كم أكره النسيان

بداية الكلام كده اللي حابب أقوله في البوست ده سؤال

ليه حاسس إن من السهل تخسر بني ادم

في حين إن صعب جداً تحافظ عليه

يعني العيب فيك ولا فيه ولا فينا ولا المسألة نسبية

مجرد تساؤل

وصديق أخر يذهب ولا يعود

وعلي رأي الجملة اللي سمعتها في فيلم

من السهل إنك تبدأ حرب لكن من الصعب إنك تبدأ حب

its Easy to Start A war but its Hard to Start a Love

**********

قريت جملة وردت علي لسان أحد أبطال رواية لسوزان عليوان

حتي الرواية مش فاكر اسمها بس الناقد كان معجب بيها أوي

كانت بتقول

وفي الوردة التي تنبت من قلب التراب عطر موتانا

وربما قد أصابت بها كبد الحقيقة وربما بهذا العطر

تكتمل تلك البوصلة الكامنة في أرواحنا والموجهة لنا

و التي سرعان ما تصاب بالعطب بمجرد الفراق

**********

بقي زمن الخد وهات

لأن خلاص عم عشم مات

علي رأي القائل

********

برتراند راسل قال كلمة فكرت فيها ملقيتش فيها غلطة

ومش حابب أنساها برضه زي كل اللي كتبته

إن عقلاً متشككاً علي الدوام لهو عقل فارغ علي الدوام

بذمتكم الراجل ده بيفهم ولا لأ ؟ عن نفسي أرفعله القبعة

********

في دستور 12 / 9 كتب جمال حمزة

واللي أعتقد إنه مش محترف

شعر بعنوان طفل ليس كذلك

وأيا كان نوعه كشعر بس اللي كاتبه بيحس

لأنه كتب الآتي

فالفقر لعين والقهر لعين

والكل لهذا أو ذاك سجين

بس أحب أضيف إن الترف والجهل أيضاً

لازم يتحطوا في القائمة دي

**********

وفي النهاية

نقطة طرحها صديق في معرض كلام

إني مصلح اجتماعي

وهو شرف مقدرش أدعيه إلا لما أحس إني راضي عن نفسي

وبحاول أصحح الفهم الغلط ده تاني

لأني يهمني كل حد يوصل لغرضي من الكتابة في المدونة

وبالتالي هيفهم كل حاجة من منظور مختلف

كل حد تشمل اللي بيتابعني لأنه بيفهمني أو بيهتم

مش المتابعة لمجرد المجاملة

الأسباب متعددة والغرض واحد

أولاً بحيلكم لكلام الأخ العزيز محمد الغزالي

نكتب لأننا كل يوم نشعر أن جدار الظلام يزحف علينا من

كل ناحية يحاول أن يعمي بصيرتنا كما نجح مع آخرين
نعم .. إبليس قد أعمى أذهان غير المؤمنين ولذلك نكتب

لكي نثقب في جدار الظلام هذا ثقبا يمر النور منه للأجيال
نور …يروي ظمأ الباحثين عن الحق وعن الطريق القويم وعن الحياة الأفضل

نور يجدد قلوبنا بحق لتصير قلوبنا الأنانية والمتعصبة

والشريرة… قلوب ترحم وتغفر وتحب الجميع
نور أنار أذهاننا بحق فصرنا لا نـُخدع ولا نـُغيب ولا نـُضلل

بتقوى خارجية … أو بكلام جميل تحت اسم الله

.....

الكتابة من قديم الأزل ملهاش جدوي أكبر من حفظ ما قد ننساه

وسننساه لأننا بنملك ذاكرة مراوغة

تتذكر ما لا يجب تذكره وتنسي ما لا يجب تناسيه

وأنا عن نفسي في مدونة مش مشهورة

أي إن المتابعين عددهم قليل والحمد لله

فمفيش قاعدة مستهدفة أصلاً لٌلإصلاح

وكل اللي بعمله إني بحاول أفكر نفسي

وكل حد بيهتم بالعالم الافتراضي البسيط ده

بكل ما قد يستحق التذكر

والغرض التاني..إني مديون للإنسانة اللي عملت المدونة دي ليا

إن جهدها ميروحش هدر وهفضل أدور جوايا

وهلاقي حاجة علي الأقل تستحق إن أفضل أكتب

لحد ما ألاقيها وأحقق من وراها اللي كانت شيفاه فيا

لأن العالم البسيط ده متعملش مجاملة

وبالتالي أنا مش بكتب فيه مجاملة أوارضاء لغرور

أو مجرد واحد عنده ازدواج في الشخصية

لأ أنا مقدرش أبداً أدعي الوظيفة دي

لأني صغير وضئيل أوي عليها

بفكر وأناقش وأعترض وأكتب

لكن أصلح ..أنا أولي بالجهد ده

خصوصاً إنه لن ينال أي تقدير

وشكراً تعبتكم معايا ..ورمضان كريم عليكم يا رب

وصوم مقبول وأعمال صالحة دايماً وادعولي معاكم بقي

لأني من أول الشهر معملتش حاجة أصلاً

رمضان كريم عليكم

يا رب يكون الشهر ده بداية خير لينا كلنا

ونحس كلنا بنعم خالقنا ونستغل الشهر ده أحسن استغلال

مش مجرد شحن بطون وفرجة علي أعلام سفوت الشريف

كل سنة وأنتم طيبين ودايماً صيام مقبول وعمل صالح وإفطار لذيذ

حروف

كتير أوي أكتب الحروف وأرجع أبصلها تاني ..الحرف مجرد تكوين بسيط

لكن إرادة ربنا جعلته أساس للتواصل والفهم والتعلم والحياة عموماً

عشان كده بستغرب لما أقرا كلام بيعلم جوايا وألاقيني نسيته

وأستغرب لما الناس تقراه ومتحسش بيه أو تنساه زيي

وعايز الحروف تبعتلي مندوب عنها يعلمني ازاي منساش

والسبب ببساطة مجردة

إني دائماً ما أنسي ما لا يجب نسيانه وأتذكر ما لا يجب تذكره

عموماً وحشتني المدونة وكل حد علق فيها مش للمجاملة ..لأ لأنه فهم المكتوب وفهم الكاتب

علي فكرة ..كلمة كاتب دي كتيرة عليا ..خليها مدون أحسن

في كام حاجة كده معلقة في دماغي قلت أكتبها قبل ما أنساها

يا تري مين هيستحمل ؟! هنشوف

**********

واجبي نحو الإسلام ..العلم بالإسلام والعمل بالإسلام والعمل للإسلام ..يوسف القرضاوي

**********

اوعي يا ابني تدور ع الدفا في فلوس وهدوم

ومتنساش تحوش شوية أصحاب

وافرح أوي لما يدقلك باب

وتلاقي حد بيحضنك لوحه الله

ياه ياما ياه

فاكرة لما كنتي بتعملي البصارة

وتدي منها لأبلة سارة

يرجع ف الطبق رز بلبن

ويروح الطبق لأم حسن

ويرجع صنية بسيسة

تبعتي منها لخالتي بيسة

يرجعلك الطبق مليان حب

معقول في كده قلب

عارفة يامه النهاردة خفت بجد

حفت مني وحفت من أي حاجة وأي حد

وبخاف غصب عني أتخبط في حد

ومن أول هنا يامه لازم ابدأ من جديد

واسأل ليه الفرح يامه شكله لسه بعيد

ده أجزاء من كلام كتبه علي سلامة ...الدستور 15/8 ..مع قليل من التصرف

***********

عايز أكبر بس شرطي إني احتفظ بطفولتي

عايز أكبر وقت ما هو لازم وواجب

وأصغر لجل ما ألعب وألاعب

بكبر مش بشيخ يعني بتعلم يا شيخ

دي أجزاء من تعتعة دكتور الرخاوي في الدستور 15/8 برضه

***********

قالوا قديماً الوحدة خيرٌ من صديق السوء

وأحب أقول حديثاً وأيضاً خيرٌ من صديق مشغول

***********

Let me Tell You Something about me

i'm just a mortal creature

i'm not staying on that planet forever

i just have my turn & i'll leave it forever

Let me remind You that

although of your beauty or wealth

& although of your wisdom or strength

although of all what you already have

and what will have

you still mortal

you will leave one day

your role is not to stay

Let me Tell something more

those who left our world

those who will come to our world

those who still on the edge

all of them were created in that world

but they dont belong to it

because they are mortals

so i wish for myself to put my foot

on that way that i know its right

& which i believe in it

before i'd leave on the way of nothing

من غير عنوان

من وحي جملة في رائعة يوسف إدريس : المهزلة الأرضية لقيتني بفكر وأقول

أنا العين التي وجدت من أجلها الحياة ومع ذلك اختارت أن تهرب

وتغمض جفونها ولو فتحتها فلرؤية السلبيات

ولو أبصرت أمر إيجابي فإنما لتشكك فيه حتي لو كانت تعرفه حق المعرفة

أنا الذي أضع الكلمة فوق الانسان أحياناً رغم انتمائي أصلاً للإنسان

أنا من اعتبرت القانون والمنطق الإلهي في إدارة الكون أسمي وأرقي من الحياة

رغم أن الحياة _ بجانب كونها اختبار _فهي مجرد رحلة قصيرة للوصول لهما

أنا الذي لا يعجبه أحد حتي أصبحت لا أعجب أحداً

أنا الذي من كتر ما أنبت نفسي لكسلها وضعفها وتفاهتها أدمنت كل ما سبق بلا استثناء

أنا الذي كثرت احلامه ومع ذلك لم أحقق منها ولو حلم واحد

وأخيراً أنا الذي صممت وعاندت مع الحياة حتي أصبحت حائراً تائهأ محتاراً

________**_______
**

من وحي هلوسة الدكتور أحمد يونس بعدد الدستور الأسبوعي 25 / 7 / 2007 لقيتني عايز أقول

ممكن يكون الحل الأخير لبلد أهلها مبقوش يتكلموا إلا برطمة أو هولسة

إننا نخلي التماثيل تتكلم وتحتج بدلاً مننا لعل وعسي التغيير المنشود يتم

ولكن من رأيي إن هذه الأشياء _ المسماة بالجماد ظلماً _ قد لا تبدأ في الكلام

والسبب إنها من المحتمل أن تنهار من البكاء بمجرد إتاحة الفرصة لها للتعبير

قال تعالى: "إنّ الله لا يغير ما بقوم حتى يغيِّروا ما بأنفسهم" سورة الرعد - الآية 11

________**_______
**

عجبت للإنسان ككائن يتمتع بنعمة العقل ويبدأ الحياة من محطة العجز ليصل لمحطة العجز

ومع ذلك يتجاهل ضعفه ويعتبره قوة ويتمسك بقوته وكأنها ضعفاً

________**_______

**

خبر قريته بيقول إن محكمة أمريكية منعت امرأة محجبة من دخول المحكمة

وبغض النظر عن أسباب الطرد...فبتعجب من حضارة ممكن يتأذي فيها المسلم كتير بسبب دينه وغالباً مش بياخد حقه

ولو تم التعرض لمهزلة المحرقة النازية لليهود...ومبالغتهم المهولة في تقديرها ...تتعلق المشانق

وسؤال بهديه للمنبهرين بالحضارة الغربية بشكل أعمي وتحديداً المنبهرين بالحرية المزيفة

الحرية اللي بتوصلنا لما كانت عليه لبنان قبل الحرب الأهلية

وبتوصلنا إن من معالم السياحة بتاعتنا هي الأماكن اللي ممكن يخلعوا فيها أكتر وحبذا لو مارسوا الشذوذ بحرية

السؤال..هو فين الحرية لما أتعرض للمحرقة والاقيني مهدد بالسجن في فرنسا بلد الحرية وأقل عقوبة هي الغرامة وبتهمة ساذجة بيسموها معاداة السامية ؟ خلصت السؤال ومعلش طولت وهضيع وقت اللي هيهتم بالرد عليه

فإذا مات ابن ادم

مقدمة لابد منها ..لأصحاب الأوقات الثمينة..البوست كتبه العبد لله الرغاي بطبعه فهو طويل..اللي يهمه يقرا يعمل حسابه بقي..وتاني حاجة..لأصحاب القلوب الفافي اللي بتتقطع لما القطة الشيراز يجيلها نزلة برد ومش بتتقطع لما عداد الموتي بيعد كل يوم مئات من البشر..مش تقروا البوست لأنه ببساطة مش هيعجبكم وهتحكموا عليه بغباء إنه كئيب..فعلي إيه وجع القلب ؟! ..اللهم قد بلغت الله فاشهد..

______________________

أتخيلها وهي تخرج من أخر منزل كان يأويها ..وتتداعي مع هذه التخيلات سيمفونية من نميمة جاراتنا في ذلك الحي الشعبي..وهي نميمة أحبها رغم بشاعة الفكرة كنشاط لا طائل منه سوي إضاعة الوقت في تناول سيرة الناس..ربما لأنها تدفعني للتفكير ؟! لا أدري..0
أتخيلها وهي منكسرة العين والفؤاد وهي في منتصف الثلاثينات ..اسمع احدي الجارات تمارس هوايتها وتتردد نميمتها في أذن لم تعد صغيرة...: كلهم يا أم السعد اتنكرولها وحتي أختها اللي كانت بتشاركها سرير واحد بتقولها أنا ما يدخلش بيتي أخت ضعيفة ..0
اتذكر رد أم السعد وبدانتها المفرطة : رغم إنها طلعت من التعليم عشان تصرف عليها وتدخلها اللي اسمها الجامعة..وبعدين بتتلكم عن الضعف ازاي وهي اللي بتتمسي يومياً بعلقة من الفحل جوزها وبعدين بتبوس رجله وتصالحه عشان شطارته في ال....0

أتخيلها سائرة بلا هدف وهي لاتحمل سوي شنطة بها ثياب قليلة وبيدها الأخري صندوق مجوهرات لم يكن علي حد علمي يحتوي علي ما يساوي قيمته ..ولكن من قال أن الذكريات عديمة القيمة ؟!0
أتذكر رد الجارة علي أم السعد : دي خافت من عين جوزها لتروح لأختها وتخطفه منها ، ولا يا حسرة أخوها اللي عمل نفسه كبير يوم الورث وخد أهم حاجة فيه وبعد كده متبري من أخواته اللي من لحمه ودمه وحتي أخوه العربجي ..لأنه مش من مقامه وهو اللي مأجر سيدلية علي ناسية - هكذا نطقتها - الشارع الرئيسي وهو اللي كان بيروح الجامعة بهدوم بيلبسها أخوه العربجي دلوقتي ..0
أعود لتذكرها عندما رأيتها أمامي تسير بعينين زائغتين تحملان اسئلة وحيرة وترتسم فيهما معالم الندم وأتذكرني وأنا ذو العشرة أعوام اسأل والدتي : هو ليه ربنا مش بيساعد الغلبانة دي يا ماما ؟!0
ولم أحصل علي جواب في حينها ..0
تعود ثرثرة الجارة للتداخل مع تصوري لها في ذلك اليوم المصيري في حياتها ..0
فأتذكر قولها : ورغم إنها يا أم السعد معاها حكم متعة يعيشها في أوضة فوق السطح...وتدبر مسروفاتها من شغل البيوت أو شغلها في الخياطة..بس باينلها اتعقدت من الأحكام والمحاكم ..0
وأذكر رد أم السعد جيداً وأذكر الألم المتصاعد بداخل نفسي الصغيرة والذي ترسخ في أعماقها السحيقة وأنا أسمعها : ما أكيد من عملة المحامي اللي بيقول إنه بيدافع عن الغلابة لوجه الله..0
أتذكر رد جارتها : أكيد كان هيعمل عملته وبعدين يدافع عنها لوجه الله محدش قال حاجة غير كده مع ضحكة لا تناسب سنها وأمومتها لأولاد متزوجين ...0
أتخيلها تسير يوماً كاملاً في حواري وشوارع الحي ...وتلك الأجواء الشعبية التي فقدت رونقها وأهم عناصرها وهو ترابط الناس كالجسد الواحد الذي اذا اشتكي منه عضو تداعت له باقي الأعضاء بالسهر والحمي ...0
أتخيل قول أمي أنها لم تستغل شباب ونضارة جسدها لكي تكمل الحياة وتحصل علي فتات الدنيا مقابل كرامة لا تعود مرة أخري..0

أتذكر قول الناس فيما بعد أنها اختفت ..هكذا ببساطة مخجلة!!0
أتخيل عقلها يتسائل عن جحود أولادها الثلاثة وأصغرهن في الثانوية العامة وهي من تباهت بهدية أهدتها لها في عيد الأم أمام والدتي ..كيف يتنكروا لها لمجرد أنها ضعيفة ووحيدة ؟ وهل أجابها أبنها الجامعي الذي كان يطمئن عليها متخفياً عن أعين أبوه..حبيبها سابقاً ؟!0
أتذكر قول خالتي عن تلك العلاقة : ولا قيس وليلي في زمانهم يا ابن اختي..من وهما 15 سنة وبدأت أغاني عبد الحليم تشتغلي ورسايل الغرام وحسد صاحباتها لحب أبن مدير المدرسة ..0
مع دخول الجامعة لم أتحمل مجرد التذكر..وصممت علي معرفة مصيرها ..واختلست صورتها أبيض في أسود من والدتي..0
وفي يوم ما بأحد المستشفيات علا صوتي لتجاهل موظف الاستقبال لي وفوجئت بصوت أنثوي من خلفي يسأل : عايز ماما أمل ؟!0
لم يكن هذا اسمها ولكني أحسست بأني قد وجدت ضالتي..فألتفتت لأجد الطبيبة الأنيقة تتابع: انت تقربلها ولا إيه ؟0
فكذبت وأجبت :أيوه أنا قريبها من بعيد ألاقيها فين ؟ هيا تعبانة ؟..فهزت رأسها نافية.. وقالت : لأ هي بخير وتلاقيها في دار ....للمسنين فلم أتمالك نفسي فسألت : وليه تروح هناك دي لسه صغيرة ؟ ومين يصرف عليها ؟ وليه اسمها ماما ؟ ولم تدعني أكمل...وقاطعتني وحمرة الخجل تغرق وجهها وتزيدها جمالاً:لأنها بتاخد بالها من والدتي هناك ومن النزلاء لدرجة إنهم سموها ماما !!0
وددت وقتها لو صفعتها لأحول سبب حمرة وجهها مندهشاً لأنها تجاهلت حمل امها لها 9 أشهر وهناً علي وهن وفطامها في عامين وتعبها في تربيتها لتصل لكلية الطب وتكافأها فلذة كبدها بأن تتنصل من خدمتها في ضعفها لتتركها بين أيد غريبة ..وأين بنتها ؟!! حية ترزق ولكنها وياللأهمية انضمت لقافلة المرأة العاملة التي رسخها بشكل مشوه إلحاح الأعلام الرأسمالي المسعور وكأن المرأة لابد وأن تعمل بمقابل مادي ثم توقفت عن استطرادي غير المجدي واحتفظت به لنفسي لأنها لن تعي منه حرفاً!!0

وأنصرفت وقد نسيت سؤالها عن العنوان ..0
أتذكر خطواتي نحو بوابة الدار ونظرة رجل الأمن لي معتقداً أني أحد الناكرين لفضل أصولهم..أتذكر كذبتي المنمقة عن إرث ماما أمل الذي تركه لها أخوها المهاجر..أتذكر حكي مسئولة الدار لي عن بدايات ماما أمل وعن طوفان الحب الذي أفاضت به علي كل هولاء الضعفاء..ودلتني علي أقرب النزيلات لها قائلة : قريب ماما أمل يا مدام ماري ..0

اتذكر تأملي لأطلال جمالها الزائل...والبادي بوضوح مع ابتسامتها...وقولها اتفضل يا ابني واستطرادها: أنا ليا هنا سنة بس ومع كده بحسها معرفة قديمة أوي عمرها من عمر ولادي..كانت بتصحيني تفكرني بميعاد الدوا وتجري تكمل صلاتها قبل الفجر ..كانت بلبسها الأبيض ملاك بعته الرب نساني توأمي المهاجرين والمرحوم وثروته اللي منفعتنيش في وحدتي..تعرف يا ابني لما حكتلي قصتها أنا شتمت جوزها فقالتلي : لأ ربنا يحاسبه مش أحنا ..بصي الرجالة دول زي البطيخ..لو كان مسموح تاخديهم علي المكسر المعيوب منهم مش هيقبل بيه حد وهيقف حال الدنيا..فتاخدي بطيختك سليمة وأنتي وحظك وشطارتك في الاختيار...يا تطلع مرة يا تدوقي العسل. يا يطلع دلع لا هو مر ولا هو محسل..وفي الأخر تحمدي ربنا علي كل حال..0

واصلت استطرادها كأنها قرأت شغفي بكل ما يخص ماما أمل: حكتلي عن قصة حبها وعيالها التلاتة والرحم اللي شالته وهيا لسه عيلة 20 سنة ..حكتلي إن حماتها قست قلبه عليها علي أساس إنها بارت ....0
أتذكر أنها توقفت لالتقاط أنفاسها..فانتهزت الفرصة وأنا أناولها كوب الماء سائلاً : وهي فين دلوقتي ؟ اجابت بأسي : أغلب وقتها في بلد والدتها في الفلاحين أصل واحد كان هنا السنة اللي فاتت كتبلها تلت ثروته وصية ليها وأقنعتها مديرة الدار بقبولها بالعافية ..نفسها عفيفة فوق ما تتصور متقبلش بأكتر من مرتبها..رأيت حينها دمعة في عينيها تترقرقان علي خلفية خضراء سبحان من خلق وهي تقول : بتوحشني أوي ونفسي أخدها بالحضن..بتفكرني بأختي الصغيرة وحنيتها عليا ..أتذكرني وأنا أتجاهل صمتها متناسياً وجوب احترامه..واسأل : طيب هيا بتعمل إيه من بعد الوصية ؟ فردت : من شهرين كملوا بني مدرسة ثانوي أزهر وده لأنها كملت تعليمها وعرفت قيمة التعليم ودلوقتي هيا في جامعة مفتوحة في حقوق..والمدرسة قالتلي إنها هتخليها من غير مصاريف للي ميقدرش يدفع وهيديرها اللي يقدر ينفذ مشاريع تنتج وتصرف علي المدرسة دوره كمدير للمدرسة..وإيراد باقي فلوس الوصية يساعد في الأول ..وبدأت قريب في دار أيتام هناك وقلتلها فلوسي تحت أمرك الخير كتير ولأني متأكدة إنك مش هتضيعيهم والأيتام هيتربوا أحسن تربية علي إيدك ..وردت عليا بشياكة وبرقة وقالت وهيا بتضحك : لو احتجت أكيد هطلب منك أصلي أنانية شوية وعايز الثواب لوحدي ..0
وكأن تذكرها الضحكة قد أعاد النشاط لذاكرتها الاستطرادية..فعادت تستكمل:تعرف حكتلي عن إنها مكرهتش جوزها لأن ده اختبار أو عقاب وفي الحالتين لو اتحملت فهيا الكسبانة في الآخرة ..حكتلي بداية عذابها مع جوزها وهروبها لمحاولة إنها تعيش سنها زي بنات ثانوي وتسمع مغني تحبه وتوجهله عواطفها ..حتي لو قال السح ادح امبو..ولكن جوزها منع عنها الراديو والتلفزيون..كان بيجر شكلها ..وكانت تقولي دلوقتي إنها حمدت ربنا علي إنه منعه لأن مغنيها بقت بتشمئز من صوته و كلمات أغانيه كلها عن الحب كأن الحب اللي بيغني عنه هيحل كل مشاكل العالم ..حتي شعره صبغه وعمل فيه عمايل ميعملهاش راجل ثم تضحك وهي تحكي لي ...0
أتذكر أحدي العاملات بالدار تقاطعنا : ميعاد الدوا يا مدام ..وتضعه مع كوب الماء بمهنية وآلية ..ورد فعل المرأة : بص الفرق في المعاملة بين اللي بتشتغل عشان الفلوس والتانية عشان قلبها الكبير..بص صورتها اللي خدتها ليها بعد محايلة.وأخرجت من الروب صورة لم أتعرف فيها ماما أمل لأول وهلة ..ملائكية تبدو في نور يشع من وجهها ويتسق معه ثوبها الأبيض والإيشارب وحتي الحذاء...ورغم ذلك رأيت في عينيها مسحة متبقية من الأسي..العالق بذاكرتي التي لم تعد أيضاً صغيرة ..0
تمنيت لحظتها لو اختلست هذه الصورة أيضاً ولو لنسخها ولكني أشفقت علي هذه المرأة الضعيفة ولم اقو علي حرمانها منها واستغفرت الله..وتيقنت أنه لابد أن أنصرف لأنها قد استهلكت طاقتها البدنية والنفسية..سألتها أخيراً عن مواعيد حضورها فأجابت : مبقاش ليها ميعاد .وتمسكت ببقائي قائلة : إنت فيك ريحتها .ولكني صممت علي الانصراف علي وعد بلقاء أخر إن شاء الخالق..0
أتذكر أنه قد مر ما يربو علي الخمسة أعوام لم تطأ قدمي فيها الدار ربما خوفاً من عدم رؤيتها والتي أحببتها بدون أن ألتقيها ويكفي ما أكنه لأمومتها من إكبار ولإنسانيتها من احترام ولعزة نفسها من تقدير ...0
وربما لم يكن الأمر بهذه المثالية ..فشاب في العشرينات ما زال يتحسس ملامح النضج قد تلهو به الماديات والحياة الخاصة مهما كانت تافهة أوفارغة وأقر بتكاسلي وتشاغلي في صغائر الأمور وإضاعتي لفرصة أبكي عليها الآن..فإن لم أنشغل بالوجود بجانب امرأة مثلها..ولو للحظات فبمن سأنشغل إذاً ؟ بعاهرات الواوا أو حبس تامر الفخور بشعر صدره ؟! عموماً ندمي هذا لم يعد يجدي..وإن كان قد يؤدي للإفاقة من واقع فارغ غالباً حقير أحياناً...0
وفي هذا العام نفضت عني الكسل..ووجدتني أخطو نفسي الخطوات ..أمام نفس رجل الأمن وقد تبدلت نظرته لشفقة وحزن..توجست منهما خيفة وسألت عنها فرد باقتضاب : اتفضل اسأل جوه ..0
وصلت لمدام ماري بصعوبة لقلة اهتمام العاملين الجدد بالدار بما فيهم المديرة ..0
أتذكر نظرتي لذلك الوجه الذي كان جميلاً واندهشت لأنها لم تكن منذ خمس سنوات إلا شابة في الخمسين والآن أصبحت كهلة في الثمانين ..0
لم تجب عن أي من تساؤلاتي ونظرت لي ساهمة معاتبة..وأشارت لركن حجرتها لصندوق أعرفه..0
لم أصبر لأحضره وفتحته ملهوفاً..وجدت فيه صورة لها مع مدام ماري قبل أن تصبح الجدة ماري..وجدت صورة جماعية رأيتها من قبل مع العاملين بالدار ..وجدت عقد زواج مهترئ وورقة طلاق..حكم محكمة...خطابات بخط جميل ورائحة أجمل..لم ترسل بعد..تبدأ كلها بولادي حبايبي..لم أحتمل وأحضرت الصندوق لمن طلبته ..التي لم تسترسل في الحديث وإنما تابعت نظرتها اللائمة وقالت : الدكتور قال كان عندها الورم من أكتر من 6 سنين ومستغرب إزاي مجاتش تشتكي منه..مكانش يعرف إنها مستعجلة علي أحلامها كأنها حاسة بقدرها..ومكانتش هتستني تخلص متاهات المرض والدكاترة ..0
أتذكر أني وقتها بدأت أعي ما حدث ولم أجد ما أقوله..واحترمت صمتها والذي كسرته بصوت واهن : قبل ماتروح لربنا بيومين كانت قاعدة معايا ومتحسش معاها إنها تعبانة تعب الموت..راحت جابت الصندوق وقالت ده هديتي ليكي وضحكت وحضنتني جامد ولو كنت أعرف إنه الأخير مكنتش سبتها تمشي بسهولة كده ..وقالتلي أستودعك الذي لا تضيع ودائعه..وبعديها بيومين قالولنا في تليفون الدار إنا كانت في دار الأيتام بتتابع الأحوال فيه...وحبت ترتاح علي الكنبة في المكتب..بعد ساعتين بيصحوها مصحيتش وفضلوا مش مصدقين إن الملاك دي راحت بالبساطة دي..أغلب اللي بيشتغلوا هنا سابوا الشغل وراحوا دار الأيتام لأن وصيتها كانت عبارة عن 3 كلمات..0
وصيتكم الأيتام والمدرسة..0

لم أحتمل وأشحت بوجهي لكي لا أزيدها هماً بدموي أنا العائد بعد خمس سنوات وأحسست بيدها الواهنة تربت علي كفي قائلة : معلش يا ابني أنا مش هلومك علي عدم متابعتك ليها وكفاية إنك حاسس بيها وأكيد اهتمامك هيبقي فعل ومفيش حد بيتولد زي ماما أمل..كل واحد فينا بياخد وقت لحد ما يرسي علي بر الخير أو الشر أو البر المتجمد اللي راسية عليه أغلب الناس..التغيير للأحسن بياخد وقته فمتعيطش يا ابني وتلوم نفسك علي أي تقصير بتتخيلها وأدعيلها وحاول تساعد في تنفيذ وصيتها..0
اتذكر أني فتحت الصندوق مرة أخري لأجد قوله تعالي " وبشر الصابرين الذين اذا اصابتهم مصيبة قالوا انا لله وانا اليه راجعون " ملصقاً بعناية في أسفل باب الصندوق ..أتذكرني أرددها وأنا أخطو خارجاً..ويتداعي إلي ذهني الحديث النبوي (( إذا مات ابن ادم إنقطع عمله إلا من ثلاث ..علمٌ يُنتفع به..وصدقةٍ جارية ..وكلاهما يتمثل في المدرسة والدار ..وولدٍ صالح يدعو له )) صدق رسول الله عليه الصلاة والسلام .0
لربما ينقصها فقط ذلك الولد الصالح الذي يدعو لها ..لربما أكون أنا هذا الولد..رغم أني لم أكن في حياتها إلا مجرد متابع عابر ..ورغم أني لم أقبل قدماها..رغم أني لم أقبل يديها أو حتي رأسها..ولكن ما أزال مقتنع بأني قد أكون هذا الولد ..0
أو أتمني ان أنجح في ذلك

العالم المخمور

دُعي أحد الدكاترة لإلقاء محاضرة في مركز للمدمنين عن أضرار الخمر

فأحضر معه حوضان زجاجيان : الأول فيه ماء ، والثاني فيه خمر

ووضع دودة في الماء فسبحت ، ثم وضعها في الخمر فتحللت وذابت

حينها نظر إلى المدمنين سائلاً: هل وصلت الرسالة ؟؟ فكان الجواب

نعم اللي في بطنه دود يشرب خمر عشان يطيب !!000

________________________

بتفكرني النكتة دي بالناس اليومين دول

يبقوا شايفين وحاسين بإنهم ماشيين في طريق غلط

بس بدل ما يدوروا علي طريق تاني أو يحاولوا يفكروا ولو لحظة

لأ بكل بساطة بيفضلوا منتشيين بنشوة الغلط سواء كانت

سلطة ..فلوس..شهوة..ويبرروه بمبررات من عينة

الطموح والسعادة والراحة ومحدش واخد منها حاجة

ربنا يهدي الجميع ...وأي حد بطنه توجعه يشرب ويدعيلي

خطوة ..نظرة..فالرحيل

البوست ده لقيته جوايا وأنا في الميكروباص مروح وعشان خايف يضيع زي حاجات كتير كتبتها علي الورق ، فنزلت السايبر بعد نص الليل كتيته في ملف وورد وروحت وجيت تاني يوم كوبي ونزلته من غير ما أبص فيه لأني شكرت غددي الدمعية أمبارح علي تماسكها ومش عايزها ترجع في كلامها ، وخصوصاً إني لازم أذاكر ولا مذكرة مع الدمع ..المهم محدش يدقق ورايا في غلط نحوي أو إملائي ..ربنا يكون في عون اللي يتعب ويقرا كل الرغي ده .0

بخطوات ثقيلة أسير وأنا أنظر إلي اللاشئ أحياناً أو أتامل البللورات البرتقالية متراصة بانتظام بديع علي خلفية السماء الصافية والجمال الرباني المبهر .
استرجعت أخر خطواتنا معاً ..رمسيس – رمسيس ..أتجاهل الأصوات المزعجة التي لا تكل ولا تمل ، أشعر بالخدر في عضلات قدمي الواهنة

وأتجاهله أيضاً وأستمر في السير البطئ .0
تتواصل خواطري في اقتحام تفكيري وفي الاستطراد ربما لتخفف من ألم الذكريات ..أرفع رأسي لأعلي وأري الطيور النائمة علي الأشجار الكبيرة

اتمني لو همست لها ، أتمني لو فهمت لغتي الدارجة " مش لاقية إلا الطريق المزعج ده وتنامي فوقه ؟! " ولن أنتظر رداً .0
أتذكر لحظة مرورنا تحت نفس الأشجار ، أتذكر كيف كان يبدو ذلك اليوم البعيد القريب
كان يبدو يوماً جميلاً في أوله وأنا أنهي أخر محادثاتي مع مليكتي ، وأنا استعد لزيارتي لمعرض الكتاب ويبدو أنها لن تتكرر ، أتذكر ملل الانتظار الذي لم يخفف من وطأته سوي أنه كان انتظاراً لأعز الأصدقاء ، أتذكر أني تناسيت هذا الملل مع سيطرة هاجس مؤلم - لم أفهمه في حينها – علي تفكيري ، أتذكر أني تناسيت الهاجس ونسيت ملل الأنتظار بمجرد التلاقي ، أتذكر جولة المعرض حتى اشتكت أقدامنا وربما بطوننا ، أتذكر تمشيتنا الأخيرة معاً ترقباً لوصول سيارة غير مزدحمة ، أتذكر أخر الدقائق التي كنت فيها قريباً .أتذكر وابتسم .0
أتذكر الهاجس الذي أصبح حقيقة عمرها من الأيام 107 مرت كالقرون ، يمر بعقلي خواطر أتت في وقتها ..واتساءل مندهشاً ..علي أي أساس يبقي اسم الشارع " صلاح سالم " ؟! هل لأن دور الرجل في تاريخنا لا يمكن نسيانه ، أم أنه مجرد نصيب في العزبة ، أم ربما هو اتباع لسياسة – دع الأمور كما هي طالما لن تضر أو تفيد ، لا أدعي العلم بالتاريخ ولكن عضوية مجلس قيادة ثورة 52 والتي لم يتركوا ميزة لها إلا وردموا عليها التراب ، باستثناء السد العالي والقليل من التراث الفني وكلاهما غير قابل للردم أو البيع ، فبأي حق إذن نسمي الشارع باسمه رغم أن رئيسنا الحكيم هو من تم في عهده بيع أهم منجزاتها ..هذا غير المكانة السياسية المنحطة التي لا نستحق حتي أن نتمتع بها ..إذن هل هو نوع من التمحك ؟! منطقياً صلاح نصر يستحق هذا الأسم أكثر لأن أفعاله رغم غبائها تسببت في إبداع فيلم الكرنك الذي خلده الشيخ صالح واحتكره ، علي الأقل فيلم الكرنك لن يمحوه مبارك ولا ابنه ولا حبيب أو حتي بطرس ومحمود محيي الدين وباقي شلة سماسرة بيع البلد .0

مع نهاية الخواطر والاستطراد الممل جداً أصل إلي حيث خطونا أخر خطوة معاً

وتتيبس قدماي رافضة التحرك ، أنظر للسيارات المندفعة التي أشعر مع تعجلها أنهم جميعاً ذاهبون لاستكمال المفاعل المنووي أو للراحة بعد يوم ملئ بالكفاح بعد أن جمعوا ما يكاد يكفي قوت يومهم وليس لقضاء سهرات صيفية إن لم تكن ذات قيمة فتأثيرها السلبي لا تخطئه عين ، أنانيتهم المفرطة في المرور بطريق لا مكان فيه للمشاة تذكرني بإعلان إشارات المرور المعبر عن عبقرية الرأسمالية في غسل العقول ..فلا توقف عن الاستهلاك وأيضا الرفاهية بدون حدود ، وإن كان الأعلان به ميزة أن حتي الاستهلاك يتطلب تشجيعاً وبالتالي تعاون أكثر ، توقفت أمامي السيارة ولم أتجاهلها هذه المرة ، ويكاد عقربا الساعة في يد السائق أن يحتضنا بعضهما في الجناح رقم 12 وأذكر تسمية صديقي لهذه اللحظة بحضن منتصف الليل
تمر محطة النزول وألمح إعلان يعلو الكوبري ونظرة الموديل تذكرني بالنظرة الأخيرة بعد النزول من المحطة ..نظرة عادية جداً قد تحمل عنوان إلي اللقاء أو أي أمل أخر ، ولكني الآن أراها عادية كالرحيل الذي اعتدته واعتادني وحتي الأصدقاء أكاد أعتاد علي أنهم مجرد أصدقاء

Take Away

هذه المرة لن أنسي هذه النظرة ..النظرة العادية ..نظرة الوداع الأخيرة ..لن أنسي لحظات كنا فيها أصدقاء مثاليين ، لن أنسي الهاجس الذي انتابني عقب هذه النظرة ..طردته سريعاً ولكنه عاد وتغلغل في أعماقي حتي أصبح واقع عمره 20 يوماً مروا كالدهر ..وأجد نفسي حائراً بين ألم الرحيل الأخير لأخر الأصدقاء الذين ظننتهم حقيقين ..وبين بصيص باهت من الأمل في أن الله قد يرد لي بعضاً مما فقد و في أنه يتركني أستمر في ما أنا فيه ولن يتركني أنفذ ما أنتويه ، وهناك في ركن أخر من نفسي أسمع ذلك الصوت المستحيل الذي يقرعني ويردد أن كرامتي لن يداويها إلا النسيان .0

وحده النسيان ؟! بهذه البساطة ؟!..وأجدني كمن رقصوا علي السلم مع الفرق أني لا أمارس أي حركة ..فقط أزداد تجمداً .تتنازعني الحيرة بين التسليم للألم وبين التعايش معه ..بين فقدان الإيمان في أخر من رحلوا أو بين التمسك بأمل زئبقي .بين الانصات للصوت المستحيل ..أو مواصلة رحلة اللاشئ

وتجاهل الحوار مع صديقي الدائم ..عقلي المتعب
أكاد أري نظرة الحيرة في عيني وأكاد أجزم أن أحداً غيري لن يفهمها

beautiful words

بسم الله الرحمن الرحيم

صدق الله العظيم

**

*

They said it's impossible to be

a Philosopher in a world of Superficials

Or to be a Moralist in a Tavern of Prostitutes

Or to be a Overwise in an Insane Nation

Or to be Yourself in a Community of Counterfeiters

Or to Show Selfless in a Jungle of Individualists

Or to be a Saint in the Hell of the Demons

Or to be Laughing , promising and

Upbeat in a Tired & Moaning Homeland .

_____

**

*

الكلام ده كنت كتبته في الانديكس المفقودة :( وافتكرته

تاني من كام يوم كده وقلت أكتبه عشان منساش تاني

مش فاكر المصدر أصلاً:( بس أنا شوهتها أصلاً

يستحيل إن تكون فيلسوف في عالم من السطحيين

أو أن تكون فاضلاً في حانة من الداعرين

أوا أن تكون حكيماً في أمة من المجانين

أو أن تكون حقيقياً في مجتمع المزيفين

أو أن تتحلي بالإيثار في غابة الأنانيين

أو أن تكون قديساً في جحيم الشياطين

أو ضاحكاً مبشراً مستبشراً في وطن أعياه الأنين

ومع اقتناعي بالكلام ده..بس أنا بعشق المستحيل أحياناً

بس شكل التحدي ده هيتأخر شوية

لو ليا عمر ..أكيد هيكون تحدي العمر

وحتى هذا الوقت استسمح نفسي إني أكون

علي الهامش في كوكب المتشاغلين

وكل سنة وأنتم طيبين ..بمناسبة الامتحانات

الفترة دي وبعد الأنيميا الاجتماعية اللي اتحطيت فيها

ولأني مش متعود علي كده أو لأني اتصدمت لأني صبرت علي الناس الغلط

ولأن رصيد الاحتمال النفسي لأي حد وأي حاجة خلص ..فمكنتش ناوي أكتب خالص ولو بعد شهر

بس صديقة عزيزة في عالم التدوين عرفت إنها مسافرة ومش عارفة هترجع امتي

وكمان مش عارف هيكون عندها مقدرة هناك تدخل علي البلوج ولا لأ

فقلت أرد علي التاج اللي بعتتهولي عشان تعرف أد إيه هيا بني أدمة طيبة وجميلة

وأكيد كل حد بيحس وبيفهم هيفتكرها لحد ما ترجع بإذن الله

عشانك بس يا ميس حاسا هرد علي التاج وأتمني تكوني بخير

_________________________

*

*

اسم مدونتك؟

هو الأسم مكتوب بخط صغير ولا إيه ..اللي عمل التاج ده مكانش نايم كويس

أو يمكن واكل فول ..ده الأسم فوق واضح في صفحة الانترنت اكسبلورار

مش هقوله بقي رخامة

لماذا اخترته..وماهي نيتك من وراء اختياره؟

أيوه هي دي الأسئلة اللي يترد عليها

بص يا سيدي امسك ماج النيسكافيه وربع علي الكنبة

ايوه هي دي اللي علي يمين باب البلوج وأنت داخل

بص يا سيدي أو يا ستي أيا كان جنس اللي حط السؤال أو اللي بيقراه

الاسم مش أنا اللي اخترته

روان اللي اختارته ..فضولك بينقح وهتقول روان مين

؟!

رغم إن الناس اللي بتيجي هنا عددها ميزيدش عن عشرة وأعتقد إن كله عارف بس هقول من تاني

روان أجمل إنسانة عرفتها وهعرفها

بس خلاص

وقبل ما ربنا يرحمها من غباء وأنانية العالم الرائع اللي عايشينه ده

كانت عملتلي البلوج ده ..كان عندي أكاونت بس هيا شجعتني علي إني أعمله

والنية أو المعني من ورا الأسم ده ..إن في كل واحد فينا الخير والشر والكلام القديم ده

وبما إن نعمة ربنا هيا العقل فأهم حاجة الواحد بيتمناها لنفسه

ده بافتراض إنه بيفهم ..إن يكون عنده عقل جميل ..وروان شافت إني ممكن أوصل للمرحلة دي

أو يمكن شافت فيا كده فعلاً وده شرف لا أدعيه بس أدعي الرغبة في الوصول ليه

وعمري ما هغيره ..لو لقيتني فشلت أقفل البلوج أفضل

هل فكرت في إغلاق مدونتك؟..والسبب؟

اه فكرت ..لما لقيتني عاجز إني أقول كل اللي أنا عايزه من خلالها

ولما لقيتني بقعد علي الكمبيوتر بال 3 ساعات ضيف تقيل علي أي من أصحابي

اللي عندهم سايبرات طبعاً..التشرد موصلش للبيوت الحمد لله

المهم ..3 ساعات بعمل فيهم كتابة مكانتش بتاخد مني نص ساعة والباقي سرحان

+ إني بفكر الفترة دي برضه أقفله لأن أقرب الناس ليا في الواقع

راحوا ..كأنهم ماتوا بالضبط

وبالتالي البلوج فضفضة من واحد مع نفسه لناس غالباً متعرفوش كويس ..فاحتمال يملوا منه قريب

وبالتالي مش هلاقي حتى الرأي اللي بدور عليه من اللي بيعلق ..+ طبعاً إن مش بقعد وقت ما بحب دايماً

وللأسف معنديش المثابرة والقوة اللي تخليني أتبني فكرة وألف بيها علي مدونات ناس معرفهاش كويس

يعني بعمل دعاية لحاجة يا تخيب يا تصيب ..وفي الأخر كله بيكسل ..فالموضوع ببصله ساعات بلاقيه مش مجدي

بس هيا بديل كويس لحالة الخرس اللي مفروضة عليا في حياتي

صورتك في المدونة..رمزيتها ؟

صورتي

هيا بالنسبة لي لحظة بتمناها ..إن بعد ما أرضي ربنا وأعمل اللي عليا في الدنيا

تبقي مكافأتي إني أقابل روان وتكون راضية عني

بس خلاص

احلى جمله قيلت لك فى وصف مدونتك؟

جملة اتقالت في تعليق ..بتقول إن الموسيقي والصورة والفراشتين

بيعيشوا الواحد في جو وهمي ..والجملة مش بليغة ولا حاجة بس أثبتتلي حاجة

إن ذوقها ورقتها هتفضل موجودة وليها اشعاعها طالما البلوج موجود وطالما في حد لسه بيحس

التعليقات بالنسبه لك ..اهميتها؟

رأي ..استفزاز إني اتكلم ..بيدفعني بعض التعليقات للتفكير

وساعات من التعليق بعرف ناس جميلة أوي وبفكر كتير أقول

ليه ميكونوش الأصدقاء في الواقع

احلى بوست كتبته ...ضع اللينك ..ثم اذكر لماذا؟

مبحبش أدي رأي إيجابي في حاجة أنا عملتها ..أنتقد ماشي لكن الاعجاب بسيبه لغيري

بس عموماً أقدر أقول إنه أكتر بوست عبرت فيه عن احساسي ناحية روان

أو ناحية أي موقف عموماً ..لأن إن الواحد معبرش صح عن رأيه أو احساسه يبقي

البلوج معمول ليه

؟!

أفضل مدونة قرأتها؟

الذاكرة المؤقتة مرتبكة دلوقتي ..ومقدرش أدعي إني أقدر أقارن بين مدونة وأخري

لكن هقول قاعدة عامة ..أفضل مدونة قريتها هيا اللي حسيت فيها بالصدق

وبالجمال ..سواء التصميم أو الكلام أو الفكرة أو حتي التعليقات ..لأن احياناً بكون في مدونة

ويجبرني الكلام علي إني متكلمش ..بحس بس ..لو لسه في إحساس أصلاً

أفضل بوست قرأته؟ وضع لينكه

للأسف مش هقدر أحط اللينك لأن أخوها قفل البلوج

وبالتالي مش هقوله ..لكن في بوستات كتيرة جميلة ..هبقي أعمل بيها ليستة في يوم

أجيب بس الجهاز وأقعد براحتي

حد قل ادبه فى التعليق..ايه رد فعلك؟

هتجاهله وأمسح تعليقه ..ولو صمم هرد عليه بخير الكلام ما قل ودل ..زاد فيها هرجع التحكم في التعليقات

وأتجاهل اللي خلفوه..لأنه ببساطة مترباش ..ومدعيش إني هربي اللي أهله والدنيا بحاله معرفتش تربيه

ربنا يهدي الجميع ومنوصلش للمرحلة دي

أسوأ مدونة؟ا

مدونة واحد فخور بمرضه ..بشذوذه الجنسي ..والمشكلة إن في ناس أعرفها وبتبان في مدوناتها ناس بتفهم

بس علي حد علمي قريبين أوي ليه ..طيب طالما إنتي قريبة منه..ليه متحاوليش تغيريه ..ولا مبسوطة بإنك بتقلدي الغرب

أنا حرة وبعمل الي أنا عايزاه وبعرف واحد شاذ جنسياً من غير ما أحسسه إنه وحش ..وعلي فكرة مش الشذوذ بس ..

تقدروا تقولوا ده اسقاط علي اللي بيكون صديق لواحد غلط وبيكدب علي نفسه لكنه بيتفرج عليه ومش بيعمل أي حاجة إيجابية وبيكون عبارة عن صديق مزيف

معاه معاه عليه عليه

أسوأ بوست..أسوأ مدون؟

اللي بيكدب ...واللي بيكون كله بجاحة وإثارة جنسية أو أي نوع من الإثارة

بغرض جذب التعليقات والاحساس بالأهمية وإنه بيناقش قضية كبيرة بقي

تدي التاج ده لمين؟

لأي حد يحب ياخده

_______________________

كلمة أخيرة ...

ميس حاسا عايز بس أقول إن تعليقياتك ومدونتك لما بقراهم بحس فعلاً

إنك اسم علي مسمي ..مش قصدي ياسمينا ..لأ قصدي الأسم اللي أنا سميتك بيه

أكتر واحدة شفتها بتستخدم كلمة بحس ومشتقاتها وبجد إنتي بني أدمة طيبة ورقيقة

وربنا يصبرك علي غربتك وتيجي بالسلامة أو علي الأقل تتكيفي مع الوضع

ويكون عندك نت عشان منتحرمش منك كتير

ربنا يكون في عونك وتروحي وتيجي بالسلامة

وشكراً أوي لكلامك وأنا عارف إنك مشغولة ولو كنتي مشغولة مكنتيش اكتفيفي بتعليقاتك

all the ppl who knew u

will miss u

Short Messages

Short message @ 23 \ 1 \ 2007 : Carefull

Hope U r not z3lan mny 100% now..

Short message @ 25 \ 1 \ 2007 :Congratulations

Congrats for U , U've finished ur exams .

Short message @ 17 \ 2 \ 2007 : Friendly

was thinking of U & i'm just checking on U .

Instant message @ 24 \ 2 \ 2007 : Pure feelings for u

U know why ?! cuze i love U ..My friend !!

Short message @ 3 \ 3 \ 2007 : Worried

r U ok ?! sms me when u turn on ur mobile .

Short message @ 18 \ 3 \ 2007 : Keep in touch

tried to call U 2day , i'll ring to U when i'm online .

Short message @ 31 \ 3 \ 2007 : Thanx

thank U & i trust U .

Short message @ 18 \ 4 \ 2007 : Not happy & Lonely

........

24 \ 4 \ 2007 : No more U ..i'll easily forget U..take it easy & do the same

28 \ 4 \ 2007 : after deep thinking...real friends wont be forgetten..so i wont forget U even if i couldn't reach U.

I have nothing to say 4 U more than...I'm very sorry .

طعم الحصرم * في الفم

بعدت الفترة اللي فاتت عن الصلاة رغم إن أول الأسبوع حصل حاجة كويسة في حياتي حمدت عليها ربنا لفظاً مش أكتر ..والنهارده الحمد لله رجعت أحسن شوية ..وحبيت أكتب حاجة قبل ما تتنسي زي اللي قبلها ..لأني بقالي 80 يوم بنسي ..

من فترة طويلة بفكر مكتبش أصلاً ...لأني محتار بين حاجات كتير عايز أقولها وبين حاجات مأثرة علي نفسيتي بتأثر

وبتخرجني عن الموضوع اللي بكتبه بس ما باليد حيلة ..

وأنا بتمشي في الشارع ..كان في واحد بيتكلم في المحمول
فبيحكي بصوت عالي أوي في تأجيل جلسة وشغل المحاميين ده
وعشان يوصل وجهة نظره فقال النكتة دي
واحد مراته طردته ..ومكانش ليه حد في الدنيا غيرها
فمش عارف يروح فين وفضل واقف علي باب الشقة
ينادي عليها متردش ..يخبط متردش ..لحد ما اتعصب أوي
فبقي كل شوية كل لما يخبط ومتردش عليه يخبط برجله صفيحة القمامة تخبط في الحيطة وتخبط فيه ..0

وهكذا فضل يكرر الموضوع ده
لغاية أما أتعور جامد أوي ..0

فقام مصرخ وقالها افتحي يا ولية
الصفيحة هتموتني ..!!00
فمنطق النكتة القديمة دي لما أفتكرته وصلني لخواطر معينة وهكتب البوست النهاردة
عشان منساش بس الموقف اللي استفدت منه أوي

*

*

*

________

**

*

لما تخرج من بيت إنت بنيته ..0

من حاجة تعبت فيها عشان تكملها للآخر

وقتها عشان ترجع ..والباب مقفول ..هتفضل تنادي ..

بس لا حياة فيمن تنادي ..هتخبط علي باب جنبه ..

هيخرجلك صاحبه بشياكة

فيقولك إنه مشغول ويقفل من تاني

وده حقه فمتقدرش تتكلم ..أكيد من حقه يحدد أولوياته

فساعتها من الحيرة تنسي أهم حاجة

اللجوء لربنا والإيمان بيه بكل جوارحك

ساعتها هتنسي وترجع للباب اللي لما اتقفل في وشك وصلك للحالة دي وتقعد تخبط ..ولما ميردش صاحبه ..0

أو يرد ببرودوبكلمتين يبينوا إنه مش مهتم بيك أصلاً وعايز يخلص منك من غير ما يتعب ضميره

وقتها هتخبط في صفيحة ذكرياتك اللي علي الباب ؟!0

أو صندوق عبارة عن خلايا مخك اللي مش بتبطل تفكير

وبحث عن مبررات لكل حاجة بتحصل..وغرق في موجات من الحيرة لوحدك تماماً مش عارف تكمل للآخر ولا تستني المجهول

حيرة بين استسلام لواقع تافه وأناني

واقع أنت متأكد من إنك مش لازم تسيبه يستغرقك..

ساعتها هتحس بطعم مر في روحك بيحاول يغطي علي الأمل

اللي تعبت عشان تزرعه جواك

وتفضل تخبط في صندوق الحيرة والذكريات..صندوق الاحتمالات

وكل ما تخبط فيه غصب عنك..0

غصب عنك لأنك لسه مش القوة

اللي تمنع بيه جنوحك للتصرف ده

يخبط ويرجع يخبط فيك تاني بقوة متزايدة ..0

ويزيد عمق الجروح ومصمم إنك لما هتعمل كده هتقدر تفتح آخر باب اتقفل في وشك

لكن في الواقع الموضوع مش متوقف علي تصرفك إنت ..0

المفروض تسلم أمرك لله

وتستني تقلبات أمزجة أصحاب الأبواب

الأبواب المقفولة ..وتروح بكل جوارحك للمكان الوحيد

اللي بابه مش هيقفل في وشك

يا تري تقدر ؟!000

ولا هتسيب طعم الحصرم يكون الطعم الوحيد في فمك ؟!00

هتفضل واقف مستسلم للصفيحة أو الصندوق اللي كل ما تخبطه يرجعلك ..يخبط فيك ؟!00

تسيبه يعمق جروحك ..تسيبه وإنت معتقد إن وحدتك

هتكون الحل لفتح أي باب إنت عايزه يفتح تاني ؟!00

في النهاية ..في اختيارين ..0

تفضل أدام الباب تجرح وتهين في روحك

أو تروح للباب الوحيد اللي مش هيتقفل في وشك وتصبر

وفي الحالتين هيفضل طعم الحصرم في فمك

_______

*

*

0* الحصرم ..كلمة عربية بترمز لأول العنب أو التمر ...يعني أول الحصاد بتاعه مبيكون لسه مش ناضج

وغالباً ما تستخدم الكلم للرمز لطعم مر

* عنوان البوست قريته في مقالة في الدستور عن رواية اسمها ( حصرم الجنة ) لأديب فلسطيني اسمه عاطف أبو سيف ..والرواية بتعبر تعبير جميل وبذكريات بسيطة عن سيطرة المرارة علي المغتربين عن بلادهم ..بداية من خبرة جدته والأجيال التالية ليها من مجتمع فلسطيني منسي في زمن جمال مبارك وهيفاء وهبي وكوندي ..مجتمع اللاجئين

المقال اللي بيحكي عن الرواية دي بالصدفة كان في جنبه مقال تاني لأحمد الخميسي

قال فيه إن الأدب ( وأنا بضيف عليها أي تعبير جميل عموماً سواء كان غناء أو سينيما أو كتابة أو شعر )

بيعيبه في المجمل إن الشخصية بطلة العمل الأدبي أو أيا كان مش بتكبر بحيث إن همها يبقي بحجم الوطن

أو المجتمع بل بالعكس

بيجرها ليصبح المجتمع أو الوطن بحجم مشكلة الفرد ..وده اللي حسيته وأنا بكتب في المدونة 00

مش عارف أخرج من شرنقة بعيب علي الناس استسلامهم ليها مع إن ربنا لو لاحظنا أغلب أحكامه وتعليماته

بتحثنا علي إننا نكون في حالة الكل

مش الفرد ..نحس بحاجات مشتركة ويكون لينا أهداف مشتركة

عموماً نرجع لمقال الأخ / أحمد الخميسي اللي قال

حاجة جميلة أوي في الآخر عجبتني أوي

مقتبسها من مسرحية بس نسيت اسمها

قد تكون قبسة النور في الغروب الشامل الذي نعيشه

هي كيفية وصفنا لهذا الغروب ..وبضيف عليه ..نظرتنا لهذا الغروب