Friday, February 23

A talk to remember

عنوان البوست ده كان هيبقي عنوان مدونة كانت روان وأنا ناويين نعملها لصديقة مشتركة وكانت من أسرع الناس اللي روان حبتهم وكانت هتعورني بلوك عشان بس أبطل أغيظ البنت بكلمة يا أنثي .
المهم ..أصعب بوست كتبته لحد دلوقتي هو ده لأني بحس بعد ما بفكر فيه إني عايز مبقاش موجود لإحساسي بضعفي..عايز أنام مقومش ..او عايز معجزة .
وكتبته من أسبوعين علي ورق بس ضاع مش عارف فين وضلفة الدولاب بتاعتي يتوه فيها فيل اليومين دول ..عشان كده قررت أقوم وأنا تعبان وألحق أكتب الكلام ده قبل ما ربنا يأذنلي وأسيب الدنيا دي + إن إمبارح سأل عليا أكتر من إنسان وإنسانة اعرفهم وده شئ رجعلي بعض الثقة المفقودة في الدنيا دي ..وللأسف مفيش منهم إلا واحد بس عنده مدونة ..شكراً يا محمد.
قلت قبل كده إن أي كلام هقوله مش هيدي لروان حقها عليا ..بس هحكي حاجة تبين أد إيه الإنسانة دي مكانش ليها مثيل .
Photobucket - Video and Image Hosting
بعدت ما رجعت من لندن بكام يوم..3 أيام تقريباً أو 4 ..كنا بنتكلم أونلاين وقامت خلصت صلاتها و صلت الفجر وبعدين رجعت..حسيت إنها مرهقة أوي وسألتها : مالك ؟! فكان جوابها إنها كويسة بس حسيت إنها فعلاً مش تمام .
وفعلاً شوية وسكتت وبعدين قالت : معلش تعبت شوية .
وقبل ما أتكلم..روان مكانتش خلصت الجملة وسألتني ..شفت فيلم
A Walk To Remember
؟
فقلتلها لأ بس فكرته وصلتني..فسكتت وسكوتها ده فهمت إنه إحباط..بس عشان كنت عايزها تطلع تنام فغيرت الكلام وخلص اليوم علي كده.
اليوم اللي بعده..كانت بتكتب جملة وأنا مش شفتها وأفتكرت إنها سألتني عن الفيلم فقلتلها ليه سألتيني عن الفيلم ده تحديداً إمبارح رغم إنها قالتلي إنها مش بتشوف أفلام الفترة دي عشان مش عايزة تضيع وقتها في حاجة ممكن تاخد فيها ولو ذنب واحد..مقالتش الأفلام حرام لكن حاولت تجتنب شبهة ضياع الوقت في حاجة ممكن تغضب ربنا منها .
فردت قالت لأ أنا شفته من زمان وحبيت أعرف رأيك فيه .
وكانت الجملة اللي كتبتها قبل ما اسأل السؤال إنها هتقوم تصلي ..كان قبل الفجر بساعة وروان اتعودت علي قيام الليل ودي من الصفات الجميلة فيها ..إنها بتوصل للصح لوحدها مش محتاجة وصي عليها أو يفكرها باللي لازم تعمله أو اللي ممكن تعمله عشان ترضي ربنا .
فأنا نسيت إنها كانت هتقوم تصلي وقلتلها إحكيلي الفيلم لأني بحب طريقتها في الحكي حتي لما بتختصر .
روان تناست مؤقتاً إنها قايمة لربنا اللي أحسن مني وأجلت الثواب اللي أنا متأكد إنها كانت في أشد الحاجة ليه عشان تحكيلي ودي المرة الوحيدة اللي أخرت قيام الليل عشان تتكلم ولو كنت خدت بالي قبل ماتبدأ الحكي مكنتش طلبت منها إلا لما تيجي من الصلاة ..كنت ببقي مبسوط وأنا بقول لأصحابي في السايبر لما يسألوني بطلت كتابة ليه ؟! أقولهم روان قامت تصلي ..كنت بحس إني أعرف إنسانة مجرد معرفتي ليها بتدي لحياتي قيمة كبيرة مفتقدها دلوقتي .
المهم ..حكت لي الفيلم اللي البطل فيه بيفتكر أيام ما كان مراهق في اخر سنة في المدرسة العليا _ السنة اللي عمره ما هينساها _ وكان عايش تايه ملوش هدف ومش مؤمن بحاجة ومقضيها فسح وخروج وتهييس ..حصل غلط معين منه كان العقاب المقابل ليه في المدرسة إنه يشترك في نشاط المفروض إنه يتعلم منه التواضع وإزاي يكون ليه قيمة..حاجة متعلقة بالدراما والمسرح علي ما أتذكر .
الوضع الجديد اللي هو فيه خلاه مجبر يطلب المساعدة من
 Jamie
البنت اللي أحياناً بتخسر أصدقائها عشان متعلقش حد بيها لأنها الوحيدة اللي عارفة مصيرها ..عارفة إن متبقاش ليها في الحياة كتير عشان تعيشه ومحبتش تعذب حد معاها .
طبعاً الوضع الجديد خلاهم قريبين من بعض ..وبدأ البطل يحب البنت بجنون ..والبطلة تتهرب منه بكل الطرق..بس في الأخر الأحاسيس الجميلة اللي زي دي مكانش ينفع تتقتل ومكانش ينفع التهرب منها ولا كان ينفع معاها الإنكار والكدب ...وبدأوا مرحلة جديدة في حياتهم..وجودهم مع بعض وكلامهم والأوقات اللي كانوا بيخرجوا فيها مع بعض غيرت كتير من مبادئ وأفكار البطل وبدأ مرحلة أصبحت حياته تستحق إنها تتعاش وحياة مكانش يحلم بيها..
ورغم إن رحيلها المحتوم أثر فيه .. وكان الألم أكبر من إنه يحتمل ..بس الفترة اللي كانوا فيها مع بعض لحد أخر يوم شافها وكلمها فيه كانت فترة أتغيرت معاها حاجات كتير أوي وبقي شخص أفضل وأقوي وقدر ميخذلهاش وقدر يحقق اللي هيا كانت بتحلمله بيه ومضيعش وجودها في حياته هدر زيها زي أي حد تاني مر علي مسرح حياته ومسابش أي تأثير .
لما روان خلصت الفيلم أنا الدموع هربت من عيني ..وفهمت الرسالة من أول لما بدأت توضحلي الفيلم وأفتكرت قصته..فهمتها كأني دخلت جوه عقلها ..وما رضتش يومها أفتح الكاميرا عشان فضلت دموعي موجودة وبتهرب مني غصب عني .
مقبلتش إني أضيع جهدها وأحسسها إنها كانت بتكلم إنسان غبي وضعيف ..فهمت إن الخسارة اللي أنا خسرتها أكيد ربنا ما أرادش بيها ضرر ليها ..فهمت إن اليوم اللي هفتكر فيه روان _ مش هنساها بإذن الله- وفي نفس الوقت حياتي تكون حياة تستاهل إني اكون فخور بنفسي وباللي عملته ..أستاهل تعليقها عندي وكلمتها اللي كانت مكسوفة تقولها لأنها مش بتعرف تعبر بالكلام وأجمل كلامها عني مقالتوش أدامي أصلاً وكذلك كلامها عن أي إنسان قدرته أو احترمته أو أي حد كان محظزظ بحبها ليه ..أستاهل إني في يوم من الأيام الأقدار سمحتلي إني أعرف إنسانة إسمها روان ..أستاهل كل لحظة روان كلمتني فيها ..
لأول مرة أندم وأعيط لأني نسيت أحفظ المحادثات بتاعتنا..بس يمكن ربنا ليه حكمة في كده ..يمكن لو كلامها كان أدامي كله والرغي اللي كنت برغيه معاها كان أدامي كنت هحبس نفسي في الكلام ده ..لكن دلوقتي بعون ربنا ..وده كفاية رغم إني لسه مش بالقوة اللي أستاهل فيها عون ربنا ..إن شاء الله هفتكر الكلام اللي روان كانت عيزاني 
أفتكره ..وهستفاد بيه للدرجة القصوي إن شاء الله .
آخر ما قامت به كانت صلاة قيام الليل، ولعل دي أقوى رسالة سابها لي ربنا. وهي رسالة لا تنسى، وربنا يرزقني نفس مصيرها أو أفضل إن شاء الرحمن.
رسالة إلى: روان ..لو في أي إمكانية إنك تشوفي كلامي أو تحسيه ..لو في إحتمال إن الكلام ده روحك تعرفه سواء دلوقتي أو في يوم الحساب ..بوعدك إني لحد ما ربنا يأذنلي بالرحيل ..هعمل كل جهدي وهعمل المستحيل عشان وجودك في حياتي ميكونش هدر وربنا هيوفقني بإذنه وبرحمته.
Photobucket - Video and Image Hosting
يا رب ساعدني ....
وأغفر لروان أي هفوة ..وإرحمها وأسكنها فسيح جناتك مع الناس اللي بتحبهم ..

25 comments:

sofinqoraso said...

أترددت أنى أرد
ومقدرتش احوش دموعى

على فكرة معظم الناس من عشاق الفيلم ده لأنه بيحمل معانى حلوة اوى

عارف أنى حبيتها اوى من كلامك عنها
يا رب ارحمها يا رب وأسكنها فسيح جناتك

خد بالك من نفسك ومتنساش تدعيلها كتير
أعذرنى بجد مش عارفة أقول ايه

Anonymous said...

I am absolutely speechless

she's in a better place now insha Allah!!

God bless her soul

baby me said...

rabna yr7mha yarab
w ysbrak
mn klamk 7aset enha kant mlak bgd rabna yr7mha
w bgd hya dlw2ty akid mbsota awy w mrta7a 3shan sabt 7gat 7lwa kteer bayna mn klamk 3liha a7la 7ga elensan by3mlha fe 7yato elnas msh by3rafoha gher lmma yb2a msh m3ahm w hya elzkra 2l7lwa 3nno w en e7na nftkr ad a hwa kan ensan bgd
ana awl mrra adkhol elblog bta3k w msh 3rfak wla 3rfaha bs bgd lmma aret klamk 3nha 7aset en bgd eldnya mlhash ay ahmya lw msbnash feha 7ga 7lwa w nas by7bona bgd


yarab er7mha w er7mna kolna asfa 3l raghy

Anonymous said...

تاني بوس ت اقراه عندك و اعيط 00
و اتوجع 00 بس عشان خاطرها انت لازم تكون كويس و ناجح و متيأسش 00
انت عارف انا هنزل الفيلم اشوفه مخصوص عشانك و انا في فيلم تاني فيه نفس الحاله كده اسمه
sweet november
انا بحبه اوي 00 و فكرني بيكوا
ربنا يرحمها و يصبرك 00 و انا علي فكره كنت داخله النهارده عشان اقولك انك لازم تكتب طلع كل اللي جواك و اكتب كتير هترتاح و لازم تصلي قيام الليل زيّها 00 طولت عليك بس عندي حاجات كتير عايزه اكتبها بس بعيط 00
ربنا معاك

Muhammad said...

من اجمل الافلام اللي شفتها, الافلام اللي رشحتهالي .. سلسلة طويلة و مدهشة .. كان عندها القدرة على التمييز بين القصيدة الجيدة من اللي مش جيدة, و الفيلم الجيد من اللي مش جيد .. و قيس على كدا حاجات كتير, حتى و ان لم تدرس اكاديميا الشيء موضوع البحث .. ربما للثقافة العالية, او الذوق الفطري, او النضج, او الاحساس, او كل ده سوا - لكن دايما كنت بثق في احكامها, حتى و ان كان الحكم ناتج عن مجرد حدس

ربما بدا غريبا - لدى البعض - ان نتحدث عن السينما عند استحضار ذكرى شخص راحل .. لكنها هي نفسها لم تقبل يوما بهذا الفصل التعسفي .. اعني انها حين كانت تتحدث عن هاملت مثلا - هاملت على الاخص - لم تكن تتحدث عنه على انه شخصية روائية .. كانت بتتكلم كأنه شخص من لحم و دم ممكن يحصل و نقابله مثلا و احنا رايحين السوق .. ليصبح الواقعي روائيا و الروائي واقعيا, و يتلاشى الحد التعسفي الفاصل .. ثم يأتي رحيلها ذاته دالا على تعسفية الفصل, إذ يحدث على المستوى الواقعي ما يحدث في الفيلم المذكور, أو في افلام اخرى احبتها ... عموما لا احب مقولات من نوعية "يا عم ده فيلم" او "دي رواية", فلا فارق كبير بين الفيلم "الجيد" او الرواية "الجيدة"و بين الواقع .. بل احيانا ما تبدو بعض الروايات اكثر واقعية من الواقع ذاته

حتى و ان حاول الواحد منا ان يتجاهل حقيقة انه عرفها في فترة من حياته مش هيقدر, تأثير وجودها كان بيشتغل بطريقة غير مرئية .. تؤثر حتى و ان لم تنتبه لحدوث تأثير .. و عموما لا احد ينزل في نفس النهر مرتين, فما بالك و النهر ده روان

لم تخسر روان كثيرا برحيلها .. فقد انتهت في موقفها من هذا العالم إلى الرفض .. نحن فقط من خسرنا, و نخسر

Diyaa' said...

نهير ...مفيش داعي للتردد وأتمني إن دموعنا تتحول لدعوات ليها ..وأتمني إني أنا شخصيا أحول الخسارة اللي أنا فيها دي لمكسب يخلي ربنا راضي عني وطالما ربنا راضي عني يبقي هقابل روان في الجنة بإذن الله وحده
وأنا مبسوط إنك حبيتيها وللأسف البلوج بتاعها مش شغال بس أنا طبعت كل البوستات بتاعتها تقريبا وهعملها سكان وأنزلها بإذن الله .
وأنا عاذرك..ادعي بس


إيبي .... أنا كمان كنت كده
و أنا كمان شايف إنها في المكان ده وعايز أشوفها بعيني و آمين ..

لوست...يا رب...وهيا فعلاً كانت إنسانة..والإنسان فيه جزء ملائكي وكان واضح أوي فيها ...وغلطها مش متصور أصلا ولو غلطت بتعتذر قبل ما الواحد يفكر في إنها غلطت وبتعتذر بشكل متحضر أوي وذوق وفي نفس الوقت كرامتها محفوظة
وأنتي صح في إننا مش بنعرف أد إيه الناس دي جميلة ونادرة إلا بعد ما بيبعدوا والنقطة اللي وصلتيلها هي الخلاصة متهيألي وهنزل بإذن الله بلوج فيه أغلب البوستات اللي هيا نزلتها ..لأن القديم اتقفل علي ما أعتقد ..ربنا يسمع منك ومتشكر أوي

أنا هكمل رد علي التعليقات بعدين لأني مش قادر أكتب دلوقتي
سلام عليكم وأسف لو سببت الحزن أو نزلت الدموع..بس أتمني إن اللي يحزن يبص لغرض الدموع دي..نزلت ليه ؟!

karakib said...

مش عارف أقول أيه
أحيانا تعجز الكلمات

Diyaa' said...

كوكاوي..مش عارف أعمل إيه اتأسف لأني السبب في العياط ولا ابدأ أرغي وأقول إن العياط بيكون مفيد لينا وبنحس بالراحة
وفي أحيان بيكون العياط حاجة بتدفعنا للتفكير و المفترض إننا نستغل اللحظة دي في تغيير نفسنا للأحسن ..مش عارف والله أقول إيه ..بس بشكرك علي تذكيري ودعائك ليها وليا وباللي لازم أعمله وأنا عشان خاطرها مستعد أعمل أي حاجة و يا ريت لما تشوفي الفيلم ويعجبك تدعيلها ..والفيلم التاني ده لما تجيلي فرصة أشوفه أكيد هشوفه..لأنها قالتلي إنه فيلم جميل برضه .وعلي فكرة أنا مشفتش الفيلم اللي حكيت عنه في البوست ده .
أكتبي براحتك وأنا عايز أكتب برضه بس مش قادر أقعد قدام الجهاز أصلاً ومش قادر أركز بقالي فترة لدرجة إن البوست ده فضلت فيه أكتر من 3 ساعات !!
وليه في أصفار كتير في كلامك ؟!
متشكر تاني ....

كراكيب ..الدعاء أبسط كلام
إدعي لروان ولأمثالها إن ربنا يغفرلها ويرحمها ويخلدها في الجنة مع اللي بتحبهم
متشكر لزيارتك

Diyaa' said...

محمد ...مش ربما ..ده أكيييييد
فطرة وذوق وإحساس ونضج وذكاء وقدرة علي التمييز وثقافة متنوعة .
كتير أوييي ممكن أتكلم عنها ..بس حاسس إن الكلام مش هيديها حقها ..
وطبعاً إنت اخترت الحتة الفلسفية في الموضوع بس تعرف مكانتش بتفكر في الموضوع من ناحية فلسفية لكن دي فطرتها اللي مع الوقت هذبتها الثقافة والتربية ..
بس أنا معاك إن أحياناً الفيلم بيوصل المعني بإختصار مفيد وبيحسس الواحد بمعاني ممكن منحسهاش من حكي متواصل لعدة أيام ..الفيلم عبارة عن حالة لو نجح الكاست بتاعه في صياغتها وتوصيلها صح هيعيش الناس في الحالة دي وتحديداً اللي بيفهموا واللي بيحسوا وتحديداً أكتر أي إنسان بيمتلك شخصية زي روان .
وتأثير وجودها يمكن غير مرئي بس محسوس ..وعشان كده بحبها أوي يا محمد ..لأنها متكبرتش لما حست بكده وعرفت كده واتصرفت بكل ذوق..وفضل تأثيرها غير المرئي يزيد ..وعن نفسي أتمني النهر ده يكون جايزتي الوحيدة في الجنة ..
وبتفق معاك في خسارتنا ..ويمكن تقول عليا ببالغ لو قلت إن مش أهلها ولا إنت ولا أنا ولا كل اللي كانوا قريبين منها هما اللي خسروا ..أعتقد إن في ناس كتير كان ممكن تأثر في حياتهم إذا أراد ربنا بس ربنا أرادلها الراحة ..وقدر الله وما شاء فعل
وموقفها الرافض للعالم كان فيه جانب متفائل ..كانت شايفة إنها هتعمل حاجة جميلة وكانت مصممة علي كده وكنت بتمني من ربنا أكون جنبها وأساعدها ..بس زي ما قلت ربنا أرادلها الراحة

voice of love said...

مفيش كلام ممكن يتقال غير الدعوة ليها بالرحمة
وأغدعو الله حتى أن تتحول دموعنا الى دعوات
حسيت انى أنا كمان فقدتها رغم انى معرفهاش
ربنا يغفر لها ويرحمها ويصبر قلوبنا

Oma said...

بجد مش عارفه اقول ايه خلاص
البوست هزني اوي وكلامك عنها حببني فيها بجد....بس هي محتاجه دعواتنا كلنا جداً ده اكبر دليل انك بتحب حد انك تفتكره بالدعاء عشان ربنا يرحمها ويسكنها الجنه يارب..بجد مش بعرف اتكلم في الحاجات دي بس ربنا يقوي كل اللي افتقدوها ويرحمها وربنا مايحرم اي حد من حد بيحبو ابداً

Diyaa' said...

Voice of Love
كلامك صح يا دكتورة وأتمني فعلاً الدموع تبقي دعوات ليها
ومتشكر ليكي
وفي الآخر مقدرش أقول غير أمين



وئام ..فعلاً الناس بتحبها بسرعة وده بيطمني عليها وبإذن الله تكون عند ربنا في أحسن مكان
ومش مهم الكلام ..ودعائك أبلغ من أي كلام ...
ملحوظة ...وئام مختار عرفتني شخصياً ومكلفتش نفسها تدخل تقول أنها بتدعيلها ..واللي ميعرفوهاش بيعلقوا تعليقات بتثبت إن الدنيا لسه فيها حد بيحس ..هو الدنيا ماشية بالمقلوب ليه ؟!

Yassmina said...

bgd rbna yr7mha wysknha fasi7 gnath
shi2 7lw awee an 7ad y2thr fena kda
wbgd akeed klamha dah haifdl gwak daima
a7iana rbna bidina nas odamna mn ghir ma n7s btkon elnas de sbb f2nna nkon a7sn w2nna ntghir ..
msh 3arfa a2ol aih tani bas bgd hia ansana gamila awee

Diyaa' said...

ياسمين ...
يا رب
والحد اللي بيأثر ده كلمة قليلة علي إنسانة زي روان ..لأنها كانت تأثير متحرك ..حاجة زي ما قال عنها محمد كده ..تأثير غير محسوس ..وكلامها أنا أتمني أحفره في مخي ..بس بحاول عن طريق قراية كلامها في مدونتها إني أفضل فاكر كل حرف وأقراه من كذا زاوية عشان أوصل للفهم المطلق لكلامها ..
واتمني إن فعلاً أنا اللي هو العبد لله ضياء ..أبقي بني أدم احسن ..أرجع ضياء اللي كنت هحبه ..أول ما رجعت بدأت أحبني ..دلوقتي مش عارف بقي ..
وإنتي قلتي اللي حسيتيه وهيا فعلاً من أجمل الناس اللي ممكن تعرفيهم في الزمن ده
متشكر أوي

koukawy said...

downloaded the movie 00
and i`ll watch it and tell u my opinion
am happy thet u`re better now i know it when u visit me

Diyaa' said...

koukawy ...congrats & i'll wait urs though i know how wounderful movie is it
i wish to see it u know ...
i'll try to visit u to give u this feeling always..when ppl feel that i'm ok that means i'd be ok soon
anyway thanx for ur comment & thank god i'm not bad

saso said...

وانا زيك باحمد ربنا انك مشيلتش كلامكم علشان ميبقاش هوا اللي باقي ليك منها
افكارها اهم من كلامها وهيا واضح انها كانت عاقلة اوي
الله يرحمها ويقدرك تعمل الخير ليها ولنفسك
لو كلامها مش هيوصلك فالاكيد دعواتك هتوصلها ان شاء الله
ادعيلها اوي لما تفتكرها بدل ماتزعل او تبكي
تعرف انك اقوي بكتير مما تخيلت ..انا لما كنت باشوف كلامك عن سفرها كنت باخاف عليك لو حصل حاجة هتعمل ايه.بس انت الحمد لله طلعت قوي جدا
ولسة بعد فترة لما تدفعك الذكري للابتسام بدل البكا.. هتبقي وصلت للي هيا عاوزاة ليك
الـسـلام

ربنا معاك

Diyaa' said...

ساسو ...حمد الله علي السلامة ..وأفكارها فعلاً سابقة سنها بكتير ...بسم الله ما شاء الله استفادت من مكتبة كبيرة واستفادت من أفلام كتيرة ومن نعم ربنا عليها ..وزعلت أوي لما عرفت إن أخوها قفل المدونة بناء علي رغبة ليها كانت صارحتني بيها قبل كده وأنا اعترضت
بدعيلها لما بفتكرها ..وتقريباً خلصت الكريديت بتاع العياط فمن الناحية دي الحمد لله عدت ..

إنتي قصدك إن كلامي مش هيوصلها فدعواتي هتوصل صح ؟! أتمني كده وأتمني كل دعوة ليها تتسمع وأتمني كل هفوة ليها تتغفر ...
تعرفي أنا مش عرف ليه الناس شايفاني قوي ..يمكن مش شايفين السلبية اللي أنا عايش فيها أو مش شايفين ضعفي وأحتياجي لحاجات مش موجودة أو عشان أجيبها لازم أدوس علي كرامتي وأفضل أجرب في حظي ..بس أنا أتمني إن ربنا يديني القوة دي لأني فعلاً مش هطمن علي روان واشوفها في الجنة إلا لما أنا كمان أكون بني آدم بحق وحقيقي مش مجرد لسان بيتكلم وبس

موضوع الابتسام ده موجود والله ...كانت عليها قفشات ..فعلاً كان نفسي يكونوا موجودين أدامي عشان كل ما بفتكر حاجة منهم بحس إني سعيد ..
متشكر أوي يا ساسو ..وربنا مع الكل ..وسلام عليكم بقي

maioya said...

بجد البوست مؤثر اوي مكنتش متوقعه ان ممكن تكون قصه الفيلم واقعيه اوي كده
وبتحصل في حياتنا
الواحد بجد مش قادر يمسك دموعه من كلامك عنها
ربنا يصبرك علي بعدها ويغفرلها ان شاء الله

Diyaa' said...

ناريوما ...يا رب وللأسف احنا بنصدق افلام ملهاش لزمة ومفيهاش رسالة لكن ساعة ما الفيلم يكون عايز يقول حاجة محدش بيهتم الا لما يتحط في مكان البطل
ومتشكر لرأيك وزيارتك

Reemo said...

ana awl mara ad5ol el blog bta3k
we kont nawya arod 3la el post el awl bs mesh 3arfa leh nzlt we2ret el post da
3ayza a2olk eny bgd 3yt m2drtesh amsk nafsy
mesh 3arfa leh elnas el kowyesa dayman heya elly btfar2
howa mesh e3trad 3la eradt rabna bs bgd el wa7d byt3b awy lma yekon fe 7d kowyes awy keda we yero7
ana bgd 7betha awy mn klamk 3nha
rabna yesbrk ya rb
we yed5olha fase7 gnato
we ye3`frlha ya rb

محمد صلاح العزب said...

الحزن شعور نبيل

Diyaa' said...

reem
rbna ysm3 mnk ...w enty nzlty w 2rety elpost da 3shan t7sy w td3y lensana b7baha w kol elly 3rfha 7abaha
3ya6k mogrd sho7na w 5rgt w atmna kol ma tftkreny aw tftkreha td3elha
elnas elkwysa btfar2 3shan n7s ad eh homa kwysen w 3shan da thier destiny w 3shan yrta7o
atmna 7obk leha yb2a do3a2 leha w elnas ely zyaha hyfdlo mwgoden belly 3mloh fy eldonya
rbna ystgeb leky ya rb w ashofha fy elgana


mohammed sala7
it's not about sadness
it's about losing which caused
the biggest gap ever

أميرة من غير قصر ولا بستان.. ولا الشاطر حسن كمان said...

انا فضلت باصه على المستطيل الابيض اللى بنكتب فيه الكومنت حوالى ربع ساعه و مش عارفه اكتب ايه لأنى بمنتهى البساطه دخلت البلوج ده ف وقت انا نفسى فيه محتاره و حاسه انى وحيده وسط اكتر الناس اللى بيحبونى
انا مش هاعرف اتكلم عن روان ببساطه لأنى معرفهاش و لو حتى قلت انى اعرفها من كلامك عنها ف هاحس انى مش صادقه انا دعيتلها ربنا يرحمها و مش عارفه انا حتمال كبير اكون بغبطها على ايمانها و على حبك ليها
لكن اللى كتأكده منه انى مش عارفه اقول ايه

Dr.esso said...

lel2saf i watched dis film i couldn't prevent ma tears like now whan i read wat u've written i couldn't 2 . nothing 2 say just allah yer7amha o ye3'ferla o yesakenha fase7 ganato zay manta dayman bet2ol o kolena ben2ol bas u could pass ur request 2 da all el7amdoelah kolena bned3elha now o men sa3et m2aret da walahi baftekerha fe kol fard . just wana nsay u r strong man o heya now mestrya7a aktar mnena o isa hatet2ablo fe elgana . plz god bless her soul o kefaya keda 3ashan bgd msoh 2adra 5las