كتابتي النهاردة وبعد مرور شهرين إلا يوم علي فقداني روان وعدوا كأنهم يومين ويمكن أقلالنهارده مفيش هدف عندي غير الفضفضة وبسربنا يكون في عون اللي هيكمل للآخر .
****
تكملة للبوست اللي فات
بمجرد أن اكتشف عدم وجود مبلغ من النقود كان بحوزته قبل دخول المسجد عاد وسأل خادم المسجد والذي طمأنه بوجه مضئ أنه بمجرد أن يجدها مع رفيقه في المسجد سوف يحفظها له وأن باستطاعته المرور في الفجر لأخذها ولكنه لم يصلي بنفس المسجد يومين متتاليين في لحظة من لحظات انتصار نفسه الأمارة بالسوء عليه وعندما تغلب علي كسله وذهب لأداء الصلاة في المسجد..وبعد أن انتهي منها فوجئ بخادم المسجد مضئ الوجه يستوقفه ويظهر له المبلغ المفقود كما كان في جيبه يوم ضياعه وبابتسامة أحس فيها بطيبة العالم كلها قال خادم المسجد ..فلوسك حلال ..بعد المعتاد في مثل هذه المواقف خرج من المسجد وهو يفكر ..هل ما حدث الآن مجرد جزاء إحساسه بالصغير ونصيحته لخادم المسجد ؟ أم مجرد تأكيد لأنه وضع قدميه علي الطريق الصحيح _رغم تيبسهما علي أول الطريق ؟ أم إن ما حدث تأكيد لأن ما يكسبه من مال علي بساطته لا حرام فيه ولابد أن يواصل السعي لكي يصل لأهدافه التي لم يفهمها ولن يهتم بها أحد ؟!
دارت هذه الخواطر بباله ولم يدري أيها الصحيح وتمني أن يثبته رب العالمين علي إيمانه
تمني أن تتحرك قدماه علي الطريق بدلاً من إضاعة الوقت في إنتظار مساعدة من مجهول
وانصرف ولم يدور في باله إلا الدعاء ...
****
عن الفتاء الدستوري سأتحدث ..
في صورة عرضتها الجزيرة واتبعتتلي من أخت عزيزة بتثبتلي بيها اللي بيدور فعلاً
وبصراحة الموضوع مش محتاج إثبات
طبعا الصورة تتحدث عن نفسها ودي حاجة بسيطة من رئيس قرية فما بالكم بقي
بنائب مجلس أيا كان كلهم واحد الصراحة ولا وزير ولا حتي رئيس مجلس إدارة
وأنا دمي اتحرق إمبارح في لفتي علي بعض المدونات
أكتر ما هو محروق من همومي اللي محدش هيشاركني فيها أصلاً
لكن حبيت أقول حاجة بسيطة ..أنا مرحتش ومعملتش بطاقة انتخابية
رغم احترامي لشجاعة اللي راحوا قالوا لأ رغم علمهم بعدم جوداها
بس علي الأقل نفسهم مفتوحة يعبروا عن رأيهم ولو إن الحكومة استغلتهم
في إثبات مدي الإقبال الكبييييييير علي ديمقراطية الحكيم اللي مجابتهوش ولادة
محمد ولد حسني ولد مبارك
المهم بقي اللي عايز أقوله كمان ...ومش مهم إذا كان يهم حد ولا لأ أهو هعمل اللي عليا وأقول رأيي
يمكن ييجي بفايدة
الناس متحكم فيهم حكام بالسوء ده ليه ؟
عشان الناس محتاجة تنضف من جوه وقبل كده مش هيقدروا يغيروا ولو رئيس مجلس محلي من مكانه
الناس بكل بساطة بقي همها الفلوس ولا شئ سوي الفلوس
بعض المظاهر الكدابة
الجنس ولو جاعوا يبقي الأكل اللي بتحس منه إنها أخر وجبة ليهم
لبس وشوبنج عموماً
تقليد للغرب في الحرية بجانبها السلبي
تشبث بكل ما هو تافه في الدين والجدل في اللاشئ
كل ما حد يقولنا شايفين العصفورة نرفع عينينا وندور عليها
كل ما يثيروا أي قضية ننشغل بيها ونفرغ كل طاقتنا العصبية فيها وبعدين منوصلش لشئ
يبقي ازاي هنقدر علي حاكم زي ده تبت وتنح وحواليه عصابة الأربعين ألف حرامي
وكمان متحكمين في الناس بيخلوهم يخبطوا في بعض
ما هو الأمن المركزي دول مننا وغلابة بس ممسوح دماغهم ومخوفينهم
نغلب خوفنا وعيوبنا أمتي
يا اما نستني مع الزمن والتربية واحدة واحدة ويمكن الجيل الجاي أو اللي بعده يكون فيهم الفايدة
يا إما نستني جيفارا يكون فيه منه نسخة مصرية أو عربية أو مسلمة
وأعتقد إن حتي جيفارا لو ظهر في مصر هيموت بسرطان أو بكبد وبائي أو بأهمال في مستشفي
او في عبارة أو في طيارة أو في مسرح والقائمة تطول
مش عايز أقول مفيش أمل ..عايز أقول منبدأ باللي نقدر عليهم
بس خلاص كفاية
****
صلاح عبد الصبور قال
يا موتانا ذكراكم قوت القلب في أيام عز فيها الأقوات
لا تنسونا حتي نلقاكم
وأنا عايز أعترض عليه..لأن مش هما اللي بإيدهم ينسوا أو لأ
لأن مفيش دنيا شغلاهم ولا شهوات مستغرقاهم
عكس بنو البشر اللي ربنا أنعم عليهم بالحياة عشان يموتوا عقولهم ويمشوا ورا اللاشئ
لحد ما حياتنا هتبقي لاشئ كبيرة
وأنا كمان بقيت بحاول أوقف عقلي
بس كل ما في ناس بتسيبني في وسط الرحلة
بيفضل شغال..
وفي كلمتين عايز أهديهم لروان ..
يا من تسكنين العالم الآخر جمعت لك من حديقة الحياة زهرتين
زهرة عشق وزهرة وفاء ..وأنتظر دوماً يا مليكتي يوم اللقاء
****
عني وعن الصداقة سأتحدث وبدون التزام بأي قواعد لغوية
أغلب اللي عرفتهم كانوا بيضيعوا وقتهم بعيد عن أعز أصدقائهم
وأحياناً كنت بكون واحد من أعز الأصدقاء
وتمر الأيام وتاخدهم الدنيا
ومكونش عرفتهم أد إيه هما غاليين وأد إيه أنا مستعد أثبت كده فعلاً
بس بيفوت الوقت ومبنلحقش
بيضيعوا كلهم ..وفي وقت وجودنا مع بعض بتوصل لدرجة إن مفيش كلام يتقال
وتوصل لدرجة اصطياد الأخطاء والحساسية علي حاجات ممكن نتقبلها من ناس ميسووش عندنا حاجة
وفي الأخر السكة بتنتهي ومنكونش لحقنا نعبر عن جزء بسيط من مشاعرنا لبعض
ومنكونش لحقنا نكمل الطريق اللي بدأناه مع بعض
ومنلحقش نسيب أثر في حياة الناس دي
هو مش البديهي إن الواحد فينا يحتاج صديقه عشان وقت الضيق ..
وقت ميكونش صديقه فيه ده محتاج إلا لإيد تتمدله وتكمل معاه لحد ما يرجع يقف علي رجليه ؟!
هو الصداقة أو أي علاقة انسانية مجرد بيس أوف كيك ..قطعة كعك يعني ؟!
حاجة سهلة كده المفروض يبقي الطرفين فيها مسليين أوي ومحدش فيهم يمر بحالة انعدام وزن
يكون الاتنين مادياً زي بعض وكل حاجة زي بعض ؟!
طيب يبقي كده نكتفي بأخواتنا اللي في البيوت منروحش لحد غريب
لأن اللي في البيت نفس الوضع المادي ومكشوفين لينا لدرجة إن من السهل استيعاب أغلب تصرفاتهم
بس بيضيق الصدر جوه البيت وبيهرب أغلبنا لبره وده غالباً لأختلاف الشخصية لأن كل أسرة مش متماسكة بتطلع فيها الشخصيات كل واحد مع نفسه
ولما نهرب لبره ونكون اصحاب في الوقت العادي ولو التعامل فسح وخروج ونكت ونميمة
هنبقي قريبين أوي ويا سلام لو في مصلحة مادية ..حتي لو مش ماديين بس اهي تقوية أواصر الصداقة
لكن ساعة الجد بيختفي الجميع
هنفضل أنانيين لحد أمتي ؟!
متوقعين إن الهدف من خلقتنا هو اننا نستمتع بالعيشة من غير أي أعباء ليه ؟!
أنا رغيت كتير وحاسس إني بضيع وقت اللي ربنا هيبتليه بقراية البوست ده
بس لما أحس إني أقرب الناس ليا أول ما بيلاقوا بديل ينسوني
ميهتموش بالاتصال ولا إنهم حتي يطمنوني عليهم
طيب بعد ما كافحت عشان أخرج وأقرب لربنا واعتمدت علي ربنا وفي نفس الوقت
مقدرتش أكمل لوحدي واحتجت للتشجيع واحتجت أفضل مهتم بأقرب الناس ليا
بس الاهتمام اترفض والفراق بيحط أخر لمساته الرمادية علي أخر أمل كان ليا
بس النهارده حاسس إني كسبت أخت وصديقة عزيزة
وبرضه أتمني صاحبي اللي شايل كل جمايله في عينيا الأتنين يرجع صاحبي
وبس خلاص ..مش هكمل عشان كفاية كده علي ناس متعرفنيش
بس بدعي ربنا إن كل أتنين كويسين وقريبين من بعض ميجيلهمش داء الكسل
ميستسهلوش يبعدوا طالما حاسين بعبء
ما هو كما تدين تدان
****
في صورة شفتها عند المدون الجميل شرم أقدر أعتبرها كوميديا سوداء
عارفين إن مصر فيها عيوب كتير وغباء مستشري
لكن مش لدرجة إني أتوقع إن الأعمي هيقرا الإعلان
ولا المفروض إن زمايل الطلبة المكفوفين يدوروا عليهم يبلغوهم ؟
روح التعاون دي بتموت يوم بعد يوم وأكيد نص الناس المستهدفة من الصورة دي مش هيعرفوا أصلاً
يبقي اتحطت ليه ؟
سد خانة ؟!
وعموماً المتنبي كان 100% صح
ياما فيكي يا مصر من مضحكات ولكنه ضحكٌ كالبكاء
بس كفاية كده عشان الناس كرهتني
27 comments:
انا محظوظه انى اول كومنت يا ضياء :)
انت بجد كل يوم بتثبتلى انك تستحق الاحترام وان بتملك عقل جميل واحساس رائع
عجبتنى فضفتك اوى وده بجد مش مجامله علشان كده انا هعلق عليها جزء جزء
بالنسبه لبقيه القصه فهى زى الجزء الاول جميله فعلاواكيد مفيش احلى من المال الحلال حتى لو كان قليل لانه كبير براحه البال ورضا النفس
والطريق الى الله جايز يكون مليان مطبات وصعب سلوكه لكن اكيد فى النهايه هو راحه البال الاكيده
اما موضوع التعديلات الدستوره فهو مش محتاج اى اثبات لان الطبخه من زمان ريحتها فاحت بس انا معاك ان التغيير مش هيحصل الا لما الناس تغير نفسها الاول وحتى لو غيروا نفسهم ومفيش حاجه من حواليهم اتغيرت فكفايه ان الواحد كسب نفسه"لن يغير الله ما بقوم حتى يغيروا ما بانفسهم"
انا بايد اعتراضك على صلاح عبد الصبور لان الموتى مش بينسونا ابدا
روحهم بتفضل حوالينا بتحس بينا عمرها ما بتنسانا ابدا
انا لغايه النهارده بحس بروح ماما حواليا وبحس بيها ومتاكده انها بتحس بيا مهما قالولى ان ده وهم او تهيؤات بس انا حاسه بيها ومتاكده انا موجوده معايا بروحها حتى لو جسدها راح
ربنا يرحم جميع موتانا يا رب
موضوع الصداقه ده بقى الكلام فيه كتير اوى لانى لسه من يومين كنت بتكلم فيه
بستغرب على ناس بيبقو قريبين اوى طول ما الواحد موجود ومجرد ما يغيب عنهم شويه ينسوه ولا يسالو عليه ويستبدلوه بشخص تانى ولو رجع فى يوم مش بيلاقى مكانه بيلاقى المكان محجوز
مش عارفه العيب فى الواحد ولا في الناس اللى مش فاهمه يعنى ايه صداقه ولا فى معنى الصداقه نفسه
فى مثل بيقولك هم يبكى وهم يضحك
وبجد الهم ده ضحكنى
بجد يا ضياء مش لاقيه كلام اقوله اعبر عن اعجابى بمدومتك من اول الموسيقى الرائعه لغايه الكتابات الاروع
تحياتى
اكتر حاجة سعيدة بيها انك كتبت.....
بقية القصة جميلة...احببتها زى الاولى تمام...
التعديلات الدستورية...لاتعليق....
ولا اقولك...تعليقى هو كلام امل دنقل اللى كتبته عندى
ان تكن كلمات الحسين...
وسيوف الحسين...
وجلال الحسين...
سقطت دون ان تنقذ الحق من ذهب الامراء...
افتقدر ان تنقذ الحق ثرثرة الشعراء...؟
الصداقة.....مش عارفة ..هاعلق وقت تانى
تحياتى
for the first part, May Allah grant you strength and faith and ligh to go on with your path..in the right way
for Egypt, well I respect your point of you, though all you spoke of could be solved if we all fetched our true Egyptian identity.. if we find it in its true sense,, and clinged to it.,. there will be hope of reformation in this country
for friends.. well your right...so right, how I lost friends in this sense.. due stupid life.. I think they are such a treasure that we have to keep attached to... thanks for such a beautiful reminder
:) welcome back, Diyaa!! ya rab dayman tekon merta7 el bal :)
Hello!
Thanks for you work. is very nice.
Have a good day
يا رب تبقى كويس
:)
still the mood is not good enough ?
plz, feel better
ياه ه ه ه ه ده انت في قلبك و صارر
بالنسبه لموضوع الاستفتاء و اللي انت بتطلق عليه فتاء انا كمان مرحتش اديتهم صوتي لنفس اسبابك
اما صلاح عبد الصبور انا بحبه جدا
و روان ربنا يرحمها و نموت كلنا علي نفس ايمانها و برائتها
تحياتي
الامل موجود وعايشين بية
وزى ما انت قولت لما الناس تنضف من جواها هتقدر تنضف اى حاجة مش عجباها
تحياتى
تجبرني الكتابة الحميمة - عموما - على التعليق, حتى و إن لم يكن تواجدي مرغوبا ..... استهلال سخيف لابد منه
تقرر منذ البدء أن كتابتك من قبيل الفضفضة .. فأقرر - بالمثل - أن أتعامل معها بحميمية التعامل مع الفضفضة
تؤرخ لحظة الكتابة بتقويمك الخاص .. ذلك الذي بدأ يوم رحيلها - فأتذكر الأيام البعيدة القريبة التي اعتدتَ فيها أن تؤرخ بسفرها .. و أتخيلنا نؤرخ - على طريقتك - بموت الأحباب, ليبدأ تقويم جديد كل صباح أو كل مساء
يعود المال, فتبدأ في تحليل الإشارة .. جزاء الإحساس بالصغير - الكسب الحلال - رضا الرب عن أولى خطوات الطريق ... الله وحده يعلم
عن الفتاء الدستوري تتحدث, فأصمت متمسكا بحميمية الفضفضة - بعيدا عن أجواء السياسة الملوثة
دفاعا عن صلاح الذي لن أدعك - بطبيعة الحال - تنال منه: يقول صلاح في نفس القصيدة
كانت أطيافكم تأتينا عبر حقول القمح الممتدة
ما بين تلال القرية حيث ينام الموتى
و البيت الواطئ في سفح الأجران
كانت نسمات الليل تعيركم ريشاً سحرياً
موعدكم كنا نترقبه في شوق هدهده الاطمئنان
و يقول
هل جئتم تأتنسون بنا
هل نعطيكم طرفاً من مرقدنا
هل ندفئكم فينا من برد الليل
نتدفأ فيكم من خوف الوحده
حتى يدنو ضوء الفجر،
و يعلو الديك سقوف البلدة
فنقول لكم في صوت مختلج بالعرفان
عودوا يا موتانا
يفترض صلاح - منذ البدء - حضور الموتى في هيئة أطياف .. يفترض وجود موعد باتفاق بيننا و بينهم .. و الأمر كذلك (وجود اتفاق بين طرفين), يصبح من الممكن أن يخل أحد الطرفين بالاتفاق
يقول صلاح
عفواً يا موتانا
أصبحنا لا نلقاكم إلا يوم العيد
لما أدركتم انا صرنا أحطاباً في صخر الشارع ملقاة
أصبحتم لا تأتون إلينا رغم الحب الظمآن
قد نذكركم مرات عبر العام
كما نذاكر حلماً لم يتمهل في العين
لكن ضجيج الحاضرة الصخرية
لا يسعفنا حتى أن نقرأ فاتحة القرآن
أو نطبع أوجهكم في أنفسنا، و نلم ملامحكم
ونخبئها طي الجفن
و هو شبيه بما قلتَه عن بني البشر الذي ينسون أو يتناسون
حتى و إن تعاملنا مع الأسطر التي أوردتَها دون باقي القصيدة, فيمكن حملها على أن نسيان الموتى لنا ما هو - في حقيقته - إلا نسياننا لهم .. فهم يأتون حين نتذكرهم, و لا يأتون (ينسوننا) حين ننساهم
أما عن زهرتيك اللتين ترسلهما لمن يسكنون العالم الآخر .. فلا شيء عندي سوى التقدير
أفهم تماما كلماتك عن الصداقة .. لكني لا أتوقع تغييرا بعد قراءتها .. سيظل - فيما يبدو - حالنا كما هو .. ندرك - فقط - أنّا افتقدناهم بعد فوات الأوان .. ليروح الأصدقاء, و يبقى الندم
ما زلتُ متمسكا بالفضفضة, فأتجاوز الصورة المقتبسة من شارم, كما تجاوزت السياسيّ .. لأعجز - فقط - عن تجاوز المتنبي
شيء أخير: أحب هذا الأمل في الأجيال القادمة التي - ربما - حققت ما لم نستطع نحن ... أحب - أيضا - إشارتك إلى التربية كنوع من الخلاص من قبح الواقع, و قبحنا .. خصوصا و قد أخبرتْني عن حلمك/حزبك الذي يخاطب الأم, و بالتالي أطفال الغد
يقول عبد الصبور على لسان زياد في مسرحيته "ليلى و المجنون": أحلى ما فيها أنك تنعى هذا الجيلَ الآسنْ
جيل لا يصنع إلا أنْ ينتظر القادم
جيل قد أدركه الهِِرَمُ على دككِ المقهى والمبغَى والسجن
جيل مملوء بالمهزومين الموتى قبل الموت
فيرد سعيد: هذا حقٌ أزياد
فأنا أشعر أنَّا جيل قد مات ولم يولَد بعد
لا يقدر أنْ يصنع شيئاً, حتى في الحُبّ
أدفأتني كلماتك
ضياء
لو انا طيبة مرة زى ما انت قلت
انا بقول عنك انسان لن ياتى بعدك مثلك
ربنا يجمعكم مع بعض فى جنتة
ويغفرلها ويتغمدها برحمتة
وان شاء الله ربنا يتقبل الدعاء
وتحياتى ليك وليكى يا روان
واتمنى انى يوصل سلامى ليها
والله ان العين لا تدمع
وان القلب لا يخشع
وانا على فراقك لمحزنون
انا لله وانا الية راجعون
ريم ...تعليقك من التعليقات اللي حسيت إن أقل رد عليها هو بوست كامل مش رد عادي ..بس أعذريني بقي ..الكمبيوتر علاقتي بيه مش زي الأول بتاتاً ..
أنا اللي محظوظ بالكومينت بتاعك..
ورأيك فيا هعتبره مجاملة وده مش تكذيب ليكي بس ممكن أنتي تكوني شايفة جزء بسيط من ضياء مش أكتر ..وأنا مبسوط باعجابك بالفضفضة وتعليقك عليها وهرد عليه أهو
الطريق إلي الله مش مليان مطبات ولا صعب ..النفس الأمارة بالسوء بتهيألنا كده ..والكسل اللي متأصل جوانا هو اللي بيسهلنا الطريق التاني ..عقلنا واخد أجازة والفسح أهم من التفكير في جدوي كل تصرف بنعمله ..وفي الأخر أعترف إن الشيطان شاطر أوي والبني أدم تلميذ خيبان أوييييييييييي في مدرسة الحياة وربنا المستعان بقي..مفيش أدامنا غير المحاولة والدعاء لربنا إنه يكون في العون
التعديلات مش طبخة ..ده جزاء النوم في العسل ..خلينا نايمين لحد ما يبقي عندنا جمال مبارك في كل حي وكل شارع ..لو قريتي أولاد حارتنا لنجيب محفوظ هتفهميني أكتر وعموماً ليا عنها بوست حين ميسرة ..
وكويسة أوي كلمتك اللي قبل الآية القرآنية الجميلة ..كفاية إن الواحد كسب نفسه
بس تفتكري إن الواحد ممكن يعمل كده لوحده..في ظل التخلي المقصود وغير المقصود من أقرب الناس ليه عنه ؟!
صلاح عبد الصبور ...ده ليا عنه كلام تاني في ردي علي فريكيكو...بس بالنسبة للنظرة المباشرة للكلام ففعلاً مش معقول إن الناس اللي راحت غصب عنها وكنا متأكدين من مشاعرهم لينا هما اللي هينسونا في حياتهم الخالية من أي مطامع ولا شهوات ولا تلاهي حتي ..عكس الدنيا اللي خوفت سيدنا عمر بن الخطاب وهو من هو ..ومع كده أهل الدنيا هما اللي متخوفين من نسيان الناس اللي سابوهلنا مخضرة ..
وربنا يسمع منك ويغفر لوالدتك ويرحمها ولكل الناس الجميلة اللي سابوا حب الناس ليهم وراحوا..
واحساسك بيها ده مش تهيؤات ..ليا رأي فيه بس أتكسف أقوله أصلاً ..
الناس اللي بتغير أصدقائهم زي ما بيغيروا ملابسهم الداخلية بالضبط دول مش وحشين ولا حاجة ..هما بس أتعودوا ينسوا ..اتعودوا علي الكسل ..ليه أروح لحد متعب في وجود حد علاقتي بيه سطحية وبنقضي وقت بنخرج منه مش فاكرين قضيناه ازاي ومفيش حاجة بتأثر منهم في الشخصية فعلاً ..
بيلجأوا لناس تقدري توصفيهم بالمخدرات ..مجرد حاجة بتنسي وبتضيع الوقت وتدي ايحاء بالسعادة ..وبعد كده وقت الوجع متلاقيهمش جنبك لأنهم مش عارفين أصلاً إن في وجع ولو عرفوا مش هيعرفوا يعملوا ايه ويكسلوا ويسيبوكي ..دايرة وكلنا بنلف فيها ..
مش لازم تستغربي ..أخرجي من الدايرة ..عرفتي تخرجي ..هتتعبي وأنتي بتقرري كده وتتعبي وأنتي بتنفذيه وتحتاري ..وتتعبي وأنتي بره الدايرة المزيفة دي ..بس في الأخر هتكسبي نفسك ..وتخرجي من الدنيا وكل الناس بتحبك وممكن ميعرفوش قيمتك وأنتي عايشة وسطهم
أتمني إني أوصل للمرحلة دي ..
ومفهوم الصداقة نسيوا يدرسوه..درسولنا بس أد إيه مبارك بطل الحرب والسلام
يا أخي أتا
أنا مش لاقي كلام أقوله رداً علي تعليقك غير شكراً ..تعبتك في القراية ومتعبتش من الرد عليكي ..
والموسيقي دي من الحاجات اللي روان سابتهالي أفتكرها بيها..ميحسهاش أي حد..
تحياتك وصلت
ميوية
أنا كتبت ؟! كنت فاكر إني بفضفض بس ..الحمد لله إنك سعيدة عموماً ..منورة
بقية القصة ..طالما حبتيها اتفضليها متتكسفيش ..اعتبريها قصتك :)
التعديلات الدستورية ..من باب الفضفضة مش أكتر ولا تعليق أيضاًَ
وكلام أمل دنقل رغم مرارته الجميلة أوي ...
إلا أن الحسين سليل النبي واللي مسمعتش عنه حاجة غلط ورغم إنه مقدرش يمنع سيطرة الذهب علي النفوس ..بس علي الأقل عمل اللي عليه لحد ميعاد رحيله من الدنيا ..
أما الشعراء..وأنا مش منهم أنا مجرد واحد بيرغي ..فهما للأسف غالباً ما بيكونوا أجبن من إنهم يكملوا المشوار وبيعملوا لنفسهم شرنقتهم الخاصة ..ويفضلوا فيها لحد ما يموتوا
ويمكن اللي بيساعدهم علي كده الجبن والتخاذل اللي ضربوا جذورهم في نفوس الناس عموماً
تحياتك وصلت ومستنيين الوقت التاني
ماما دايما تقولي الكلمه دي الفلوس الحلال عمرها ماتضيع
وربنا بيعوضها فحجات تانيه
واحساسه الي جاله لما رجعتلو فلوسو حسيت قوي بيه
ساعات الانسان بتحصلو حجات ولو كانت بسيطه لكن في احساس جواه بيأكدله انو ربنا بيكافئو على الي عمله من خير او ارضاء لربنا
متفائله قوي ببطل القصه
*****
بالنسبه لموضوع الاستفتاء زي مانت قلت
الصوره بتعبر عن نفسها
والي يعيش فمصر ياما يشوف
وياما يتحرق دمه بجد
*****
رغم كلامك القليل عن روان ورغم اني معرفتهاش
الا احساس جوايا دايما مع ذكر اسمها انها كانت حد جميل
يارب ارحمها واسكنها جنتك
*****
الصداقه عارف ساعات بحسها كلمه معقده قوي
بجد مش اي علاقه انسانيه هيا صداقه زي مناس كتير فاكره
بجد الصداقه دي كلمه كبيره معنى مليان حجات كتير قوي
وقليل قوي لما تلاقي الطرفين فاهمين المعنى ده
اليوم الي بتلاقي فيه الي يحسك ويشيلك وقت زنقتك يكون جانبك وقت تعبك ومرضك معاك وقت فرحك
متتكسفش انك حتى تحكيلو ااقل تفاصيل عندك
انسان زي ده مفتكرش انك ممكن تلاقي منو اتنين فوقت واحد قليل قوي ونادر قوي
عشان كده كلمه صداقه دي صعبه قوي
وعارف الي يوجع اكتر زي مانت قلت
لما يجي الوقت الي تكون عاوز تعبرلهم في عن مدى حبك وسعادتك انهم جانبك وتبص متلاقيهمش
او الدنيا تبعدنا والظروف تفرقنا
حسيتك قوي ياضياء وانت بتتكلم عن الصداقه بجد
حسيتك لآني وانا بقرا كلامك حسيت اني
بقرا عن نفسي
*****
دخلت وشفت الصوره
وبجد لاتعليق
ايه الغباء ده مش ممكن
فعلا
الناس هتكرهك
و اتكلمت زيادة عن كدة
كل ده جواك وساكت
بس برده لو كنت اتكلمت اكتر من كدة
مكنتش همل منك
ولا الناس كمان
فضفضت
وكلنا سامعينك
ربنا يرحمها
عظم الله اجركم
قلت اصوصو
Epi...1st sorry for the late reply..
2nd mnwra (I)
3rd...Amen..ur words will a source for this light...it's wounderfull to have some1 like u pray for me in a way like that..thx (F)
3rd define the true egyptian idenity plz :P so2al mo7reg ana 3arf
4th ..life isnt stupid...cuze allah gave it to us
even the bad things happen for a reason we dont see cuze we r almost blind...blind hearts
the stupidity is in our choices..in giving the devil all the trust..in thinking that we must follow our thoughts...forgetting about our religion & our pure instinct ( fe6ra y3ny ) ...
being selfish..
we cant blame the life..we had to blame the souls...cuze they didnt feel it right
anyway my english sux...
we will talk about it laters
u r welcome for the reminder
thank u b2a for welcoming me & prayin for me
god bless u ya bent (F)
_________________________
David santos
Hello ...u r welcome though u didnt get anything i know..i'll write in english soon..i hope u liked the music which were chosen by Rawan..my precious...
thank u :)
_______________________
Miss E ...
u wont read this answer...almost y3ny
but thank u ..i wish the same to u
rbna m3aky ya gameela :)
باشمهندزة شيماء..بحاول والله أهو...عشانك برضه هحاول أكتر ...متقلقيش عليا وأدعيلها بس ..
منورة بتعليقك التيك أواي ده :))
_______________________
كوكو أزيك ؟!
صباح الصوصوة ...
متشكر عشان بتهتمي وبتسألي ولو بصوصوة...
بس يعني إيه صارر ..أنا عموماً مقلتش كل حاجة دي حاجة بسيطة عشان محدش يكرهني 100%...خليها 75% حسب أخر صيحات الموضة الاستفتائية ..
شطورة برضه إنك مرحتيش ..هنوجع دماغنا عشان بلد مش متربية ..دي تشي جيفارا كان أخره في البلد دي منادي في موقف دار السلام ولا حاجة ..بلا نيلة
وصلاح عبد الصبور ناس كتير بتحبه جداً بس لظروف سوء الحظ وعدم ميلي للشعر الدواويني ...يعني مقراش ديوان ولا اتنين ...أقرا المختارات ممكن ..الخلاصة والحاجة اللي ليها هدف أو اللي بتعبر بقوة عن موضوع معين ..بس مسيري هبقي فاضي ورايق وأتابعه كويس..
بس مفهمتش برضه إنتي بتحبيه يعني ممش موافقة علي الكلام ولا بتحبيه وملكيش رأي في الهجص اللي أنا كتبته ولا إيه ..
وروان ..آمين ...ويا ريت حتي نص إيمانها وبرائتها ..والباقي ربنا هيسامحنا فيه ..
تحياتك وصلت ونورتيني ..
__________________________
تامر بيه نبيل ..منورني يا جميل ..الأمل موجود بس محتاج ميكروسكوب عملاق أوي ..أسمه الضمير ..
للأسف ما زال البحث عنه جارياً ..
منورني ..
ضياء
بجد مش عارفة اقولك ايه
اعتذرلك ولا اشكرك
بس كل اللي عايزاك تعرفه اني كنت بمر بظروف زي الزفت وكان اسهل شئ اني ابعد
يمكن ارتاح
وعشان كدة مش كنت عارفة اخش اكلم اي حد
مش هقولك غير ربنا يرحم روان يارب
وتاكد انك اخ وصديق
واني هفضل اسمعلك علي طول
مش تزعل مني بقي
محمد ...مهما كان الاختلاف فالتواجد - عموماً - مرغوب والتعليق ده تحديداً احتفظت بيه عندي علي الميل من ضمن التعليقات اللي مبسوط بيها عموماً ولعلمك ده أول مرة يحصل معاك
وبإذن الله متكونش الأخيرة لو لينا عمر ..رديت علي الاستهلال اللي كان سخيف فعلاً :) ومش حميمية أوي يعني ..وقرارك عموماً ملك ليك وأهلاً بقراراتك :>
تعرف ..لحظة الكتابة كتبتها كده من غير ما أقصد تقويم ومن غير أي هدف ..جت صدفة وأنت عملت منها تقويم بس الله ما شاء الله عليك ممكن تبقي تعمل سيناريوهات جميلة من أي شئ تلقائي ..
بس تخيل التقويم ده متعب إزاي ..لما تبدأ تفتكر يوم الرحيل والأيام اللي قبله ..وتلاقي في حاجات مهمة أوي كان نفسك تفتكرها متفتكرهاش ..بتستحوذك لحظة الرحيل ويستحوذك ردود أفعال ناس كنت متوقع منهم اهتمام أكبر من كده ..وبتفضل في مرحلة اللاعودة دي لحد ما ربك يريد إنه يهديك للطريق الصح أو شيطانك يغلب نيتك الصافية وترجع تلف نفس الدايرة تاني ..أغنية نلف ف دواير اللي كتبها الأبنودي وغناها واد لبناني مش فاكره
وبالنسبة لعودة المال ..ومكانش مال أوي يعني دي حاجة بسيطة بس بالنسبة لواحد مش بيشتغل أكيد قيمته كانت أعلي + إن الموقف نفسه نضيف أوي ويخليك متفقدش الأمل ..وكمان في وقت بتكون محتاج فيه ولو حتي منام ..محتاج تشوف ابتسامة ..إيد ممدودة..فتبدأ الاسقاطات والله أعلم في الأول والأخر ..
____________________________
بالنسبة للسياسة ..هييجي يوم ومش هصمت ..السياسة الملوثة لازم حد يحاول يدور علي إمكانيات تنظيفها ولو بشكل أفلاطوني ..يعني أحياناً الأحلام بتخفف من مرارة الواقع وأنا مؤمن إن كل ما سقف الحلم هيعلي كل ما هتحقق نتيجة مبهرة في الواقع ..
كنت بحلم بدار ترجمة :( كانت هتفرق أوي معايا لو وصلت للمرحلة دي معاها بس ملحقتش ...قدر الله وما شاء فعل ..
________________________
نيجي لملعبك اللي يسهل استفزازك من خلاله ..زي شكسبير بالنسبة لها ..
بص بقي ..الاخلال ده يا سيدي الشاعر..يا فقيهنا في الشعر ..يبقي في حالة لو النفوس مش نضيفة ..في الأحوال العادية..لما يكون الاتفاق بين اتنين ن بنو البشر أو أكتر ..أو بين شياطين ..
لكن افتراضه ده كان بين أطياف ملهاش أي مصلحة _ هكمل معاه علي أساس الافتراض _ في الدنيا الفانية واللي تأكدوا من ذلك بنفسهم وده افتراض مني أنا متقدرش تنكره لا إنت ولا الشاعر اللي مقدرش أنقص من قدره علي الأقل في الموهبة والتمكن من الألفاظ والتعبير
المهم ..الاخلال ده مفترض فقط في حالة الجهل وده بالنسبة للبشر أو العند وده بالنسبة للشيطان بس لأنه الغرور عماه في الأول لأنه اعتبر نفسه أعلي مرتبة من البشر اللي مخلوقين من الطين
لكن الأطياف اعتقد إنها نالت ما يكفيها من العلم في حساب القبر ..وأعتقد برضه إنها في الأول والأخر كانوا بشر وميقدروش بعد اللي شافوه واتأكدوا منه يتكبروا علي بشر زيهم وبشر كانوا بيحبوهم قبل ما ييجي وقت الرحيل ..
بما يعني إن افتراض الأخلال ده هيكون من طرف واحد بس ..اللي هو الانسان ونفسه الأمارة بالسوء :(
واللي قلته عن بني البشر ده في آيات قرآن كتير للأسف مش متذكر منها حاجة دلوقتي بتأكد إن الأنسان نساي أو بيتناسي ..
وفي كلمة لنجيب محفوظ في أولاد حارتنا ..آفة حارتنا النسيان ..آفة عالمنا عموماً ..ومع كده بنبرر لنفسنا النسيان السلبي اللي بيحمل معاني كتير أقلها نكران جميل وجود موتانا في حياتنا قبل ما يحين آوان الرحيل ..
واللي بيكون من غير تدخل منهم _ إلا فيما ندر وهو الانتحار ..
أنا معاك بقي في ...إن الانسان بنفسه الضعيفة بيحاول يتجنب تأنيب الضمير بإسقاط غلطة ونسيانه علي الطرف الآخر اللي مش موجود أصلاً عشان يدافع عن نفسه ويريح ضميره راحة مزيفة ويستمر في الوهم اللي عايش فيه ...
يعني أنا مثلاً ليا تجربة كنت ملخبط ومفيش أي تفكير إيجابي لحد مش شفت حلم والتفسير المبسط ليه إن في تشجيع ..
فمقدرش أقول إن روح الفقيد أو الفقيدة اختارت كده والموضوع عبارة عن إشارة من ربنا ..ليها تفسير تاني ؟!
فأنا متفق معاك أن ممكن الشاعر كان قصده ده ولكن بشكل مش أي حد يفهمه
وعموماً كده هيبقي الموضوع أحلي بالنسبة لي
___________________
الزهرتين دول برضه مش عارف ليه عملت كده ..وليه في بوست ..مكانش المفروض يبقي بالشكل ده بس اللي حصل بقي ..يمكن ببرر لنفسي عجزي عن إني أعمل حاجة أكبر أو بصبر نفسي ..أو يمكن خفت أنسي أكتب الكلام فكتبته ..وده من أكبر حوافز إني أفتح البلوج وأكتب فيه حاجة ..
بس تقديرك أنا بشكرك عليه لأن علي الأقل في حد لسه حاسس ..
_____________________________
أنا كلماتي مكانتش بهدف التغيير رغم إن المتسببين في صدورها مني معاهم اللينك واللي بعتبره توب سيكرت ومش بديه لأي حد يعرفني ..لازم أكون بحبه وبحترمه ..
بس تعرف لما تقول الكلام ده مع نفسك كده أحسن ما تقوله أدام حد متوقع منه إنه يفهم أو يقول أي حاجة وتلاقيه ساكت
وأحياناً كمان بتكون إنت عايز تساعد الانسان أو الانسانة لأنك حابب تشوفه مبسوط ..وتلاقيه بيهرب منك علي أساس إنه خايف يتكشف وخايف يبان ضعيف ..
فأحسنلي إني أقول الكلام بأي شكل لوحدي ومستناش رد من حد ..لأن السكوت مؤلم أكتر من الكلام ..مؤلم بجد يا محمد :(
لما مبيكونش في وقته
وفي الآخر بيمر الوقت ويروحوا مننا ونبدأ نحس بقيمة بعضهم ..ويبدأوا يحسوا بقيمتك ويبذلوا قصاري جهدهم للبحث عن بدائل وهمية وتسير بيهم المركب بعامل التوفيق ليس إلا مش بقدرتهم علي الأختيار الصحيح سواء للأشخاص أو لردود الأفعال ..
_______________________
مالها صورة شرم ..مش بجد تضحك بدموع
والمتنبي إن تجاهلت كل كلامه فمتقدرش تتجاهل الجملة المعجزة دي ..
اللي بيفهم واللي مش بيفهم هيحسهم وهيعلموا فيه ..ومش هيقدر يتجاوزهم
الشئ الأخير ..تعرف ..لو كنت عرفت منك الشئ ده من عشر أسابيع فاتوا كان هيكونلي عندها عتاب سريع ..مش بحب أحلامي تبقي معروفة عشان غالباً بتقابلني حالة من عدم التقدير أو التجاهل بتخليني أكره لحظة المعرفة مش الشخص المتجاهل ..لأنه مش ذنبه إنه اتربي علي الغباء ..
عموماً أنا مقدرش أعاتبها أكتر من دقيقة وبعد كده بنسي وبكون مبسوط..وكويس إنها جات فيك ...تعرف إنها أول مرة قلتلها ضحكت جامد أوي وبعدين جات تاني يوم تشجعني ..تقريباً بعد ما حاكمت نفسها أو يمكن لما كلمتك عن الحلم ده ..
عموماً هو حلم ..ولو شفته بيتحقق في مجرد دار أيتام أو حضانة وشفت أدامي عشرين بني أدم يجبروا أي حد علي احترامهم لأنهم أتربوا صح ونشأتهم كانت صح ..ساعتها هقابل ربنا وأنا مطمن إنها هتكون فخورة بيا ..
كل ما سقف الحلم يعلي كل ما النتيجة تكون مبهرة في الواقع ..بشرط إن اللي بيحلم يكون عنده قوة إرادة ودي بفتقدها وبدور عليها ..
عموماً ميكفنيش حبك للأمل والإشارة ..عايزك تؤمن بيهم ولو علي سبيل الحلم المقبول تحقيق جزء منه ..
وكلام زياد اللي ألفه عبد الصبور حسيت بيه أوي بيعبر عن مرارتك من البني آدمين اللي بتخليني جنبك متفائل أوي ..
بس افتراضه إن الجيل ..أي جيل بقي مش قادر حتي يحب مش عاجبني
لأن طالما في ناس زي روان..هيكون في نسبة من كل الأجيال بتعرف تحب وتحس ..الحب هيفرض نفسه ..
اسألني أنا ..
______________________
بشكرك علي تعليقك ومبسوط إن كلامي وصلك الاحساس ده ..يعني رغم بعض العيوب اللي فيك بس دماغك هفضل أحترمها طول العمر ..
شرفت بتعليقك اللي كنت بفكر أرد عليه ببوست
سلام عليكم بقي لأني فصلت ..
شكرا يا ضياء على اطراءك في اخر موضوعك .. انا مجرد مدون عادي و بسيط
تحياتى لك و لافكارك المعبرة عن افكار تحير كل انسان فينا
نبض إسكندرية ...
والله العظيم إنتي طيبة ..بس أتمني إني أوصل للمستوي اللي بتقصديه بكلامك الجميل ده...
وربنا يسمع منك ومش لروان بس
لكل إنسان ساب الدنيا وذكراه مبتجيش إلا بالخير ...
ويا رب دعائك يكون مقبول دايماً
وتحياتك ليا وصلت ...وليها فده شئ علمه عند ربنا ..بس أوعدك لو ربنا أرادلي الجنة ..أكيد هقوله إن الدنيا مكانتش بالسوء اللي بتبان عليه ..
لولا الخجل ولولا الأنانية كان الناس اللي بحب مدوناتهم بقوا هما القاعدة والباقي مجرد شواذ
ومش هلاقي ختام في ردي عليكي أجمل من الكلام اللي أنتي كتبتيه
___________
والله إن العين لتدمع
وإن القلب ليخشع
وإنا على فراقك لمحزنون
وإنا لله وإنا إليه لراجعون
ميس حاسا...
منوراني وأنا مبسوط إنك اتكلمتي ..وأتمني إنك تكوني خلاص لقيتي اللي يستفزك وتتكلمي
وتشكر علي تعليقك ونفصصه بقي
أولاً ...مش هقول غير إن ماما بتفهم ..
والاحساس اللي حسيتي بيه أوي أتمني إنه ميكونش إنتهي لحيرة بطل القصة..
وأتمني إنه يكون هو كمان متفائل بنفسه
*****
بصي بقي الفتاء ده يندرج تحت بند من أعمالكم سلط عليكم
أو بالأحري ...من عدم عملكم لأي شئ..
فمش مستاهلة تحرقي دمك وحاولي بس بينك وبين نفسك تحطي إيدك علي الناقص وتحاولي تكمليه
وأنا هنسي مصر ..أخليني في الدين اللي ناقص وفي حياتي اللي مش لاقيلها تعريف وبعد ما أعرفها محتاج الإرادة والتشجيع..بعدها بقي ممكن في ثانية اللي بيحصل فوق يتغير ..لما ربنا يريد أكيد
*****
احساسك صح 50%...لأنها الجمال نفسه
يارب ارحمها واسكنها جنتك ..آمين
*****
الصداقة مش معقدة ولا حاجة
بس هتفق معاكي في ..إن قليل أوي لما الطرفين يكونوا فاهمين المعني ده ..واللي يعذبك أكتر إن طرف يكون بيحاول يفهمه ويطبقه صح والتاني مش مهتم أصلاً ..مهتم بس برأيه بغض النظر عن صحته ..مهتم بس بإرادته
الصداقة عدوها الأنانية
لو مفيش أنانية ...مكانش هيبقي الكلمة بتحمل الغموض والصعوبة والتعقيد ...
لو الأهل بيربوا ولادهم علي معناها الحقيقي أو علي الأقل للسعي للوصول ليه ولأي شئ تاني جميل ..أكيد مكانش البني أدم فينا وصل للعشرين وعداها وممكن يلعب في التلاتين وهو لسه مش عارف يكون صداقة يتيمة يقابل بيها ربنا ويقول ده خليلي اللي أنا علي دينه ..
وكلامك ده
" اليوم الي بتلاقي فيه الي يحسك ويشيلك وقت زنقتك يكون جنبك وقت تعبك ومرضك معاك وقت فرحك
متتكسفش انك حتى تحكيلو ااقل تفاصيل عندك "
مجرد جزء من كل كبير أوي مش أي حد بيحاول يوصله ولو حاول اللي أدامه بكل برود وغباء يمنعه
متشكر لأنك حستيني لأني رغاي اوي وكان ممكن أضيف علي ردي ده الضعف ..وأتمني إني المرة الجاية لما أجي أتكلم عن نفسي بشكل مختلف ويكون فيه تغيير للأحسن
وقتها أكون برضه بتكلم عنك
*****
شفتي يا ستي إن الغباء ممكن ؟!
إنه زمن الغباء
الوردة السوداء
منورة ...واضح إنك قريتي البوست وإنتي مستعجلة ...عشان علقتي بنوع من التشجيع ..بس كفاية إني علي الأقل لقيت حد هيقرا الرغي اللي برغيه ده
وأكيد أنا مش مبسوط إنه جوايا وساكت
بس مجبر أخاكي لا بطل :(
ومتشكر لتعليقك ولزيارتك
ومتأكدة إنك مش هتملي ؟! جواب نهائي ؟!
الأخت ليلي حسين ...متشكر ..ويا رب يتقبل منك الدعاء والصلاة والصوم وكل حاجة كويسة
قولي آمين
سمرا...مين قال إني زعلان ..يمكن أقلق ..لكن أزعل ..أكيد مقدرش
وبعدين كمان ( سر بيني وبينك ) فقدت القدرة علي الزعل خلاص
المهم نبطل استطراد بقي :(
مش تشكريني علي واجب..وأتمني إنك دلوقتي أحسن وطمنينا عليكي
وأنتي قلتي اللي أنا محتاجه
ويا رب يسمع منك ويكون جنبك ..وأنا متشكر لتأكيدك لأنه في وقته
ويا رب متزهقي بس :)
منورة
شرم ...اطراء مين بس يا جميل ..والله لو بإيدي أنشرلك في جريدة يومية كل بوست تكتبه ( مش كله يعني بس أغلب بوستاتك بحسها ممكن تيجي بفايدة لو اللي تابعها بيحس ويفهم )
إنت جامد..بس مش فاهم ليه حاطط صورتك سلسلة علي رقبتك...أعذر فضولي بس هيا ليها معني يعني في حياتك ولا مجرد شكل جديد :$
وتحياتك وصلت وأنا يشرفني إني أعرف أعبر ولو عن 1% من أفكارك إنت بس ..
منور وعاجبني قدرتك علي اختيار ما قل ودل
وليه مسحت تعليقك الأولاني ؟!
ازيك يا ضياء ...معبرة صورة الاستفتا..زياسلام ع الفته وحلاوتها يا سلام يا سلام
ربنا يوفقك
على فكرة انا جيت اهوه
وقريت البوست تانى
وبالذات كلامك عن روان
وعن الصداقة
انت بجد انسان رقيق اوى
وكلامك بالرغم انه مش ملزم باى قواعد
الا انه ملتزم بأهم قاعدة
وهى الحب والوفاء
والصدق
كلامك بجد وصلنى جدا
واسفة انى قريت البوست ونا مستعجلة
واوعدك انى مش همل
رجاء
بلاش تعليقات بالانجلش
مروة جمعة
أنا الحمد لله ...بحاول أهو..
وصورة الاستفتاء أكيد معبرة ..عارف إنها هتعجبك
ربنا يوفق الجميع يا مروة ومنورة ..
الوردة..بس كده
علي فكرة أنا برد علي تعليقك أهو وبالعربي كمان
وشكراً لأنك قريتي البوست تاني ووالله مكانش قصدي أخليكي تقريه تاني ولا حاجة بس حسيت إنك فعلاً مستعجلة وحبيت أقولك خدي راحتك يعني متخلينيش أكتفك
متشكر لزيارتك ..متشكر برضه لمجاملتك وادعيلي حبي ليها يكون ليه أثر إيجابي بدل الكلام بس ..
وأنا مبسوط إن الكلام بسطك ومفيش داعي للأسف ..أنا أسف إني قلت الملحوظة بشكل فيه لوم...ولو مليتي أكيد العيب فيا أنا مش فيكي
وحاضر هحاول معلقيش بالأنجليش ..بس أحياناً بيكون جنبي ناس غريبة كده ومش بكون حابب إنهم يتابعوا الكلام اللي بقوله عشان لو قالوا تعليق ملوش لزمة هتقلب بقفش
منورة تاني ..
سلام عليكم
Post a Comment