Thursday, April 19

طعم الحصرم * في الفم

بعدت الفترة اللي فاتت عن الصلاة رغم إن أول الأسبوع حصل حاجة كويسة في حياتي حمدت عليها ربنا لفظاً مش أكتر ..والنهارده الحمد لله رجعت أحسن شوية ..وحبيت أكتب حاجة قبل ما تتنسي زي اللي قبلها ..لأني بقالي 80 يوم بنسي ..
من فترة طويلة بفكر مكتبش أصلاً ...لأني محتار بين حاجات كتير عايز أقولها وبين حاجات مأثرة علي نفسيتي بتأثر
وبتخرجني عن الموضوع اللي بكتبه بس ما باليد حيلة ..
وأنا بتمشي في الشارع ..كان في واحد بيتكلم في المحمول
فبيحكي بصوت عالي أوي في تأجيل جلسة وشغل المحاميين ده
وعشان يوصل وجهة نظره فقال النكتة دي
واحد مراته طردته ..ومكانش ليه حد في الدنيا غيرها
فمش عارف يروح فين وفضل واقف علي باب الشقة
ينادي عليها متردش ..يخبط متردش ..لحد ما اتعصب أوي
فبقي كل شوية كل لما يخبط ومتردش عليه يخبط برجله صفيحة القمامة تخبط في الحيطة وتخبط فيه ..0
وهكذا فضل يكرر الموضوع ده
لغاية أما أتعور جامد أوي ..0
فقام مصرخ وقالها افتحي يا ولية
الصفيحة هتموتني ..!!00
فمنطق النكتة القديمة دي لما أفتكرته وصلني لخواطر معينة وهكتب البوست النهاردة
عشان منساش بس الموقف اللي استفدت منه أوي
*
*
*
________
**
*
لما تخرج من بيت إنت بنيته ..0
من حاجة تعبت فيها عشان تكملها للآخر
وقتها عشان ترجع ..والباب مقفول ..هتفضل تنادي ..
بس لا حياة فيمن تنادي ..هتخبط علي باب جنبه ..
هيخرجلك صاحبه بشياكة
فيقولك إنه مشغول ويقفل من تاني
وده حقه فمتقدرش تتكلم ..أكيد من حقه يحدد أولوياته
فساعتها من الحيرة تنسي أهم حاجة
اللجوء لربنا والإيمان بيه بكل جوارحك
ساعتها هتنسي وترجع للباب اللي لما اتقفل في وشك وصلك للحالة دي وتقعد تخبط ..ولما ميردش صاحبه ..0
أو يرد ببرودوبكلمتين يبينوا إنه مش مهتم بيك أصلاً وعايز يخلص منك من غير ما يتعب ضميره
وقتها هتخبط في صفيحة ذكرياتك اللي علي الباب ؟!0
أو صندوق عبارة عن خلايا مخك اللي مش بتبطل تفكير
وبحث عن مبررات لكل حاجة بتحصل..وغرق في موجات من الحيرة لوحدك تماماً مش عارف تكمل للآخر ولا تستني المجهول
Photo Sharing and Video Hosting at Photobucket
حيرة بين استسلام لواقع تافه وأناني
واقع أنت متأكد من إنك مش لازم تسيبه يستغرقك..
ساعتها هتحس بطعم مر في روحك بيحاول يغطي علي الأمل
اللي تعبت عشان تزرعه جواك
وتفضل تخبط في صندوق الحيرة والذكريات..صندوق الاحتمالات
وكل ما تخبط فيه غصب عنك..0
غصب عنك لأنك لسه مش القوة
اللي تمنع بيه جنوحك للتصرف ده
يخبط ويرجع يخبط فيك تاني بقوة متزايدة ..0
ويزيد عمق الجروح ومصمم إنك لما هتعمل كده هتقدر تفتح آخر باب اتقفل في وشك
لكن في الواقع الموضوع مش متوقف علي تصرفك إنت ..0
المفروض تسلم أمرك لله
وتستني تقلبات أمزجة أصحاب الأبواب
الأبواب المقفولة ..وتروح بكل جوارحك للمكان الوحيد
اللي بابه مش هيقفل في وشك
يا تري تقدر ؟!000
ولا هتسيب طعم الحصرم يكون الطعم الوحيد في فمك ؟!00
هتفضل واقف مستسلم للصفيحة أو الصندوق اللي كل ما تخبطه يرجعلك ..يخبط فيك ؟!00
تسيبه يعمق جروحك ..تسيبه وإنت معتقد إن وحدتك
هتكون الحل لفتح أي باب إنت عايزه يفتح تاني ؟!00
في النهاية ..في اختيارين ..0
تفضل أدام الباب تجرح وتهين في روحك
أو تروح للباب الوحيد اللي مش هيتقفل في وشك وتصبر
وفي الحالتين هيفضل طعم الحصرم في فمك
_______
*
*
0* الحصرم ..كلمة عربية بترمز لأول العنب أو التمر ...يعني أول الحصاد بتاعه مبيكون لسه مش ناضج
وغالباً ما تستخدم الكلم للرمز لطعم مر
* عنوان البوست قريته في مقالة في الدستور عن رواية اسمها ( حصرم الجنة ) لأديب فلسطيني اسمه عاطف أبو سيف ..والرواية بتعبر تعبير جميل وبذكريات بسيطة عن سيطرة المرارة علي المغتربين عن بلادهم ..بداية من خبرة جدته والأجيال التالية ليها من مجتمع فلسطيني منسي في زمن جمال مبارك وهيفاء وهبي وكوندي ..مجتمع اللاجئين
المقال اللي بيحكي عن الرواية دي بالصدفة كان في جنبه مقال تاني لأحمد الخميسي
قال فيه إن الأدب ( وأنا بضيف عليها أي تعبير جميل عموماً سواء كان غناء أو سينيما أو كتابة أو شعر )
بيعيبه في المجمل إن الشخصية بطلة العمل الأدبي أو أيا كان مش بتكبر بحيث إن همها يبقي بحجم الوطن
أو المجتمع بل بالعكس
بيجرها ليصبح المجتمع أو الوطن بحجم مشكلة الفرد ..وده اللي حسيته وأنا بكتب في المدونة 00
مش عارف أخرج من شرنقة بعيب علي الناس استسلامهم ليها مع إن ربنا لو لاحظنا أغلب أحكامه وتعليماته
بتحثنا علي إننا نكون في حالة الكل
مش الفرد ..نحس بحاجات مشتركة ويكون لينا أهداف مشتركة
عموماً نرجع لمقال الأخ / أحمد الخميسي اللي قال
حاجة جميلة أوي في الآخر عجبتني أوي
مقتبسها من مسرحية بس نسيت اسمها
قد تكون قبسة النور في الغروب الشامل الذي نعيشه
هي كيفية وصفنا لهذا الغروب ..وبضيف عليه ..نظرتنا لهذا الغروب
Photo Sharing and Video Hosting at Photobucket

28 comments:

dandana said...

فى شوق لقرائتها

Reemo said...

ضياء
انا مش عارفه بجد اعلق اقولك ايه
بس ساعات كتير الانسان لما بيكون فى ازمه بيلجأ لحاجات كتير اوى
ولناس كتير وابواب مقفوله
وينسىان فى باب مفتوح ليه على طول
مهما اخطأ
باب صاحبه بيرحب بيك وبيدعوك دائما
مهما بعدت عنه ومهما اخطأت فى حقه
فهو دائما مسامح غافر بيدعوك لبابه
ضياء بجد انا مش عارفه ليه مش عارفه اعبر عن اللى حسيته
بس دايما مدونتك وكلامك والموسيقى اللى بتشتغل اول ما ادخلها بتدخلنى فى حاله بيعجز فيها عن التعبير عن اللى حاساه
فى مثل بيقول اللى يشوف بلاوى الناس بتهون عليه بلوته
دائما الانسان بيشوف مصيبته بحجم الكون وكانها اعظم ابتلاء
وهى ممكن تكون فىالحقيقه لا شئ
:)))
انا مش عارفه انا بقول ايه ومش عارفه ارتب افكارى
بس السبب فيك وفى مدونتك اللى بجد اكتر من رائعه
تحياتى ليك

شيمـــــاء said...

مبسوطة من النتيجة اللى وصلتلها
الباب اللى عمره ما بيقفل
و اتمنى انك عمرك ما تنساه

دعواتك يا ضياء
علشان الملك يقولك ولك مثله

koukawy said...

ههههههههههههههه
النكته دي كانت بتضحكني اوي كل ما اسمعها و ده اتصوري لشك الشخص ؛
نقطه واحده هتكلم فيها من البحر اللي انت كتبه ؛ و هي فكرة ان الواحد يبني حاجه و تتهدم في لحظه اي حاجه بيت علاقه او امل شئ مؤلم فعلا

Diyaa' said...

ميوية ..تعليقك لغز والله ...منورة ومتشوق للترجمة


ريـــــمــــو
ضياء بيقولك أنتي قلتي كل حاجة ..
كفاية لما أكتب حاجة بعبر بيها عن رأيي أو نفسي وألاقي حد ميعرفنيش ويفهمني ببساطة كده
وبعدين تعليقاتك أطول تعليقات وده شئ بيسعدني :)) كفاية وقتك يعني
المهم نخش للكلام الجميل ..
عارفة ليه بنلجأ للأبواب المقفولة دي ؟ لأن عقلنا قاصر عن استيعاب فكرة اللجوء لربنا ..أغلب الناس كده ..البني آدم مننا بيحتاج معجزات كتير تحصل في حياته وضمير يغلب وساوس الشيطان
لأن قليلين اللي وصلوا لمرحلة إنه يشوفوا بقلبه وعقله ويحس بروحه بتخاطب خالقها ويحس أد إيه ربنا كان كريم لما طلب مننا السؤال وعليه الإجابة..
+ عدم قدرة ناس كتير وأحياناً بكون منهم ..علي استيعاب إن ربنا ليه تصاريف في الأقدار ميقدرش عقلنا المحدود علي استيعابها..
في حين إن اللي حوالينا من أهل وأصدقاء متعودين علي أنهم أدامنا ولأن من السهل إنك تتخدعي في بني آدم وخصوصاً لما ميكونش في سبب لإنه يخرج من حياتك ..ساعتها بنروح ليه ولغيره ..مرة وتانية وتالتة ..ونيأس ونرجع لربنا وتعدي الأزمة ونعيد الكرة من تاني
وأحسن تعبير عن ده أكيد كلام ربنا بس للأسف مش فاكر نص الآية
بس عبد الرحمن الأبنودي عبر عنها في أغنية نلف ف دواير في أخر فيلم أوقات فراغ ...
يلا معلش....
ومسألة المصايب دي أنا احترت معاها ..أعيش مع نفسي وأشوف كل حاجة في عالمي الصغير وبس ..ولاأفضل أكافح عشان أشوف أي تأثير لوجودي في العالم الكبير ده ...طيب لو أحب الناس ليا وأقربهم مني رفضوا مجرد إني أسمع أو أكون موجود ...أروح أشحت اصحاب من نيوزيلاندا مثلاً ...موضوع رخم وربنا هيعينني عليه بإذنه

بس خلاص ...وأنا مبسوط لإطرائك اللي كتير أوي عليا وعلي كتابتي ...لأني حاسس إن في بني أدم بيشجعني من غير مصلحة في كده ولا حاجة تفرض عليه كده
والموسيقي ..هبررلك الاحساس اللي بتدخلك فيه ...لأنها من ذوق روان
بس خلاص...
منوراني دايماً ولحد أخر يوم في عمر البلوج أو عمري أيهما أقرب
وتحياتك وصلت
سلام عليكم

Diyaa' said...

باشمهندستنا الجميلة ...أختي الصغيرة ..يوه قصدي الكبيرة ..حلوين شوية النفاق دول :)) بهرج طبعاً
المهم منورة البلوج ..والنتيجة اللي وصلتلها دي كان المفروض أوصلها من زمان ..وأمنيتك الجميلة دي اعتبريها أمنية مشتركة لكل البشر ..وخصوصاً اللي بيحاولوا ميكونوش أنانيين..
شكراً ليكي ولنصيحتك تحديداً ويا رب بس ألحق
منورة وتحياتي وكوني بخير لو سمحت



كوكو...إزيك يا ستي ..النكتة جميلة ..عشان ليها معني ...والراجل ده أنا متصوره إنه فرفور وضعيف رغم إنه جواه القوة اللي بينادي بيها وبيخبط بيها بس ما استغلهاش إلا في وقت زي ده واستغلال مش مجدي ..زي البني آدم من جوه ..ضعفه وغبائه وأنانيته مسيطرين عليه للأبد
إلا من رحم ربي ..
لكن ربنا مخلقناش عشان الشيطان يتسلي علينا ويلعب بينا ..ربنا خلقنا لكذا حكمة منها إننا فعلاً أقويا ونقدر نحقق كل اللي ربنا كان عايزه مننا

والنقطة اللي اتكلمتي فيها ..يا ريت يحسوا كل اللي بيتسببوا في هدم أي شئ جميل أد إيه هما قتلوا حاجات أجمل كانت ممكن تشوف النور ...
وريحتيني لما النقطة دي وصلتلك
نيجي لمجاملتك الجميلة
لو اللي أنا كاتبه ده بحر يبقي ريم مثلاً غرقت فيه :( وكمان أنتي لسه مشفتيش حاجة ...أكيد أكيد أنا هبقي من أكتر الناس اللي فكرت في حاجات كتير (أغلبها نظري للأسف ومعظمها مجابش نتيجة للأسف برضه ) ودماغي مليانة مش هتفضي إلا وأنا في قبري ..
منوراني وتحياتي ليكي وحمد الله علي سلامتك للمرة اللي مش عارف كام

Muhammad said...

السلام عليكم و رحمة الله و بركاته

انا قريت بس مش عارف اعلق
ليه؟
و الله ماعرف

كنت جايبلك معايا اتنين كيلو حصرم و انا جاي .. قلت مش معقول كل مرة اجي بايدي فاضية .. المهم لما قريت و لقيتك مشرد الحصرم اتكسفت على دمي و رميتهم .. مع انه كان حصرم لبناني بالشيء الفلاني

المرة الجاية هجيبلك حنظل .. بقولك اهه من دلوقتي عشان متشردوش:)

سلام

koukawy said...

مفهمتش كلمة الانعزال في الكومنت اللي منشرتوش عندي ؟
ثانيا الكتاب مش عندي بس هدور عليه و هحاول ادخله بسكانر و اقولك و تبعتلي ساعتها ميل ابعتهولك
بس فهمني موضوع الانعزال؟؟؟؟؟؟؟؟؟؟؟؟؟؟؟؟

Diyaa' said...

محمد ..وعليك مثلما قلت :@
ماشي هات حنظل هات حصرم هات سم فيران ...كله كويس :)
بس الحصرم اللبناني غالي :( حرام ترميه ...وبالنسبة لعجزك عن التعليق فمتهيألي لأن مفيش شعر في الموضوع :)
عموماً أنا عاجز عن الشكر
منور
سلام ورحمة الله وبركاته



كوكو ...متشكر جداً ...بتعبك معايا

Nothing To Lose said...

السلام عليكم
اولا البلوج بتاعك مريح معرفش ليه
انا اول مرة أجى وان شاء الله مش أخر مرة
حسيت كدا رغم ان البوست طويل بس متقدرش مش تقرأه

عارف ..الواحد فعلا لو بيفكر بعقله اول حد هيلجأله هو ربنا
هو الوحيد الى مبيقفلش بابه فى وش حد
مهما كانت اخطائنا وعصيانا ليه
بالعكس
من تقرب منى شبرا تقربت اليه زراعا
ومن تقرب منى زراعا تقربت له باعا
ومن جاءنى مسرعا جاءت اليه مهرولا
يا الله ...انت متخيل
سبحان الله ...وكل ما تقرب اكتر تحبه اكتر ويحبك اكتر
يديك كل حاجة واى حاجةومن قبل ما تطلب

انا سعيدة اوى البوست بتاعك بجد صحا فيا انا كمان حاجات كتير كنت محتاجاها

جزاك الله خيرا
وان شاء الله ربنا يسعدك طول حياتك
تحياتى اخى الكريم

Oma said...

الله
لخبطلي مودي خالص
من شويه قريت بوست عيطني
ودلوقتي بتديني امل
وعشان اللخبطه اللي انا فيها
مش هعرف اقولك غير انك حد بيوتيفل اوي :)
بيوتيفل مايند بجد

šσяšαяαα said...

ايه الجمال دا ماشاء الله

الكلمات على الرغم من انها مش بالعربية الفصحى اللى بتحسس الواحد بالكلكعه وبرهبة الكلمات:)
الا انها فعلا مؤثرة وبتوصل للقلب من غير واسطه ولا توصيه:)

ربنا يوفقك ويهديك لكل خير

تحياتى

نبض اسكندرية said...

اخيرا

يا ضياء الشمس

اخيرا بداية الامل بدء يشرق فى جوانبك

وهل لنا غير الله نلجأ لة

بجد توبيك اكثر من رائع

احيك علية

وانتظر المزيد من هذة الكيفية

الله عليك يا فنان

وعلى فكرة النكتة جامدة طحن

تحياتى

youssef said...

ازيك ياضياء
" واذا مسكم الضر في البحر ضل من تدعون الا اياه فلما نجاكم الي البر أعرضتم وكان الانسان كفورا"....كلامك جميل و كلام الآية طبعا أجمل..لكن الكلام بس في زماننا مش كفاية ابدا علشان يوصلنا للاحساس..
أولا ياضياء.. اتكلمت عن الوصول لاحساس بالضعف .. بالصغر أمام القوة الأكبر والأعظم .. عن التخلي عن الغباء والأنانية والتسليم للمقادير..و الاعتقاد بحكمة تصاريفها.. ياه صعب جدا يا ضياء .. زمن المعجزات انتهي وزمن الشفافية والروحانية .. وحتي الاحلام والخيال.. وسط المادة والواقع والانحدار الانسانى المرعب..صعب جدا الوصول للاحساس .. الاحساس فاهمني .. الشعور اللطيف اللي ضاع مع مشاعر كتير مرهفة و راقية.. الشعور يا ضياء الشعور مش المظاهر ..المظاهر عارفها كويس وباعملها والله لكن من غير معني او هدف او حس..هو احنا فالحين في اي حاجة غيرها الايام الغبرة دي.. حتي لو الظروف مواتية عقلي دلوقتي اتطور بشكل يخليه يسأل الف سؤال ويشك الف شك..عقلي أكبر حائل يبعدني عن الاحساس بحاجات كتير جميلة.. منها الاحساس ده.. للأسف مش هاقدر أكسره أو اهدمه .. لكن محاولاتي لا تكل ولا تمل لمهادنته مرة واقناعه مرة وكبحه مرة ونسيانه مرة.. باحاول والله قبل ما يقضي علي وعلي كل احساس جميل يديني امل.. لو شبكتك بتلقط وتستقبل شئ من الاحساس ده فتقبل تهانئى بالتاكيد..لسه فيه ثانيا وثالثا .. راجع لك تاني

smraa alnil said...

ضياء

النكتة دي فكرتني بقصة نوعا ما مشابهه
هقولها بطريقتي

كان في شاب تايه مش عارف طريقه فين
بيدور علي ايد حنينة تخرجه من اللي هو فيه

حس انه مهما نادي علي كل الناس مش ي حد هيسمعه

لحدماهو ماشي لاقي باب اتفتح وام بتطرد طفلها برة
الولد قعد يخبط علي الباب ويوقلها افتحيلي يا اماه

والام لا تجيب

فضل علي هذا الحال والولد يبكي والشاب متابع لهذا الموقف

الولد يبكي بحرقة ويستنجد بامه عشان تفتحله
والولد ينادي ويوقولها
سامحيني يااماه لن افعل ذلك مرة اخري سامحيني

والشاب يلاقي الباب اتفتح ويجد الام تاخذ ابنها في حضنها

والولد يبكي

وتقوله يا ولدي ما اجبرني علي ذلك سوي فعلتك وقد فتحتلك عندمت وعدتني بعد فعل ذل مرة اخري واغلقت الباب ورائها

الشاب دمعته نزلت وصرخ وقال وجدته

لقيت طريقي

ساقرع علي بابه ليسمعني
فهو ارحم من الام علي اوليدها
فما بال الام سامحت وليدها فالله غفور رحيم والله لاقرعن بابه
ولا امل ولا اياس حتي انال رضا ومغفرة الله


اللي عايزة اوصله ليك يا ضيائ ان طول ما احنا بنحاول مع ربنا
صدقني احوالنا هترتاح
بس نبل نبكي علي الماضي

Diyaa' said...

الأخت ...ناثنج تو لووز ..
وعليكي السلام ورحمة الله وبركاته
أولاً ..بشكرك لإطرائك ورأيك في البلوج وأنا عن نفسي عارف ليه ..لأن التصميم بتاعه علي بساطته بس عبقري..واللي عملته إنسانة رقيقة جداً وجميلة جداً فطبيعي إن البلوج يعجبك...
وبإذن الله متكونش أخر مرة
عارفة بقي أعتقد يعني إن القلب اللي هو كناية عن التفكير العاطفي ..مش هو بس سبب البعد عن ربنا...لكن النشأة وسط بيئة مش مشجعة علي كده بتخلي الإنسان أناني وضعيف..مش بيلجأ إلا للحل السهل اللي مش محتاج منه تفكير ..العقل عشان يدرك وجود ربنا ويقتنع بيه اقتناع تام محتاج حد يوصله أو بيئة تشجعه علي إنه يوصل بتفكيره للنقطة دي وميتعبش
والحديث اللي ذكرتيه بيثبت إن الإنسان فعلاً ضعيف ومعندوش بعد نظر ...يعني أنا متأكد إن في ناس كتير أوي سمعت الحديث ولو بالصدفة أو تعرفه ..وأنا منهم ..لكن اللي حصل في الواقع يا إما نسيان يا إما نية مبتكملش لمرحلة الفعل

وأنا سعيد بسعادتك وبالحاجات الجميلة اللي صحيت فيكي ..
وإن شاء الله أكون فعلاً سعيد طول حياتي ..بس مش السعادة اللي بيحلم بيها أي واحد أناني
تحياتك وصلت ونورتي المدونة


أوما ..ما عاش اللي يلخبطك ...إنا بس حاسس إنك حسيتي الموضوع أوي ..وعشان قريتي الاتنين ورا بعض فتقدري تقولي الاحساس اللي حسيتيه هنا معرفتيش تعبري عنه .
بس أنا حسيت إنك مبسوطة وأتمني إن فعلاً يكون الأمل اللي وصلك من البوست سبب في إني أشوفك في أحسن حال دايماً...وعلي الأقل إن انا ما استفدتش باللي قلته فيكفي عندي وجود الأمل جواكي
وأتمني أبقي فعلاً البيوتيفول مايند اللي روان شافته ..ولسه بدري لأن مش دايماً الأعمال بالنيات .
متشكر ليكي أوي يا أوما ..ونورتي البلوج

Diyaa' said...

Sorsara
مش حابب أنطق أسمك بالعربي أو أكتبه ..
الأول منورة المدونة ...ثانياً ده ذوقك هو اللي جميل ..
وكويس إن مفيش كلكعة ولا رهبة ..أنا مش بكتب كتب ..مجرد تعبير بسيط عن حاجات جوايا..وأتمني فعلاً تكون مؤثرة وبتوصل للقلب ..
وربنا يوفقك إنتي كمان ويهدي الناس كلها ويستجيب لدعائك
تحياتك وصلت



نبض إسكندرية ..جميلة أوي ضياء الشمس ..بس أحب أقولك حاجة ..معلش أنتي جميلة وكلامك جميل ..بس خلاص مبقاش في ضياء شمس ولا ضياء نجم حتي ...عادي يعني ..الوحدة + عدم وجود فرصة لعمل شئ إيجابي ..+ الضعف اللي مزروع جوايا ولسه بدري علي ما يطلع ..
بس عموماً ..أنا بشكرك بحرارة علي التعليق عموماً وعلي اللقب الجميل ده تحديداً ..
وادعيلي أعرف الجأ لربنا ومضعفش ..

والروعة روعة فهمك للتوبيك وربنا يسهل ويبقي في المزيد ..أدعيلنا إنتي بس ..ربنا يهديني ويهدي المسلمين جميعاً ..
وكل نكتة وأنتي بتضحكي :))
ودي أخرة حرية المرأة ...( مشاغبة دي مش أكتر )
تحياتي





سمرا...منورة يا أنووج ..الواحد اطمن عليكي قبل أي حاجة..
قصتك جميلة ولو إنك حكيتيها وأنتي مستعجلة ..بس المعني وصلني ..والمسألة مش بس في البكاء علي الماضي ..المسألة في الضعف اللي اتربينا عليه ..وعايشين بيه وفيه ..مش سهل نخلص منه ..ربنا يكون في عون كل اللي عايز يلجأله ..ويخلصنا من نفوسنا الهشة دي ويدينا بدالها نفوس أقوي ..
بشكرك أوي يا أنووج لزيارتك وتعليقك ..ويا رب منبطلش محاولة ..ونكمل للآخر ..
منورة وتحياتي

youssef said...

تحياتي ثانية .. اتابع..
ثانيا .. ختامك كان متشائم يا ضياء قلت ان طعم الحصرم هيفضل في الحالين .. و ده بيخليني اقول رايي ان البابين يمكن صعب نفصلهم علشان نعيش .. يمكن لجوءنا للباب الذي لا يغلق امر عظيم لكن حتي هو يمكن لا يواسينا تمامالو اتقفل باب الاحتمالات والذكريات والامال والاخرين .. وده معني كلامك ان الطعم المر باقي.. ويمكن توافقني ان البابين مرتبطين تماما .. الباب الالهي يعطينا وسائل ونصائح لا مجال لحصرها لكي نتلاقي و نتوحد .. لكي نجد احلامنا وامالنا .. لكي نسيطر علي مشاعرنا و انفعالاتنا لا لنقتلها..طرق الباب الالهي لا يعني ان نترك قرع الابواب الاخري لكنه يعني في صميمه ان نهدا ونسيطر علي الغضب و نطرق بالهدوء و الحكمة والامل .. حتي لو الامر غير متوقف عليك لا تياس من اصحاب الابواب .. لكن ايضا تقبل ان الاحتمالات احتمالات تحتمل وجهين .. لكن لو كلها محض احتمالات ولم تتاكد من شئ بعد فموقفك حرج جدا صعب اقول فيه حاجة .. وانا كنت عاوز اوصل لثالثا
لا يا ضياء .. لما تكتب عن نفسك مش بتبقي في شرنقة مش عارف تخرج منها .. بالعكس .. انت كده بتخرج وبتتحرك وبتلاقي غيرك وبتقابله ويقابلك.. و من هنا نوصل لنقط مشتركة .. و مش ممكن نحكي علي مشاكل كبيرة ونلاقي بعض فيها قبل ما يكون عندنا استعداد نسمع ونفهم بعض اصلا.. واول الطريق انك تتكلم عن نفسك وعن احساسك .. وده اللي هيوصلنا للاحساس الاكبر والامل المشترك .. وصدقني الانسان كبير قوي زيه زي القضايا ذات الاسماء الرنانة الضخمة ماهو اللي صنعها انسان برضه.. طولت عليك وتعبت من نفسي حتي .. لك تحياتي

Diyaa' said...

تحذير هام للسادة المهتمين ...الرد ده طويل أوي ..وممكن يكون ممل لبعضكم ومتعب للبعض ومحتاج تفكير في كل الأحوال
قد أعذر من أنذر



يوسف ...إزيك انت يا جمييل ..
أنا مبسوط أوي أوي بتعليقك اللي علي جزئين ..وكل يوم مساحة اعجابي بتفكيرك بتتضاعف ..ويا رب إلي ما لا نهاية بإذن الله . وخايف أضيفك وتنضم لباقي الناس اللي عرفتهم واحترمتهم وفجأة تلاشوا أصلاً ..أيا كان السبب
المهم ..بدأت بأجمل الكلام ..كلام ربنا ..اللي انا نفسي شخصياً ألاقي حد يكون العامل المشترك اللي ما بيني وبينه إنه بني آدم عادي مش متزمت وفي نفس الوقت يكون عنده فضول واهتمام بفهم الكلام ده وتذكره في أي وقت وكل وقت ..بس كالعادة تقدر تقول إن ده من الأحلام المدفونة .

موافقك إن الكلام مش كفاية عشان توصل ..محتاج إرادة من حديد ..أنا كلامنجي كبير أوي ..يمكن مش بتكلم بشياكة ولا بأسلوب منمق يسحر أي حد ولا حتي يسحرني ..بس بتكلم كتير أوي وبفكر كتير وبوصل ..لكن تيجي علي التنفيذ ..ويبدأ الكسل والنسيان والضعف والغباء ...إلخ
نخش علي أولاً ...
أنا معاك إنه صعب جداً الوصول ليه لوحدك ..لكن متهيألي لو عرفت إنسانة زي روان أو إنسان زيها ..اللي أعرفها إن أخوها لسه موجود ومتأكد إنه ميقلش جمالاً عنها ..المهم سيبك من استطراداتي ..اللي يعرف الناس دي الموضوع بالنسبة له هيكون أسهل أوي ..مش بسيط بس هيكون أهون من اللي عايش في الدنيا لوحده ومتخيل إنه مش لوحده ..عايش في عالم معتقد إنه مثالي ..أو بيبعد نفسه عن التفكير في جدوي حياته أصلاً...عشان كده أنا مخنوق من نفسي أوي ..إزاي ربنا اداني نعمة زي دي ولو لفترة صغيرة ..وإزاي أنا تقريباً لسه زي ما أنا ..بالعكس يمكن بقيت أضعف ..
وفاهم أي احساس بتتكلم عليه ..هقولك علي جزء منه ...وأنا بتمشي أمبارح ..بليل كده قبل الفجر ..بصيت للسما وأنا سرحان ولقيتني بحبها أوي ..عارف ..نفسي أطلع أنام فوق منامش وسط أربع حيطان ..المهم رجعت للوعي بقي وبصيت تاني ..لقيت إن حاجة زي كده مجاتش صدفة ..وتبصلها تاني ..جميلة أوي ..بسيطة وجميلة ومستحيل تتخيل اتعملت إزاي ..إن محسيتش بتقدير وحب لخالق السما دي ..ولو لحظة قبل ما الشيطان والدنيا ياخدوك ..تبقي ميت ..والحمد لله لسه فيا الرمق والاحساس ده فضل فيا لفترة مقدرش أقدرها بس لسه كل ما أفتكره أرتاح ...الشعور مضاعش لكنه مدفون ومش سهل تكتشفه بسهولة ..المظاهر انا كمان تقريباً بعملها ..عليا 3 أيام صلاة لما أخلصها وبعد كده هبقي شبه مضبوط في المظهر ..لو كذبت علي نفسي وقلت لكل الناس إني كويس ومعترضتش علي أي تصرف حسيته غلط وعشت زي الموتي الأحياء اللي عايش وسطها ..ساعتها هيبقي المظهر مثالي ..أخرج وأتفسح وروح شوبينج وأسمع نميمة وشوف أخر كليب واتفرج علي أوراك وصدور الحرية الشخصية واحبس بجوانين حشيش وخطط لمستقبل مزيف وأمشي زي ما اللي حواليك عايزين وهتبقي المظاهر بالنسبة لك مثالية .
ليا رجاء عندك...بلاش تقول الأيام الغبرة أو السودا ..ساعات بتنرفز وبقولها ..لكن الأيام متهيألي ينطبق عليها حديث قدسي بينهي عن سب الزمن ..وحتي لو مش أكيد فمش مهم أوي سب الزمن يعني وأنا متأكد إن نيتك خير

نيجي لعقلك ..مش عقلك ولا عقلي هو الحائل الأكبر ..الحائل هو النشأة اللي اتعودنا فيها علي الغلط والاستسهال والاستسلام للمتحدي الأوحد لربنا ..ولجنوده في الأرض اللي متنكرين في زي البشر..العقل نعمة من ربنا ..زيها زي النار وزي الديناميت ..استخدامها هو اللي بيفرق...يمكن جزء منه هو اللي مسئول عن سكتنا اللي ماشيين فيها دي .سكة اللي بيروح ميرجعش ..بس مش المعجزة اللي أنعم علينا بيها ربنا هيا السبب ...سوء استخدامنا ليها وسوء تهيئتنا ليها قبل الاستخدام ...عارف لما يبقي أغلب المفاهيم المهمة في الحياة ما مريتش بيها في مرحلة الطفولة ..المفاهيم اللي رسمهالك رب الكون كله رغم إن المرحلة دي مرحلة تعليم ..مرحلة تحفر فيها علي الحجر وإنت مطمن ...تيجي لوقت الشباب وقت الشهوات والضعف والنسيان والكسل ..صعب أوي توصل لنص المطلوب
هحاول معاك أكسره وأهدمه ...لو سمحتلي بشرف المحاولة ...في حد اسمه دكتور مصطفي محمود ..وفي عالم فيزيائي سوري مش متذكر اسمه ...الاتنين محتفظ ليهم بكتابات مقريتهاش كلها ولا حتي ربعها ..بس بصيت بصة سريعة ومنطق الكلام مقنع أو علي الأقل هيساعدك في الوصول للحقيقة ويثبتها جواك أكتر ..هبقي أبعتهملك علي الميل ويا ريت تسبقني وتقراهم لحد ما أجيب جعاز أو ألاقي طريقة تانية أقراهم علي رواقة ..وبإذن الله محاولاتك هتجيب نتيجة ..وبإذن الله الاحساس الجميل والأمل هيفضلوا موجودين ..وتهنئتك وصلت وعقبالك...بس للأسف شبكتي ضعيفة ...

فاصل ...حمد الله علي السلامة :))

نيجي لثانياً.. ختامي مش متشائم ..ده منطقي...تخيل مثلاً ..إني بقيت عالم كبير أو أي حاجة عليها القيمة في الزمن ده ..هل هنسي إنسان أو إنسانة كانوا قريبين مني في فترة بيسموها الشباب ؟! أكيد مش هنسي والمرارة هتفضل موجودة ومستبعدش بتكوين شخصيتي إني مهما بعدت هحاول أرجع في أي وقت وبأي شكل ..إلا البنات لسبب إنهم هيتجوزوا وهيرتاحوا من وجع دماغ معرفتي :)
البابين فعلاً مستحيل يتفصلوا ..ربنا خلقنا عشان نتعارف ونتآلف ونتعاون في تعمير الأرض ونكون لبعض زي أعضاء الجسد الواحد ..منتخلاش عن بعض ..بس طبعاً دي مثالية مستنكرة الزمن ده ومنقدرش نعلنها علي الملأ عشان ميكونش جزاتنا السخرية والتثبيط من إرادتنا ..
يعني الناس مش اتخلقت عشان كل واحد يفوز بنصيب ضئيل من كعكة الدنيا ويوهم نفسه بإنه ال
Big Winner
وبعدين يفوق متأخر وممكن ميفوقش..في رأيي إننا اتخلقنا عشان نفوق بعض ونتحد أدام العدو الأوحد لينا ..والتعليمات اللي في القرآن وفي صحيح الكتب السماوية ما هي إلا مصابيح علي الطريق لو حافظنا عليها وفهمناها وفهمنا جدواها ..مبعدناش عنها ..هنوصل ..بس في نفس الوقت عايزين حد جنبنا علي نفس الخط يشجعنا .حد ملموس وزينا ..بس تجيبه منين في زمن عز فيه حتي الصديق ؟!0
بس تعرف ..أحياناً كتير بتمني لو ارتاح وأوصل بسرعة لأهداف بسيطة أنا بحلم بيها ..وبعد كده أعيش مع نفسي ..ومع الوقت هوصل للباب ده ومش هخرج منه تاني ..مش مجرد يأس من أصحاب الأبواب ..لأ كمان مفيش طاقة ولا رغبة في التجربة من جديد ...ابدأ ادي احترام وثقة وأقرب وفي الآخر لا شئ ..أنا مش بحب القمار ومش بحب أحاول كتير في حاجة مش معتمدة علي إرادتي وحدها ..وربنا يديني الصبر والقدرة علي السيطرة علي نفسي ..
الاحتمالات كمان ...مش بيسمحولك إنك تعرف وجوهها ..عارف..قرارات باردة زي نصل السكين اللي بيدبح في عز التلج..ومن غير ليه ..محدش فاضيلك ..وبيني وبينك أنا متأكد بس مش عايز أخرج زي ما دخلت ..عايز أعمل حاجة وربنا يقدم اللي فيه الخير ...

وصلت معاك لثالثاً ...وموافقك عليها ..بس لأمتي هفضل أخرج ..تعرف يا يوسف ..لو فضلت أفضفض في البلوج ده ..مش قدامي أقل من سنتين 3...هكتب في سنة وأسرح في سنتين ..لأن ظهر عليا أعراض تتلخص في إني لو بكتب لوحدي مش بكلم حد أونلاين ..ببص وأتنح في الشاشة وأفوق وأنا عامل حاجات غريبة ..أو مش عامل حاجة خالص ومش فاكر حتي كنت بفكر في إيه ..عندي تفسير بس مش مهم أوي ..الموضوع وما فيه إني بستخدم الكمبيوتر لغرض شخصي ومش مهم الوقت اللي هيضيع
بس المهم إني مليت من نفسي..وحاسس إني بتعب البعض من اللي بيعلقوا .. عدد مش كبير من الناس أنا سعيد بوجودهم وتعليقاتهم واهتمامهم ولو نص ساعة في الأسبوع ..بس في الآخر عارف إن كل ده ليه أخر مقدرش أمنعه ..فمش عايز أتواصل مع ناس مفترض إنهم ليهم دنيتهم الخاصة ..ولو علي الفضفضة فعندي الورق أكتب فيه لحد ما يزهق مني والحمد لله مستورة وأقدر أشتري كراريس تملي أوضة
بس بيني وبينك لو وصلت لفكرتك ..إني أوصل للراحة والسلام مع نفسي ومع ناس تكون قريبة مني في الاحساس والتفكير ..أكيد وقتها هعرف أتكلم عن الهم العام اللي مترتب علي الهموم الخاصة بشكل غير مباشر غالباً ومباشر أحياناً ..ووقتها يمكن أعرف أعمل جزء من كل الدور اللي اتخلقت عشانه ..وأدخل قبري وأنا شبه مطمئن ..واعتمد بقي علي رحمة ربنا
وأتمني ده يحصل ...إزاي وامتي .الله أعلم
انت مطولتش عليا بتاتاً يا يوسف ..أنا سهران الليلة دي مخصوص عشان أرد عليك ..وسلامتك من التعب ..
هروح أصلي بقي ..تحياتك وصلت
سلام عليكم وشكراً لتعليقك المزدوج :))

Diyaa' said...

David ...
i believe that...the best gift ever that you would give to someonr is the pure intention..i can see that in yout posts & in ur comments...but you know...ur dream is not close to happen...but if it happened...i'll invite you to have a week in the new & free egypt...
wish to live till the 3rd world get out of its prison
thanks for passing by...

david santos said...

Diyaa I adored to live in the mother of the world, Egipto, nor that he was alone one days. I adore the Egipto all and the Arab people

رينـــــــــــا said...

ياااااااااااااا
حمد الله على السلامه
:) :) :)

Diyaa' said...

david....ok thanx...
72k 3la 2omy eny rdyt ..msh fahm mnk 7aga :(


reeena
allah yslmk

youssef said...
This comment has been removed by the author.
youssef said...
This comment has been removed by the author.
youssef said...

يااااااااااااااااه .. يا جدع .. ايوه عارف انك هتختلف وتوافق وتقنع وتناقش .. لكن ما تخيلتش بصراحة القصيدة دي كلها .. لا الكلام معاك ماينفعش خالص علي النت ده محتاج مواجهة شخصية.. المهم دلوقتي اني كالعادة موافقك علي حاجات ومش موافقك في حاجات .. وفيه برده حاجات في كلامي فهمتها انت بطريقة تانية .. لكن صدقني معنديش وقت ابدا دلوقتي للكلام ماانت نفسك كنت قاعد و متكيف مخصوص عشان ترد علي زي ما قلت .. مش ممكن اتابعك للاسف قبل يوم الاربع علي الاقل.. هتفكرني دلوقتي من اللي بيتلاشوا .. لكن معلش لما ارجع هتعرف اني لسه موجود..وهتروح مني فين.. والسلام
ملحوظة .. انا اللي حذفت تعليقين .. معلش اخطاء مطبعية وفنية..

youssef said...

ابعد التحية .. اتأخرت شوية بس معلش .. احنا بنتقابل في أول حاجة انت أشرت لها صعب توصل للاحساس ده لوحدك .. اقول بس ان غيرك مش يكون دوره انه يساعدك للوصول له بشكل عملي .. لكن لما تشوف و تحس في علاقاتك نفسها و في ارتباطك بالآخرين وحدة الروح .. وحدة الكيان و الشعور .. اللي هي نابعة في النهاية من أصل واحد هتحس فعلا بالجمال و هتؤمن أو يزيد ايمانك .. و نقرب في الاحساس اللي بقول عليه و انت اديت له مثال السما .. و تظاهرنا بندور علي معني ليه .. نيجي بقي للعقل و مشكلته الأزلية يا ضياء .. هو مقتنع و موقن مفيش كلام بالقوة الأبدية اللي بتحرك الكون لكن مشكلته و مشكلة الدنيا مش بس العبد لله الغلبان انه هييجي كده كده يوصل لاسئلة مش ممكن تتجاوب .. مثلا مين اللي غلط فعلا و مين اللي صح و ازاي ده بقي كده وده بقي كده .. ودورنا فين بالظبط في اللعبة دي امتي نتحرك و نقرر فعلا امتي نستحق .. ثواب او عقاب .. غير بقي ليه ؟.. ده مخدش ده و ده يحصل له كده مش كان ده اولي بمساعدة الظروف و ده أولي انها تكسره .. و خد من ده كتير .. مفيش اجابة يا ضياء تقنع العقل في الحاجات دي عشان كده قلت لك حله نهادنه أو ننساه و نكبحه .. و اهم حاجة لو شبكاتنا قوية لقطت الاحساس اللي هيغطي عليه و علي حيرته و زي ما اتفقنا محتاجين بشر معانا عشان نوصل .. فهمتني .. أقصد ان مشكلته مش في اليقين من عدمه لكن في أسئلة أزلية محدش يعرف حل ليها .. وصدقني مستحيل برضه تهدم أو تمسح الأسئلة دي .. بعد كده بتقول انك مش بتحب المقامرة علي حاجة مش نتوقفة عليك وحدك .. التعليق هنا اعادة لكلامك وكلامي .. فاهم ان ممكن الرغبة و الطاقة تضعف لكن رد انت هل فيه طعم أو معني لحياتك كده؟؟.. و بعدين انت جربت و كنت متاكد تماما في يوم من الايام .. امل انك تلاقي شئ أكيد يفضل موجود .. اصل لو اتخليت عن الامل ده وقلت كفاية .. هيكون ايه معني الحياة ؟؟.. لكن اتحكم في نفسك و حكم عقلك برضه شوية عشان متحصلش صدمات كبيرة .. ورغم كل كلامي افهم ازاي ممكن الواحد يوصل لحالة ياس و ملل المهم يخليها مؤقتة .. عموما كده قربنا الصور شوية و انام عشان الساعة داخلة علي تلاتة .. أه بالنسبة للزمن .. يا جدع لما نقول زمن اخبر ومنيل نقصد الظروف المهببة اللي فيه الفساد و الغش و الخداع و ال.... يعني الزمن مضاف و الحاجات دي مضاف اليه مش بنوصف الزمن نفسه .. و الزمن الحلو هو زمن الخيال و الحلم و الحب مش الايام أو الدهر اللي حلوين أو وحشين... متصحصح يا عم ضيا ... و السلام

Diyaa' said...

الحمد لله إنك مش تلاشيت

وأكيد يعني إنت مش هتروح بعيد ..بإذن الله يعني أنا واثق فيك

نيجي للكومينت التاني بقي

التحية وصلت ...مش مهم التأخير المهم وصولك ..

فهمت إن دور الناس مش المساعدة عملياً ..بس مجرد وجود القريبين منك اللي كنت حاطط عليهم أمال وأحلام كبيرة أو علي الأقل مديهم كل أحترامك..أكيد هيساعد ولو بشكل غير مباشر

العقل ...أنا هقولك أخر الأسئلة اللي فعلاً هيتعبك ..هو ربنا أصله إيه صح ؟ هرد عليك وأقولك ..لو إنت عرفت ربنا أصله إيه وعرفت كل حاجة وإنت لسه معديتش الاختبار ومنجحتش في المهمة المطلوبة منك ..يبقي طبيعي إنك كبني أدم نفسه أمارة بالسوء هتتعامل بتعالي أكتر باعتبار إن مفيش حاجة مستخبية عليك...لو عرفت إجابة السؤال حرفياً احتمال كبير اجلالك لربنا وإيمانك بيه يقل خصوصاً إن الغموض أحياناً بيحافظ علي فرق المكانة بين الانسان والانسان ..فما بالك بالانسان والخالق..ده اللي اديته لعقلي ومقتنع بيه

الغلط والصح متهيألي واضحين بس تايهين في زحمة الحياة...ودورك في اللعبة برضه هتلاقيه في القرآن ..تعمير الأرض سواء بالذرية الصالحة أو العمل الصالح ..وكمان عبادة ربنا أولاً وأخيراً ..الأجابات موجودة بس الانشغال بيخليني ويخليك مش عارفين إيه اللي ناقص أو مطلوب ...وبالنسبة لتصاريف القدر ..هقولك علي سؤال مريت بيه مرتين ..المرة الأولي بنت كانت بتحبني وكانت من الهاي كلاس بس يتيمة وتايهة ...وعايشة عيشة كلها انبساط مزيف ...ومع الوقت بطلت تدخين وبدأت تحافظ علي نعمة ربنا اللي ادهالها اللي هيا جمالها الخارجي ..وتنمي نعمته الداخلية اللي هيا جمالها الداخلي ..ووصلت لمرحلة بدأت انا نفسي أقتنع إنها بتحبني أكتر من أي حد بس فرق المادة خوفني من الارتباط وزعلت وسافرت ..وبعدين رجعت وجايبالي هدية وعملت حادثة ...لو تخيلت معايا الصدمة...وإزاي بعد ما تعبت كل ده مش تستمتع بالدنيا من موقف إنها وصلت لمرحلة الفهم الصحيح ليها ..والتطبيق القريب من المطلوب فعلاً منها ..

لكن تخيل إنت لو هيا لسه عايشة ولأي صدمة كبيرة في حياتها اتغيرت ورجعت زي الأول واسوأ...تخيل لو هتتعب جسدياً أو نفسياً لأي سبب ..مش يمكن ربنا عايزها تفضل محتفظة باحساسها ليا ...عارف ..بعد تفكير كتير ارتحت وكمان شفتها في المنام قبل ما أعرف روان بيومين ..والمنام علي قصره وندرته في حياتي بس كان واضح ..أنا دلوقتي بفتكر نهي وأدعيلها دعاء سريع ..اه ناوي أعمل حاجة ليها لو ربنا اداني المقدرة والعمر ...بس أنا متأكد بنسبة كبيرة أنها من اللي رحمة ربنا شملتهم ..ومتأكد بإذن الله إنها مصيرها جميل زي ما كانت جميلة

جيت لروان ..البنت بقي عندها أمل في الشفاء رغم الألم اللي كانت فيه ..وفي نفس الوقت أخدت أمل منها في الارتباط أول ما أخلص دراسة وهيا كمان ...وقربت أوي من ربنا ..وشائت ارادة ربنا برحيلها بعد كل ده ..تفتكر ليه..مش رحمة ليها الأول من تعب الدنيا ...ربنا أراد يقولها كفاية كده أنتي نجحتي ..احتمالات كتيرة أوي واحنا برضه لسه بشر ومش هنستوعب إرادة اللي بيدير الكون ده مع العلم بالغيب ..وده الفرق اللي ناقصنا ..ولازم أنا وأنت وأي حد محتار يخلي إيمانه بحكمة ربنا هو الفرامل اللي توقفه عن التفكير...والأسئلة بكده مش هتتلغي ..بس هتاخد مسكنات ليها لحد يوم الحساب ..اللي لو حسبته حسابياً هتلاقيه مش بعيد ....عمرنا مهما طال فهو يوم من أيام ربنا ..أو أقل ..فعادي بقي الصبر هو الحل والانشغال بمهتمنا الأهم في الكون ده هو المسكن للأسئلة اللي مش عارفين نجاوب عليها أو ننساها

مش عارف بقي موضوع معني الحياة ده ..لأني لما بصدق بصدق أوي ..ولما بقرب بقرب أوي برضه مبحبش التجزئة ومحبش الخوف والحذر ..وأقول لنفسي يا واد انت لسه بدري علي ما تصدق إنكم اصحاب علي طول أو أخوات أو حبايب أو أيا كان المسمي ..مش هيفرقنا إلا الموت والكلام القديم ده ..فعارف ..لازم أدي لنفسي راحة وأشوف متعة الحياة في مساعدة اللي يحتاج مساعدة وأولهم نفسي بإني أحاول رغم ضعفها أقربها من ربنا وأهو بالمرة أخلص الكلية بنت ستين في تسعين دي عشان بعدها بقي أبقي حر ومش رابطني حاجة ..ويااه لو خدت اعفا من الجيش عشان نظري ال -8 ده يبقي زي الفل ..

لسه بدري عموماً وفعلاً الصورة قربت وتصبح علي خير ...وبالنسبة للزمن فهمت بس حاول برضه تخفف من تقل المصطلح ..يعني تقول زمن مقلوب ...زمن القيم الغبرا...فاهمني ؟!

يلا بقي هستودعكم الله ومبسوط بمتابعتك ليا.. .

نورتني العادة

تصبح علي خير