كُــنت..

كـُنـت ناوي أفضفض في البوست ده زي أي بوست

كـُنـت ناوي ابعتلها كارت اطمن عليها فيه و أعرف ليه بطلت تكتب في البلوج بتاعها

كـُنـت دايما بنرفزها مني بس دايما كنت بحبها ومهما عملت بستحمل

كـُنـت عايز أكلمها قبل متسافر تعمل العملية أقولها أنها راجعة بإذن الله و أنهم في لندن شاطرين و مش هتموت من الأهمال و أن قدرها لو مكتوب في أي لحظة مش هتعجل بيه عملية ولو كانت تغيير قلب

كـُنـت فاكر أنها زعلانة مني لأني بقالي شهر مش بتكلم كتير زي الأول و بنكون أونلاين بس مش بعرف أتكلم

كـُنـت ناوي أفطر عند واحد صاحبي و نتفرج علي ماتش الزمالك بس أعتقد أني لما أدعيلها هرتاح

كـُنـت فاكر اني حبيت مرة و اني مش عندي مكان لحد تاني ..بس لقيت ان المكان بقي فيه منه مكانين

كـُنـت عايز احضنها قبل متسافر و أقولها أني مش هعرف اعمل حاجة تاني و استمتع بيها من غيرك..ولو حتي حضنتها بعيني بس مكانش ينفع

كـُنـت عايز أسمع صوتها و هيا بتقولي يا ضياء ..أو يا ضيا

كـُنـت دايما بقولها مش بتبعتي ميلز كتير ليه تقولي مش بعرف ..و معرفتش أنها صح الا لما شفت أخر 2 بوست كتبتهم قبل متسافر

كـُنـت ناوي مقولش لحد علي موضوع العملية بتاعتها عشان مشوفش شفقة مزيفة لفترة مؤقتة و بعد يومين انسي يا قلبي ..بس يمكن في وسط الشفقة دي تطلع دعوة من القلب ربنا يستجيب ليها و يطلعها من العملية سليمة و صحتها أحسن من ما تتخيل

كـُنـت ناوي اكتب كتير بس مش قادر و مش عارف ازاي كتبت اللي فات ده من غير ولا غلطة

يا رب روان ترجع مصر بالسلامة ولو كان ده قدرها فيا رب أجمعها بالناس اللي بتحبهم في الجنة و أغفرلها كل ذنوبها

آمين