليونان .. غرق هو واصحابه فيه منهم الي رجع ومنهم الي اكله السمك اصله مبيعرفش يعوم .. ومعرفوش أهله يلفوه بعلم مصر الحرير أصله ناكر للجميل ورمى بنفسه في التهلكة
البقاء لله يا ريس .. انا أم ابني الوحيد مات وهو واقف يستنى الترام .. وقعت على دماغه المحطة - رغم انها كانت جديدة - ومات في الحال كان شايل في جيبه وقتها جواب ترشيحه لكلية الطب غلطته انه استنى التروماي
البقاء لله يا ريس .. انا أم ابني مات متكهرب وهو بيعوم في حمام سباحه غلطتي اني لبسته مايوه وملحقتش اسفره بره ولا حتى يوصل المستشفى الميري .. لان صاعقة الكهربا كانت اسرع .. قدر ربنا وعطيته استردها
البقاء لله يا ريس .. انا أم ابني مات وهو بيدافع عن شباب البلد دي ضد تاجر مخدرات .. وكان يدوب عريس جديد ومطلعش حتى بزفة جنازة عسكرية بعد موته
البقاء لله يا ريس .. انا أم طفلي مات وهو بيتفرج على فرح من البلكونه برصاصة.. طايشة شقاوة عيال يا ريس
البقاء لله يا ريس .. أنا ابني كان عندكم في القسم خدوه من الشارع سليم رجعلي جثة .. واحتسبته عند الله شهيد .. مش هو كده شهيد يا ريس؟؟  يا رب يكون شهيد يا ريس
البقاء لله يا ريس .. أنا ابني دكتور الجامعة مات وهو خارج من صلاة الفجر..عشان يسرقوا منه الموبايل  .. غلطان حد قاله يخرج في ساعة متأخره وكمان يشيل موبايل غلطان يا ريس


البقاء لله يا ريس ..  أنا أم طفل بيموت كل يوم في المستشفى من سرطان وامراض الدم وعيوب خلقية و .... لاني معيش تمن امبول الدواء .. و مستنيه نفقة الدولة  .. قبل ما يموت زي الحيوانات النافقة على سرير مستشفى حكومي
البقاء لله يا ريس .. انا اب ابني مات مولع في قطر الصعيد ومكنش حيلتنا غيره .. فات وسابلنا كوم لحم مراته وعياله وانا عاجز ومريض .. ياما قلتله بلاش تركب درجة تالتة واطلع على السطح أو خليك في السبنسة يا ريس
البقاء لله يا ريس .. انا ابني ومراته ماتوا في عمارة لوران في اسكندرية .. كانوا لسه عرسان مكملوش شهر العسل .. كان نفسي اشوفلي اي حفيد ..  حفيد بس يا ريس

البقاء لله يا ريس .. انا والد اسلام فاكره يا ريس ؟ ؟ اسلام اللى المدرس ضربه في قلبه موته رغم ان قلبه كان سليم وبكامل صحته .. كان من اشطر واهدى طلاب المدرسة .. ضربة قلبه حرقت قلبي عليه يا ريس
البقاء لله يا ريس .. انا اب من الدويقة او كنت من الدويقة رجعت من شغلي لاقيت اطنان حجارة فوق اولادي ومراتي .. حاولت اغسّلهم معرفتش .. اصلهم طلعوا اشلاء بعد يومين وتلاته واسبوع ..  كان نفسي صورهم تنزل في التليفزيون او حتى يتكتب اسمهم في جرنان اصفر يا ريس
البقاء لله يا ريس .. انا جد زيك مات ابني ومراته وعياله في عبارة السلام من البرد والغرق .. حد قالهم مياخدوش عوامات معاهم  .. بس علي الأقل مماتوش لوحدهم وكان معاهم اكتر من الف واحد .. وتخيل يا ريس إن التليفزيون مقطعش الارسال ولو لساعة واحدة بالعكس ده سابلنا الماتش نتفرج عليه ونفرح بالفوز عشان ننسي  .. والاجمل ان صاحب العبارة طلع براءة من قتلهم .. اصلهم ماتوا موتة ربنا .. بس تعرف وحشوني اصل اعز الولد ولد الولد و كان نفسي اشيل جثمانهم حتى يا ريس

البقاء لله يا ريس ..أنا أي أب لأطفال وشباب بيروح دمهم هدر علي الأسفلت كل يوم ..وبيهرب القاتل وبيفلت المسئولين والجرح مش بيندمل يا ريس

البقاء لله يا ريس ..إحنا أسر شباب زي الورد انتقلوا لرحمة ربنا من 8 سنين لما طيارتهم وقعت أدام نيويورك لأسباب غامضة ومنفعناش بحاجة الصندوق الإسود ..هم لقوه صحيح يا ريس ؟! ادعيلهم يا ريس
البقاء لله يا ريس .. احنا أغلب شعب مصر كله الي مات واندفن من اكتر من 25 سنه من الفقر والجوع والمرض والتخلف والتعصب والقوانين وبلاش اكمل .. متزعلش يا ريس وعمر حفيدك التاني ربنا يبارك لوالدته فيه ويطولها في عمره.. بإذن الله طبعاً يا ريس
افتكر إن الموت مبينساش حد .. أول الشهر احتفلت بعيد ميلادك .. اعتقد دي اخر مرة هتحتفل بيه لانه مينفعش تحتتفل بذكرى ميلاد وموت في نفس الشهر .. ربنا يصبر أم الفقيد ويصبرنا كمان يا ريس .. أنا أسف لأني  حاولت افتكر قد ما اقدر الناس الي ماتوا بس الذاكره مستحملتش من كترهم


 البقاء لله دائماً وأبداً يا ريس..ويفني العبد ويبقي الله

تعرف كده يا ريس ؟! يا رب تعرف يا ريس

البقاء لله يا ريس

14 comments:

كيكى عوووووو said...

مش عارفه اعلق على كلامك الى فى الاول
ولا على كلام الدكتورة الى قطع قلبى
مش عارفة لية ناس كتير بتقول ان احنا شماتنين همه مش حاسين لمة فى جرح بيتفتح كل الجروح بتفتح وصعب اوى تتلم
**صعب اوى--
عوووووووو

Unknown said...

بصراحة
انا مش عارفة هى حالة من النفاق
ولا حالة من العاطفة التى تحكم اغلب الشعب المصرى
فلا انكر انى تعاطفت مع الاب والام لانهم اب وام عاديين ونسيت تماما انهم من اسرة النظام


اما عن كلام الدكتورة مروة
فلا رد لانها قالت ما يكوى قلوب الاف السيدات
والاباء فى مصر

Unknown said...

شكرا لسؤالك

رحــــيـل said...

حاجه توجع القلب بجد

المسألة مش نفاق عند الناس بس الطبيعى جدا ان لا شماته فى الموت ومهما كان ده طفل وربنا يصبر امه وابوه لان ملوش ذنب

واكيد لموته لحكمه و عظة

اما بقى عن النفاق الاعلامى فده الطبيعى بتاعهم مش غريب يعنى

فاتيما said...

اخيرااااااااا بوست مفتوحة صفحة تعليقاته عندك يا ضياء !!
الحمدلله
ملحقتش أقرى بوست لماضة بس لا فض فوها
كلامها لسان حال الناس كلها
مش شماتنين فى الموت
بس حاسين إنه جه عشان يكون تذكرة
إن محدش بيفلت من القضاء
و كل الناس اللى قلوبها إتقهرت على عيالها دى من حقها لحظة سلام
لحظة عدل
لحظة يحسوا فيها إن ولادهم بيتساوا مع ولاد علية القوم و المصيبة بتيجى للكل
قطع الأرسال و القرآن و النفاق اللى صاحبهم من دعاة فى كل البرامج تتكلم عن المصيبة و الصبر كلها كانت مبالغات ضيعت أثر التعاطف اللى حصل ف الكام ساعة الأولانين
الناس حست إنه كدا كتير قوى
و يعنى لما مات الف فى العبارة محدش قرى الفاتحة حتى عليهم فى قناة واحدة و الدنيا مشيت عادى عشان يخففوا من آثر المصيبة على الناس
بس مبقاش الحال غير الاول خلاص
و المصيبة بقت مصيبة الكل
و موت شخص غريب عنك فى حادث أو ماسأة بتبقى مصيبتك الشخصية نوعا ما بتعاطفك معاه كأنسان
و هوه دا السبب فى تعاطف الناس مع حفيد الرئيس لما مات
تعاطف إنسانى بحت
لكنه لا يجب ما قبله من مرارة القهر على آخرين ماتوا فطيس
كل الود ليك يا ضياء يا غالى

dandana said...

مش عارفة اتكلم
ولا اقول ايه

نبض اسكندرية said...

ان لله وانا الية راجعون

لعلة خير

Unknown said...

حلو اوى البوست دة

مفيهوش شماتة بس واقعى اوى

الله ينور

الفقيرة إلى الله أم البنات said...

فين الشماته؟
انت حزين على اللى مات لك
بس افتكر اللى ماتوا لنا

انا اكتر شئ قتلنى انهم حولوهم إلى ملايكه
والنفاق الاعلامى
وعمرو أديب والمفتى وكل الناس اللى اتعاملوا مع الموقف بنفاق
شديد

والله العظيم كان نفسى وامنية حياتى ايام العبارة يظهروا حزن
او ايام ضرب فلسطين

والله العظيم وقلتها قبل كده
يوم وفاة الطفل
حسيت انى مجنونه
وانى بيتهيألى حاجات
وانى مش عايشه فى مصر

بس الحمد لله أنا مش مجنونه
ده نفاق

Maryama Qandil said...

salam alikom

الكلام صعب وحقيقة حدوث ده كله صعب فعلا ما بال اهاليهم حاسين بايه فعلا ربنا يصبرهم يااارب
وكلنا معرضين للموت باي طريقة وتحت اي عذر اذا كان اهمال او عدم مبالاة او او
ربنا يرحمهم ياارب ويرحمنا اجمعين

بالنسبة للنفاق...كما هو معروف عن الشعب المصري غلبان وطيب ومشاعره هي الي بتتحكم فيه
بس للاسف النفاق داااخل في كل حااجة
وفي الاخر برده الله اعلى واعلم بالنوايا

Ana keda said...

الكلام صعب اوى والواحد يحسه اوى اوى
مش عارفة احكم عالموضوع والله يا ضيا ماشى معاك ان فى ضجة اتعملت كبيرة فى الموضوع والناس اتعاطفت مش عشان هو حفيد الريس يمكن عشان هو سنه صغير وطفل برىء كاى تعاطف بيحصل التعاطف حصل على الناس

مش عارفة بس احنا شعب بينسى بسرعة وشعب بيقف فى الازمة حتى لو مع حد ظالمنا والله مش عارفة ده صح ولا غلط

اما كلام الدكتورة بجد واصف حالة كلنا فيها تعبانا والم الفقدان صعب اوى والله اعلم برضه وهو مسبب الاسباب

Anonymous said...

فعلا انا متفق معاك ومع مروه
وكتبت لها كتير عشان متمسحش البوست
مش فاهم الناس بقى مالها عاملين زى مايكونوا بيتعاطوا حاجه فيه فرق بين الشكاته والبله
احنا مش شمتانين بس الموت مش بيغير التاريخ

ميرام said...

هو انا زائرة متأخرة
(:
مش حاسة ان الموضوع نفاق قد ما الشعب ده عاطفي قوي
بعيدا عن كونه الريس او غيره
حالة التعاطف دي كانت طبيعية لجد شايل حفيده للقبر
لان الطبيعي ان يحصل العكس
واضح ان الاعلام استغل كده كويس والموضوع فجأه بقى غريب
وحسسوني ان المتوفي ده كان حد مهم قووي ومسؤول ومؤثر
ربنا يتولانا برحمته
ويرحم أمواتنا جميعا
تحيــــاتي

Unknown said...




شركة مكافحة حشرات بالجبيل
شركة تسليك مجاري بالجبيل
شركة المثالية للتنظيف بالجبيل
شركة المثالية لتنظيف المنازل بالجبيل
شركة تنظيف بالخبر
شركة تنظيف منازل بالخبر
شركة تنظيف فلل بالخبر
شركة تنظيف شقق بالخبر
شركة المثالية للتنظيف بالقطيف