Thursday, January 1

للأسف هتكلم

كنت قد قررت في يوم من الأيام
إني أتجنب السياسة ككل لغموضها وقذارتها
ولعدم جدوي الكلام فيما لا نملك التحكم فيه
ومع عوامل تانية..بقيت أفضل اللاشئ
علي متابعة التلفزيون أو الصحافة أو أي أخبار
حتي مواقع النت والمدونات ..بقيت بحاول أهرب من الوصول للصورة
والواقع المفروض علي ناس اتولدت فيه والمفروض يكونوا أقوي
عشان يعرفوا يغيروه
صورة كانت الأخيرة اللي اتكلمت فيها مع أعز إنسانة في حياتي
دموية البشر وقسوتهم علي بعض.والسفسطة
والجدل اللي بيغرقنا فيه الصهاينة
وعملائهم في الداخل والخارج وإعلامهم الشيطاني
وطبعاً خداع العقل الباطن واستسهال الإجابات المريحة للضمير
جدل استمرينا فيه ساعتين وفي الآخر
اكتشفنا إن مفيش حل سريع للأسف بالكلام

Photobucket

للأسف هتكلم
ورغم إني كذلك بكره الكلام وفقاً للموجة والموضة
بمعني إن...العراق بيسيل فيها الدم أنهار من 5 سنين
فلسطين كبلد عايش فيه بشر..بلاش عرب وبلاش فلسطينيين
بشر زينا زيهم..محتلين من شياطين الإنس..وبيموتوا من 1984
إيه الجديد بقي ؟ .مجزرة وحصار..اه شكله أكبر
بس نفس النتايج
اللي بتحصل سنوياً..حصلت في خمس أيام وبضجة أكبر
لكن بصراحة أنا اللي خلاني أقرر أرغي وأفضفض
موقفين
بدأت بأول معرفة ليا بالموقف من مدونة نوران
ورد فعلها كان صريح لدرجة أثارت إعجابي الشديد
وأثارت أوجاع برضه..لأني حتي يومها معرفتش أعلق وقفلت ومشيت
وللصدفة كانت أول حد يبلغني الوضع
بشكل غير مباشر وبعدها بدأت
لفة طويلة أوي وحيرة واسعة أوي
وإنتهيت هنا في مدونة داليا قوس قزح
وفكرتها البريئة أوي..وأسفها المؤلم أوي
وتخلل الكام يوم دول اسئلة كتيرة في بالي
اسئلة نسوني 90% من بهجة اليوم الوحيد
اللي خرجت فيه من وقت طويل أوي
ونسخوا فرحة إحساسي بالحرية بعد التخرج
وطبعاً أي حد بيقوللي هابي نيو يير بجامله بزيها وخلاص
لكن..الأسبوع اللي فات..وصلت فيه لبداية
الثورة اللي مش بتتحول لفعل
أو فعل مش مجدي..أو فعل مجدي بس جدوي بسيطة
وإنتهيت عند..الدخول في دهاليز السياسة
ومين قرص مين الأول وفلان ضربني يا أبلة
هحاول أكون منظم
وأعرض رأي في كذا نقطة أو لقطة
أولاً ..رد فعل مبارك أو أي رئيس عربي مش صدمني ومش هيصدمني
الناس دي بتمثل وبتخون حاجات كتير من زمان أوي ومحترفين في كده
المهم نفسه وبس وأسرته والباقي يولع
يمكن زي ما كتير مننا بيغلط في حياته الخاصة
بس الفرق إنه تجرأ وادعي تحمله مسئولية بلد كاملة فبالتالي للأسف
هو الأول في دائرة الإتهام
ورد فعله طبيعي ومتصور من
واحد بقاله 28 سنة بيكدب وبيتمسك بمنصب وجاه
ثانياً..رد فعل الناس العادية..برضه متوقع أوي
الثورة الغير محددة الإتجاه..كله متضايق وكله متنرفز
اللي بيقول نحارب..وده مستحيل.لأن جيشنا كله جيش ضايع
وكل مسمار في دبابة عندنا معروف
للبيت الأبيض فبالتالي مش هيبقي في مفاجآت عسكرية
واللي بيقول نفتح المعبر خالص..وده مستحيل
لأن بكده الصهاينة هيخلصوا الثور
الأسود بسرعة ويدوروا علي باقي الثيران
وجروبات بتتعمل وأفكار وتأنيب ضمير لحظي
ومظاهرات للأسف بتمنع كمان
في البعض بيتبرع ..بس للأسف أغلب التبرعات بتوصل ببطء
لأن السياسة عايزة كده لكن لو كانت التبرعات
لضحايا زلزال في كوالالمبور كانت كل جهود الحكومة اتوحدت عشانها
وفي رد فعل من بنت كل اللي كنت أعرفه عنها
إنها من سعودية فرحانة بحريتها لما اشتغلت وبس
فوجئت بيها هيا وأخوها بيتكلموا
والإتنين نفسهم يروحوا يموتوا نفسهم وبس
يعني النية لو موجودة..مكانش في أي عقل
اتنين بالغين وعاقلين..لو الفرصة متاحة
هيروحوا بدون أي تدريب أو تخطيط أو تخيل يموتوا وبس
أدي ردود الأفعال العامة والتفكير من
الناس اللي عندهم حماسة واهتمام وقدرة علي التناسي
ثالثاً..رد فعل الناس الهربانة..كله بيلوم حماس
كله بيلوم إن الفلسطينيين ناس وحشة
متناسيين إن البشر لما بيتحبسوا في سجن
بيتحولوا لحيوانات وبينتشر الشذوذ
والملاك لو اتحبس في سجن بيخرج مجرم
لكن الناس اللي عايشة تحت الإحتلال ومتغربة في بلاد ربنا
مينفعش يشذ بعضهم عن القاعدة بمساعدة الطابور الخامس
ومش متصور علي الإطلاق إن يبقي في ما بينهم أغبيا
وحمقي..ومستغلين..وقواد..وكل الأنواع السلبية من البشر
ناس محاصرة ومحتلة ومهانة ومذلولة
ومش جيل واحد دول أكثر من جيل
فطبيعي يوصل كتير منهم لكده
إذا كان عندنا في مصر
التاجر لما البضاعة سعرها بيعلي الضعف مثلاً
بيكون عنده في المخزن بضاعة في الأصل
شاريها من شهرين بسعر الجملة القديم
بيقوم بايعها في أول يوم زيادة السعر بالزيادة الجديدة
ومصر مش في حرب ولا محتلة ولا فيها طابور خامس ولا أي حاجة
مصر بلد الأمن والأمان والإستقرار وكلام الجرايد ده
ليه بقي عندنا نماذج كتير جشع
وأسافين الموظفين وأمثلة كتيرة سلبية في مجتمعنا
مش بنفس درجة غزة مثلاً..بس لو تعرضنا
لا قدر الله لنفس الموقف احتمال نبقي اسوأ
والواحد ساعتها ممكن يبيع أخوه مش ابن عمه بس
فبالتالي..لعبة لوم الفلسطينيين وبس
لعبة كسبها الصهاينة وبإقتدار
تكفلوا بكل الأطراف وسيطروا عليهم وسابوا الناس لوحدها
ولما الناس اختارت الطرف الوحيد المعارض للإعتراف الرسمي بالمحتلين
استغلوا غباء الطرف ده وقلة حيلته
وعاقبوا الناس علي انتخابهم للإختيار الوحيد المتاح
لو استثنينا الطابور الخامس ممثلاً في قادة فتح
استغلوا عمالة أغلب الحكام العرب وبجاحتهم وجبروتهم
والخوف والرعدة عند الباقي
واستغلوا حاجات كتير
وأصبحت القضية إن الفلسطينيين فيهم البدع
والصهاينة هما اللي هيخلصوا العالم منهم
علي أساس إن صواريخ الصهاينة وقنابلهم
فيها جهاز كاشف عن النوايا والأسارير
وعلي أساس إن الصهاينة مثلاً مبعوثين
من ربنا للأرض لعقاب كل واحد علي عيوبه
رابعاً..زي ما قلت رد فعل مبارك طبيعي
وأي حد بنفس شخصيته مش هيعمل أكتر من كده
لكن الغير طبيعي إني أكتشف إننا بقينا ..زيه
وهتكلم عن نفسي عشان محدش يقولهالي
أنا بقيت زيه بشكل جزئي..بقيت زي أكتر حد مش بطيقه في الدنيا
مهتم باللي متخيل إنه متبقيلي في الدنيا
وبس..حتي الترفيه الخاص بيا..مهتم بيه أوي وبنسي ذكر ربنا
بنسي إني بني ادم هيموت ..خلاص اللي اتعودت عليه ثابت
فلو تخيلت إن في زيي كتير..ناس اتولدت
اتخدعت.فاكرين إن النجاح الشخصي هو الأهم
ونربي عيالنا ونتبسط وبس..وبيتغاضوا عن
مليون منكر بيشوفوه أو بيسمعوه أو بيلمسوه
أو بيمارسوه..المهم المركب تمشي
المهم الثابت يفضل ميتغيرش لأسوأ متخيلينه
ساعتها يبقي إحنا عندنا مش مبارك ماسك ومتعتع في الكرسي وبس
لأ عندنا شبهه ملايين الناس
كل واحد متعتع في حاجات خاصة بيه وشكراً
عشان كده..محتاجين معجزة عشان يحصل تغيير للأحسن
عشان نعرف نقوم بدور ولو حيادي
عشان نشغل حواس المنطق عندنا ومنمشيش
ورا اسوأ قيادة سياسية عرفها التاريخ المصري
مش كل كلام تقوله الجرايد القومية يبقي مسلم بيه
ومش لما أقول حسبي الله ونعم الوكيل في واحد عندنا منه كتير أبقي غلطان
لأنه مهتم بابنه وبنفسه وبس..ومش عايز يغامر يخسر فرصة توريث الواد
وحتي فهمي هويدي اللي كنت شايفه من سنة حكومي وبيطبطب في الكلام
لما اتحول لمعارض لسه بيطبطب في الكلام ..كلامه محسيتش إنه أقنع حد
وأنا بتكلم عن اللي بعرفهم كلهم
من أقرب الناس ليا..تجاهلوا اسئلة ومقال لهويدي
كنت عايز أوصل من خلال نقلهم للناس حاجة واحدة
إن حتي المنتفعين من الحاشية بعضهم مبقاش
بيمشي جنب الحيط وبيقول الحق لأن : بلغ السيل الزبي
وكمان
الخلاصة
لكل حد مصري ممكن يقرأ كلامي يفكر معايا
تصدير الغاز برخص التراب للعدو أصلاً كارثة
تصدير الحديد كارثة مع اعتبار العدو حليف
ورمل سينا لسه فيه دم شهداءنا كارثة
التعاون الزراعي والتجاري واستقبل السياحة من العدو كارثة
حماية سفارة العدو كأنها أخر ما نملك في مصر كارثة
الكارثة الألعن بقي إن كل ده يستمر
والعدو ده بيقوم بعمل حيواني بدون رحمة
وبيموت الناس بشكل عشوائي زي واحد
عايز يضرب بقنبلة واحد مضايقه في ميدان العتبة
والمشكلة إن اللي هيضرب بالقنبلة دي أخبث من الخبث
ويقدر يوصل لأهدافه بشكل أسهل
لكن أسلوب العقاب الجماعي ده أقوي
حصل قبل كده من هتلر.ومن الصرب وطبعاً بلد الحرية وجيوشها
ومفيش أي حد هيقدر يبرر الحياد السلبي لمصر
لكن كل ده ملهوش علاقة بمصر..اللي ليه علاقة بمصر
إن المحتل وخريطة من النيل للفرات في الكنيست موجوودة
بيموت ناس مسلمين زيي وأنا بتفرج
ومش بفكر حتي أقطع نهائي أي علاقة تربطني
خلي اتفاقية الخنوع زي ما هيا..بس ليه يبقي في علاقة ؟!
عشان مين ؟ عشان إيه ؟
ليه محروقين أوي من إيران عشان اسم شارع
كأن السادات هو مصر ومصر هيا السادات
وفقاً لنظرية الفرعون اللعينة
ومش محموقين من كيان محتل وخبيث حاطط هدف في برلمانه
والهدف ده بيشمل نص بلدنا
فين السياسة والحكمة والفطنة والوطنية في كده
المكسب الوحيد اللي بيعود علي مبارك
إنه بيخوفنا ..بيقول ده مصير أي حد
يدخل الإخوان المسلمين اللعبة السياسية كبديل
وده مصير أي حد هيعارض ننوس عين والديه جمال بيه
هتبقوا دولة محاصرة ومحتلة ومشرذمة وممزقة
محدش يقول إن حماس بتعمل صواريخ لعبة بتستفز الصهاينة
ولا يقول إن حماس رفعت السلاح علي فلسطينين عملاء أو غير
ولا يقول إن حماس قتلت جندي مصري
برغم إن الصهاينة قتلوا زيه كتير وقت السلام المزيف
ولا يقول إن حماس متشددة وعفريت بيحكم بالحديد والنار
عايزكم تقولوا ..ليه منقطعش أي علاقة بالصهاينة
ليه منمنعش دخول السياحة الصهيونية بلدنا
ونعتبر تأشيرتهم علامة سودا علي أي جواز سفر
وغير مرحب بيها ولا بيهم ولو بكنوز الدنيا
ليه مينطردش السفير أو علي الأقل
تخفف الحراسة الفائقة حواليه وتصبح حراسة عادية
ليه ميدخلوش الجرحي والمرضي والضعفاء
من عواجيز وأطفال وحوامل أرض مصر
مع تعهد منظمة دولية زي الصليب الأحمر
أو الأمم المتحدة برعايتهم لحد ما الكارثة تنتهي ويرجعوا
ليه ميعلنش إلغاء وصمات العار زي
اتفاقية الغاز والكويز والعلاقات التطبيعية
ليه ميصححش كلمة اسرائيل ويخليها
الكيان الصهيوني في الإعلام وفي الجرايد
ليه إحنا مندعيش للناس اللي بتعاني
ولو مرة واحدة في صلاتنا ..ولحد أخر يوم في عمرنا
مش لحد أخر يوم من الحصار
بستغرب لإندهاش البعض لأن في المظاهرات
بيتقبض علي مصريين وبيتحبسوا لجريمة
التعبير عن الغضب بدون تكسير لأ بالتظاهر ضد العدو
لأن الأعداد القليلة دي..تعتبر كتير أوي..بالنظر للمستقبل
المستقبل بيحمل صورة قاتمة
عبارة عن 100 مليون حسني مبارك في مصر
كلنا هنهتم بنفسنا وبس..وأقل رد فعل بسيط
علي عدوان أعداءنا علي جيراننا هنستخسره
هنستخسره لحسابات كتيرة أوي تتعلق بالصالح الخاص وبس
ومحدش هيحس بكده فعلاً إلا لما نصل السكين يعدي علي رقبة بلدنا
ونقول أكلت يوم أكل الثور الأسود
ونبدأ نعيد تجربته في المقاومة الفاشلة للإعتداء
والمحاولة الفاشلة لتقليل نزيف الدم والتحايل علي المحتل
عشان يقبل بس يدخل الأكل والدوا
..
_____
..
معلش طولت وضيعت وقت أي حد هيفكر يقرا كل ده
بس للأسف مكانش ينفع افضل كاتم كل ده
كان لازم أوهم نفسي إني اتكلمت
حتي لو في واقع افتراضي زواره لا يتعدوا الخمسة
ويا ريت مننساش الدعاء..والزيارة لو أمكن
للجرحي اللي دخلوا مستشفي منشية ناصر أو غيرها

5 comments:

همس الاحباب said...

كلامك منطقى ومسلم به من الناحية النظرية ومتفق معك فى الكثير منه
ولكن نحن لسنا سلبيين
ولكن يزج بنا الى نار لا نعلم مداها
اخى العزيز تعلمنا فى الصغر ان بيتى لابد ان ادافع عنه لاخر نقطة فى دمى ولا انتظر شخص اخر لكى يحرره لى ويستعمره
انا ليس ضد الحرب ومتعاطف جدا مع الاخوة فى غزة ولكن ضد ان يزج بناالى حرب والعرب مكتوفى الايدى
وما يدريك اننا سوف نقتل بايدى العرب قبل اليهود
اخى العزيز لابد من التريث فى بعض الامور فاليهود لها مخطط واضح والكل يعلمه
تحياتى

Anonymous said...

عزيزى ضياء

لا يملك الحكم الصحيح الا من يرى كل الحقيقة

ولا يستطيع احد أن يدعى ممن كان له رأى أو رأى آخر انه لديه كل الحقيقة ..نحن فقط نملك مانشيتات جرائد .. أو لقطات على قنوات فضائية متعددة أو أى وسيلة أخرى

اعطيك لينك .. ربما يلقى بعض الضوء .. لكنها .. وأكرر .. ليست كل الحقيقة

http://hanyzenhomahmed.blogspot.com

مع أطيب تحياتى

maha zein said...

الحوت والعنكبوت
http://islam.maktoob.com/islam_files/Media/duaa/NasrAldeen-Tobar/8.rm


بك أستجير
http://islam.maktoob.com/islam_files/Media/duaa/NasrAldeen-Tobar/19.rm


جل المنادي
http://islam.maktoob.com/islam_files/Media/duaa/NasrAldeen-Tobar/6.rm


حين يهدي الصبح إشراق سناه
http://islam.maktoob.com/islam_files/Media/duaa/NasrAldeen-Tobar/7.rm



سبحانك اللهم
http://islam.maktoob.com/islam_files/Media/duaa/NasrAldeen-Tobar/14.rm


سبحانه
http://islam.maktoob.com/islam_files/Media/duaa/NasrAldeen-Tobar/9.rm


صدق وعده
http://islam.maktoob.com/islam_files/Media/duaa/NasrAldeen-Tobar/15.rm


مؤنسي في وحدتي
http://islam.maktoob.com/islam_files/Media/duaa/NasrAldeen-Tobar/10.rm


مجيب السائلين
http://islam.maktoob.com/islam_files/Media/duaa/NasrAldeen-Tobar/3.rm


والقلب شاكي عليل
http://islam.maktoob.com/islam_files/Media/duaa/NasrAldeen-Tobar/11.rm


يا بارئ الكون
http://islam.maktoob.com/islam_files/Media/duaa/NasrAldeen-Tobar/1.rm


يا سالكين الدرب
http://islam.maktoob.com/islam_files/Media/duaa/NasrAldeen-Tobar/13.rm


يا مالك الملك
http://islam.maktoob.com/islam_files/Media/duaa/NasrAldeen-Tobar/2.rm


يا من يراني في علاه
http://islam.maktoob.com/islam_files/Media/duaa/NasrAldeen-Tobar/18.rm


يا نصير المظلوم 1
http://islam.maktoob.com/islam_files/Media/duaa/NasrAldeen-Tobar/16.rm


يا نصير المظلوم 2
http://islam.maktoob.com/islam_files/Media/duaa/NasrAldeen-Tobar/17.rm




اي خدمات انا في الخير اسد
بجد اتشرفت بمعرفتك
رغم ان المعرفة كانت عابرة
الا اني بجد حسيت انك طيب جدا ودي مش مجاملة لاني مش مجبرة اقولها
بجد انت طيب

بصراحة مقرتش البوست
هروح اكل واجي اعلق علي البوست

علي فكرة عرفتك لما قلتلي ان شبرا جنب معهد ناصر
اصلي مكنتش عارفة
سلام مؤقت

maro said...

يمكن عندك حق فى كلامك كله
بس الناس بجد بقت تايهه يعنى يومين كمان والتهدئه تحصل وهننسى كل حاجة زى ماقولت فلسطين من سنة 48 فى مجازر اللى بيحصل معاهم ده مش احتلال دى محاولات مستمرة للاباده وكل اللى الشعوب بتعمله انها تثو رو تتظاهر وتسكت الى بيحصل اكبر منى ومنك دى قوه حاكمه العالم كله وماينفعش فيها شوية مظاهرات ولا كلام وخلاص وماينفعش نلوم نفسنا وبس لازم نوصل للحقائق بس زى مابيقولوا ((( دائماً لا تصلكَ سوى أنصاف الحقائق مهما بالغت في الإلحاح عن إجابةٍ لها.ودائماً هناك دوافع مخفيّة لا نبوح بها، تبقى هي الحقيقة الغامضة)))للاسف انت مش عارف تحل مشاكلك ازاى هتحل مشاكل غيرك ازاى هاسيتنوا حاجة من حد وهو اصلا مش قادر يساعد نفسه بقى فى حاجات كتير واقفه فى طريقنا وماينفعش نقف لوحدنا واصلا محدش عايز حد وكله بيفكر فى نفسه كل الامور اختلطت امور الدنيا والدين هات انسان فى مجتمعنا متوازن نفسيا وعارف هو عايز ايه كلنا ملخبطين ومشتتين يمكن جوانا كويس بس للاسف بقى مشوه محتاجين فكرة وروح وايمان وصدق .... الصورة يمكن بقت قاتمه اوى وضلمه بس اكيد فى بقعة نور هتظهر

dodda said...

للاسف انك اتكلمت

وبايه يفيد الكلام؟؟

تعرف من كام يوم كنت بفكر اكتب بوست عن الموضوع ده


كنت حقول ان جهاد المأ÷ هو تحميس الرجال للجهاد
يعنى الكلام للستات والنزال للرجال


كلامى طبعا مش وجه ليك بشخصك لكن معدش عندى امل ان بلدى كلها يطلع فيها راجل ويعمل اى حاجه


مع ان الحكايه مش محتاجه غير راجل واحد فول اوبشن
يعنى قيادى وف نفس الوقت بيفهم

وهى قلبة ترابيزه والا اكتر

تحياتى

واعتذارى لقسوة كلماتى