Thursday, May 3

Photo Sharing and Video Hosting at Photobucket
الفترة دي وبعد الأنيميا الاجتماعية اللي اتحطيت فيها
ولأني مش متعود علي كده أو لأني اتصدمت لأني صبرت علي الناس الغلط
ولأن رصيد الاحتمال النفسي لأي حد وأي حاجة خلص ..فمكنتش ناوي أكتب خالص ولو بعد شهر
بس صديقة عزيزة في عالم التدوين عرفت إنها مسافرة ومش عارفة هترجع امتي
وكمان مش عارف هيكون عندها مقدرة هناك تدخل علي البلوج ولا لأ
فقلت أرد علي التاج اللي بعتتهولي عشان تعرف أد إيه هيا بني أدمة طيبة وجميلة
وأكيد كل حد بيحس وبيفهم هيفتكرها لحد ما ترجع بإذن الله
عشانك بس يا ميس حاسا هرد علي التاج وأتمني تكوني بخير
_________________________
*
*
اسم مدونتك؟
هو الأسم مكتوب بخط صغير ولا إيه ..اللي عمل التاج ده مكانش نايم كويس
أو يمكن واكل فول ..ده الأسم فوق واضح في صفحة الانترنت اكسبلورار
مش هقوله بقي رخامة
لماذا اخترته..وماهي نيتك من وراء اختياره؟
أيوه هي دي الأسئلة اللي يترد عليها
بص يا سيدي امسك ماج النيسكافيه وربع علي الكنبة
ايوه هي دي اللي علي يمين باب البلوج وأنت داخل
بص يا سيدي أو يا ستي أيا كان جنس اللي حط السؤال أو اللي بيقراه
الاسم مش أنا اللي اخترته
روان اللي اختارته ..فضولك بينقح وهتقول روان مين
؟!
رغم إن الناس اللي بتيجي هنا عددها ميزيدش عن عشرة وأعتقد إن كله عارف بس هقول من تاني
بس خلاص
وقبل ما ربنا يرحمها من غباء وأنانية العالم الرائع اللي عايشينه ده
كانت عملتلي البلوج ده ..كان عندي أكاونت بس هيا شجعتني علي إني أعمله
والنية أو المعني من ورا الأسم ده ..إن في كل واحد فينا الخير والشر والكلام القديم ده
وبما إن نعمة ربنا هيا العقل فأهم حاجة الواحد بيتمناها لنفسه
ده بافتراض إنه بيفهم ..إن يكون عنده عقل جميل ..وروان شافت إني ممكن أوصل للمرحلة دي
أو يمكن شافت فيا كده فعلاً وده شرف لا أدعيه بس أدعي الرغبة في الوصول ليه
وعمري ما هغيره ..لو لقيتني فشلت أقفل البلوج أفضل

هل فكرت في إغلاق مدونتك؟..والسبب؟

اه فكرت ..لما لقيتني عاجز إني أقول كل اللي أنا عايزه من خلالها

ولما لقيتني بقعد علي الكمبيوتر بال 3 ساعات ضيف تقيل علي أي من أصحابي

اللي عندهم سايبرات طبعاً..التشرد موصلش للبيوت الحمد لله

المهم ..3 ساعات بعمل فيهم كتابة مكانتش بتاخد مني نص ساعة والباقي سرحان

+ إني بفكر الفترة دي برضه أقفله لأن أقرب الناس ليا في الواقع

راحوا ..كأنهم ماتوا بالضبط

وبالتالي البلوج فضفضة من واحد مع نفسه لناس غالباً متعرفوش كويس ..فاحتمال يملوا منه قريب

وبالتالي مش هلاقي حتى الرأي اللي بدور عليه من اللي بيعلق ..+ طبعاً إن مش بقعد وقت ما بحب دايماً

وللأسف معنديش المثابرة والقوة اللي تخليني أتبني فكرة وألف بيها علي مدونات ناس معرفهاش كويس

يعني بعمل دعاية لحاجة يا تخيب يا تصيب ..وفي الأخر كله بيكسل ..فالموضوع ببصله ساعات بلاقيه مش مجدي

بس هيا بديل كويس لحالة الخرس اللي مفروضة عليا في حياتي

صورتك في المدونة..رمزيتها ؟

صورتي

Photo Sharing and Video Hosting at Photobucket

هيا بالنسبة لي لحظة بتمناها ..إن بعد ما أرضي ربنا وأعمل اللي عليا في الدنيا

تبقي مكافأتي إني أقابل روان وتكون راضية عني

بس خلاص

احلى جمله قيلت لك فى وصف مدونتك؟

جملة اتقالت في تعليق ..بتقول إن الموسيقي والصورة والفراشتين

بيعيشوا الواحد في جو وهمي ..والجملة مش بليغة ولا حاجة بس أثبتتلي حاجة

إن ذوقها ورقتها هتفضل موجودة وليها اشعاعها طالما البلوج موجود وطالما في حد لسه بيحس

التعليقات بالنسبه لك ..اهميتها؟

رأي ..استفزاز إني اتكلم ..بيدفعني بعض التعليقات للتفكير

وساعات من التعليق بعرف ناس جميلة أوي وبفكر كتير أقول

ليه ميكونوش الأصدقاء في الواقع

احلى بوست كتبته ...ضع اللينك ..ثم اذكر لماذا؟

مبحبش أدي رأي إيجابي في حاجة أنا عملتها ..أنتقد ماشي لكن الاعجاب بسيبه لغيري

بس عموماً أقدر أقول إنه أكتر بوست عبرت فيه عن احساسي ناحية روان

أو ناحية أي موقف عموماً ..لأن إن الواحد معبرش صح عن رأيه أو احساسه يبقي

البلوج معمول ليه

؟!

أفضل مدونة قرأتها؟

الذاكرة المؤقتة مرتبكة دلوقتي ..ومقدرش أدعي إني أقدر أقارن بين مدونة وأخري

لكن هقول قاعدة عامة ..أفضل مدونة قريتها هيا اللي حسيت فيها بالصدق

وبالجمال ..سواء التصميم أو الكلام أو الفكرة أو حتي التعليقات ..لأن احياناً بكون في مدونة

ويجبرني الكلام علي إني متكلمش ..بحس بس ..لو لسه في إحساس أصلاً

أفضل بوست قرأته؟ وضع لينكه

للأسف مش هقدر أحط اللينك لأن أخوها قفل البلوج

وبالتالي مش هقوله ..لكن في بوستات كتيرة جميلة ..هبقي أعمل بيها ليستة في يوم

أجيب بس الجهاز وأقعد براحتي

حد قل ادبه فى التعليق..ايه رد فعلك؟

هتجاهله وأمسح تعليقه ..ولو صمم هرد عليه بخير الكلام ما قل ودل ..زاد فيها هرجع التحكم في التعليقات

وأتجاهل اللي خلفوه..لأنه ببساطة مترباش ..ومدعيش إني هربي اللي أهله والدنيا بحاله معرفتش تربيه

ربنا يهدي الجميع ومنوصلش للمرحلة دي

أسوأ مدونة؟ا

مدونة واحد فخور بمرضه ..بشذوذه الجنسي ..والمشكلة إن في ناس أعرفها وبتبان في مدوناتها ناس بتفهم

بس علي حد علمي قريبين أوي ليه ..طيب طالما إنتي قريبة منه..ليه متحاوليش تغيريه ..ولا مبسوطة بإنك بتقلدي الغرب

أنا حرة وبعمل الي أنا عايزاه وبعرف واحد شاذ جنسياً من غير ما أحسسه إنه وحش ..وعلي فكرة مش الشذوذ بس ..

تقدروا تقولوا ده اسقاط علي اللي بيكون صديق لواحد غلط وبيكدب علي نفسه لكنه بيتفرج عليه ومش بيعمل أي حاجة إيجابية وبيكون عبارة عن صديق مزيف

معاه معاه عليه عليه

أسوأ بوست..أسوأ مدون؟

اللي بيكدب ...واللي بيكون كله بجاحة وإثارة جنسية أو أي نوع من الإثارة

بغرض جذب التعليقات والاحساس بالأهمية وإنه بيناقش قضية كبيرة بقي

تدي التاج ده لمين؟

لأي حد يحب ياخده

_______________________

كلمة أخيرة ...

ميس حاسا عايز بس أقول إن تعليقياتك ومدونتك لما بقراهم بحس فعلاً

إنك اسم علي مسمي ..مش قصدي ياسمينا ..لأ قصدي الأسم اللي أنا سميتك بيه

أكتر واحدة شفتها بتستخدم كلمة بحس ومشتقاتها وبجد إنتي بني أدمة طيبة ورقيقة

وربنا يصبرك علي غربتك وتيجي بالسلامة أو علي الأقل تتكيفي مع الوضع

ويكون عندك نت عشان منتحرمش منك كتير

ربنا يكون في عونك وتروحي وتيجي بالسلامة

وشكراً أوي لكلامك وأنا عارف إنك مشغولة ولو كنتي مشغولة مكنتيش اكتفيفي بتعليقاتك

all the ppl who knew u

will miss u



19 comments:

شيمـــــاء said...

يااااااااااه اخيرا
عملت تاج
مبروك :)

Marwa Friday said...

صباح الورد ياضياء ...كيفك ..أخبار الدنيا معاك ايه ..
التاج هاااايل و معبر ..ميزته فى بساطته ..
الله يرحمها روان ..ويارب تلقاها كما تتمنى ان شاء الله الكريم
تحياااااتي الكتييييير ة جدااااا

Anonymous said...

عالم التدوين كله وحشني مبروك النجاح الف مبروك
أم أحمد

Amyra said...

ليست أول مرة أدخل هنا لكن ممكن أول مرة أقرأ تاج مليء بالاحساس

تحياتي
:)

Anonymous said...

تصدق التعليق نزل اهوه انا قلت اجرب الاول
انا الحمد لله بصحة جيدة وموجودة وبتعلم السواقة دلوقت ولو اني حاسة اني هاخد وقت طويل
اول مرة احس اني غبية كدة باين عليا صديت من الركنة
يلا الحمد لله
مبروك مرة تانية
انت جامعه مفتوحة مش كدة؟
أم احمد

koukawy said...

انا بحب اسم اسم البلوج بتاعك عشان الفيلم العبقري بتار راسل كرو
لو مشفتوش لازم تشوفه

Reemo said...

رغم ان التاج مليان احساس
وروان موجوده فى كل كلمه فيه
بس ليه حسيت انه حزين اوى كده
انت فى اميلك اديتنى امل
حسستنى ان الدنيا لسه فيها ناس كويسه
وناس ممكن تهتم ببعض من غير اى هدف
ممكن تلاقى اللى يساعدك وهو ميعرفكش
وممكن تلاقىاللى بيهتم بيك وهو مش عايز منك حاجه
حتى لو اقرب الناس بعدو عنك
حتى لو اصحابك راحو وسابوك
لسه فى ناس ممكن تبقى اصحابك ده لو انت عايز اكيد
انا هزعل اوى بجد لو فى يوم قفلت البلوج ده
انا فعلا برتاح فيه جدا
الموسيقى والفراشات زى ما قلت بتخلق عالم جميل اوى
ممكن يكون وهمى بس جميل
بلاش بجد احس انك يائس
لانى كل ما بدخل عندك بحس ان لسه فى امل
ممكن تعوض اصحابك اللى بعدو
وفى ناس اكيد تحب صداقتك
عارف
رغم انى معرفش روان ولا عمرى دخلت بلوجها لانى اصلا عملت واحد مؤخرا بعد ما ربنا رحمها
لكن بجد والله حاسه انى كنت اعرفها من كلامك عنها
ومش عارفه ليه حاسه انها قريبه ليا جدا
انا لو قعدت اتكلم ممكن اتكلم لبكره
انا هبقى اكمل كلام فى ميل هبعتهولك
خلى بالك من نفسك
تحياتى

Diyaa' said...

شيماء ...الله يبارك فيكي ..بس هو ليه أخيراً يعني ..مش مهم حصل خير ..منورة

مروة جمعة ..صباح الريحة الحلوة ..كيفك انتي ..أنا أخبار الدنيا معايا زي ما هيا مفيش ..
وأنتي اللي هايلة والله..والبساطة هيا الجمال
الله يرحم روان وكل الناس الجميلة اللي كان ميعاد رحيلها قبل ما يلحقوا يحققوا اللي نفسهم فيه..
ويسمع منك ربنا
وتحياتك الكتيرة وصلت وعمال ألم فيها أهي وأشيلها في مكان منساهاش فيه
كفاية إنك بتسألي وأنا مش بسأل :(
متشكر أوي يا مروة

Diyaa' said...

أم أحمد ...تعليقين ..إيه النور ده
حمد الله علي سلامتك
التدوين مفتقدك زي ما أنتي مفتقداه وأكتر
والله يبارك فيكي ..أخيراً لقيت حد فرحان ..أصلي معرفتش أفرح وقتها
الحمد لله طبعاً
الحمد لله إنك بصحة جيدة وأنتي مش غبية ولا حاجة هو بس تأثير الركنة ..تأكدي إنك هتبقي ولا مايكل شوماخر بعد اعتزاله طبعاً
الله يبارك فيكي مرة تانية
ومفتوحة مين بس يا ستي .. أنتي شايفاني بحب التعليم أوي كده ؟! ده حتي تعليم مصري حمضان أوي يعني ..مش طالباه هيا شهادة واحدة وأنا كده مكتفي
أنا لسه في جامعتنا بس ليا خبرات سابقة أداب ودبلرة حقوق وكده
المهم نورتيني
أوي أوي وسلامي لأحمد وأخوه اللي نسيت اسمه :(

Diyaa' said...

ندي ..يااه أخيراً شفت حد من الجزائر علي النت ...مبسوط إنك بتيجي المدونة وأتمني متكونش أخر مرة
وبشكرك علي رأيك
وتحياتك وصلت ..


كوكو ...بتتكلمي في إيه ..ده أنا لو بنت مكنتش حبيت غير بطل الفيلم ده ..مكانش هيملا عيني راجل غيره
فيلم عبقري عن حد عبقري والممثل بتاعه عبقري
صباح العبقرية
منورة



ريم ..هرد عليكي بس هروح أصلي الخطبة خلصت..معلش بقي
منورة

رينـــــــــــا said...

اجاباتك رائعه
حاسه بكل كلمه فيها
حاسه بحزنك الى وصلى
بس الى تقريبا فهمته انك عايز تسيب التدوين
لو دا حصل هضايق اوى
لان بيتك دا اجمل بيت بحب ازوره
لانه مريح اوى
حاول ترجع لنفسك تانى
انا شويه حاسه انها ضايعه منك ..يمكن اسأت الفهم
بس اوعى تيأس من حاجة
ولايياس من روح الله الا القوم الكافرون :)

Yassmina said...

زعلانه قوي اني جيت متأخر قوي كده
مع اني كان المفروض اكون اول واحده ترد على البوست ده
:(
اهداءك الجميل ده فرق جامد معايا
بجد انا اسفه اني قصرت الفتره الي فاتت بس كان غصب عني

beatifull mind
تعرف ان اول حاجه شدتني اني ادخل على مدونتك كانت الاسم ده
عارف روان كان عندها حق لما اختارت الاسم ده
ضياء انت فعل عقل جميل وحد جميل وتستاهل فعلا الاسم ده
حبيت روان قوي من غير حتى ما اعرفها بجد ربنا فعلا يرحمها عشان هيا حد جميل قوي
عارف ساعات كتير بقعد وقت كبير زيك جوايا كلام كبير بس مش عارفا اكتب منه كلمه واحده وفلآخر بروح قافله وقايمه
!!!
الصوره فمدونتك تحفه انا مسيفاها عندي على الجهاز من زمان
بريئه قوي
ومعبره قوي ضياء اكيد روان هتبقى راضيه عنك

the god father
اجمل موسيقى اخترتها

*******
ضياء كلامك بالتاج ده فيه احساس جامد قوي
معرفش حاسا اني مبسوطه انك اتكلمت عن نفسك كده ياريتني كنت بعتلك التلت تاجات
:D
بجد عاوزه ااقولك مبسوطه كمان انك رديت على التاج
وانشاء الله لما امشي هفضل بتواصل على البلوج

ضياء انا بعتلك ميل
خالي بالك من نفسك كتير
: )

Oma said...

yaaah
kont me7taga el tag da awy
3ayza a2olk eny kont merakeza awy fe kol kelma fe elpost da
mayenf3ash a3al2 hena 5ales
3ayza akarr enk beautiful begd
w ay 7ad ye3rfk men 2oryb hay2ol 3lek keda
rabna ye7mek
kan lazem aseb comment hena 3shan kefaya en el tag da beta3 yasmina 7bebty
tesd2 eny awel mra a7es en damk 5afek :D
makansh damk t2el ya3ni bas 7aset damk 5fef wna ba2ra elkalam
w bardo za3lan w fek ms7et 7ozn keda rheba

the god father
aktr 7aga ba7ebha fe blogk

bas da msh my comment bardo...
lessa bena kalam ;)

Jaqueline Sales said...

Très intéressant son profil, donc montre combien c'est malin et intelligent. Débitrice deavoir ouvert la porte de sa maison pour mon entrée. Je cherche des personnes pour changer des idées, donc je suis brésilien et aime son pays.


Very interesting its profile, therefore shows how much it is smart and intelligent. Debtor for having opened the door of its house for my entrance. I am searching people to change ideas, therefore I am Brazilian and I love its country.

Diyaa' said...

رييمو ...متشكر طبعاً قبل أي حاجة لأهتمامك وزيارتك ..
مش هعرف أفسر الحزن إلا بحاجة واحدة ..إني لسه بحاول أتعلم منه ..وطالما متعلمتش من الحزن أو من السبب اللي وصلني ليه فهو هيفضل شوية ..لكن متخافيش أنا ماشي عادي ..مشاكل تانية موجودة مخلياه احساس ثانوي مش أساسي واتعودت إلي حد ما علي تجاهله ..
الأمل اللي بتقولي عليه ده هو الأصل يا ريم ..عارفة يعني إيه ..لما الأصل يكون هو الاستثناء ..يبقي العيب في نفوس الناس مش في الزمن..وأكيد أنا فخور بإني كنت من أسباب تفكيرك بوجود الأمل ده ..ويا رب ميتغير ولا يتزحزح ..
أنا مقدرش علي زعلك ولا زعل أي حد بيهتم بوجودي ..

أنا مش يائس ..بس هيا فترة كده وهتعدي بإذن الله
روان يا رييم قريبة من أي حد بيفهم ويحس ..جميلة أوي البني أدمة دي ومحدش قرب منها إلا وقال فيها كل خير
هخلي بالي من نفسي وأنتي كمان برضه خلي بالك منها ..مش نفسي لأ نفسك :)
منورة



ريينا ..حاضر ..هرجعلها ..ومتشكر لتذكيري بالكلام الجميل ده ..وأنتي منورة وبراحتك وحسيتي بيا رغم إنك متعرفنيش ويمكن ده من أسباب حزني ..إن اللي يعرفني اوي مشغول او متهرب من معرفتي
ومتشكر لرأيك في المدونة ومش هقفلها بإذن الله طالما أنا عايش

Diyaa' said...

ياسمينا . البيت بيتك والبوست عشانك ..تيجي في أي وقت
ومتكونيش أسفة ولا قصرتي ولا حاجة ..ربنا يكون في عونك ..والحمد لله إن الاهداء جاب تمنه :))
بالنسبة للأسم ..بتاع المدونة يعني ..ربنا يخليكي بس والله لسه بدري ..انتي بس طيبة وعشان كده شايفة الأسم موجود أوي ..عموماً روان كل أختياراتها بتكون اختيارات بتعلق وبتتحس بسهوة وبعمق ..
وربنا يرحمها ويغفرلها ويجعلها من الخالدين في الجنة
ومتشكر لرأيك ده ودعائك ليها

أنا بقي عشان معنديش جهاز فمش بقفل وأقوم ..بلف لفة كده وبرجع تاني يمكن تتفك

الصورة فعلاً زي ما أنتي قلتي وأتمني ربنا يسمع منك وأوصل لليوم ده
والموسيقي برضه اختيار روان

وربنا ستر ومبعتيش التلات تاجات ..كانت هتقلب مجزرة وميلودراما وكانت الناس هتدخل ومش هترجع تاني ..وساعتها هبقي وحدي في المنزل وأختفي براحتي بقي ما هو محدش هياخد باله
أنا مبسوط إن ردي بسطك ويا رب التواصل يفضل موجود والميل وصل وشكراً جداً
تحياتي



أوما ..بصراحة مش عارف التاج احتجتيه في إيه بس الحمد لله إن كان عندي حاجة إنتي محتاجاها ولو هيبسط يا ستي أجيبلك كل يوم تاج إنشالله أنا اللي أضربه في الخلاط ..
ومتشكر لتركيزك ومجاملتك ورأيك اللي أتمني إني أستحقه في يوم من الأيام
وربنا يحميكي أنتي أكتر ..كفاية زياراتك لأي حد بيكون متضايق ..أنا اللي بقول ربنا يحميكي وميحرمش الناس منك
لول @ دمي خفيف ..بلا خيبة ..ما هو في الأول بيقولوا كده وبعدين بيقولوا معلش أنت عامل ضغط علينا ..لما دمك يرجع خفيف نبقي نشوف يمكن ننفع اصحاب تاني ..وعموماً مش خفيف أوي كده ..الميه مكترتهاش المرة دي عشان التموين
وبعدين بقي في مسحة الحزن دي ..أنا هقرا التاج أدور عليها وأخد بالي ألغيها من أي بوست بعد كده ..مش عارف بقي الموضوع كتير ..
الموسيقي ..اتفضليها ..أجيبلك اللينك ؟!

وبعد الكومينت الجميل ده بتقولي إنه مش كومينت ..أوك لسه بيننا كلام ومستنيه
منورة
سلام عليكم

الوردة السوداء said...

انت جميل اوى يا ضياء

ومخلص اوى

Diyaa' said...

keila, a Loba
i didnt get u very well
but u r welcome in my blog though u i dont post in ur language
my mail in the profile
welcome again :)




الوردة ...أنتي اللي جميلة ..ربنا يخليكي ومنورة المدونة

شــــمـس الديـن said...

السلام عليكم و رحمة الله و بركاتة

تعرف
انت من الناس القليلة اللي بيدفعوك انك تقلب المدونة بتاعتهم و تشوف كاتبين ايه و الواحد مش بيمل من قرائة تدويناتهم ... و دول مش ناس قليلة دول ناس نادرة

مفيش تعلقي يتقال لان دا تاج و كلام شخصي :)