الصدقة

تستغرقنا الهموم..والآلام علي أنواعها _ وبإختلاف أقدراها لدي كل منا علي حدة _ ولكن وفي ثانية واحدة فقط وربما أقل من الثانية أحياناً


تنتشلنا في كل مرة تلك المعجزة ببساطتها المتناهية


_ والمذهلة في نظري _ إنها معشوقتي الآثيرة الإبتسامة ..فقط_ وبدون أي مجهود عضلي _ ترتسم علي الشفاه وإن تطلبت أحياناً القليل من الجهد النفسي

ولذلك لم يكن غريباً أن يتضمنها الحديث النبوي


حيث جاء في نص حديث .. أشرف الخلق عليه أفضل الصلاة والسلام


" تبسمك في وجه أخيك صدقة "


صدقت يا رسول الله


______


سؤال علي الماشي ..هل البراءة الحقة .هي الحالة التي نولد عليها ؟ أم إنها هي الحالة التي من المفترض أن نموت عليها ؟

البقاء لله يا ريس

تدوينة كتبتها  الدكتورة مروة  ومسحتها لأنها شكت إن فيها شماتة.بس أنا عدلت حاجة بسيطة وهنزلها لأن مفيهاش شماتة.ولازم نفصل بين تعاطفنا مع أم الطفل زيها زي أم أي طفل بينتقل لرحمة ربنا ودعائنا ليها سراً بالصبر..وكذلك اليقين الطبيعي عند أي حد عارف دينه إن الطفل البرئ في الجنة

وبين جوقة النفاق _ تقرباً من الجد فقط لا غيرأو شكر لنعمته علي رئيسهم مش رئيسي  _ اللي شغلها الإعلام وحالة الحداد الغير طبيعية وقطع الإرسال والجنازة اللي الطفل نفسه لو رجع للدنيا هيرفضها لأنه رايح لربنا مش رايح للبشر..ونتج عن ما سبق حالة تعاطف غير إرادية حس بيها البعض من الغلابة ..أو إرادية نافق بيها البعض نفسهم قبل أي حد تاني

أنا بس مندهش..هو فعلاً بقي صاحب العزبة ؟ واستطعم الناس الخضوع للفرعون حتي في أدق التفاصيل ؟ من 3 سنين كان مستهتر بيتفرج علي ماتش السنغال مع جدة الحفيد ومبانش عليهم غير السعادة برغم إنه ولي أمر سيحاسب عن رعية ماتوا بسبب إهمال إدارته وعضو من أعضاء حاشيته..مفكرش إكراماً ليهم حتي يشوف الماتش في بيتهم ..ليه بقي كل التعازي العلنية والسرية..فيس بوك وماسنجر ورسايل علي القنوات..هل لأن الزن علي الودان إمبارح كان أمر من السحر ؟ ولا لأن إنفلونزا النفاق استشرت بشكل لا إرادي ؟ ولا الجد فعلاً قدر يبقي فرعون بيحكم فراعنة ؟ اسئلة ملهاش رد لا عندنا ولا عند الجد

أسيبكم مع كلام مروة اللي وجعلي قلبي فعلاً..وربنا يرحم الجميع..أحياء وأموات

البقاء لله يا ريس .. انا أم ابني مات وهو بيحاول يهج من البلد ويروح اليونان .. غرق هو واصحابه فيه منهم الي رجع ومنهم الي اكله السمك اصله مبيعرفش يعوم .. ومعرفوش أهله يلفوه بعلم مصر الحرير أصله ناكر للجميل ورمى بنفسه في التهلكة
البقاء لله يا ريس .. انا أم ابني الوحيد مات وهو واقف يستنى الترام .. وقعت على دماغه المحطة - رغم انها كانت جديدة - ومات في الحال كان شايل في جيبه وقتها جواب ترشيحه لكلية الطب غلطته انه استنى التروماي
البقاء لله يا ريس .. انا أم ابني مات متكهرب وهو بيعوم في حمام سباحه غلطتي اني لبسته مايوه وملحقتش اسفره بره ولا حتى يوصل المستشفى الميري .. لان صاعقة الكهربا كانت اسرع .. قدر ربنا وعطيته استردها
البقاء لله يا ريس .. انا أم ابني مات وهو بيدافع عن شباب البلد دي ضد تاجر مخدرات .. وكان يدوب عريس جديد ومطلعش حتى بزفة جنازة عسكرية بعد موته
البقاء لله يا ريس .. انا أم طفلي مات وهو بيتفرج على فرح من البلكونه برصاصة.. طايشة شقاوة عيال يا ريس
البقاء لله يا ريس .. أنا ابني كان عندكم في القسم خدوه من الشارع سليم رجعلي جثة .. واحتسبته عند الله شهيد .. مش هو كده شهيد يا ريس؟؟  يا رب يكون شهيد يا ريس
البقاء لله يا ريس .. أنا ابني دكتور الجامعة مات وهو خارج من صلاة الفجر..عشان يسرقوا منه الموبايل  .. غلطان حد قاله يخرج في ساعة متأخره وكمان يشيل موبايل غلطان يا ريس


البقاء لله يا ريس ..  أنا أم طفل بيموت كل يوم في المستشفى من سرطان وامراض الدم وعيوب خلقية و .... لاني معيش تمن امبول الدواء .. و مستنيه نفقة الدولة  .. قبل ما يموت زي الحيوانات النافقة على سرير مستشفى حكومي
البقاء لله يا ريس .. انا اب ابني مات مولع في قطر الصعيد ومكنش حيلتنا غيره .. فات وسابلنا كوم لحم مراته وعياله وانا عاجز ومريض .. ياما قلتله بلاش تركب درجة تالتة واطلع على السطح أو خليك في السبنسة يا ريس
البقاء لله يا ريس .. انا ابني ومراته ماتوا في عمارة لوران في اسكندرية .. كانوا لسه عرسان مكملوش شهر العسل .. كان نفسي اشوفلي اي حفيد ..  حفيد بس يا ريس

البقاء لله يا ريس .. انا والد اسلام فاكره يا ريس ؟ ؟ اسلام اللى المدرس ضربه في قلبه موته رغم ان قلبه كان سليم وبكامل صحته .. كان من اشطر واهدى طلاب المدرسة .. ضربة قلبه حرقت قلبي عليه يا ريس
البقاء لله يا ريس .. انا اب من الدويقة او كنت من الدويقة رجعت من شغلي لاقيت اطنان حجارة فوق اولادي ومراتي .. حاولت اغسّلهم معرفتش .. اصلهم طلعوا اشلاء بعد يومين وتلاته واسبوع ..  كان نفسي صورهم تنزل في التليفزيون او حتى يتكتب اسمهم في جرنان اصفر يا ريس
البقاء لله يا ريس .. انا جد زيك مات ابني ومراته وعياله في عبارة السلام من البرد والغرق .. حد قالهم مياخدوش عوامات معاهم  .. بس علي الأقل مماتوش لوحدهم وكان معاهم اكتر من الف واحد .. وتخيل يا ريس إن التليفزيون مقطعش الارسال ولو لساعة واحدة بالعكس ده سابلنا الماتش نتفرج عليه ونفرح بالفوز عشان ننسي  .. والاجمل ان صاحب العبارة طلع براءة من قتلهم .. اصلهم ماتوا موتة ربنا .. بس تعرف وحشوني اصل اعز الولد ولد الولد و كان نفسي اشيل جثمانهم حتى يا ريس

البقاء لله يا ريس ..أنا أي أب لأطفال وشباب بيروح دمهم هدر علي الأسفلت كل يوم ..وبيهرب القاتل وبيفلت المسئولين والجرح مش بيندمل يا ريس

البقاء لله يا ريس ..إحنا أسر شباب زي الورد انتقلوا لرحمة ربنا من 8 سنين لما طيارتهم وقعت أدام نيويورك لأسباب غامضة ومنفعناش بحاجة الصندوق الإسود ..هم لقوه صحيح يا ريس ؟! ادعيلهم يا ريس
البقاء لله يا ريس .. احنا أغلب شعب مصر كله الي مات واندفن من اكتر من 25 سنه من الفقر والجوع والمرض والتخلف والتعصب والقوانين وبلاش اكمل .. متزعلش يا ريس وعمر حفيدك التاني ربنا يبارك لوالدته فيه ويطولها في عمره.. بإذن الله طبعاً يا ريس
افتكر إن الموت مبينساش حد .. أول الشهر احتفلت بعيد ميلادك .. اعتقد دي اخر مرة هتحتفل بيه لانه مينفعش تحتتفل بذكرى ميلاد وموت في نفس الشهر .. ربنا يصبر أم الفقيد ويصبرنا كمان يا ريس .. أنا أسف لأني  حاولت افتكر قد ما اقدر الناس الي ماتوا بس الذاكره مستحملتش من كترهم


 البقاء لله دائماً وأبداً يا ريس..ويفني العبد ويبقي الله

تعرف كده يا ريس ؟! يا رب تعرف يا ريس

البقاء لله يا ريس

صدق الله العظيم

قُلْ إِن كَانَ آبَاؤُكُمْ وَأَبْنَآؤُكُمْ وَإِخْوَانُكُمْ وَأَزْوَاجُكُمْ وَعَشِيرَتُكُمْ وَأَمْوَالٌ اقْتَرَفْتُمُوهَا وَتِجَارَةٌ تَخْشَوْنَ كَسَادَهَا وَمَسَاكِنُ تَرْضَوْنَهَا أَحَبَّ إِلَيْكُم مِّنَ اللّهِ وَرَسُولِهِ وَجِهَادٍ فِي سَبِيلِهِ فَتَرَبَّصُواْ حَتَّى يَأْتِيَ اللّهُ بِأَمْرِهِ

عن حلم أسطبل عنتر سأتحدث

مفتتح

اهو ده اللي صاااار وادي اللي كااان

مااالكش حق تلوم عليا ما لكش حق

تلوم عليا ازاااااي يا سيدنا

وخير بلدنا ماهوش في ايدنا

قول لي عن اشياء تفيدنا

وبعدها ابقى لوم عليااااا

عن صوت لأطفال في عمر الزهور يشدو بأروع طقطوقة سمعتها أو هسمعها في حياتي

عن تطابق معناها التام مع أحلامهم ومع ادائهم المسرحي القصير المعبر الموجز

عن حلم اسطبل عنتر سأتحدث

عن محمود حنفي بطل العرض الصغير

عن خجله وهو بيفهم مني معني الاوتوجراف وبيكتبلي إسمه ويقول مش قلتلك خط مش حلو

عن إلهام وتعبيرها المرتبك الخجول عن حلمها في التمثيل وعمل كل البرامج

عن تعبير بسيط من أطفال أكثر بساطة

عن عرض مسرحي صغير كان أبرز مثال علي دور الفن في التعبير عن الواقع وخدمة الرسالة اللي بيقدمها

فن بيرضوا بيه ربنا وميقدرش أعتي المتشددين إنه يفكر يحرمه

فن مش بيتصرف علي أبطاله جزء في المليار من اللي بيتصرف علي أبطال أي فيلم في سينماتنا

فن نقل الواقع اللي أجبر _ وبصراحة يحسد عليها _ مخرج حين ميسرة إنه يعتذر في نهاية الفيلم عن عدم قدرته علي نقل الفيلم للواقع بشكل كامل

ليس لأن الفيلم مبالغ فيه بل لأن الواقع أكثر قسوة

فعلاً ازاي كان هينقل روايح أكوام الزبالة المهولة في منطقة جبلية مساحتها متساويش مساحة نادي مثلاً

عن طفلة سنها خمس سنوات اسمها ياسمين اللي قبل ما أسمع أخر حرف منه كانت أضافت مندهشة : بس إسمي الأصلي عدالات..وأنا بحب اسم عدالات معرفش ليه هم بيحبوا ياسمين

عن نظرة عينيها وهي بتلف طيارتها الورقية البسيطة وبتقوللي ازاي أعرف أطير طيارتي وعجزي لأني في حين إن الطيارة أطول منها..فأنا اللي أطول منها والطيارة في الواقع مجربتش أطيرها قبل كده

عن طفل 3 سنين كان نفسه في آيس كريم زي الأطفال الباقيين ومقدرش يندفع معاهم

عن ورشة بسيطة للغزل وصناعة السجاد بدأت تعلم أطفال متسربين من التعليم مهنة شريفة وفقاً للحكمة القائلة إذا أردت إن تساعد إنساناً فلا تعطه سمكة بل علمه كيف يصيد

عن طفل فخور بإنه بينتمي لمدرسة الفصل الواحد اللي شجعت نسبة محدودة _ متوقع زيادتها _ علي التعليم بدلاً من التسرب والتشرد

وبيقولها زي ما بيقول البعض بإنه متخرج من هارفارد أو بيدرس في الجامعة الأمريكية براس مرفوعة



عن أبطال العرض المسرحي وهما بيسألوني ببراءة..كنا حلوين يا أستاذ ؟

عن وصولهم بفرحتهم للسما وابتساماتهم العريضة والسبب بس كان إشادتي المتواضعة بيهم

عن أطفال كتير زيهم تشجيعهم ممكن والأمل فيهم كبير بس محتاجين المكان يتوسع والمتطوعين يزيدوا

عن المخرج المتطوع اللي قال إنه حفظهم هيعملوا إيه بالترتيب غير كده هم مش احتاجوا تدريب لأنه ده واقعهم ومحدش هيدربهم أحسن من الواقع


عن صوت العود المصاحب للعرض وهو لسه بيرن في أذني بشجنه المناسب للواقع


عن مربع من السيراميك فضل الأطفال جواه طول العرض كرمز لسجن الواقع


عن طفلة بريئة من الأبطال وهي بتقول أنا حلمي..يبقي عندي حمام سباحة كبير..وأدَخَل الناس من غير فلوس


عن طفل حلمه بس الإستحمام..بمياه طبيعية مش بجركن مياه بتكلفه جنيه ويكتشف متأخر أوي إختلاطها بصرف صحي


عن عشرات الأطفال والمراهقين في أسطبل عنتر شفتهم بعيني بيستنفذوا طاقتهم في ملعب ترابي معمول بجهود أصحاب الحلم مش بجهود المسئولين عن بلدنا والمتشدقين بإنجازاتهم ( واجباتهم المنقوصة ) والمتبجحين بتصديرهم الغاز للصهاينة ولا حتي من هواة لعبة تحرير المرأة


عن سور قلعة الكبش ومنظره كتحفة أثرية سمحلها إهمال المسئولين وادائهم ل 1% من واجبهم بإنها تبقي مجرد مقلب زبالة كبير أوي أوي..وغرزة للشباب الفقير الضايع اللي بينسي الواقع بأحقر الوسائل المتاحة وهو الإدمان


عن تلاجة آيس كريم هدية متجددة لحلم اسطبل عنتر وفرحة الأطفال ولهفتهم وإندفاعهم وإشباع الحرمان اللي حسيته في عينهم ولو بثلاجة آيس كريم من شركة كبيرة خلتني اتفائل بإن مش كل الشركات الكبيرة في مصر مجرد حيتان جشعة بتكبر علي أجساد الآخرين لأن هدية رمزية زي دي بتساهم ولو بتخفيف المعاناة


عن متطوعين بعتبرهم أبطال وعن كل أسرة جمعية صحبة الخير وبالأخص المساهمين في حلم اسطبل عنتر لأن مجرد طلوعنا ونزولنا في يوم واحد للمكان حسينا فيه بدوار يمكن دام اليوم كله..فما بالنا بناس كل يوم بتروح وتيجي ويمكن في اليوم الواحد أكتر من مرة ..مقدرش أقول غير ربنا يحميهم ويكتر من أمثالهم




عن 850 ألف إنسان وإنسانة ..فقرهم أنا لو بعانيه..كان ممكن أتاجر في المخدرات فعلاً..ممكن أشتغل قاطع طريق..ممكن قواد..ممكن حرامي..ممكن أنتحر حسب درجة إيماني وتحملي ( وبحمد ربنا علي نعمه المحسوس منها وغير المحسوس ) للمعاناة


لكن هما بس نفسهم في وظيفة ..نفسهم يحسوا بأمان بنقطة شرطة..نفسهم حلم اسطبل عنتر ينجح ويكبر.ويتعلموا علي إيد أصحاب الحلم مش علي إيد كدابين الحكومة ..هيتعلموا ازاي يصطادوا


مش هيمدوا إيدهم لمسئول مش بيعتبرهم بشر ولا حتي يستحقوا إهتمام معاليه


ولا حتي هيمدوا إيدهم لفاعل خير..رغم إحتياج أغلبهم الواضح ولو لعشرة جنيه يسد بيها جوعه لمدة يوم ويمكن أكتر كمان ومحدش يسأل ازاي يسد جوعه بعشرة جنيه لعدة وجبات


عن حلم اسطبل عنتر نفسي أحكي وأحكي لأني بتمني قريب أبقي ترس فعال فيه مش مجرد متكلم من بعيد بيكتب


عن أرض محتاجة كشافات عشان تبقي ملعب كورة بيخدم مئات من شباب وأطفال المنطقة كل يوم ولحد أخر الليل ..والنتيجة إن المنطقة هيبقي فيها حركة..وعن ركن من أركان سور قلعة الكبش هيبقي مضاء ومساحة الغرزة هتقل ..لأن كمان الشباب والأطفال المستهدفين من الحلم..مش هيتجهوا للغرزة زي اللي سبقوهم ولا هيدمنوا زيهم ويضيعوا

ولسخرية القدر تكلفة الإضاءة والملعب وملعب طايرة _ مع الفائدة المهولة ليهم _ مش تساوي عشر عربية من عربيات حراسة أي مسئول مبجل معظم ويمكن أقل

تكلفة ورشة تعليم صناعة السجاد ومهن أخري مش تساوي اللي بيقبضه تافه حسني ولا عمرو بيه دياب ولا فيفي عبده في حفلتين ترف

عن أرض عملوها مركز للشباب بجهود ذاتية وبمساعدة أهل الخير..ولما حبوا يخصصوها كمركز شباب.محدش هيمتلكه.محدش هينتفع بيه إلا شباب بينتمي لمصر اللي خايفين علي سمعتها ناس قاعدين تحت التكييف ومش شايفين الواقع ..تجربة عملية قام بيها أصحاب الحلم ..مشيوا في الإجراءات القانونية عشان تخصيص قطعة أرض في مكان محدش بيستفاد بيه من قرون ومش متوقع الإستفادة بيه قريباً..يروحوا لهيئة الآثار يقولولهم مفيش مشكلة لو الأرض اتخصصت مركز شباب..يطلبوا التخصيص من المحافظة يقولولهم لأ دي أرض آثار


عن حلم اسطبل عنتر اللي بيمثل جزء بسيط من حلم اتولد جوايا من فترة بعيدة وكنت نسيته

حلم إنقاذ ما يمكن إنقاذه.إنقاذ المستقبل..إنقاذ طاقات مهدرة لشباب بعد كده هيتحرش.وهيدمن.وهينضم لقافلة أطفال الشوارع ويمكن ينضموا للقاعدة كمان مين عارف !! وكالعادة هيكتب عنهم الجالسين تحت التكييف.هيكتبوا بحرارة.وهيتحركوا تحركات هاتفية وتلفزيونية.وفي النهاية النتيجة هتبقي محدودة.مسلسل بيمجد البطلة ويرضي غرورها وبينساه المشاهدين بعد شهرين ..وبعض مساعدات من أهل الخير لا تكفي للأسف وبس !! للأسف

تفتكروا الحلم اللي أنا شفته وخايف ييجي في يوم أشوفه بيتدفن بإيد البيروقراطية والروتين هيدفنوه فعلاً

بس لأ..ازاي أخاف..لما أشوف الأطفال والناس اللي انقطاع المياه بالنسبة لهم حياة كاملة وعايشين عادي وتكيفوا مع أوضاعهم..وأنا نص ساعة بس المياه تنقطع كانت تكفي لخروجي عن شعوري في اتصالي بالموظفين

أنا عندي أمل في بكره.وهفضل أحاول وراه..هفضل أحاول لحد ما أشوف إلهام ممثلة بتنقل قضية أهلها ومكانها ومحمود فتحي ممثل مسرح بيوقع الأوتوجرافات بخطه بعد التعديل..عدالات أو ياسمين زي ما بيسموها بتعرف تطير الطيارة وبتحقق أحلامها البسيطة كل ما بيتقدم بيها العمر

عن حلم اسطبل عنتر اللي تأكدت إنه مش مجرد حلم علي ورق
ده عمل لنزع فتيل ألغام متحركة في مجتمع فيه ألغام تكفي عشرات المجتمعات
مش مجرد حلم يتسجل علي جدران عادية
ده حلم بنقش فرعونى لا يمحى مع الزمن

محتاج الحلم يوصل لناس تقدر تساعد ضد الروتين وضد الحاجة..ممكن أي اقتراحات تتسابلي في تعليقات أو في ميل وشكراً مقدماً

لينك لموقع الحلم اللي عمله المتطوعين

ولينك لتحميل عرض للحلم بيشتغل بمشغل الفلاش

(Song for Gaza by Michael Heart)

***

**

مش أحسن بمليون مرة من عادل إمام اللي عاملين عليه ضجة مش مستاهلها أصلاً
يكفي إني حسيت إنه مش مجرد اداء لأغنية

وشكراً لنهي جمال ..شمس الليل

لأني عرفت بالكليب من مدونتها

***

ودي كلمات الأغنية

ومش تنسوا تدعوا لأهل غزة..وندعي للعرب والمسلمين بالهداية

مقال غير دبلوماسي وللأسف حقيقي أوي

مقال عبد الحليم قنديل

إضافة بسيطة

المقال مش بيطرح حلول تفصيلية ولا بيكشف التايه

بس رؤية وصرخة مبنية علي واقع يعمي العين

واقع مينفعش نعدي عليه ونسكت

يمكن الصرخة دي تفوق الناس ويفكروا

ويمكن تبقي بس تأريخ للجيل اللي بعدنا

يقرا ويعرف الحقيقة اللي بيخفيها الإعلام الحكومي

وعموماً أسلوبه الصريح أوي أدي لعدم النشر

ولكن لو قرينا بين السطور فاللي قاله حقيقي

للأسف حقيقة مش علي هوي كسل وقلة حيلة مترسبين جوانا

بس تظل حقيقة

***

دعوة من الأستاذ أحمد في مدونته دردشة عربي

معبرة أوي عن سهولة إننا نكون إيجابيين

شوفوا اللينك ويا ريت مش ننسي بعد يوم أو اتنين

المقاطعة ومن غير فذلكة

****

أفضل مقال قرأته وأتمني التمعن فيه بعناية

في مدونة الأستاذ أحمد كمال

برجاء الإطلاع عليه والقراءة بتركيز شديد

وأهم حاجة بعد القراءة والتطبيق بإذن الله

إننا ما ننساش..لأننا للأسف بننسي ما لا يجب نسيانه

ونتذكر ما لا يجب تذكره

**

في فكرة هنا برضه محتاجة مناقشة

في مدونة مجداوية

وتذكير بإن المقاطعة مش موضة بتنتهي مع إنتهاء العدوان

لأن الجريمة مستمرة واللي فوقنا دلوقتي بس إنها

كانت ملحوظة وصعب تستخبي بس

__

وده فيديو لحد منهم بيقول الحقيقة

ويصب في نفس النهر الصور دي

عند نوارة نجم وقيمة الصور في

إنها ممكن تكون أجدي بكتير

من مظاهرات في مواجهة حاكم معندهوش دم

لأن لما توصل للغرب إن أكاذيب الصهاينة

مش حتي مستمدة من الديانة اليهودية

في أمل إن الدعم الغربي يتأثر

للأسف هتكلم

كنت قد قررت في يوم من الأيام

إني أتجنب السياسة ككل لغموضها وقذارتها

ولعدم جدوي الكلام فيما لا نملك التحكم فيه

ومع عوامل تانية..بقيت أفضل اللاشئ

علي متابعة التلفزيون أو الصحافة أو أي أخبار

حتي مواقع النت والمدونات ..بقيت بحاول أهرب من الوصول للصورة

والواقع المفروض علي ناس اتولدت فيه والمفروض يكونوا أقوي

عشان يعرفوا يغيروه

صورة كانت الأخيرة اللي اتكلمت فيها مع أعز إنسانة في حياتي

دموية البشر وقسوتهم علي بعض.والسفسطة

والجدل اللي بيغرقنا فيه الصهاينة

وعملائهم في الداخل والخارج وإعلامهم الشيطاني

وطبعاً خداع العقل الباطن واستسهال الإجابات المريحة للضمير

جدل استمرينا فيه ساعتين وفي الآخر

اكتشفنا إن مفيش حل سريع للأسف بالكلام

للأسف هتكلم

ورغم إني كذلك بكره الكلام وفقاً للموجة والموضة

بمعني إن...العراق بيسيل فيها الدم أنهار من 5 سنين

فلسطين كبلد عايش فيه بشر..بلاش عرب وبلاش فلسطينيين

بشر زينا زيهم..محتلين من شياطين الإنس..وبيموتوا من 1984

إيه الجديد بقي ؟ .مجزرة وحصار..اه شكله أكبر

بس نفس النتايج

اللي بتحصل سنوياً..حصلت في خمس أيام وبضجة أكبر

لكن بصراحة أنا اللي خلاني أقرر أرغي وأفضفض

موقفين

بدأت بأول معرفة ليا بالموقف من مدونة نوران

ورد فعلها كان صريح لدرجة أثارت إعجابي الشديد

وأثارت أوجاع برضه..لأني حتي يومها معرفتش أعلق وقفلت ومشيت

وللصدفة كانت أول حد يبلغني الوضع

بشكل غير مباشر وبعدها بدأت

لفة طويلة أوي وحيرة واسعة أوي

وإنتهيت هنا في مدونة داليا قوس قزح

وفكرتها البريئة أوي..وأسفها المؤلم أوي

وتخلل الكام يوم دول اسئلة كتيرة في بالي

اسئلة نسوني 90% من بهجة اليوم الوحيد

اللي خرجت فيه من وقت طويل أوي

ونسخوا فرحة إحساسي بالحرية بعد التخرج

وطبعاً أي حد بيقوللي هابي نيو يير بجامله بزيها وخلاص

لكن..الأسبوع اللي فات..وصلت فيه لبداية

الثورة اللي مش بتتحول لفعل

أو فعل مش مجدي..أو فعل مجدي بس جدوي بسيطة

وإنتهيت عند..الدخول في دهاليز السياسة

ومين قرص مين الأول وفلان ضربني يا أبلة

هحاول أكون منظم

وأعرض رأي في كذا نقطة أو لقطة

أولاً ..رد فعل مبارك أو أي رئيس عربي مش صدمني ومش هيصدمني

الناس دي بتمثل وبتخون حاجات كتير من زمان أوي ومحترفين في كده

المهم نفسه وبس وأسرته والباقي يولع

يمكن زي ما كتير مننا بيغلط في حياته الخاصة

بس الفرق إنه تجرأ وادعي تحمله مسئولية بلد كاملة فبالتالي للأسف

هو الأول في دائرة الإتهام

ورد فعله طبيعي ومتصور من

واحد بقاله 28 سنة بيكدب وبيتمسك بمنصب وجاه

ثانياً..رد فعل الناس العادية..برضه متوقع أوي

الثورة الغير محددة الإتجاه..كله متضايق وكله متنرفز

اللي بيقول نحارب..وده مستحيل.لأن جيشنا كله جيش ضايع

وكل مسمار في دبابة عندنا معروف

للبيت الأبيض فبالتالي مش هيبقي في مفاجآت عسكرية

واللي بيقول نفتح المعبر خالص..وده مستحيل

لأن بكده الصهاينة هيخلصوا الثور

الأسود بسرعة ويدوروا علي باقي الثيران

وجروبات بتتعمل وأفكار وتأنيب ضمير لحظي

ومظاهرات للأسف بتمنع كمان

في البعض بيتبرع ..بس للأسف أغلب التبرعات بتوصل ببطء

لأن السياسة عايزة كده لكن لو كانت التبرعات

لضحايا زلزال في كوالالمبور كانت كل جهود الحكومة اتوحدت عشانها

وفي رد فعل من بنت كل اللي كنت أعرفه عنها

إنها من سعودية فرحانة بحريتها لما اشتغلت وبس

فوجئت بيها هيا وأخوها بيتكلموا

والإتنين نفسهم يروحوا يموتوا نفسهم وبس

يعني النية لو موجودة..مكانش في أي عقل

اتنين بالغين وعاقلين..لو الفرصة متاحة

هيروحوا بدون أي تدريب أو تخطيط أو تخيل يموتوا وبس

أدي ردود الأفعال العامة والتفكير من

الناس اللي عندهم حماسة واهتمام وقدرة علي التناسي

ثالثاً..رد فعل الناس الهربانة..كله بيلوم حماس

كله بيلوم إن الفلسطينيين ناس وحشة

متناسيين إن البشر لما بيتحبسوا في سجن

بيتحولوا لحيوانات وبينتشر الشذوذ

والملاك لو اتحبس في سجن بيخرج مجرم

لكن الناس اللي عايشة تحت الإحتلال ومتغربة في بلاد ربنا

مينفعش يشذ بعضهم عن القاعدة بمساعدة الطابور الخامس

ومش متصور علي الإطلاق إن يبقي في ما بينهم أغبيا

وحمقي..ومستغلين..وقواد..وكل الأنواع السلبية من البشر

ناس محاصرة ومحتلة ومهانة ومذلولة

ومش جيل واحد دول أكثر من جيل

فطبيعي يوصل كتير منهم لكده

إذا كان عندنا في مصر

التاجر لما البضاعة سعرها بيعلي الضعف مثلاً

بيكون عنده في المخزن بضاعة في الأصل

شاريها من شهرين بسعر الجملة القديم

بيقوم بايعها في أول يوم زيادة السعر بالزيادة الجديدة

ومصر مش في حرب ولا محتلة ولا فيها طابور خامس ولا أي حاجة

مصر بلد الأمن والأمان والإستقرار وكلام الجرايد ده

ليه بقي عندنا نماذج كتير جشع

وأسافين الموظفين وأمثلة كتيرة سلبية في مجتمعنا

مش بنفس درجة غزة مثلاً..بس لو تعرضنا

لا قدر الله لنفس الموقف احتمال نبقي اسوأ

والواحد ساعتها ممكن يبيع أخوه مش ابن عمه بس

فبالتالي..لعبة لوم الفلسطينيين وبس

لعبة كسبها الصهاينة وبإقتدار

تكفلوا بكل الأطراف وسيطروا عليهم وسابوا الناس لوحدها

ولما الناس اختارت الطرف الوحيد المعارض للإعتراف الرسمي بالمحتلين

استغلوا غباء الطرف ده وقلة حيلته

وعاقبوا الناس علي انتخابهم للإختيار الوحيد المتاح

لو استثنينا الطابور الخامس ممثلاً في قادة فتح

استغلوا عمالة أغلب الحكام العرب وبجاحتهم وجبروتهم

والخوف والرعدة عند الباقي

واستغلوا حاجات كتير

وأصبحت القضية إن الفلسطينيين فيهم البدع

والصهاينة هما اللي هيخلصوا العالم منهم

علي أساس إن صواريخ الصهاينة وقنابلهم

فيها جهاز كاشف عن النوايا والأسارير

وعلي أساس إن الصهاينة مثلاً مبعوثين

من ربنا للأرض لعقاب كل واحد علي عيوبه

رابعاً..زي ما قلت رد فعل مبارك طبيعي

وأي حد بنفس شخصيته مش هيعمل أكتر من كده

لكن الغير طبيعي إني أكتشف إننا بقينا ..زيه

وهتكلم عن نفسي عشان محدش يقولهالي

أنا بقيت زيه بشكل جزئي..بقيت زي أكتر حد مش بطيقه في الدنيا

مهتم باللي متخيل إنه متبقيلي في الدنيا

وبس..حتي الترفيه الخاص بيا..مهتم بيه أوي وبنسي ذكر ربنا

بنسي إني بني ادم هيموت ..خلاص اللي اتعودت عليه ثابت

فلو تخيلت إن في زيي كتير..ناس اتولدت

اتخدعت.فاكرين إن النجاح الشخصي هو الأهم

ونربي عيالنا ونتبسط وبس..وبيتغاضوا عن

مليون منكر بيشوفوه أو بيسمعوه أو بيلمسوه

أو بيمارسوه..المهم المركب تمشي

المهم الثابت يفضل ميتغيرش لأسوأ متخيلينه

ساعتها يبقي إحنا عندنا مش مبارك ماسك ومتعتع في الكرسي وبس

لأ عندنا شبهه ملايين الناس

كل واحد متعتع في حاجات خاصة بيه وشكراً

عشان كده..محتاجين معجزة عشان يحصل تغيير للأحسن

عشان نعرف نقوم بدور ولو حيادي

عشان نشغل حواس المنطق عندنا ومنمشيش

ورا اسوأ قيادة سياسية عرفها التاريخ المصري

مش كل كلام تقوله الجرايد القومية يبقي مسلم بيه

ومش لما أقول حسبي الله ونعم الوكيل في واحد عندنا منه كتير أبقي غلطان

لأنه مهتم بابنه وبنفسه وبس..ومش عايز يغامر يخسر فرصة توريث الواد

وحتي فهمي هويدي اللي كنت شايفه من سنة حكومي وبيطبطب في الكلام

لما اتحول لمعارض لسه بيطبطب في الكلام ..كلامه محسيتش إنه أقنع حد

وأنا بتكلم عن اللي بعرفهم كلهم

من أقرب الناس ليا..تجاهلوا اسئلة ومقال لهويدي

كنت عايز أوصل من خلال نقلهم للناس حاجة واحدة

إن حتي المنتفعين من الحاشية بعضهم مبقاش

بيمشي جنب الحيط وبيقول الحق لأن : بلغ السيل الزبي

16 سؤال منطقي

وكمان

تصور سلمي وبسيط لرد فعل محترم عقلاني

من دولة كانت محترمة في يوم من الأيام

الخلاصة

لكل حد مصري ممكن يقرأ كلامي يفكر معايا

تصدير الغاز برخص التراب للعدو أصلاً كارثة

تصدير الحديد كارثة مع اعتبار العدو حليف

ورمل سينا لسه فيه دم شهداءنا كارثة

التعاون الزراعي والتجاري واستقبل السياحة من العدو كارثة

حماية سفارة العدو كأنها أخر ما نملك في مصر كارثة

الكارثة الألعن بقي إن كل ده يستمر

والعدو ده بيقوم بعمل حيواني بدون رحمة

وبيموت الناس بشكل عشوائي زي واحد

عايز يضرب بقنبلة واحد مضايقه في ميدان العتبة

والمشكلة إن اللي هيضرب بالقنبلة دي أخبث من الخبث

ويقدر يوصل لأهدافه بشكل أسهل

لكن أسلوب العقاب الجماعي ده أقوي

حصل قبل كده من هتلر.ومن الصرب وطبعاً بلد الحرية وجيوشها

ومفيش أي حد هيقدر يبرر الحياد السلبي لمصر

لكن كل ده ملهوش علاقة بمصر..اللي ليه علاقة بمصر

إن المحتل وخريطة من النيل للفرات في الكنيست موجوودة

بيموت ناس مسلمين زيي وأنا بتفرج

ومش بفكر حتي أقطع نهائي أي علاقة تربطني

خلي اتفاقية الخنوع زي ما هيا..بس ليه يبقي في علاقة ؟!

عشان مين ؟ عشان إيه ؟

ليه محروقين أوي من إيران عشان اسم شارع

كأن السادات هو مصر ومصر هيا السادات

وفقاً لنظرية الفرعون اللعينة

ومش محموقين من كيان محتل وخبيث حاطط هدف في برلمانه

والهدف ده بيشمل نص بلدنا

فين السياسة والحكمة والفطنة والوطنية في كده

المكسب الوحيد اللي بيعود علي مبارك

إنه بيخوفنا ..بيقول ده مصير أي حد

يدخل الإخوان المسلمين اللعبة السياسية كبديل

وده مصير أي حد هيعارض ننوس عين والديه جمال بيه

هتبقوا دولة محاصرة ومحتلة ومشرذمة وممزقة

محدش يقول إن حماس بتعمل صواريخ لعبة بتستفز الصهاينة

ولا يقول إن حماس رفعت السلاح علي فلسطينين عملاء أو غير

ولا يقول إن حماس قتلت جندي مصري

برغم إن الصهاينة قتلوا زيه كتير وقت السلام المزيف

ولا يقول إن حماس متشددة وعفريت بيحكم بالحديد والنار

عايزكم تقولوا ..ليه منقطعش أي علاقة بالصهاينة

ليه منمنعش دخول السياحة الصهيونية بلدنا

ونعتبر تأشيرتهم علامة سودا علي أي جواز سفر

وغير مرحب بيها ولا بيهم ولو بكنوز الدنيا

ليه مينطردش السفير أو علي الأقل

تخفف الحراسة الفائقة حواليه وتصبح حراسة عادية

ليه ميدخلوش الجرحي والمرضي والضعفاء

من عواجيز وأطفال وحوامل أرض مصر

مع تعهد منظمة دولية زي الصليب الأحمر

أو الأمم المتحدة برعايتهم لحد ما الكارثة تنتهي ويرجعوا

ليه ميعلنش إلغاء وصمات العار زي

اتفاقية الغاز والكويز والعلاقات التطبيعية

ليه ميصححش كلمة اسرائيل ويخليها

الكيان الصهيوني في الإعلام وفي الجرايد

ليه إحنا مندعيش للناس اللي بتعاني

ولو مرة واحدة في صلاتنا ..ولحد أخر يوم في عمرنا

مش لحد أخر يوم من الحصار

بستغرب لإندهاش البعض لأن في المظاهرات

بيتقبض علي مصريين وبيتحبسوا لجريمة

التعبير عن الغضب بدون تكسير لأ بالتظاهر ضد العدو

لأن الأعداد القليلة دي..تعتبر كتير أوي..بالنظر للمستقبل

المستقبل بيحمل صورة قاتمة

عبارة عن 100 مليون حسني مبارك في مصر

كلنا هنهتم بنفسنا وبس..وأقل رد فعل بسيط

علي عدوان أعداءنا علي جيراننا هنستخسره

هنستخسره لحسابات كتيرة أوي تتعلق بالصالح الخاص وبس

ومحدش هيحس بكده فعلاً إلا لما نصل السكين يعدي علي رقبة بلدنا

ونقول أكلت يوم أكل الثور الأسود

ونبدأ نعيد تجربته في المقاومة الفاشلة للإعتداء

والمحاولة الفاشلة لتقليل نزيف الدم والتحايل علي المحتل

عشان يقبل بس يدخل الأكل والدوا

..

_____

..

معلش طولت وضيعت وقت أي حد هيفكر يقرا كل ده

بس للأسف مكانش ينفع افضل كاتم كل ده

كان لازم أوهم نفسي إني اتكلمت

حتي لو في واقع افتراضي زواره لا يتعدوا الخمسة

ويا ريت مننساش الدعاء..والزيارة لو أمكن

للجرحي اللي دخلوا مستشفي منشية ناصر أو غيرها