عبقرية عمر ..رضي الله عنه

مكانش ليا نفس أكتب أصلاً

بس أمبارح خدت كتاب من صديقة بعتبرها الثقافة ماشية علي رجلين ..رغم أن أكيد في ناس كتير بيقروا أحسن منها بس هيا مهتمة بالقراية لدرجة أنها ممكن متفتحش معايا محادثة علي الماسنجر إلا لو في كتاب أو مقالة أو حاجة زي كده هيا عايزة تتكلم عنها

المهم ..الكتاب أسمه عبقرية عمر ...لعباس محمود العقاد ...كتاب عبقري ..رغم أني مقريتش إلا مثلاً 65 صفحة أمبارح ..وحاولت أخد منهم الخلاصة ..الناس اللي بيقولوا أحنا مش أنبيا ...الراجل ده مكانش نبي وكان قبل الأسلام بيشرب الخمر ومن ألد أعداء الأسلام ..بس عشان فطرته نقية ..بقي حاجة تانية خالص ..ربنا زرع في قلبه الأيمان وهداه

مش هعرف أتكلم عنه طبعاً لا في بوست ولا في عشرة ..بس في شوية أجزاء عجبتني حبيت أنشرها ..سواء كلام هو قاله أو اتقال عنه أوكلام عجبه

مجرد مقتطفات يعني

* أخوف ما أخاف عليكم إعجاب المرء برأيه ..

بهديها لنفسي ولكل بني أدم علي الأرض ده معتقد أن رأيه دايماً صح ..وخصوصاً لكل اللي هيقرا المدونة دي .

* أعقل الناس أعذرهم للناس ..

يا ريت كل العرب يبقوا عاقلين .

* لست مخادعاً ولكن المخادع لا يخدعني ..

لأولياء أمر المسلمين ..

* الذي لا يعرف الشر أحري أن يقع فيه ..

للمتزمتين أو الناس العنيدة اللي مبتحبش تستفيد من تجارب غيرهم ولازم يقعوا في الغلط عشان يعرفوا أنه غلط ويمكن ساعتها ميعرفوش يرجعوا ..ولكل اللي بيرفض أننا نعلم ولادنا ازاي يتفادوا الشر قبل ما نعلمهم المثاليات .

_ العقاد قال عنه ..كان أشد ألمه ظلم ظالم وأشد خجله خِذلان المظلوم .

لا تعليق ..الجملة موضحة نفسها .

كلام عجبه وإيه مش من أحسن الكلام كتاب ربنا القرآن الكريم لأ ده كلام من عامة الناس ..

* الحمد لله لا شريك له في حــكـمه كان أو في قــدره

قدر موتاً علي العباد فما يقدر خلق أن يزيد في عمره

حد يقدر يضمن لنفسه يوم زيادة يعيشه ..طب ليه كله عايش كأنه هيصلح كل حاجة بكره وبعده وهيتوب عن الذنوب كلها قبل ما يروح للقبر اللي مفيهوش لا بكره ولا بعده؟! عمر بن الخطاب سمع الكلام ده بكي

متهيألي أي حد تاني هيسمعه هيعديه من الودن التانية ..مع اننا أولي بالبكاء منه .

* وكنا كندماني جزيمة حقبة من الدهر حتي قيل لن يتصدعا

فلما تفـرقـنا كأننــا أنا ومالك لطول افتــراق لم نبت ليلةً معــاً

عمر بن الخطاب رضي الله عنه بكي ..لأنه افتكر أخوه اللي استشهد يوم اليمامة ..رد عليه اللي كان بيرثي أخوه قاله أنا لو أخويا شهيد في يوم زي ده ..مبكيش

فرد عليه عمر بن الخطاب قاله : ما عزاني أحد بمثل ما عزيتني ..أخوه مات شهيد ..ناس مش متمسكة بالحياة رغم عظمة دورهم فيها ..

احنا بقي يا عرب ويا مسلمين دورنا ايه؟!

راجل تواضع لله ربنا رفع من شأنه وخلاله هيبة مبينولهاش أجدع حاكم من بتوع اليومين دول

..

يا رب أبقي 1 % من عمر بن الخطاب ..فطرته وغيرته علي دينه و إيمانه بيك يا رب ..

والسلام ختام