..يامُـــواطـــن
ادع للحكــام بالصبــر علينــا
يا مـواطــن..
واشكــر الله الذي ألهمهــم موهبـة القمــع..
وإعــداد الكمائــن
قــل : إلهـي أعطهــم مليــون عيــن
أعطهــم ألــف ذراع
أعطهــم موهبــة أكبــر
في مــلء الزنازيــن وتفريــغ الخزائــن
رب ساعدهــم علينــا..
فهم اثنــان وعشــرون شريفًــا مخلصًــا حــرًا..
وإنا يا إلهــي..
مئتا مليــون خائــن
وصلني الشعر ده لأحمد مطر علي الميل من 5 دقايق كده ..مكنتش ناوي أكتب النهارده و كنت أفضل أقرا قرآن أحسن
بس استفزني الكلام لأني فكرني باللي أحنا فيه و خلاني أحاول أوصل للسبب الرئيسي يمكن لما أعرفه أرتاح ولو قليلاً
القمع موهبة متميزين بيها الحكام ..اه ..لكن مين اللي ادالهم الفرصة عشان يظهروها ..شعوبهم المستكينة اللي كل همها هتاكل ايه الليلة دي و هيتبسطوا ازاي بعد ما رمضان يخلص
شعوبهم المستكينة اللي بيقطعوا في بعض عشان الميراث و عشان فتوي الشيخ فلان بتحريم مش عارف ايه و اباحة مش عارف ايه
شعوبهم اللي مش عارفين يحكموا أسرة ولا يربوا عيلين و يزرعوا فيهم الأخلاق اللي هيا أهم مليون مرة من الميراث ومن الشهادة و من المهر و الجهاز اللي زي فلانة و زي علانة
شعوبهم اللي الدش عندهم أهم من جزء في القرآن أو موعظة في الأنجيل ..
شعوبهم اللي بيفوقوا و يبقوا رجالة لما ضربة جزاء متتحسبش في ماتش ولا لما رسام ملوش أي لازمة يرسم حاجة مشافهاش أكتر من ألف واحد في بلاد الواق واق ..
شعوبهم اللي دمهم بيفور لما مسيحية تتجوز مسلم وتسيب لأهلها البيت أو لما مسلمة تتجوز مسيحي ..
طب فين الشعوب دي و فين التدين و الورع من الكباريهات و الخمور
فين الشعوب دي من ولادهم اللي بيدخلوهم الجيش والشرطة عشان يركبونا ..
فين الشعوب دي من ربنا ..عايزين منه استجابة و هما عمرهم ما كانوا قريبين منه
فين الشعوب دي لما بناتها تلبس من غير هدوم و يحلموا يبقوا موديلز في كليب فلان و يحلموا بعلان زوج المستقبل
فينهم لما الولد بيكون كل همه يتصاحب علي دي و يمشي مع دي و يشرب شيشة أو مارلبورو أن مكانش حشيش ..
الناس مشغولة بالتفاهات و بتنمي مواهب حكامنا في القمع
دول لو حكمهم ملاك هيبقي شيطان ولو حكمهم شارون و عرفوا ربنا هيعرفوا يخلوا شارون أحسن من حكام الدولة العباسية كلهم
مش عارف أقول ايه
بس فعلا أحنا أكتر من ميتين مليون خاين و اللي بيحكمونا دول مخلصين للفلوس و الكرسي
بس ايه العمل يعني ؟ نقعد نشتم فيهم و بس ؟
5 comments:
خد بالك من نفسك اليومين الجايين
هههههههه
عموما عرض مناسب للوضع الحالي لينا
ولا تعليق
متشكر أوي علي النصيحة ..بس أنا مش أحمد زويل يعني لو رحت ورا الشمس مش هتفرق كتير الا مع الأسرة الكريمة بس و أصدقائي مع الوقت هينسوا فأيه رأيك ؟ افضل كاتم رأيي جوايا ؟
متشكر جدا لزيارتك و يا رب متكون الأخيرة
لا تعليق علي اللا تعليق :)
بص يا سيدي انت مش لازم تكون احمد زويل عشان تفرق مع الناس
اكيد حتفرق في حياة اصحابك وفي حياة حبيبتك وفي حياة اي حد حيسمع عنك وبلاش التشاؤم ده .. يعني في ناس كتييييييييييير مهتمين بالوضع الحالي والاحق والسابق لسيادتك وما تسالنيش يعني اية كمية الاوضاع اللي انا قلتها من حبة دول عشان هما طلعوا كده
بس من الاخر حتفرق مع ناس كتير
وبعدين اقولك حاجة حلوة انا لو عرفت انك حصلك حاجة حتمر عليا لحظات ضيق مش حكدب واقولك حتمرمت ممكن المرمتة تيجي لما اعرفك اكتر بس اكيد حمر بلحظات ضيق اما بقى لو سمعت ان احمد زويل جراله حاجة فمعتقدش اني ححس بحاجة محددة
اه وما تكتمش رايك جواك وات ايفر اللي حيحصل
ما هو مش ناقصين كتمة .. بس ما تفضفضش قوي الهي يخليك
حاضر مش هفضفض قوي لعرق الفضفضة عندي يطق
و شكرا علي كلامك الجميل و زيارتك اللي بتعوض نسبيا يعني غياب باقي الناس اللي معاهم اللينك بتاعة البلوج و غياب تعليقاتهم و الوضع اللاحق و السابق و الحالي فعلا فعلا مش فاهمهم خالص و مش هسأل خالص برضه مع خالص تمنياتي ليكي بالمزيد من الأوضاع المماثلة اللي أنتي شخصيا مش فاهماها
ربنا يخليكي أنتي كمان متتدلقيش علي القطط بعد اللي حصلك
و كل سنة و انتي طيبة
Post a Comment