هو اللي راح مبيرجعش ؟!

مفيش سبب محدد أكتب عنك النهارده يا محمد ..بس الواحد ميضمنش يعيش لحد أمتي
في يوم زي ده من سنة و شهرين شفتك لأول مرة
ضحكتك بصوت عالي و ذوقك في التعامل خلوني أجي السايبر أكتر من مرة كزبون رغم أنه _حتي و انا شغال فيه دلوقتي _ سايبر نص لبة علي رأيك .
عوضتني في الفترة دي عن حاجات كتير مكنتش لاقيها ..صراحتك كصديق و كأخ..خبرتك _رغم صغر سنك بالنسبة لي _ في حاجات أنا مكنتش بعتبرها مهمة ..و تطوعك بخدمتي في حاجات كنت بتكسف فيها أوي ..وكمان الصورة الوردية اللي رسمتها عني للناس والكلام اللي مكنتش أتخيل أن حد يقوله عني لولاك أنت و طبعاً بمشيئة ربنا .
كنت جاي منقول لحي جديد ..خبرتي عنه قبل كده أنه مش مكان أعيش فيه ومكنتش بحب أمشي فيه أصلاً
وفعلاً لحد دلوقتي أغلب الناس هنا زي منتا كنت بتقول بالضبط ...غجر بس اتعودت و ادينا مستحملين ..
أنت من أهم أسباب أني اشتغلت في السايبر اللي أنا بكتب منه دلوقتي ده _بعد ما كنت خالي شغل ومش طايق الدراسة_ ومن أهم اسباب أني بستحمل أي حاجة فيه عشان كلامك معايا وتشجيعك ليا ولحد دلوقتي كلامك هو الدافع الرئيسي لأستمراري هنا .
تعرف ..أخويا اللي هو عايش معايا في البيت مكانش بيلجألي زي ما كنت بتيجي أنت ومكانش صريح معايا بنفس صراحتك معايا

وحشاني كل حاجة كنا بنعملها ..واحشني سباقات العربيات اللي كنت بتكسبني فيها بكل بساطة ..ماتشات الكورة اللي أكون كاسبك فيها 9 ولا 10 و تقول للناس أن أنت الفرقة الكسبانة ..حتي تصرفاتك اللي كنت بنتقدها وحشاني أوي ..

تعرف ؟..الكلام ده كان نفسي أقوله ليك قبل ما تروح أسكندرية ..اقولك أنا متشكر علي كل اللي عملته معايا و أقولك انك كنت أخ و صديق ملوش زي مهما عملت وغلطت في حقي ..كنت عايز أعتذرلك عن كام حاجة كده ..

مش هنسي تعليقك لما شفتني وأنا بشوف صورة راوان ..بتقولي أنت ناوي تتجوز ملاك..ساعتها أنا ضحكت و شلتها ومكنتش متخيل أنك فعلاً صح و أنها أقرب للملائكية ..بقالها 16 يوم معرفش عنها حاجة يا محمد ..لو تعرف أنت تعرفلي عنها حاجة و تيجيلي في المنام زي ما جيت قبل كده ..

لحد دلوقتي مش متخيل أزاي سبتك تروح اسكندرية من غير ما أقولك لأ ...عارف أنك مجنون وهتنزل البحر ..وعارف أنك مبتعرفش تعوم..بس وجود صاحبك معاك خلاني أأجل المناقشة يومها لأني كنت تعبان ...ومكملتش المناقشة تاني ..قضاء ربنا ولا أعتراض عليه..نفسي تكون شايف الكلام ده ..نفسي تعرف أني مقصر في حقك و مش بدعيلك كتير ..بس والله أول ما هقدر هعمل حاجة تعوض جزء بسيط من جمايلك عليا ..بإذن الله .

الناس اللي كانت بتعيط يومها و اليومين اللي بعدها كانوا بيمثلوا أو كان انفعال مؤقت..بس والله وربنا شاهد .. انا رغم أني كنت بهديهم وماسك نفسي قدامهم بس لحد دلوقتي فاكرك و بدعيلك بالرحمة و المغفرة ..نفسي أشوفك تاني في حلم أطمن أنك عرفت الكلام اللي أنا قلته بعد فوات الأوان ..اطمن عليك و أنت عند ربنا ..

كنت فاكرك أكتر واحد بيكره مصر عشان انتقادك اللي زاد عن انتقادي ليها ..بس يوم ماتش مصر وليبيا في كاس الأمم ..لما ميدو جاب الجون ..صوتك العالي أوي و عروقك اللي كانت هتنفجر و أنت الوحيد اللي فضلت فرحان اكتر من دقيقة ..كنت براقبك و انا مبسوط ..تأكدت ان العيوب اللي بتبان منك دي مجرد قناع مزيف فرضه عليك المجتمع

عموماً انت انسان طيب وجميل أوي يا محمد و قناعك المزيف مخدعنيش و بإذن الله ربنا هيسامحك عليه ..بإذن الله اشوفك تاني في الجنة

ومعتقدش أن في صاحب هيعوضني عنك ..ومعتقدش أن في حاجة تخليني أعرف أرد علي البنت اللي بتحبك وسؤالها ليا يومها ..ليه سبتوا يروح اسكندرية ..كان هيسمع كلامك يا ضياء ...لحد دلوقتي السؤال لسه في عينيها ..مش مستوعبة مسألة القضاء و القدر ..بس مين قال أني كان يصح أسيبك و أمشي زعلان ومنكملش كلامنا

ربنا يغفرلك يا محمد و يجمعك بكل اللي بتحبهم و يحبوك في الجنة ..حتي محمد عبد الوهاب اللي كنت فخور بتشابه اسمكم مع بعض طلع عند ربنا ..كان نفسك تسلم عليه وتاخده بالحضن عشان رافع راسك وسطينا

سلمت عليه يا محمد ؟!